शिक्षक सम्मान
काली शिक्षक दिवस हरय। ए मउका म राष्ट्रपति द्रौपदी मुर्मू नई दिल्ली के विज्ञान भवन म पचहत्तर शिक्षक मन ल राष्ट्रीय शिक्षक पुरस्कार दीही। ए बछर ले राष्ट्रीय शिक्षक पुरस्कार के दायरा ल बढ़ाय गेहे। एमा उच्च शिक्षा विभाग, कौशल विकास अउ उद्यमिता मंत्रालय के शिक्षक मन ल घलो शामिल करे गेहे। ए बछर पचास स्कूली अध्यापक, उच्च शिक्षा विभाग ले तेरा शिक्षक, कौशल विकास अउ उद्यमिता मंत्रालय ले बारा शिक्षक मन ल पुरस्कृत करे जाही।
छत्तीसगढ़ ले ए बछर अंबिकापुर के स्वामी आत्मानंद शासकीय अंग्रेजी माध्यम स्कूल के प्राचार्य डॅाक्टर बृजेश पांडेय ल राष्ट्रीय शिक्षक सम्मान बर चुने गेहे। राष्ट्रपति ह श्री पांडेय ल ये सम्मान दीही।
एति छत्तीसगढ़ म काली शिक्षक सम्मान समारोह के आयोजन करे जाही। राजभवन म आयोजित राज्य स्तरीय समारोह म राज्यपाल विश्वभूषण हरिचंदन प्रदेश के बावन शिक्षक मन ल सम्मानित करही। एमा ले अड़तालिस शिक्षक मन ल राज्य शिक्षक सम्मान अउ चार शिक्षक मन ल प्रदेश के महान साहित्यकार के नाम म स्मृति पुरस्कार ले सम्मानित करे जाही। समारोह म राज्य शिक्षक पुरस्कार बर चयनित शिक्षक मन ल इक्कीस-इक्कीस हजार रूपिया अउ प्रशस्ति पत्र दे जाही। संगसेंग प्रदेश के महान विभूति मनके सुरता म दे जाने वाला पुरस्कार ले सम्मानित होवइया शिक्षक मन ल पचास-पचास हजार रूपिया अउ प्रशस्ति पत्र दे जाही। समारोह के अध्यक्षता मुख्यमंत्री भूपेश बघेल करही, उंहे विशिष्ट अतिथि स्कूल शिक्षा मंत्री रविंद्र चौबे अउ संसदीय सचिव द्वारिकाधीश यादव होही।
अनुराग ठाकुर-चुनाव स्पष्टीकरण
सूचना अउ प्रसारण मंत्री अनुराग सिंह ठाकुर ह स्पष्ट करे हे कि केंद्र सरकार के समय ले पहिली लोकसभा चुनाव कराय के कोनो योजना नइ हे। एक ठिन निजी टीवी चैनल के संग साक्षात्कार म ओमन कहिन कि अवइया विधानसभा चुनाव ल आम चुनाव के संग कराय के कोनो योजना नइ हे। ओमन चुनाव बेरा ले पहिली या देरी ले होय के खबर ल मीडिया अनुमान बताके खारिज कर दीस। ओमन कहिन कि सरकार ह ’’एक राष्ट्र एक चुनाव’’ म एक समिति गठित करे हे अउ ए समिति एखर उपर हितधारक मनके संग विचार विमर्श करही।
भाजपा बैठक
भाजपा के वरिष्ठ पदाधिकारी मन ह आज रायपुर स्थित प्रदेश कार्यालय कुशाभाउ ठाकरे परिसर म जिला प्रभारी, विधानसभा प्रभारी अउ विस्तारक मनके बइठका लीन। ए बइठका म प्रदेश अध्यक्ष अरूण साव, क्षेत्रीय संगठन महामंत्री अजय जामवाल, प्रदेश सह प्रभारी नीतिन नबीन अउ संगठन महामंत्री पवन साय ह बस्तर, रायपुर, बिलासपुर अउ दुर्ग संभाग के प्रभारी मन ल जरूरी दिशा-निर्देश दीन। बइठका म अवइया कार्यक्रम के रूपरेखा घलो तय करे गीस। ए मउका म भाजपा महामंत्री विजय शर्मा, ओ.पी. चौधरी, केदार कश्यप अउ भूपेन्द्र सवन्नी उपस्थित रीहिन।
उंहे भाजपा अल्पसंख्यक मोर्चा के प्रदेश स्तरीय कार्यकर्ता सम्मेलन अवइया छै सितंबर के रायपुर म आयोजित करे जाही। अल्पसंख्यक मोर्चा के प्रदेश अध्यक्ष, शकील अहमद ह बताइन कि ए सम्मेलन म राष्ट्रीय अध्यक्ष जमाल सिद्दकी शामिल होही।
‘कंाग्रेस बैठक
प्रदेश कंाग्रेस कमेटी के चुनाव समिति के आज रायपुर म बइठका होइस। बइठका म प्रत्याशी चयन ल लेके विचार विमर्श करे गीस। बइठका के बाद मीडिया ले बातचीत करत प्रदेश प्रभारी कुमारी शैलजा ह बताइन कि कंाग्रेस के चुनाव समिति के बइठका म उपस्थित वरिष्ठ नेता अउ पदाधिकारी मन ह अपन अपन सुझाव राखीन। ओमन बताइन कि अवइया आठ सितंबर के स्क्रीनिंग कमेटी के बइठका होही। एखर बाद प्रत्याशी मनके घोषणा करे जाही।
राष्ट्रीय लोक अदालत
राष्ट्रीय विधिक सेवा प्राधिकरण डहार ले अवइया नौ सितंबर के राष्ट्रीय लोक अदालत के आयोजन करे जाही। इही कड़ी म प्रदेश के सबो जिला अउ व्यवहार न्यायालय म घलो लोक अदालत आयोजित करे जाही। ए दौरान पुराना अउ लंबा समय ले लंबित राजीनामा योग्य प्रकरण के निराकरण करे के प्रयास करे जाही।
एखर तहत मोटर दुर्घटना दावा ले संबंधित प्रकरण, चेक बांउस, जलकर, संपत्ति कर, राजस्व संबंधी, ट्रैफिक चालान, भाड़ा नियंत्रण, बैंक अउ विद्युत संबंधी प्रकरण घलो लोक अदालत के माध्यम ले निपटाय जाही। संगेसंग राजस्व न्यायालय खंडपीठ म खातेदार मनके बीच आपसी बंटवारा, दूरसंचार विभाग, नगर निगम अउ नगर पालिका परिषद म वसूली संबंधी लंबित प्रकरण के आपसी राजीनामा के आधार म निराकरण करे जाही।
मुख्यमंत्री महिला सुरक्षा
मुख्यमंत्री भूपेश बघेल ह कहिन कि राज्य सरकार माइलोगिन के सुरक्षा बर पूरा तरह ले प्रतिबद्ध हे। ओमन कहिन कि राज्य म माइलोगिन मनके खिलाफ अपराध के मामला ल गंभीरता ले ले जात हे अउ अपराधी मन उपर कड़ा कार्रवाई करे जात हे। एखर बर राज्य के थाना मन म एक महिला सेल के गठन करे गेहे अउ माइलोगिन ले जुड़े अपराध मनके स्वतंत्र जांच करे जात हे। श्री बघेल ह कहिन कि माइलोगिन मनके संरक्षण बर कानून के सख्ती ले पालन करे जात हे।
जंाजगीर शराब मौत
जांजगीर-चंापा जिला म अकलतरा क्षेत्र के परसाहीबाना गांव म आज शराब पीये ले दू झन भाई संग तीन झिन आने लोगन के मउत होगे। पुलिस ले मिले जानकारी के अनुसार मृतक मन गांव के ही एक झिन माइलोगिन ले शराब खरीदे रहिन। पुलिस माइलोगिन संग आने लोगन ले पूछताछ करत हे। जिला म पाछू तीन महीना ले तीन आने-आने घटना म शराब पीये ले आठ लोगन के मौत हो गेहे।
इही बीच घटना ले गुस्साये ग्रामीण मन ह राष्ट्रीय राजमार्ग म धरना प्रदर्शन करके यातायात ल बाधित करे के प्रयास करीन। उंहे भाजपा के कार्यकर्ता मन ह मृतक मनके घरवाले संग मुआवजा के मांग ल लेके धरना दीन। ए दउरान ओमन ह मृतक के घरवाले मन ल पचास लाख रूपिया मुआवजा अउ एक झन सदस्य ल सरकारी नौकरी देके मांग करीन। मउका म अकलतरा के एसडीएम अउ पुलिस के टीम मौजूद रीहिस। उंहे भाजपा महिला मोर्चा के जिला अध्यक्ष रजनी साहू के अगवई म कार्यकर्ता मन ह राज्य सरकार के खिलाफ नाराबाजी करके शराबबंदी के मांग करीन।
अकलतरा विधायक सौरभ सिंह ह शराब पीये ले तीन लोगन के मउत बर राज्य सरकार ल जिम्मेदार ठहराय हे। ओमन कहिन कि राज्य सरकार वादा करके घलो शराबबंदी नइ कर पात हे। एखर परिणाम सरलग आगू आवत हे।
भाजपा घेराव
भाजपा कार्यकर्ता मन ह बीरगांव नगर निगम क्षेत्र के आने आने समस्या मन ल लेके आज नगर निगम कार्यालय के घेराव करीन। ए दउरान पार्टी कार्यकर्ता अउ पदाधिकारी मन ह महापौर के खिलाफ नारेबाजी करत धरना प्रदर्शन करीन। ए धरना प्रदर्शन म बड़ संख्या म आम नागरिक घलो शामिल होइन।
एति रायपुर म घलो आने आने समस्या ल लेके भाजपा पार्षद मन ह आम मनखे मन संग नगर निगम के जोन कार्यालय दू अउ तीन के घेराव करके प्रदर्शन करीन।
गांजा बरामद
महासमुंद पुलिस ह आज एक ठिन चारपहिया वाहन ले अस्सी किलोग्राम गांजा बरामद करे हे। ए मामला म दू अंतर्राज्यीय तस्कर ल गिरप्तार करे गेहे। जब्त गांजा के कीमत लगभग बीस लाख रूपिया बताय गेहे। उंहे एक कार दू मोबाईल अउ पच्चीस सौ रूपिया के राशि घलो जब्त करे गेहे।
ओति राजनंादगंाव के पुराना बस स्टेण्ड म पुलिस ह तीन किलो गांजा के संग एक झिन आरोपी ल गिरप्तार करे हे।
कोंडागांव मिशन 95 कार्यशाला
कोंडागंाव म बोर्ड परीक्षा के परिणाम सुधारे के उद्देश्य ले ’’मिशन नाइंटी फाईव प्लस’’ कार्यशाला के आयोजन करे गीस। जामकोटपारा के स्वामी आत्मानंद उत्कृष्ट अंग्रेजी माध्यम विद्यालय म होवइया ए कार्यशाला म भौतिकी, जीव विज्ञान, गणित, अंग्रेजी, रसायन शास्त्र, वाणिज्य, अर्थशास्त्र अउ कृषि संकाय के विशेषज्ञ मनके टीम गठित करे गीस। जिला शिक्षा अधिकारी मधुलिका तिवारी ह बताइन कि मिशन नाइंटी फाइव प्लस के उद्देश्य जिला म पढ़ईया विद्यार्थी मनके शति प्रतिशत परीक्षा परिणाम के संग जादा ले जादा लईका मन ल प्राविण्य सूची म लाना हे।