अभी मिले खबर के मुताबिक देश के तीसर चंद्र मिशन चंद्रयान तीन ह सफलतापूर्व चंद्रमा म लैंडिंग कर लेहे। चंद्रयान के चंद्रमा के सतह म उतरना एक ऐतिहासिक मउका रीहिस। संगेसंग भारत के दक्षिणी ध्रुव के निकट यान उतरने वाला विश्व के पहिली देश बन गेहे। उंहे चंद्रमा के सतह म साफ्ॅट लैंडिंग करइया ये ह चौथा देश हरय।
ए मउका म राष्ट्र के नाम दे अपन संदेश म प्रधानमंत्री नरेंद्र मोदी ह वैज्ञानिक मन ल बधाई देत कहिन कि यह अविस्मरणीय क्षण हे । यह क्षण विकसित भारत के हे। ये क्षण मुश्किल के महासागर ल पार करे के हे। प्रधानमंत्री ह कीहिन कि यह क्षण भारत म नवा उर्जा अउ क्षमता के हे। आज हम अंतरिक्ष म नवा भारत के नवा उड़ान के साक्षी बने हन।
एथलेटिक्स प्रतियोगिता
रायबरेली म होवत अखिल भारतीय अंतर रेलवे एथलेटिक्स चैंपियनशिप म दक्षिण पूर्व मध्य रेलवे, बिलासपुर के खिलाड़ी रवि ह हैमर थ्रो म स्वर्ण पदक जीते हे। बिलासपुर मंडल के कमर्शियल विभाग म टी.सी.सी.सी. रवि ल ओखर ए उपलब्धि बर दक्षिण पूर्व मध्य रेलवे के महा प्रबंधक अउ आने अधिकारी मन ह शुभकामना दीन हे।
मुख्यमंत्री घोषणा
मुख्यमंत्री भूपेश बघेल ह आज अपन जनमदिन के मउका म श्रमिक मनके हित म दू ठिन महत्वपूर्ण घोषणा करे हे। एमा मुख्यमंत्री निर्माण श्रमिक आवास सहायता योजना के राशि पच्चीस हजार रूपिया ले बढ़ाके एक लाख रूपिया कर देहे । उंहे राज्य के बस्तर, सरगुजा, जांजगीर-चांपा, बलौदाबाजार अउ राजनांदगांव के श्रम पदाधिकारी कार्यालय के उन्नयन, सहायक श्रम आयुक्त कार्यालय के रूप म करे गेहे।
मुख्यमंत्री भूपेश बघेल ह आज रायपुर के कलेक्ट्रेट कार्यालय के आगू बीपीओ सेंटर के शुभारंभ करीन। मल्टीलेवल पार्किंग के पांचवा अउ छठवां माला म बने ए बीपीओ सेंटर ल लगभग दस करोड़ रूपिया के लागत ले बनाय गेहे।
जनमदिन के मउका म आज रायपुर के अंबेडकर चौक ले शहीद भगत सिंह चौक तक स्वागत रैली निकाले गीस। जिहां मुख्यमंत्री के लेगन मन ह अभिनदंन करीन।
पूर्व कलेक्टर नीलकंठ टेकाम ह आज भारतीय जनता पार्टी के सदस्यता लीन। रायपुर म भाजपा के प्रदेश प्रभारी ओम माथुर, प्रदेश अध्यक्ष अरूण साव अउ पूर्व मुख्यमंत्री डॅाक्टर रमन सिंह के उपस्थिति म श्री टेकाम ह भाजपा म प्रवेश करीन। ए मउका म पूर्व नेता प्रतिपक्ष धरमलाल कौशिक, महामंत्री केदार कश्यप अउ बस्तर प्रभारी संतोष पांडे ह मौजूद रीहिन।
मुख्य न्यायाधीश निरिक्षण
ट्रेन परिचालन
दक्षिण पूर्व मध्य रेलवे के बिलासपुर-नागपुर सेक्शन म इंटरलाकिंग के काम पच्चीस अगस्त ले शुरू होही। एला देखत हुए छब्बीस अगस्त तक अठारा घंटा के ब्लॉक रीही अउ ए बेरा म रायपुर अउ दुर्ग के बीच चलइया पंद्रह ठिन लोकल अउ पैसेंजर ट्रेन के परिचालन ह प्रभावित होही। एमा रायपुर-दुर्ग मेमू अउ अंतागढ़-रायपुर मेमू ट्रेन शामिल हरय। उंहे रायपुर-इतवारी पैंसेजर ट्रेन दू दिन तक रद्द रीही। ए बेरा म रायपुर-डोंगरगढ़ पैंसेंजर ट्रेन रायपुर अउ दुर्ग के बीच अउ झारसुगुड़ा-गोंदिया पैसेंजर ट्रेन बिलासपुर अउ गोंदिया के बीच नइ चलही।
सिद्धार्थनाथ सिंह-दायित्व
उत्तर प्रदेश के पूर्व मंत्री सिद्धार्थनाथ सिंह ह भाजपा केंद्रीय नेतृत्व ह अवइया विधानसभा चुनई ल देखत हुए छत्तीसगढ़ मीडिया अउ प्रचार प्रसार विभाग के प्रभारी बनाय हे। ए जिम्मेदारी मिले के बाद श्री सिंह ह रायपुर के भाजपा के प्रदेश कार्यालय म मीडिया विभाग के पदाधिकारी अउ सदस्य मनके संग एक ठिन बइठका लीन, जेमा चुनई ल लेके मीडिया प्रभाग के काम उपर गोठबात होइस।
मतदाता जागरूकता-एमओयू
अवइया विधानसभा चुनई म रायपुर जिला के सबो सात ठिन विधानसभा म मतदान प्रतिशत बढ़ाय बर जिला प्रशासन ह पूरा कोसिस करत हे। एखर चलत आज जिला निर्वाचन कार्यालय अउ रायपुर चेंबर ऑफ कॉमर्स के बीच मतदाता जागरूकता बर एमओयू होइस।
एखर चलत चेंबर ऑफ कॉमर्स जागरूकता अभियान चलाके सबो व्यापारी सदस्य, उंखर संस्थान-दुकान म काम करइया लोगन, श्रमिक अउ उंखर घरवाले मन ल अवइया चुनई म मतदान बर प्रेरित करही। संगेसंग चेंबर कोति ले अठारा बछर ले जादा उमर के लोगन मनके नाम मतदाता सूची म दरज करवाय, अउ सुधार के काम घलो होही। उंहे चेंबर ऑफ कॉमर्स के सबो सदस्य मन मतदान वाले दिन म उंखर संस्थान म काम करइया कर्मचारी मन ल छुट्टी घलो देही।
सहायक शिक्षक काउंसिलिंग
प्रदेश के सरकारी स्कूल म वर्ग तीन के सहायक शिक्षक के पद म भर्ती बर पहिली चरण के ऑनलाईन काउंसिलिंग आज ले शुरू होगे हे। तीस अगस्त तक चलइया ये काउंसिलिंग मंझनियां बारा ले संझा पांच बजे तक स्कूल शिक्षा विभाग के वेबसाइट म चलही। ए काउंसिलिंग म व्यापम के परीक्षा परिणाम के अनुसार कट ऑफ रैंक के जानकारी विभाग के पोर्टल म देखे जा सकथे।
छत्तीसगढ़ उच्च न्यायालय के आदेश के अनुसार बीएड उत्तीर्ण उम्मीदवार मन ल सहायक शिक्षक पद के चयन प्रकिया ले अलग राखे गेहे। जउन उम्मीदवार मन ह व्यापम के पोर्टल म अपन योग्यता डीएड या फेर डीएलएड दरज कराय हे, ओमन ह काउंसिलिंग के प्रक्रिया म भाग ले सकही। ए बारे म अउ जादा जानकारी बर विभाग के वेबसाईट के अवलोकन करे जा सकत हे।
भाजपा महिला मोर्चा-प्रेसवार्ता
भाजपा महिला मोर्चा कोति ले प्रदेश म अवइया महीना ले जनसंपर्क अउ युवती संवाद सम्मेलन के आयोजन करे जाही। एखर माध्यम ले राज्य के सबो विधानसभा क्षेत्र म करीबन एक लाख माईलोगिन मनले संपर्क करे के लक्ष्य राखे गेहे। ए जानकारी भाजपा महिला मोर्चा के राष्ट्रीय अध्यक्ष वानथी श्रीनिवासन ह आज रायपुर म पत्रकार मन ल दीन।
मुख्यमंत्री अपील
मुख्यमंत्री भूपेश बघेल ह लोगन ले अपील करीन हे कि ओमन ह एसो रक्षाबंधन म स्व सहायता समूह के बहिनी मन कोति ले तियार करे गे राखी ल ही बउरे। ओमन ह ट्वीट करत कीहिन कि जब कोई बहिनी अपन भाई के कलाई म राखी बांधही, त दूर बइठे दूसर बहिनी ह घलो खुश हो जाही। श्री बघेल ह कहिन कि रक्षाबंधन के तिहार हर भाई बहिनी बर बहुत खास होथे।
एथलेटिक्स प्रतियोगिता
रायबरेली म होवत अखिल भारतीय अंतर रेलवे एथलेटिक्स चैंपियनशिप म दक्षिण पूर्व मध्य रेलवे, बिलासपुर के खिलाड़ी रवि ह हैमर थ्रो म स्वर्ण पदक जीते हे। बिलासपुर मंडल के कमर्शियल विभाग म टी.सी.सी.सी. रवि ल ओखर ए उपलब्धि बर दक्षिण पूर्व मध्य रेलवे के महा प्रबंधक अउ आने अधिकारी मन ह शुभकामना दीन हे।