राष्ट्रपति-छत्तीसगढ़
राष्ट्रपति द्रौपदी मुर्मू आगामी इकत्तीस अगस्त ले दो दिवसीय दौरा म छत्तीसगढ़ आवत हे। श्रीमति मुर्मू अपन छत्तीसगढ़ प्रवास के दौरान रइपुर अउ बिलासपुर म आयोजित अलग- अलग कार्यक्रम मन म सामिल होही। राष्ट्रपति इकत्तीस अगस्त के बिहनिया दस बजे विशेष विमान ले रइपुर के स्वामी विवेकानंद विमानतल पहुंचही। एखर बाद ओमन रइपुर स्थित प्रजापिता ब्रम्हकुमारी ईश्वरीय ट्रस्ट शांति सरोवर म आयोजित कार्यक्रम म भाग लिही। संगेसंग ओमन रइपुर के महंत घासीदास संग्रहालय के अवलोकन घलो करही। राष्ट्रपति राजभवन म रात्रि विश्राम करे के बाद अगले दिन एक सितंबर के हेलीकॉप्टर ले बिलासपुर जाही। उंहा, रतनपुर स्थित मां महामाया मंदिर म दर्सन करे के बाद बिलासपुर स्थित गुरू घासीदास केन्द्रीय विश्वविद्यालय के दीक्षांत समारोह म सामिल होही। एखर बाद ओमन बिलासपुर ले रइपुर आही अउ विशेष विमान ले दिल्ली बर रवाना होही।
प्रधानमंत्री-जी-20
प्रधानमंत्री नरेन्द्र मोदी ह किहीन हे कि भारत के डिजिटल सार्वजनिक बुनियादी ढांचा वैश्विक चुनौती मन बर सुरक्षित अउ समावेशी समाधान उपलब्ध करावत हे। बैंग्लूरू म आज जी-20 डिजिटल अर्थव्यवस्था के बइठका म मंत्री मन ल वर्चुअली संबोधित करत हुए प्रधानमंत्री ह जी-20 फोरम के संग समावेशी, समृध्द अउ सुरक्षित वैश्विक डिजिटल व्यवस्था के आधारसिला रखे के ये विशेष अवसर ल महत्वपूर्ण बताइन। ओमन जी-20 देस मन ल वैश्विक प्रौद्योगिकी आधारित प्रणाली उपर काम करे के आग्रह करीन।
प्रधानमंत्री-जन धन खाता
प्रधानमंत्री नरेन्द्र मोदी ह जन-धन खाता मन के संख्या म महत्वपूर्ण वृध्दि उपर प्रसन्नता व्यक्त करे हे। देस म जन-धन खाता मन के संख्या पचास करोड़ के आकड़ा पार कर गेहे। एक ठन सोशल मीडिया पोस्ट म श्री मोदी ह ए बात उपर घलो प्रसन्नता व्यक्त करीन कि एमा छप्पन प्रतिसत खाता महिला मन के हे।
केन्द्रीय वित्त मंत्रालय ह बताइन हे कि ए खाता मन म लगभग चौतीस करोड़ रूपे कार्ड निःशुल्क जारी करे गेहे।
मुख्यमंत्री-लोकार्पण
पूर्व प्रधानमंत्री स्वर्गीय राजीव गांधी के काली जयंती हे। ए अवसर म मुख्यमंत्री भूपेश बघेल ह महासमुंद म आयोजित कार्यक्रम म प्रदेस के चौबीस लाख बावन हजार किसान मनके बैंक खाता म राजीव गांधी किसान न्याय योजना के दूसरइया किस्त एक हजार आठ सौ चौरानवे करोड़ रूपिया के ऑनलाइन अंतरण करही। ए योजना के अंतर्गत लाभान्वित होवइया मन म धान, कोदो-कुटकी, रागी, दलहन-तिलहन, धान के बदला दूसर फसल उत्पादक किसान अउ वृक्षारोपण करइया किसान मन सामिल हे।
उहें, मुख्यमंत्री काली गोधन न्याय योजना के तहत गोबर विक्रेता, गौठान समिति अउ महिला स्व-सहायता समूह मन के बैंक खाता मन म घलो नौ करोड़ पैंसठ लाख रूपिया के रासि के अंतरण करही।
ए मउका म मुख्यमंत्री ह महासमुंद जिला म छह सौ पचपन करोड़ रूपिया के लागत के अलग-अलग कार्य मनके लोकार्पण अउ भूमिपूजन घलो करही। संगेसंग ओमन लगभग तीन सौ तेइस करोड़ रूपिया लागत ले बने महासमुंद मेडिकल कॉलेज के भवन निर्माण कार्य के आधारसिला घलो राखही।
आप-घोषणा पत्र
छत्तीसगढ़ म आगामी विधानसभा चुनाव बर आम आदमी पार्टी ह अपन घोषणा पत्र जारी कर देहे। आज रइपुर म आयोजित कार्यक्रम म दिल्ली के मुख्यमंत्री अरविंद केजरीवाल ह चुनाव घोषणा पत्र जारी करत हुए बतइन कि प्रदेस म चौबीस घंटा बिजली, तीन सौ यूनिट तक निःशुल्क बिजली, पुराना बकाया बिजली बिल माफ, निःशुल्क शिक्षा, सरकारी अस्पताल मन म निःशुल्क ईलाज, बुजुर्ग मन ल तीर्थ यात्रा कराय अउ महिला मन ल एक हजार प्रतिमाह सम्मान रासि दे सहित दस ठन गारंटी के वादा करे हे। उहें, युवा मन ल रोजगार अउ बेरोगार मन ल तीन हजार प्रति माह भत्ता देके घोषणा घलो करे गेहे। पार्टी ह प्रदेस म भ्रष्टाचार खत्म करे अउ शहीद जवान मनके परिजन मन ल एक करोड़ रूपिया के सम्मान रासि प्रदान करे के वादा घलो करे हे।
कांग्रेस-बैठक
कांग्रेस के छत्तीसगढ़ प्रभारी कुमारी सैलजा ह आज रइपुर म होय बइठका के बाद पत्रकार मनले गोठबात करत हुए किहीन कि प्रदेस म अवइया विधानसभा चुनाव बर कांग्रेस प्रत्यासी मनके पहिली सूची छै सितंबर के जारी करे जाही।
इही बीच, कांग्रेस के घोषणा पत्र समिति के अध्यक्ष मोहम्मद अकबर ह बताइन कि घोषणा पत्र तैयार करे बर लोगन मन ले इकतीस अगस्त तक सुझाव ले जाही। कोनो भी मनखे लिखित म अपन सुझाव दे सकत हे। संगेसंग सुझाव दे बर ई-मेल के सुविधा घलो दे गेहे।
उपभोक्ता विवाद-प्रशिक्षण कार्यक्रम
छत्तीसगढ़ के सबो जिला उपभोक्ता विवाद प्रतितोष आयोग मन म नियुक्त अध्यक्ष अउ सदस्य मन बर दो दिवसीय प्रशिक्षण कार्यक्रम के आयोजन निमोरा स्थित छत्तीसगढ़ प्रशासन अकादमी म करे गीस। कार्यक्रम के सुभारंभ के अवसर म छत्तीसगढ़ राज्य उपभोक्ता विवाद प्रतितोष आयोग के अध्यक्ष न्यायमूर्ति गौतम चौरड़िया ह किहीन कि प्रशिक्षण ले कौसल बाढ़थे अउ गुणवत्ता म विकास होथे। एखरे सेती समय-समय म प्रशिक्षण होवत रहना चाहिए।
कार्यक्रम म खाद्य सचिव टोपेश्वर वर्मा, छत्तीसगढ़ राज्य उपभोक्ता विवाद प्रतितोष आयोग के पूर्व अध्यक्ष न्यायमूर्ति सी.डी. बाजपेयी अउ छत्तीसगढ़ प्रशासन अकादमी के संचालक टी.सी. महावर घलो मौजूद रिहीन।
शिक्षक हड़ताल-कार्रवाई
राज्य शासन ह स्कूल शिक्षा विभाग म हड़ताल म गे सहायक शिक्षक, समग्र शिक्षक-एलबी के विरूध्द अनुशासनात्मक कार्रवाई करे के निरदेस जारी करे हे। लोक शिक्षण संचालनालय डहार ले ए संबंध म विभाग के सबो संभागीय संयुक्त संचालक, जिला शिक्षा अधिकारी अउ विकास खंड शिक्षा अधिकारी मन ल शासन के निरदेसानुसार कार्रवाई करे बर केहे हे।
गौरतलब हे कि प्रदेस के सहायक शिक्षक, समग्र शिक्षक-एलबी, छत्तीसगढ़ सहायक शिक्षक फेडरेशन के आह्वान म पूर्ण सेवा के गणना कर सही वेतन निर्धारण अउ वेतन विसंगति ल दूर करे बर पाछू दस अगस्त ले हड़ताल करत हे। ए हड़ताल ले स्कूल मन म अध्ययन अध्यापन के काम प्रभावित होवत हे। राज्य शासन ह एला गंभीरता ले लेवत हुए, कड़ाई ले कार्रवाई करे के निरदेस दे हे।
मतदाता सूची-विशेष शिविर
मतदाता सूची म नाम जोड़वाय बर आज प्रदेस के सब्बों मतदान केन्द्र मन म विशेष सिविर के आयोजन करे गेहे। उहें, काली बीस अगस्त के घलो मतदान केन्द्र मन म विशेष सिविर लगाय जाही। जेन लोगन मन के नाम अभी तक मतदाता सूची म नई हे, ओमन ए विशेष सिविर म जाके आवेदन प्रस्तुत कर सकत हे। संगेसंग जेन मतदाता मन के नाम या पता गलत दर्ज होय हे, उहू मन सिविर म जाके सुधरवा सकत हे। एखरे संग विशेष सिविर म आधार नंबर ला मतदाता परिचय पत्र ले घलो जोड़े जाही।
इही बीच, कलेक्टर अउ जिला निर्वाचन अधिकारी डॉक्टर सर्वेश्वर भूरे के अध्यक्षता म रइपुर जिला के स्वीप समिति के बइठका के आयोजन करे गीस। बइठका म कलेक्टर ह चुनाव के दौरान जिला म मतदान के प्रतिशत बढ़ाय अउ सबो मतदाता मन ल वोट दे बर प्रेरित करत हुए विशेष जागरूकता अभियान चलाय के निरदेस दीन। संगेसंग मतदाता सूची म नाम जोड़े, हटाय अउ संशोधन के काम निर्धारित समय-सीमा म पूरा करे बर घलो किहीन।
अउ अब पेस हे मौसम के हाल…
प्रदेस म आगामी चौबीस घंटा के दौरान आने आने जघा म हल्का ले भारी बरसा होय के संभावना हे। उहें, एक-दू जघा म गरज-चमक के संग आकाशीय बिजली गिरे के चेतावनी घलो दे गेहे।
मौसम विभाग के अनुसार एक ठन निम्न दाब का क्षेत्र उत्तर छत्तीसगढ़ अउ ओखर आसपास बने हुए हे। एखर प्रभाव ले राजधानी रइपुर समेत प्रदेस के कई ठन जघा मन म हल्का ले मध्यम बरसा होवत हे। पाछू चौबीस घंटा के दौरान कुछेक जघा म तेज बरसा घलो दर्ज करे गेहे। निचला इलाका मन म पानी भरे ले सामान्य जन-जीवन प्रभावित होवत हे।