प्रवर्तन निदेशालय-ईडी ह एक घांव फेर दुरूग, भिलाई, रइपुर म दबिस देके करीबन आठ ठन जघा म छापा मार कार्रवाई करे हे। ऐमा महादेव सट्टा ऐप ले जुड़े लोगन के अलावा व्यापारी मन के ठिकाना म घलो छापा मारे गिस। मिले जानकारी के अनुसार ईडी के टीम ह दुरूग भिलाई म नेहरू नगर, वैशाली नगर, अउ फरीद नगर म छापामार कार्रवाई करिस। ऐमा एक ठन ट्रांसपोर्टर घलो सामिल हे। संगेसंग टीम ह भिलाई म एक झन वकील के घर म दबिस दिस। उहे, रइपुर म एक झन ज्वेलर्स अउ पेट्रोल पंप संचालक के घर छापामारी के खबर घलो हे।
सुप्रीम कोर्ट-शराब घोटाला
प्रवर्तन निदेशालय ईडी ह आज नकली होलोग्राम बनाके शराब बिक्रि के मामला म सुप्रीम कोर्ट म जवाब दाखिल करीस। ए मामला म कोर्ट ह अवइया सुनवई के तारीख छब्बीस सितंबर तय करे हे। तब तक आरोपी मन के खिलाफ कोनो प्रकार के बल प्रयोग नइ करे जा सकही। ए मामला म ईडी ह उत्तर प्रदेस के ग्रेटर नोएडा थाना म आबकारी आयुक्त निरंजन दास, विसेस सचिव, ए.पी. त्रिपाटी के अलावा अनिल टुटेजा, कारोबारी अनवर ढेबर अउ होलोग्राम निर्माता कंपनी के एमडी के खिलाफ रिपोर्ट दर्ज कराय रिहीस। एला लेके अनिल टुटेजा अउ करिश्मा ढेबर डहार ले सुप्रीम कोर्ट म आने आने याचिका दायर करे गे रिहीस। याचिकाकर्ता ह आरोप लगाय रिहीस कि शराब घोटाला मामला म कार्रवाई उपर रोक के आदेस के बावजूद ईडी ह उत्तर प्रदेस म एक ठन अउ प्रकरण दर्ज करे हे। ओमन ह एला कोर्ट के अवमानना, करार दे रिहीन।
भारतीय जनता पार्टी के प्रदेस इकाई ह अवइया विधानसभा चुनाव के तियारी ल देखत सत्रह ठन राज्य के विधायक मन ल भाजपा के पक्ष म वातावरण बनाय बर विधानसभावार जिम्मेदारी सौंपे के तइयारी करे हे। इही कड़ी म आज राजधानी रइपुर के भाजपा कार्यालय कुशाभाउ ठाकरे परिसर म पांच राज्य के संतावन विधायक मनके प्रशिक्षण सुरू होइस। ए दउरान विधायक मन ल छत्तीसगढ़ म तेरह ठन बिन्दु उपर काम करे के जानकारी देय गिस। ऐमा विधानसभा स्तरीय बैठक, मन की बात, समन्वय बैठक, लाभार्थी सम्मेलन अउ संपर्क , विधानसभा क्षेत्र म दीवाल पेंटिग अभियान के समीक्षा, अनाथालय के दौरा, पार्टी प्रवेश बर कारीकरम के आयोजन, वृध्दाश्रम के दौरा, बाइक रैली, युवा मनले गोठबात, सोशल मीडिया आईटी सेल के समीक्षा अउ प्रेसवार्ता के आलावा सोशल मीडिया इंन्फ्लुएंसर्स के संग गोठबात करना हे। प्रशिक्षण म सामिल ए विधायक मन ह आठ दिन तक छत्तीसगढ़ म रइही अउ दू सितंबर तक विधानसभावार अपन रिपोर्ट राष्ट्रीय अध्यक्ष जे.पी. नड्डा अउ राष्ट्रीय महामंत्री संगठन बी.एल. संतोष ल सौपहीं। प्रशिक्षण कारीकरम अठ्ठाइस अगस्त तक चलही।
बिजली सब स्टेशन-आधारशिला
मुख्यमंत्री भूपेश बघेल ह काली महासमुंद म बसना क्षेत्र के ग्राम तरेकेला म ट्रांसमिशन कंपनी के एक सौ बत्तीस के.वी. उपकेन्द्र निर्माण के वर्चुअल भूमिपूजन के आधारसिला राखिन। करीबन उनचास करोड़ रूपिया के लागत ले बनइया ए सब स्टेशन ले अवइया दस बछर तक निर्बाध रूप ले विद्युत आपूर्ति हो सकही। एखर अलावा मुख्यमंत्री ह सरायपाली के भूलका अउ खल्लारी के घोंच म डिस्ट्रीब्यूसन कंपनी के दू ठन नवा के.वी. सब स्टेशन के लोकार्पण घलो करीन।
राज्यपाल-शिक्षा सम्मेलन
राज्यपाल विश्वभूषण हरिचंदन ह भुवनेश्वर म आयोजित शिक्षा सम्मेलन म सामिल होइन। ए मउका म ओमन ह नवा शिक्षा नीति ल क्रांतिकारी कदम बतावत किहीन कि, एखर ले देस ल समृध्द अउ मजबूत बनाय म मदद मिलही। नवा पाठ्यक्रम भाषा, संस्कृति, देसभक्ति, ज्ञान विकास अउ मूल्य उपर जोर देवत हे। ओमन किहीन कि ए शिक्षा नीति मनखे मनके सामाजिक, आर्थिक,नेतिक, धार्मिक बहुभाषी, मानसिक अउ चारित्रिक गुण म सुधार करही। राज्यपाल ह किहीन कि शिक्षा ह समाज अउ देस ल प्रगतिसील बनाथे। जब शिक्षा मजबूत होथे तो समाज ह विकास के रद्दा म आगू बढ़थे अउ मजबूत होथे।
माओवादी-मुठभेड़
नारायणपुर जिला म आज सुरक्षाबल संग होय मुठभेड़ म एक झन वर्दीधारी माओवादी ह मारे गिस। जेखर शव ल बरामद कर ले गेहे। मिले जानकारी के अनुसार भटबेड़ा के जंगल म माओवादी कमांडर मनके मौजूदगी के सूचना मिले म ओरछा थाना ले डीआरजी अउ बस्तर फाइटर्स के संयुक्त टीम ह सर्चिंग म निकले रिहीस। इही दौरान जंगल म माओवादी मन ह सुरक्षाबल उपर फायरिंग सुरू कर दीन। जवान मन डहार ले करे गे जवाबी कार्रवाई म एक झन माओवादी मारे गिस। मउका के तलासी म तीन सौ पन्द्रह बोर अउ बारा बोर के एक ठन राइफल बरामद करे गिस।
ओति बीजापुर जिला म सुरक्षाबल के टीम ह गंगालूर थाना क्षेत्र के किकलेर पहाड़ी तीर मुख्य रद्दा म पन्द्रह किलो वजन के डायरेक्सनल पाईप बम बरामद करे गिस, जेला मउकच म बम निरोधक दस्ता के टीम ह निष्क्रिय कर दिस।
माओवादी-ग्रामीण अगवा
बीजापुर जिला के कुटरू क्षेत्र के चिकटराज पहाड़ म पूजा करे बर गे पचास ले जादा ग्रामीण मन ल माओवादी मन ह अगवा कर ले रिहीन। ऐमा ले सब्बों गा्रमीण मन ल पूछताछ के बाद छोड़ दे गेहे। उहें, एक झन पूर्व सरपंच महेश गोटा ह अभी घलो माओवादी मनके कब्जा म हवय।
अतिरिक्त पुलिस अधीक्षक चन्द्रकांत गवर्ना ह बताइन कि ग्रामीण मन ह ए सूचना दे हवय। ओमन बताइन कि ग्रामीण मन अउ परिवार वाला मन ह माओवादी मन ले पूर्व सरपंच के निःशर्त रिहाई के अपील करीन हे। ए मामला फरसेगढ़ थाना क्षेत्र के बताय गे हवय।
छन्नी साहू-हमला
राजनांदगांव जिला के खुज्जी विधानसभा क्षेत्र के विधायक छन्नी चंदू साहू उपर काली संझा एक झन युवक ह चाकू ले हमला कर दीस। हमला म विधायक के हाथ म मामूली चोटें आई है। मिले जानकारी के अनुसार विधायक छन्नी साहू गा्रम घोघरा म स्कूल अउ महिला भवन के भूमिपूजन करे के बाद ग्रामीण मन ले चर्चा करे बर मंच म गीन। इही दौरान एक झन युवक ह मंच म चघिस अउ विधायक उपर हमला करे के परयास करीस। जेला सुरक्षाकर्मी अउ ग्रामीण मन ह पकड़ के पुलिस के हवाला कर दीन।
इही बीच, भारतीय जनता पार्टी ह छन्नी साहू उपर होय हमला के निंदा करत केहे हे कि राज्य के कांग्रेस सरकार ह माईलोगिन मन ल सुरक्षा दे म असफल हे। भाजपा के प्रवक्ता अउ विधायक रंजना साहू ह आरोप लगाइन कि कांग्रेस के शासन महिला विधायक मन घलो सुरक्षित नइ हे। पूरा प्रदेस म भय के वातावरण हे।
बंधक-रिहाई
तमिलनाडु के नामक्कल म बंधक बनाय गे कोंडागांव जिला के बंजोड़ा के रहइया पांच झन युवक मन ल छुड़ा ले गेहे। मिले जानकारी के अनुसार धनोरा थाना क्षेत्र के पांच झन युवक मन ह मजदूरी करे बर तमिलनाडु गे रिहीन, जउन मन ल ठेकेदार ह बंधक बना ले रिहीस। ऐमा ले एक झन युवक ह अपन रिश्तेदार ल ए बात के जानकारी दीस। मामला के जानकारी मिलते साथ कलेक्टर दीपक सोनी ह ओमन ल छुड़ाय बर पहल करीन। जेखर बाद जिला के अधिकारी मन ह तमिलनाडु के पुलिस अधिकारी मन संग मिल के बंधक युवा मन ल मुक्त कराइन।
नाग पंचमी/कांवड़ यात्रा
नाग पंचमी के तिहार आज प्रदेसभर म पारंपरिक रूप ले मनाय जात हे। ए मउका म शहर अउ गांव मन म नाग देवता के प्रतिमा बनाके पूजा-पाठ करे गीस, उहें, कुश्ती अउ दंगल के भी आयोजन करे जावत हे।
इही बीच, सावण महिना के सोमवार के आज राजधानी रइपुर के मारूति मंगलम भवन गुढ़ियारी ले महादेवघाट के श्री हटकेश्वरनाथ महादेव मंदिर तक कावड़ यात्रा निकाले गीस। ए कांवड़ यात्रा के सुरूआत मुख्यमंत्री भूपेश बघेल ह करीन। ए दौरान ओमन ह शिवलिंग के पूजा करके भगवान भोलेनाथ ले प्रदेस के जनता बर सुख-समृध्दि के कामना करीन।