आज दिनभर के खबर ल अपन गुरतुर छत्तीसगढ़ी भाखा म पढ़व

राष्ट्रपति द्रौपदी मुर्मू आज अपन दू दिवसीय दउरा म छत्तीसगढ़ पहुंचीन। अपन दौरा के बेरा श्रीमती मुर्मू ह रायपुर के प्रजापिता ब्रम्हकुमारी इश्वरीय विश्वविद्यालय म सकारात्मक परिवर्तन का वर्ष के राज्य स्तरीय कार्यक्रम के शुभारंभ करीन। ये मउका म राज्यपाल विश्वभूषण हरिचंदन अउ मुख्यमंत्री भूपेश बघेल मौजूद रीहिन। कार्यक्रम म बोलत राष्ट्रपति ह कहिन कि अपन आंतरिक शक्ति के विकास खातिर अपन रूचि के मुताबिक सकारात्मक काम करत रहना चाही। संगेसंग अइसन लोगन ल संग रखना चाही जउन हमला आगू बढ़े खातिर प्रेरणा देवय।
श्रीमती मुर्मू ह कहिन कि ओखर आध्यात्मिक यात्रा म ब्रम्हकुमारी संस्था के बड़ योगदान रहे हे। मानवता के कल्याण खातिर ब्रम्हकुमारी संस्था कोति ले कतकोन कार्यक्रम करे जात हे। संस्था के बहिनी अउ भाई भारत ही नही भलुक दुनिया के आने देश म घलो प्रेम सद्भाव अउ शांति के बढ़वार बर प्रयास करत हे। श्रीमती मुर्मू ह कहिन कि देश म आने आने क्षेत्र म रोजे नवा कीर्तिमान बनत हे। राष्ट्रपति ह विद्यार्थी मनले आह्वान करीन कि ओमन खुद म बदलाव लावंय। प्रतियोगिता के ये दौर म हार जीत होत रहिथे फेर लईका मन नकारात्मक प्रभाव ले दूरिहा रहंय। ओमन यहू कहिन कि टेक्नॉलाजी के ये दउर म ये जरूरी हे कि हमन इलेक्ट्रॉनिक जीनिस ले दूरिहा रहिके कुछ बेरा बीतावन। ये हमर शारीरिक अउ मानसिक विकास खातिर जरूरी हे।
कार्यक्रम म राज्यपाल विश्वभूषण हरिचंदन ह कहिन कि सकारात्मक सोच ले दुनिया के कोनो भी चुनौती के सामना करे जा सकथे। ओमन यहू कहिन कि जब कोनो समाज सकारात्मक बदलाव ल अपनाथे, त वोह अउ जादा मजबूत हो जाथे। राज्यपाल ह कहिन कि प्रधानमंत्री नरेंद्र मोदी आत्मनिर्भर भारत बर वोकल फॅार लोकल ल बढ़ावा देवत हे।

राष्ट्रपति छ.ग. प्रवास-02

राष्ट्रपति श्रीमती मुर्मू ह आज रायपुर के महंत घासीदास स्मारक संग्रहालय ल देखीन। ये दउरान ओमन छत्तीसगढ़ के पुरातात्विक ऐतिहासिक अउ जुन्ना जीनिस के संग आदिवासी संस्कृति अउ आधुनिक शिल्प ले जुड़े सामग्री के         संबंध म जानकारी लीन। राष्ट्रपति ह राजभवन परिसर म पारिजात अउ राज्यपाल ह चंपा फूल के पौधा लगाइन। रायपुर दौरा के बेरा श्रीमती मुर्मू ह गायत्री नगर के जगन्नाथ मंदिर म भगवान श्री जगन्नाथ के पूजा पाठ करत प्रदेशवासी समेत देशवासी मनके सुख-समृद्धि के कामना करीन।
ये मउका म राज्यपाल विश्वभूषण हरिचंदन अउ मुख्यमंत्री भूपेश बघेल मौजूद रीहिन। एखर पहिली राष्ट्रपति के विमानतल पहुंचे म राज्यपाल अउ मुख्यमंत्री ह पुष्पगुच्छ भेंट देके उंखर स्वागत करीन अउ विमानतल म गॉर्ड ऑफ ऑनर घलो दे गीस। राष्ट्रपति काली एक सितंबर के बिलासपुर जाही । उंहा रतनपुर म मां महामाया मंदिर के दर्शन के बाद बिलासपुर के गुरू घासीदास केंद्रीय विश्वविद्यालय म राखे गे दसवां दीक्षांत समारोह म संघरहीं। समारोह म अठाईस शोधार्थी मन ल पीएचडी के उपाधि अउ छिहत्तर विद्यार्थी मन स्वर्ण पदक ले सम्मानित करे जाही। यह कार्यक्रम विश्वविद्यालय के रजत जयंती सभागार म होही। कार्यक्रम के अगवई विश्वविद्यालय के कुलपति प्रोफेसर आलोक चक्रवाल करही।
बिलासपुर ले लहुटे के बाद राष्ट्रपति, राजभवन म विशेष संरक्षित जनजाति वर्ग के समूह संग गोठबात करही अउ काली संझा दिल्ली लहुट जाही।

संसद विशेष सत्र

संसद के विशेष सत्र अठारा ले बाईस सितंबर तक राखे जाही। सत्र म पांच बइठका होही। संसदीय कार्यमंत्री प्रहलाद जोशी ह सोशल मीडिया म आज एखर जानकारी दीन। ओमन कीहिन कि अमृतकाल के बेरा सरकार संसद म सार्थक बहस अउ गोठबात करना चाहत हे।

अमित शाह छ.ग. प्रवास

भारतीय जनता पार्टी राज्य के कांग्रेस सरकार के खिलाफ परनदीन दू सितंबर के आरोप पत्र पेश करही। रायपुर के पंडित दीनदयाल ऑडिटोरियम म राखे गे कार्यक्रम म केंद्रीय गृह अउ सहकारिता मंत्री अमित शाह ये आरोप पत्र पेश करही। श्री शाह काली ले दू दिन के दउरा म छत्तीसगढ़ आवत हे। ये दउरान ओमन भाजपा प्रदेश कार्यालय कुशाभाउ ठाकरे परिसर पहुंचके पार्टी पदाधिकारी मनके बइठका लीही।
उंहे श्री शाह दू सितंबर के सराईपाली के अर्जुन्दा गांव म जनजाति समाज कोति ले राखे गे अभिनंदन कार्यक्रम म शामिल होही।

मतदाता सूची-विशेष शिविर

मतदाता सूची म नाम जुड़वाय बर दू अउ तीन सितंबर के प्रदेस के जम्मों मतदान केन्द्र मन म बिसेस सिविर लगाय जाही, जउन लोगन मनके नाम मतदाता सूची म दर्ज नइ हे, ओमन अपन आवेदन ए सिविर म जमा करा सकत हे। संगेसंग जउन मतदाता मनके नाम या पता गलत दर्ज होय हे, ओमा घलो सुधार करे जाही। एखर अलावा लोगन के आधार नंबर ल मतदाता परिचय पत्र म घलो जोड़े जाही। प्रदेस म मतदाता सूची के पुनरीक्षण कार्य ग्यारह सितंबर तक चलही। उहें, चार अक्टूबर ल मतदाता सूची के आखिरी प्रकासन होही।

विश्व संस्कृत दिवस

आज विश्व संस्कृत दिवस हे। प्रधानमंत्री नरेंद्र मोदी ह संस्कृत भाषा ले मया करइया लोगन के सराहना करीन हे। सोशल मीडिया पोस्ट म प्रधानमंत्री ह कहिन कि भारत के संस्कृत संग विशेष संबंध हे। ओमन लोगन ले अपील करीन कि ये समृद्ध भाषा के सम्मान करय अउ संस्कृत म कम से कम एक वाक्य जरूर साझा करंय। प्रधानमंत्री ह खुद सोशल मीडिया पोस्ट म संस्कृत म एक वाक्य साझा करीन। विश्व संस्कृत दिवस बर ये भाषा बर जागरूकता  लाये खातिर मनाये जाथे। जेमा प्राचीन विद्वान, ऋषी मुनी मन धर्म अउ दर्शन के कतकोन सम्मानीय ग्रंथ लिखे हे।

ट्रेन परिचालन

दक्षिण पूर्व मध्य रेलवे बिलासपुर मंडल के तहत शहडोल-रूपोंद सेक्शन म नॉन इंटरलॉकिंग के काम होवत हे। जेखर सेती दस सितंबर तक छै ट्रेन रद्द रीही । एमा रीवा-बिलासपुर एक्सप्रेस, भोपाल-बिलासपुर एक्सप्रेस अउ रीवा-चिरमिरी एक्सप्रेस शामिल हे ।

पर्वतारोही प्रशिक्षण विद्यार्थी रवाना

प्रदेश के एकलव्य आदर्श आवासीय विद्यालय के पांच झिन विद्यार्थी मन के चयन हिमाचल प्रदेश के मनाली म पर्वतारोही प्रशिक्षण अभियान बर होय हे। ए सबो विद्यार्थी मनाली बर रवाना होगे हे। एमा कांकेर जिला के अंतागढ़ विद्यालय के कीर्तन पद्माकर अउ हिमालय, नारायणपुर जिला के ओरछा विद्यालय के मासोराम, सूरजपुर जिला के शिवप्रसाद नगर विद्यालय के विकास पैकरा अउ राजनांदगांव जिला के पेण्ड्री विद्यालय के छात्र सुरेन्द्र शामिल हे।
केंद्रीय जनजाति कार्य मंत्रालय कोति ले राखे गे ये पर्वतारोही प्रशिक्षण अभियान काली ले शुरू होके छब्बीस सितंबर तक चलही।

मौसम

प्रदेश म चार सितंबर ले एक घांव फेर बने बरसा होय के संभावना बनत हे। मौसम विभाग के मुताबिक उपरी हवा के चक्रवाती घेरा उत्तर पूर्व बंगाल के खाड़ी उपर बने हे। एखर प्रभाव ले अवइया चौबीस घंटा म प्रदेश के कुछएक जगा म हल्का ले मध्यम बरसा होय अउ गरज चमक संग छींटा बौछार पड़े के संभावना हवय। उंहे कहूं कहूं गाज गिरे के चेतावनी दे गेहे।