अवइया विधानसभा चुनई ल देखत मतदाता मन ल वोट डारे बर जागरूक करे खातिर अवइया छब्बीस अगस्त के रायपुर के तेलीबांधा के मरीन ड्राइव म वाकेथॉन के आयोजन करे जाही। ए दउरान अठारा बछर या ओखर ले जादा उमर के जम्मों लोगन मन ल मतदाता सूची म अपन नाम जुड़वाये बर प्रेरित करे जाही। दौड़ेगा रायपुर वोट करेगा रायपुर – थीम म आधारित ये वाकेथॉन म जम्मों वर्ग के लोगन संघरही। जिला निर्वाचन अधिकारी डॅाक्टर सर्वेश्वर भूरे ह ये वाकेथॅान म जादा ले जादा लोगन मन ल शामिल करे के अपील करीन हे।
एति स्वीप कार्यक्रम म राजनांदगंाव जिला के गांव अर्जुनी म मतदाता सूची म नाम जुड़वइया नववधु ल सम्मानित करे गीस। जिला म मतदाता मन ल जागरूक करे खातिर रंगोली अउ मेहंदी प्रतियोगिता के संग कतकोन कार्यक्रम राखे जात हे अउ कलेक्टर ह लोगन ले मतदाता सूची म नाम जुड़वाय के अपील करीन हे।
निर्वाचन आयोग दौरा
प्रदेश म अवइया विधानसभा चुनई के तैयारी के समीक्षा बर मुख्य निर्वाचन आयुक्त राजीव कुमार के अगवई म भारत निर्वाचन आयोग के दल रायपुर पहुंच गेहे। ए टीम म निर्वाचन आयुक्त अनूप चंद्र पांडेय अउ अरूण गोयल शामिल हे। अपन तीन दिन के प्रवास के पहिली दिन आज ए दल ह राजनीतिक दल मनके प्रतिनिधि अउ बड़का अधिकारी मन संग बइठका करीन। एखर संगेसंग निर्वाचन आयोग के ये दल आने आने इंफोर्समेंट एजेंसी के बड़का अधिकारी मन संग बइठका करत हे।
निर्वाचन आयोग के दल काली पच्चीस अगस्त के प्रदेश के आने आने जिला के कलेक्टर, पुलिस अधीक्षक के संगेसंग बड़का अधिकारी मनके बइठका लेके चुनावी तैयारी के समीक्षा करही। एखरे संग निर्वाचन आयोग प्रदेश म मतदाता जागरूकता बर चलाये जात स्वीप कार्यक्रम के घलो समीक्षा करहीं।
कंाग्रेस
कंाग्रेस हाइकमान ह छत्त्ीसगढ़ प्रदेश कंाग्रेस कमिटी बर महासचिव मन संग सचिव अउ कार्य समिति के घोषणा कर देहे। पार्टी कोति ले तेइस महासचिव अउ एक सौ चालीस सचिव नियुक्त करे गेहे।
पार्टी के महासचिव के सी वेणुगोपाल ह आज जारी सूची के मुताबिक प्रदेश कार्य समिति ह सात झनके नियुक्ति करे हे। एमा लालजी चंद्रवंशी, श्रीमती शकुन डहरिया श्रीमती गंगा पोटाई, डॅाक्टर शिव नेताम, सुरेंद्र प्रताप जायसवाल, विष्णु यादव अउ भोलाराम साहू के नाम शामिल हे।
प्रदेश कंाग्रेस अध्यक्ष, मुख्यमंत्री के संगेसंग पूर्व प्रदेश कांग्रेस अध्यक्ष, पूर्व मुख्यमंत्री, कांग्रेस दल के पूर्व नेता, उपाध्यक्ष अउ सबो महासचिव प्रदेश कंाग्रेस कार्य समिति के पदेन सदस्य होहीं।
कंाग्रेस बैठक
कंाग्रेस के प्रदेश प्रभारी कुमारी शैलजा आज राजनांदगांव जिला के दौरा म रीहिन। ये दउरान ओमन सर्किट हाउस म कांग्रेस के पदाधिकारी अउ जन प्रतिनिधि ले भेंट करीन। ओमन संगठन म रहिके टिकिट के दावेदारी करइया लोगन के संबंध म जानकारी लीन। खबर के मुताबिक राजनांदगांव क्षेत्र म आठ विधानसभा सीट म इच्छुक कांग्रेसी उम्मीदवार मन ह अपन दावेदारी करे हे।
माओवादी सामग्री बरामद
सुकमा जिला म सुरक्षा बल ह विस्फोटक समेत बड़ मात्रा म माओवादी जीनिस बरामद करे हे। जिला के पुलिस अधीक्षक किरण चव्हाण ह बताइन कि माओवादी मनके मौजूदगी के सूचना मिले म डीआरजी, बस्तर फाईटर्स अउ कोबरा बटालियन के संयुक्त टीम सर्चिंग बर रवाना करे गे रीहिस। इही दउरान सुरक्षा बल ह कोराजगुड़ा क्षेत्र ले माओवादी जीनिस बरामद करीन हे।
पीआईबी पत्रकार वार्तालाप
पत्र सूचना कार्यालय रायपुर कोति ले आज कोंडागांव जिला म पत्रकार मन बर वार्तालाप कार्यक्रम राखे गीस। कार्यक्रम के शुरूआत जिला पंचायत के मुख्य कार्यपालन अधिकारी प्रेमप्रकाश शर्मा ह करीन। ए बेरा म ओमन पत्रकार मनले आने आने विषय म गोठबात करीन।
कार्यक्रम म पत्र सूचना कार्यालय के डिप्टी डॉयरेक्टर रमेश जयभाय ह पत्रकार मनल केंद्र सरकार के योजना के जानकारी दीन। संगेसंग ओमन पीआईबी कोति ले दे जात सुविधा के घलो जानकारी दीन।
राष्ट्रीय पाठ्यक्रम रूपरेखा
केंद्रीय शिक्षामंत्री धर्मेन्द्र प्रधान ह काली नई दिल्ली म स्कूल शिक्षा बर राष्ट्रीय पाठ्यक्रम के रूपरेखा जारी कर दीन। ये राष्ट्रीय शिक्षा नीति दू हजार बीस के कार्यान्वयन बर महत्वपूर्ण अउ परिवर्तनकारी कदम हवय। बोर्ड परीक्षा अब बछर म दू घांव होही। जेमा पढ़ईया लईका मन ल अपन सबले बने स्कोर बनाये राखे के मउका मिलही। अइसन करे म एक घांव के वार्षिक परीक्षा ले विद्यार्थी मन ल होवइया तनाव कमती करे म मदद मिलही।
मुख्य न्यायाधीश निरिक्षण
छत्तीसगढ़ उच्च न्यायालय के मुख्य न्यायाधीश रमेश सिन्हा ह भाटापारा के व्यवहार न्यायालय अउ बलौदा बजार के जिला सत्र न्यायालय के निरीक्षण करीन। ओमन ह भाटापारा न्यायाल य परिसर म साफ सफई के बने बेवस्था राखे के निर्देश दीन। ये दउरान प्रशासनिक अधिकारी मन ह बताइन कि व्यवहार न्यायालय के नवा भवन बर करीबन छै एकड़ भुंइया दे गेहे। जेमा छै ठिन नवा कोर्ट रूम बनाय जाही। मुख्य न्यायाधीश श्री सिन्हा ह बलौदा बजार के जिला अउ सत्र न्यायालय के निरीक्षण करीन। ये दउरान ओमन साफ सफई, गाड़ी राख्ेा के बेवस्था के संग अधिवक्ता मनके बइठे के बेवस्था देखीन।
पशु विशेष अभियान
मवेशी मन ल रद्दा म आय ले रोके बर प्रदेश भर म अठाईस अगस्त ले तीन सितंबर तक बिशेष अभियान चलाये जाही। ए संबंध म मुख्य सचिव अमिताभ जैन ह कमिश्नर अउ कलेक्टर मनके वर्चुअल बइठका लीन। बइठका म श्री जैन ह कहिन कि रद्दा म मवेशी मनले होवइया दुर्घटना ल रोके खातिर अधिकारी सड़क म पहुंच के निरीक्षण करंय। ओमन कीहिन कि सड़क म मवेशी मनके होय के शिकायत मिले म ओखर निराकरण खातिर प्रयास करंय। ओमन पशुपालक ले अपील करीन कि अपन मवेशी मन ल रद्दा म झन छोड़यं।
मुख्यमंत्री अपील
मुख्यमंत्री भूपेश बघेल ह लोगन ले अपील करीन हे कि ओमन ह एसो रक्षाबंधन म स्व सहायता समूह के बहिनी मन कोति ले तियार करे गे राखी ल ही बउरे। ओमन ह ट्वीट करत कीहिन कि जब कोई बहिनी अपन भाई के कलाई म राखी बांधही, त दूर बइठे दूसर बहिनी ह घलो खुश हो जाही। श्री बघेल ह कहिन कि रक्षाबंधन के तिहार हर भाई बहिनी बर बहुत खास होथे।
आकाशीय बिजली मौत
कोरबा जिला म गाज गिरे ले छै झिन झुलस गे, जेमा एक मनखे के मउत होगे हे। खबर के मुताबिक दर्री थाना के नवागांव झाबुआ क्षेत्र म एके परिवार के छै झिन खेत म काम करत रीहिन, इही बेरा गाज गिरगे। एमा जम्मों झन ओखर चपेट म आगे। गंभीर रूप ले घायल पांच झिन ल इलाज खातिर तीर के अस्पताल म भर्ती कराय गेहे।
पर्यवेक्षक भर्ती परीक्षा
व्यावसायिक परीक्षा मंडल कोति ले महिला अउ बाल विकास विभाग ह पर्यवेक्षक मनके भर्ती बर अवइया सत्ताईस अगस्त के दू पाली म परीक्षा ले जाही। एखर बर रायपुर जिला म पंचानवे ठिन परीक्षा केंद्र बनाय गेहे, जेमा सैंतीस हजार ले जादा परीक्षार्थी शामिल होही। परीक्षा के संबंध म अउ जादा जानकारी बर टेलिफोन नंबर – शून्य सात सात एक – दू चार एक तीन दू तीन तीन तीन म जानकारी ले जा सकत हे।
उंहे नर्सिंग कॉलेज म भर्ती बर अवइया सत्ताईस अगस्त तक ऑनलाईन अर्जी दे जा सकत हे। चिकित्सा शिक्षा विभाग कोति ले मिले अर्जी ले बीएससी नर्सिंग, एमएसएसी नर्सिंग, पोस्ट बेसिक बीएससी नर्सिंग अउ पोस्ट बेसिक डिप्लोमा इन सायकेट्रिक नर्सिंग पाठ्यक्रम म भर्ती दे जाही।
ट्रेन पत्थरबाजी कार्रवाई
ट्रेन म पत्थरबाजी करइया लोगन के खिलाफ रेलवे प्रशासन कोति ले अब सोझे कार्रवाई करे जाही। ए संबंध म रेलवे सुरक्षा बल के अधिकारी पटरी तीर रहइया लोगन ल जागरूक करत हे। एखर पहिली दुर्ग सेक्शन के रसमढ़ा, प्रेमनगर अउ उरला म पत्थरबाजी के घटना हो चुके हे। ए मामला म करीबन अठारा झन ल गिरप्तार करके न्यायालय म पेश करे गे रीहिस।
खबर के मुताबिक वंदे भारत ट्रेन म कतकोन जगा म पत्थरबाजी के घटना होय हे। अइसन म ये ट्रेन के कोच मन म कैमरा लगाय जात हे। जेखर ले असामाजिक लोगन मनके खिलाफ कार्रवाई करे जाही।