राज्य सरकार ह प्रदेस के आवासहीन याने बिन घर द्वार वाले अउ कच्चा कुरिया म रहवइया स्थायी प्रतीक्षा सूची म करीबन सात लाख परिवार मन ल प्रधानमंत्री आवास योजना के चलत पक्का मकान देही। ए निर्णय काली संझा मुख्यमंत्री भूपेश बघेल के पगरइती म रईपुर के उंखर निवास कार्यालय म राखे गे मंत्री मंडल के बइठका म लेगिस।
बइठका म सामाजिक आर्थिक अउ जातिगत जनगणना बछर दू हजार ग्यारा के सर्वे सूची म सामिल होय ले छुटे रहिगे अइसन परिवार जउन बिन घर द्वार के ओखर मन बर घर दे खातिर मुख्यमंत्री ह विधानसभा म ग्रामीण आवास न्याय योजना के घोषणा करे रिहीस। ए योजना के नीति निर्धारण अउ एला लागू करे के बारे म घलो निर्णय ले गीस।
मंत्रिमंडल ह छत्तीसगढ़ लोकसेवा आयोग के राज्य सेवा परीक्षा म इन्टरव्यू या पर्सनाल्टि टेस्ट बर अब एक सौ पचास के जघा म सौ अंक राख के मंजूरी दीस। बइठका म सिविल सेवा के तइयारी करत जवान लइका मन बर राज्य सेवा परीक्षा नियम दू हजार आठ म संशोधन खातिर घलो अनुमोदन करे गीस। एमा आयोग डहार ले राज्य सेवा परीक्षा संबंधी अंतिम चयन सूची जारी करे बाद प्रारंभिक परीक्षा, अउ अंतिम चयन परिणाम के अंकसूची ल अभ्यर्थी मनके ऑनलाइन अकाउंट म दे जाही। राज्य सेवा प्रांरभिक परीक्षा के रिजल्ट के संगे परीक्षा के विज्ञापित वर्ग अउ उपवर्ग वार कटअप नंबर घलो जारी करे जाही।
एखर संगे बइठका म सासकीय अधिकारी कर्मचारी मनके हित म सीधी भर्ती के पद मन बर तीन बछर के परिवीक्षा अवधि म पहलइया तीन बछर म वेतन मान के न्यूनतम के सत्तर, अस्सी अउ नब्बे प्रतिसत स्टायपंड दे जाय के प्रावधान ल सिरोय के घलो फइसला करे गीस।
मतदाता सूची-विशेष शिविर
मतदाता सूची म नाव जोड़वाय बर आज प्रदेस के सबों मतदान केंद्र म बिसेस सिविर राखे गीस। ए सिविर के माध्यम ले मतदाता परिचय पत्र म नाव या पता गलत दर्ज होय ल सुधारे बर आवेदन दे गीस। एखर संगे लोगन मनके आधर नंबर ल मतदाता परिचय पत्र ले घलो जोड़े के काम करे गीस। प्रदेस म ए बेरा म मतदाता सूची के पुनरीक्षण काम जारी हे। जउन ह ग्यारा सितंबर तक चलही। उंहे, चार अक्टूबर के मतदाता सूची के अंतिम प्रकासन होही।
शिक्षक सम्मान
राष्ट्रपति द्रौपदी मुर्मू पांच सितम्बर के नई दिल्ली के विज्ञान भवन म पचहत्तर झिन शिक्षक मन ल राष्ट्रीय शिक्षक पुरस्कार देही। हरेक बछर पांच सितंबर के डॉक्टर सर्वपल्ली राधाकृष्णन के जयंती ल राष्ट्रीय शिक्षक दिवस के रूप म मनाय जाथे। ए बछर ले राष्ट्रीय शिक्षक पुरस्कार के दायरा ल बढ़ाय गे एमा उच्च शिक्षा विभाग, कोसल विभाग अउ उद्यमिता मंत्रालय के शिक्षक मन ल घलो सामिल करे गेहे। ए बछर पचास झिन स्कूली अध्यापक, उच्च शिक्षा विभाग ले तेरह झिन शिक्षक अउ उद्यमिता मंत्रालय ले बारह झिन शिक्षक ल पुरस्कार दे जाही।
छत्तीसगढ़ ले ए बछर अंबिकापुर के ब्रम्हपारा स्थित स्वामी आत्मानंद सासकीय अ्रंग्रेजी माध्यम स्कूल के प्रिंसिपल डॉक्टर बृजेश पाण्डेय के चयन राष्ट्रीय शिक्षक सम्मान बर होही। राष्ट्रपति ह श्री पाण्डेय ल नई दिल्ली म होवइया समारोह म ए सम्मान देही।
‘एक राष्ट्र-एक चुनाव‘
केन्द्र सरकार ह ‘एक राष्ट्र-एक चुनाव‘ के संभावना ल जाने बर आठ झिन सदस्य वाले उच्चस्तरीय समिति गठित करे हे। पूर्व राष्ट्रपति राम नाथ कोविंद समिति के पगरइत होही। गृहमंत्री अमित शाह, कांग्रेस सांसद अधीर रंजन चौधरी, राज्य सभा म विपक्ष के पूर्व नेता गुलाम नबी आजाद, पन्द्रह वित्त आयोग के पूर्व अध्यक्ष अउ कोनो-कोनो बड़का मनखे मन ल नामित करे गेहे। नवा बने समिति संविधान के व्यवस्था देस म लोकसभा, विधानसभा, नगरीय निकाय अउ पंचायत चुनाव ल ऐके संघरा कराय के सुझाव देहे।
हड़ताली कर्मचारी-निलंबित
दुरूग जिला के मुख्य चिकित्सा अउ स्वास्थ्य अधिकारी ह एस्मा लागू होय के बाद घलो अपन काम म नइ लहूटइया दू सौ छै झिन हड़ताल कर्मचारी मन ल सस्पेंड कर देहे। ओदस म बताय गे हे कि हड़ताली कर्मचारी मन ल काम म उपस्थित होय बर बीते इक्काइस अउ छब्बीस अगस्त के आदेस जारी करे गे रिहीस। तभो ए कर्मचारी मन अपन काम म उपस्थित नइ होय हे।
वन अधिकार मान्यता पत्र
वन अधिकार मान्यता प्राप्त ल लागू करे म छत्तीसगढ़ देस म पहलइया स्थान म हे। अब तक ले राज्य म पांच लाख सत्रह हजार ले जादा हितग्राही मन ल वन अधिकार मान्यता पत्र दे गेहे।
प्रधान मुख्य वन संरक्षण व्ही. श्रीनिवास राव ह बतइन कि वन अधिकार मान्यता प्राप्त असन राज्य म सामुदायिक वन अधिकार के तहत छियांलिस हजार प्रकरण मन ल मान्यता दे गेहे। जउन ह देस म सबले जादा हे। उंहें, चार हजार ले जादा सामुदायिक वन संसाधन अधिकार मान्यता पत्र दे गे हवय।
भाजयुमो-विरोध प्रदर्शन
भारतीय जनता युवा मोर्चा के कार्यकर्ता मन आज रईपुर म ‘एटीएम भरो‘ कारीकरम राख के प्रदेस सरकार के कथित भ्रष्टाचार के खिलाफ विरोध प्रदर्सन करीन। भाजयुमो के प्रदेस अध्यक्ष गोविंद गुप्ता के अगुवई म होय एक ठिन कारीकरम म सांकेतिक एटीएम बनाके विरोध जताय गीस। ए मउका म श्री गुप्ता ह किहीन कि प्रदेस के कांग्रेस सरकार जउन घोषणा पत्र के सहारे सत्ता म आइस, ओमा ले कई ठन वायदा अभी तक ले पूरा नइ होय हे, भलुक भ्रष्टाचार सरलग बाढ़त हे। केंद्रीय जांच एजेंसी के जांच म हजार करोड़ रूपिया के अवैध लेनदेन के खुलासा होय हे।
राशि गबन-गिरफ्तार
कोंडागांव जिला के मत्स्य विभाग म काम करइया सहायक ग्रेड-दू के कर्मचारी संजय गढ़पाले ल करोड़ रूपिया के सरकारी रासि ल गबन करे के आरोप म पुलिस ह गिरफ्तार करे हे। मिले जानकारी के मुताबिक मछली पालन कार्यालय म संजय गढ़पाले एकाउंटेंड के पद म काम करत रिहीस, ओखर तीर नारायणपुर के घलो उपरहा प्रभार रिहीस। पोस्टिंग दउरान ओहा कोंडागांव अउ नारायणपुर के मछली पालन विभाग के सासकीय खाता ले अपन खाता म एक करोड़ पच्चीस लाख अंठावन हजार रूपिया ले जादा के रासि के अंतरण कर ले रिहीस। एखर जानकारी मिले बाद उच्च स्तरीय जांच करे गीस। जांच म आरोप साबित होय के बाद सहायक अधिकारी के सिकायत म ओला गिरफ्तार कर ले गेहे।
प्रकृति राखी त्यौहार
जांजगीर-चांपा जिला के बहेराडीह स्थित किसान स्कूल म प्रकृति राखी तिहार मनाय गीस। ए मउका म रूख-राई मन ल राखी बांध के पर्यावरण ल बचाय के ऑरो दे गीस। कारीकरम म अतिरिक्त पुलिस अधीक्षक अनिल सोनी ह ए कारीकरम ल सहरावत किहीन कि हरेक झिन ल पर्यावरण ल बचाय बर आगू आना चाही।
अउ अब सुनव मौसम के हाल
मौसम विभाग ह अवइया चौबीस घंटा के दउरान प्रदेस के कई ठिन जघा म बिसेस रूप ले दक्षिण छत्तीसगढ़ म जोरदरहा पानी गिरे के चेतावनी दे हे।
मिले जानकारी मुताबिक उत्तरपुर बंगाल के खाड़ी अउ ओखर तीर-तखार म एक ठिन चक्रीय चक्रवात बने हुए हे। एखर असर ले अवइया चौबीस घंटा म उत्तर-पश्चिम बंगाल के खाड़ी उपर एक ठिन निम्न दाब के क्षेत्र बन सकत हे। संगे दक्षिण तटीय आंध्र प्रदेस तक एक ठिन द्रोणिका घलो बने हुए हे। मौसम विभाग ह बताय हे कि एखर प्रभाव ले प्रदेस के कई ठिन जघा म थोरकुन ले जादा बरसा या फेर गरजई-चमकई के संगे पानी गिर सकत हे। उंहे, एक-दू जघा म झमाझम बरसा अउ गॉज घलो गिरे के चेतावनी देहे।
अउ अब थोरकुन समाचार सार म-
– मुख्यमंत्री भूपेश बघेल ह परनदीन पांच सितंबर के इंदिरा गांधी कृषि विश्वविद्यालय के तहत चलइया संत विनोबा भावे कृषि महाविद्यालय अउ अनुसंधान केन्द्र, मर्रा, पाटन के नवा बने महाविद्यालय भवन, हाईटेक नर्सरी, टिश्यू कल्चर प्रयोगशाला, इम्प्लीमेंट शेड, बीज भण्डार गृह अउ कृषक विश्राम गृह के लोकार्पण करही।
अउ
– जांजगीर-चांपा पुलिस ह देसी शराब पिये ले दू झिन मनखे के मउत के मामला म एक झिन आरोपी ल गिरफ्तार करे हे।