मुख्यमंत्री भूपेश बघेल ह नगर पालिका महासमुंद ल नगर निगम बनाय के अउ ग्राम पंचायत भोरिंग ल नगर पंचायत के दर्जा देय के घोषणा करीन हे। एखर अलावा श्री बघेल ह महासमुंद म कंपोजिट बिल्डिंग निर्माण ल अवइया बछर के बजट म सामिल करे के ऐलान करीन हे।
मुख्यमंत्री ह आज महासमुंद म आयोजित कारीकरम म सामिल होइन। ए मउका म ओमन प्रदेस के 24 लाख बावन हजार किसान मनके बैंक खाता म राजीव गांधी किसान न्याय योजना के दूसरइया किस्त 1 हजार 8 सौ 94 करोड़ रूपिया के रासि ऑनलाइन अंतरित करीन। उहें, मुख्यमंत्री ह गोधन न्याय योजना के तहत गोबर विक्रेता, गोठान समिति अउ महिला स्व-सहायता समूह मनके बैंक खाता म घलो 9 करोड़ 65 लाख रूपिया के रासि जारी करीन। कारीकरम म मुख्यमंत्री ह प्रदेस के 18 नवा तहसील अउ 13 ठन अनुविभागीय कार्यालय के सुभारंभ करीन। एमन ल मिला के प्रदेस म अब 250 तहसील अउ 122 अनुविभाग हो जाही।
ए मउका म मुख्यमंत्री ह महासमुंद जिला बर 655 करोड़ रूपिया के लागत के कतकोन बिकास कारज के लोकार्पण अउ भूमिपूजन करीन। संगे ओमन महासमुंद म मेडिकल कॉलेज भवन निर्माण के आधारसिला घलो राखिन। कारीकरम ल संबोधित करत मुख्यमंत्री ह किहीन कि राज्य सरकार के योजना मनके लाभ जनता ल मिलत हे। छत्तीसगढ़ म पाछू 5 बछर म 40 लाख लोगन गरीबी ले बाहिर आ चुके हें। एमा कबीरधाम, सरगुजा अउ दंतेवाड़ा के 23 ले 25 प्रतिसत लोगन सामिल हें।
मुख्यमंत्री-लोकार्पण-02
एखर पहिली, श्री बघेल ह ‘‘मुख्यमंत्री गौवंश मोबाइल चिकित्सा योजना‘‘ के तहत महासमुंद जिला बर 7 अउ संभाग के आने जिला मन बर 43 मोबाइल पशु चिकित्सा इकाई मन ल हरा झंडा दिखाके रवाना करीन। एखर आलावा मुख्यमंत्री ह कृषि यांत्रिकीकरण म सब मिशन घटक योजना के 10 हितग्राही मन ल ट्रैक्टर अउ 1 हितग्राही ल हार्वेस्टर चाबी सौंपिन।
कांग्रेस कार्य समिति
कांग्रेस के राष्ट्रीय अध्यक्ष मल्लिकार्जुन खड़गे ह कांग्रेस कार्य समिति के घोषणा कर दे हे। 39 सदस्यीय समिति म छत्तीगसढ़ ले गृहमंत्री ताम्रध्वज साहू ल सामिल करे गे हे। राज्यसभा सांसद फूलोदेवी नेताम स्थायी आमंत्रित सदस्य होहीं। उहें, कार्य समिति म 32 स्थायी आमंत्रित सदस्य, 9 बिसेस आमंत्रित सदस्य, युवा कांग्रेस, एनएसयूआई, महिला कांग्रेस अउ सेवादल के अध्यक्ष मन ल घलो स्थान दे गे हे।
मतदाता सूची-विशेष शिविर
मतदाता सूची म नांव जुड़वाय बर आज घलो प्रदेस के सबो मतदान केंद्र मन म बिशेष सिविर के आयोजन करे गिस। जउन लोगन के नांव मतदाता सूची म दर्ज नइ रिहीस, ओमन ए बिशेष सिविर म जाके अर्जी लगाइन । संगेसंग जेन मतदाता मन के नांव या पता गलत दर्ज होय रिहीस ओमन घलो सिविर म अपन नांव अउ पता ल सुधरवाइन। एखर अलावा कतकोन लोगन अपन आधार नंबर ल मतदाता परिचय पत्र ले जुड़वाइन हें।
भाजपा-मांग
भारतीय जनता पार्टी ह निर्वाचन आयोग ले मतदाता सूची म नवा नांव जोड़े अउ गलत नांव ल हटाए बर पंद्रह दिन अउ समय बढ़ाय के मांग करे हे। रइपुर सांसद सुनील सोनी ह आज रइपुर म मीडिया ले चर्चा करत मुख्य निर्वाचन पदाधिकारी छत्तीसगढ़ उपर आरोप लगाइन। ओमन किहीन कि भारत निर्वाचन आयोग डहार ले देय गे आदेस के पालन नइ करे जावत हे। छत्तीसगढ़ म मतदाता सूची म नांव जोड़वाय बर बूथ लेवल अधिकारी कतकोन जघा हड़ताल म हे। एखर सेति अधिकारी मन बूथ म नइ बइठत हें। एखर सिकायत निर्वाचन कार्यालय ले करे गे रिहीस। फेर स्थिति जस के तस बने हे। श्री सोनी ह किहीन कि भाजपा के सबो पदाधिकारी काली ले इकतीस अगस्त तक मतदाता सूची म नांव जुड़वाय अउ गलत नांव ल हटवाय बर जन-जागरण अभियान चलाहीं।
चंद्रयान-3
चंद्रयान-3 मिशन के लैंडर मॉडयूल के परिक्रमा-पथ ल आज बिहनिया सफलतापूर्वक बदले गिस। अब ए लैंडर मॉडयूल के चंद्रमा के कक्षा म पहुंचे बर सिरिफ 25 किलोमीटर बांचे हे। इसरो के अनुसार लैंडर मॉडयूल विक्रम सही स्थिति म हे, अउ ए ह अपन इही कक्षा ले चंद्रमा के सतह म उतरे के परयास करही। चंद्रमा के दक्षिणी ध्रुव म सॉफ्ट लैंडिंग 23 अगस्त के संझा साढ़े पांच बजे ले साढ़े छै बजे के बीच निर्धारित हे। ए ह चंद्रमा के दक्षिणी धु्रव म उतरही ते भारत ह सफलता हासिल करइया चौथा देस बन जाही।
राजीव गांधी-जयंती
पूर्व प्रधानमंत्री राजीव गांधी के आज जयंती हे। ए मउका म प्रधानमंत्री नरेन्द्र मोदी ह स्वर्गीय राजीव गांधी ल श्रध्दांजलि अर्पित करीन।
उहें, कांग्रेस के राष्ट्रीय अध्यक्ष मल्लिकार्जुन खड़गे, सोनिया गांधी अउ प्रियंका गांधी घलो राजीव गांधी के समाधि स्थल वीरभूमि म जाके नमन करीन।
ऐति छत्तीसगढ़ म राजीव गांधी के जयंती ल सद्भावना दिवस के रूप म मनाय जावत हे। ए मउका म मुख्यमंत्री भूपेश बघेल, विधानसभा अध्यक्ष डॉक्टर चरणदास महंत समेत प्रदेस कांग्रेस के पदाधिकारी मन स्वर्गीय राजीव गांधी ल श्रध्दांजलि दीन हें।
शार्क टैंक-एमओयू
रइपुर जिला प्रशासन के डहार ले ग्रामीण क्षेत्र म उद्यमिता ल बढ़ावा अउ उद्यमी मन ल मार्गदर्सन देय के उद्देस्य ले बाइसन केज शार्क टैंक के आयोजन करे गिस। ठाकुर प्यारेलाल राज्य पंचायत अउ ग्रामीण विकास संस्थान निमोरा म आयोजित कारीकरम म जिला प्रशासन अउ हेडस्टार्ट फाउंडेशन के बीच एमओयू होइस। एखर तहत जिला म रीपा ल तकनीकी सहयोग प्रदान करे जाही। कार्यालय म नवा स्टार्टअप वाले उद्यमी मन अपन स्टार्टअप आइडिया अउ उत्पाद के बारे म जानकारी देइन।
ए मउका म रइपुर कलेक्टर डॉक्टर नरेन्द्र सर्वेश्वर भूरे ह किहीन कि हाल बेरा नवाचार के हे। छत्तीसगढ़ के युवा मन घलो अपन नवा सोच-बिचार ले स्टार्टअप तइयार करय संगेसंग दूसर बर घलो रोजगार के मउका सिरजावंय।
आईटीआई-काउंसिलिंग
प्रदेस के सरकारी औद्योगिक प्रशिक्षण संस्था मन म प्रशिक्षण अधिकारी के कतकोन खाली पद बर पहिली चरण के काउंसिलिंग के बाद दस्तावेज सत्यापन कारज काली ले सुरू हो गेहे, जउन 22 अगस्त तक चलही। सत्यापन बर अभ्यर्थी मन ल एसएमएस के जरिया ले सूचना भेजे गे हे। उहें, जेन अभ्यर्थी कोनो कारण ले नियत तिथि म हाजिर नइ हो पाहीं, वहू मन 22 अगस्त के बिहनिया साढ़े नौ बजे हाजिर होके दस्तावेज सत्यापन करा सकथें।
रेडियो श्रोता दिवस
रेडियो श्रोता दिवस के मउका म आज ओल्ड लिसनर्स गु्रप ऑफ छत्तीसगढ़ जोन के डहार ले रइपुर सिविल लाइन स्थित वृंदावन हॉल म बिसेस कारीकरम के आयोजन करे गिस। कारीकरम के मुख्य अतिथि आकाशवाणी केन्द्र रइपुर के सहायक निदेसक लखनलाल भौर्य रिहीन। कारीकरम के अध्यक्षता पूर्व जिला पंचयात अध्यक्ष अशोक बजाज करीन।
उहें, कारीकरम के आयोजनकर्ता मोहनलाल देवांगन अउ झावेन्द्र कुमार धु्रव रिहीन। कारीकरम म श्रोता अउ कलाकार मन ल प्रसस्ति पत्र अउ स्मृति चिन्ह देय के सम्मानित करे गिस। संगेसंग रेडियो कारीकरम म रूचि रखइया श्रोता मन ल रेडियो सेट घलो प्रदान करे गिस।
अउ अब थोरकुन समाचार सार म-
– अखिल भारतीय कांग्रेस कमेटी के अध्यक्ष मल्लिकार्जुन खड़गे अवइया 8 सितंबर के राजनांदगांव म आयोजित किसान सम्मेलन म सामिल होही।
– छत्तीसगढ़ स्वास्थ्य फेडरेशन ह अपन पांच सूत्रीय ल मांग ल लेके काली ले अनिश्चितकालीन हड़ताल म जाके चेतावनी दे हे।
– दुरूग जिला के पाटन थाना क्षेत्र के भरर चौक के तिर चारपहिया वाहन के टक्कर ले एक युवा के मउत होगे। मुख्यमंत्री भूपेश बघेल ह घटना उपर दुख जतावत मृतक के परिजन ल चार लाख रूपिया आर्थिक मदद देय के घोषणा करीन हे।
अउ
– राजनांदगांव जिला के डोंगरगढ़ पुलिस ह पुरी-अहमदाबाद एक्सप्रेस म गांजा तस्करी के आरोप म दू झन ल गिरफ्तार करे हे। आरोपी मन ले 11 किलो गांजा जब्त करे गिस।