प्रधानमंत्री नरेंद्र मोदी ह आज वीडियो कॉन्फ्रेसिंग ले इंक्यावन हजार ले जादा नवा नियुक्त कर्मचारी मन ल नियुक्ति पत्र दीन। आठवंा रोजगार मेला के आयेाजन देशभर म पैंतालिस ठन आने-आने जगा म करे गीस। ये रोजगार मेला ले गृह मंत्रालय ह केंद्रीय सशस्त्र पुलिस बल, नार्काेटिक्स कंट्रोल ब्यूरो अउ दिल्ली पुलिस म कर्मचारी मनके भर्ती करीन। प्रधानमंत्री ह नवा नियुक्त कर्मचारी मनल अमृत रक्षक बतात कीहिन कि ओमन सिरिफ देश के सेवा नइ भलुक देश अउ देशवासी मनके रक्षा करही।
श्री मोदी ह कीहिन कि हमन युवा मन बर नवा रद्दा खोले खातिर अर्धसैनिक बलके भर्ती प्रक्रिया म बदलावा करे गेहे। प्रधानमंत्री ह कहिन कि ये बखत रोजगार मेला अइसन बेरा म राखे गेहे जब देश गौरव अउ आत्मविश्वास ले भरे हे। हमर चंद्रयान अउ ओखर रोवर प्रज्ञान चंद्रमा ले सरलग ऐतिहासिक फोटू भेजत हे। ओमन कीहिन कि ये प्रतिष्ठित क्षण म नवा नियुक्त कर्मचारी अपन जीवन के सबले महत्वपूर्ण यात्रा शुरू करइया हे। देश के विकास यात्रा ल बतात प्रधानमंत्री ह कहीन कि भारत ह अब दुनिया के सबले तेजी ले बाढ़त अर्थव्यवस्था हे, जउन ये दशक म विश्व के तीन सबले बड़े अर्थव्यवस्था म शामिल हो जाही। श्री मोदी ह फार्मा, ऑटोमोबाईल, खाद्य प्रसंस्करण अउ पर्यटन क्षेत्र म मौजूद मउका ल बतात ओमन कीहिन कि ये क्षेत्र के बढ़वार ले अवइया बछर म रोजगार के कतकोन अवसर मिलही। सरकार ह पाछू नौ बछर म बुनियादी ढांचा के विकास म तीस लाख करोड़ रूपिया ले जादा खरच करे हे। जेखर ले देशभर म संपर्क सुविधा के तेजी ले बढ़वार होवत हे अउ आने आने क्षेत्र म रोजगार के मउका मिलत हे।
प्रधानमंत्री रोजगार मेला 02
एति छत्तीसगढ़ म सीआरपीएफ कोति ले आज रायपुर के तीर आरंग क्षेत्र के भिलाई गांव के अपने ग्रुप केंद्र म रोजगार मेला लगाय गीस। ये बेरा म केंद्रीय राज्य मंत्री रेणुका सिंह सरूता ह चुने गे तीन सौ तैंतीस अभ्यर्थी मन ल नियुक्ति पत्र दी। ये मउका म श्रीमती सिंह ह कहिन कि प्रधानमंत्री के रोजगार सृजन ल सबले पहिली प्राथमिकता देके प्रतिबद्धता ल पूरा करे के दिशा म रोजगार मेला एक ऐतिहासिक कदम हवय। ओमन यहू कहिन कि रोजगार मेला भविष्य म रोजगार तैयार करे अउ युवा मन ल ओखर सशक्तिकरण अउ राष्ट्रीय विकास म भागीदारी खातिर मउका दीही।
ये बेरा म रायपुर के सांसद सुनील सोनी, सीआरपीएफ छत्तीसगढ़ सेक्टर के महानिरीक्षक साकेत कुमार सिंह अउ केंद्रीय रिजर्व पुलिस बल ग्रुप केंद्र आरंग के पुलिस उप महानिरीक्षक बलराम बेहेरा मौजूद रीहिन।
पीएम-जनधन योजना
प्रधानमंत्री जनधन योजना के आज नौ बछर पूरा होगे। ये मउका म प्रधानमंत्री ह कहिन कि नौ बछर पहिली शुरू करे गे जनधन योजना म अब तक पचास करोड़ ले जादा खाता खोले गेहे, जउन नागरिक मनके आर्थिक सशक्तिकरण के साधन बन गेहे।
उंहे केंद्रीय वित्तमंत्री निर्मला सीतारमण ह कीहिन कि प्रधानमंत्री जनधन योजना के सेती होय डिजिटल बदलाव ले देश म वित्तीय समावेशन म कं्राति आय हे ।
खबर के मुताबिक ये योजना के शुरूआत प्रधानमंत्री के अगवई म अठाईस अगस्त दू हजार चौदा म करे गे रीहिस। वित्त मंत्रालय के मुताबिक ये योजना के शुभारंभ के बाद पचास करोड़ ले जादा नवा बैंक खाता खोले गेहे। एमा करीबन छप्पन प्रतिशत खाता धारक माइलोगिन हे।
मुख्यमंत्री ओबीसी महासम्मेलन
मुख्यमंत्री भूपेश बघेल ह कहिन हे कि राज्य सरकार जम्मों वर्ग के संग आने पिछड़ा वर्ग के विकास खातिर यथासंभव प्रयास करत हे। ओमन कीहिन कि राज्य सरकार ह अनुसूचित जाति अउ अनुसूचित जनजाति के पढ़ईया लईका मन असन प्रदेश के संभागीय अउ जिला मुख्यालय म आने पिछड़ा वर्ग के विद्यार्थी मन बर छात्रावास शुरू करे के फैसला ले गेहे। मुख्यमंत्री काली रायपुर के रावणभाटा मैदान म राखे गे ओबीसी महासम्मेलन म बोलत रीहिन।
दैनिक वेतनभोगी-वेतन
राज्य सरकार ह दैनिक वेतनभोगी कर्मचारी मनके मासिक वेतन म चार हजार रूपिया के बढ़वार करे हे। ये संबंध म वित्त विभाग ह आदेश जारी कर देहे। जारी आदेश के मुताबिक शासकीय विभाग म काम करइया अकुशल, अर्धकुशल अउ उच्च कुशलदर के कर्मचारी मन ल बाढ़े रकम पाछू एक अगस्त ले दे जाही।
सांसद धरना
लोकसभा सांसद सुनील सोनी संग आज रायपुर के तीर बीरगांव के एक शैक्षणिक संस्थान म कंाग्रेस कार्यकर्ता मन कोति ले कथित रूप ले दुर्व्यवहार करे के खबर हवय।
मिले जानकारी के मुताबिक आजादी के अमृतकाल के मउका म चंद्रयान तीन मिशन के सफलता ल लेके आज बीरगांव के शैक्षणिक संस्थान म कार्यक्रम राखे गे रीहिस। इही बेरा म कथित रूप ले कंाग्रेस कार्यकर्ता मन कोति ले श्री सोनी संग दुर्व्यवहार करे गीस। घटना ल लेके सांसद श्री सोनी ह बीरगांव के गाजीनगर म धरना दीन। एखर बाद भाजपा के रायपुर शहर जिला अध्यक्ष जयंती पटेल के अगवई म भाजपा कार्यकर्ता मन ह खमतराई थाना के घेराव करीन।
अंतर्राज्यीय समन्वय बैठक
प्रदेश म अवइया विधानसभा चुनई ल देखत आज जिला मुख्यालय कोंडागांव म अंतर्राज्यीय समन्वय बइठका राखे गीस। बइठका म कोंडागांव अउ जिला के सीमा ले लगे ओड़िशा के नवरंगपुर जिला के अतिरिक्त पुलिस अधीक्षक स्तर के अधिकारी शामिल होइन।
ये दउरान दूनो राज्य के बीच आपसी मदद के संगेसंग नशीला पदार्थ के तस्करी ल रोके, चोरी अउ अंतर्राज्यीय स्थायी वारंट शामिल करे, अपराध के रोकथाम म सहयोग करे जइसन मुद्दा म गोठबात करे गीस। बइठका म छत्तीसगढ़ अउ ओड़िशा म ग्यारा-ग्यारा नवा चेकपोस्ट लगाय सूचना के आदान-प्रदान बर दूनो राज्य के अधिकारी मनके वाट्सअप ग्रुप बनाय म सहमति बनीस।
विस-चुनाव दल गठन
राजनंादगंाव जिला म अवइया विधानसभा चुनई ल देखत निर्वाचन व्यय अनुविक्षण बर विधानसभावार सहायक व्यय प्रेक्षक अउ लेखादल के गठन करे गेहे। उंहे वीडियो निगरानी अउ वीडियो अवलोकन टीम बनाय गेहे। ए सबो टीम रिटर्निंग अधिकारी के कार्यक्षेत्र म अपन-अपन काम करही।
माओवादी मुठभेड़-गिरप्तार
धमतरी जिला म पाछू रतिहा होय मुठभेड़ म एक माओवादी के मारे जाय के खबर हे। जिला के अतिरिक्त पुलिस अधीक्षक मधुलिका सिंह ह बताइन कि जिला पुलिस बल के टीम तलाशी अभियान म निकले रीहिस । इही दउरान नगरी ब्लॉक के कारीपानी के जंगल म पहिली ले घात लगाये बइठे माओवादी मन ह पुलिस उपर फायरिंग शुरू कर दीन। जवान मन ह जवाबी कार्रवाई करीन। करीबन एक घंटा तक चले मुठभेड़ के बाद माओवादी जंगल कोति भाग गे। पुलिस ह ये मुठभेड़ म एक माओवादी के मारे जाय के दावा करे हे।
ओति दंतेवाड़ा पुलिस ह सर्चिंग के बेरा अरनपुर क्षेत्र ले एक माओवादी ल गिरप्तार करे हे। ओखर तीर ले अस्सी नग तीर बम, डेटोनेटर समेत आने माओवादी जीनिस बरामद करे गेहे। पुलिस ह माओवादी ल जेल भेज देहे।
मौसम
प्रदेश म अइवया चौबीस घंटा के दौरान बस्तर संभाग अउ एखर ले लगे जिला म हल्का ले मध्यम बरसा होय या फेर गरज चमक संग छींटा बौछार पड़े के संभावना हवय।
मौसम विभाग के मुताबिक एक द्रोणिका हिमालय के तराई म स्थित हे जेखर ले प्रदेश म अभी मानसून के गतिविधि रूक गेहे। तापमान म कोनो विशेष फेर-बदल होय के संभावना नइ हे।
संजय पिल्ले-संविदा नियुक्ति
राज्य सरकार ह सेवानिवृत्त आईपीएस अधिकारी संजय पिल्ले ल संविदा नियुक्ति दे देहे। ये संबंध म मंत्रालय ले आदेश जारी कर दे गेहे। ओमन ल जेल अउ सुधारात्मक सेवा के डीजी बनाय गेहे। खबर के मुताबिक श्री पिल्ले उन्नीस सौ अठ्यासी बैच के आईपीएस अधिकारी हवय। संविदा नियुक्ति पवईया राज्य के ये दूसर आईपीएस हे। एखर पहिली राज्य सरकार ह इही बछर सेवानिवृत्त होय पूर्व डीजीपी डी.एम. अवस्थी ल घलो संविदा नियुक्ति देहे। ओमन ल पुलिस मुख्यालय म ओएसडी बनात एसीबी ईओडब्लू के जिम्मेवारी दे गेहे।