केन्द्रीय मंत्रिमंडल ह तेरह हजार करोड़ रूपिया के पारंपरिक शिल्पकार अउ कारीगर मनके मदद बर पीएम-विश्वकर्मा योजना ल मंजूरी दे देहे। केन्द्रीय मंत्रिमंडल के बइठका के बाद नई दिल्ली म संचार अउ सूचना प्रौद्योगिकी मंत्री अश्वनी वैष्णव ह बतईन कि ए योजना के तहत सुरू म पारंपरिक उद्योग-धंधा ल सामिल करे जाही, जेमा बढ़ई, डोंगा बनइया, सोनार, राजमिस्त्री, खिलौना बनइया, लोहार अउ कुम्हार सामिल हे। ओमन किहीन कि ए योजना म इंखर मनके हुनर ल बढ़ाय जाही अउ मदद घलो दे जाही। सूचना अउ प्रौद्योगिकी मंत्री ह बतईन कि ए योजना म पांच प्रतिसत के रियायती ब्याज म एक लाख रूपिया तक के करजा घलो दे जाही। ए योजना ले करीबन तीस लाख ले जादा परिवार मन ल फायदा मिलही।
मुख्यमंत्री-जगदलपुर
मुख्यमंत्री भूपेश बघेल ह आज जगदलपुर के धरमपुरा स्थित काकतीय पीजी कालेज परिसर म युवा मन संग भेंट-मुलाकात करीन। ए मउका म मुख्यमंत्री ह कोंडागांव जिला म कुश्ती अकादमी अउ सुकमा जिला म कृषि महाविद्यालय खोले के घोसना करीन। त उहें, नारायणपुर जिला म आउटडोर स्टेडियम अउ सेंट्रल लाइब्रेरी बनाय के संगेसंग पीएमटी गर्ल्स कालेज म सीट मनके संख्या ल पचास ले बढ़ाके एक सौ करे के घोसना करीन।
युवा मन ले भेंट-मुलाकात के दउरान मुख्यमंत्री ह किहीन कि बस्तर संभाग म सिक्षा, स्वास्थ्य अउ रोजगार के क्षेत्र म अब्बड़ बदलाव आय हे।
बाल अधिकार संरक्षण आयोग-आदेश
राष्ट्रीय बाल संरक्षण आयोग ह प्रदेस म पाछु करीबन चार साल म उनचालीस हजार लइका मनके मउत के मामला म जांच के आदेस देहे। आयोग के अध्यक्ष प्रियंक कानूनगो ह आज छत्तीसगढ़ के मुख्य सचिव ल चिठ्ठी लिखके पूरा मामला के जांच करवा के सात दिन के भीतर आयोग ल रिपोर्ट भेजे बर केहे हे।
जानबा के मुताबिक छत्तीसगढ़ के प्रदेस भाजपा अध्यक्ष अरूण साव के अगुवई म राज्य के चार सांसद के दल ह राष्ट्रीय बाल अधिकार संरक्षण आयोग ल ज्ञापन देके बताय रिहीस कि राज्य विधानसभा म प्रदेस के उप मुख्यमंत्री टी.एस. सिंहदेव डहार ले दे गे जानकारी के मुताबिक छत्तीसगढ़ म जनवरी दू हजार उन्नीस ले जून दू हजार तेईस तक पांच साल तक के उनचालीस हजार लइका मनके मउत होगे हे। ज्ञापन म केहे गेहे कि ए आंकड़ा ले स्पष्ट होथे कि राज्य सरकार ह नवजात शिशु मन ल स्वास्थ्य सुविधा देवाय म विफल रेहे हे। सांसद मन ह ए पूरा मामला के आयोग ले जांच कराय के मांग करे रिहीन।
मुख्य न्यायाधीश उद्घाटन
बिलासपुर स्थित छत्तीसगढ़ उच्च न्यायालय परिसर म होय स्वतंत्रता दिवस समारोह म मुख्य न्यायाधीश रमेश सिन्हा ह झंडा फहरा के परेड के सलामी लीन। ए मउका ओमन नवा बने विस्तार भवन अउ अतिरिक्त कोर्ट रूप के संगेसंग न्यायिक कार्यवाही के लाईव स्ट्रीमिंग, बाईस जिला मनके ई-सेवा केन्द्र अउ ई-गेट तीर के बारे म मोबाइल ऐप ऑनलाइन रिक्रूटमेंट एप्लीकेशन के उद्घाटन करीन। त उहें, यातायात ले जुड़े चालान बर अंबिकापुर, बिलासपुर, दुरूग अउ जगदलपुर के वर्चुअल कोर्ट, न्यायिक विमर्श के सॉफ्टवेयर अउ चार ठिन टेलीग्राम के चैनल घलो उद्घाटन करीन।
छत्तीसगढ़ पेंशनर-महंगाई भत्ता
प्रदेस के पेंसन पवइया मन ल जल्दीच बयालीस प्रतिसत महंगाई राहत दे बर मुख्यमंत्री ह मध्यप्रदेश के मुख्यमंत्री ल चिट्ठी लिखे हे। ए बारे म प्रदेस के मुख्यमंत्री ह मध्यप्रदेश के मुख्यमंत्री ले सहमति बर जरूरी कदम उठाय के बात केहे हे, जेखर ले छत्तीसगढ़ के पेंसन पवइया मन ल बयालीस प्रतिसत महंगाई भत्ता दे जाय के कार्रवाई करे जा सकय।
जानबा के मुताबिक छत्तीसगढ़ के रिटायर सरकारी अधिकारी-कर्मचारी मन ल बयालीस प्रतिसत महंगाई राहत पाछु एक जुलाई ले देके फइसला ले गेहे। एखर कागजी काम बर मध्यप्रदेश पुनर्गठन अधिनियम के तहत दूनों राज्य के बीच सहमति होना जरूरी हे।
अटल बिहारी वाजपेयी-पुण्यतिथि
पूर्व प्रधानमंत्री भारतरत्न अटल बिहारी वाजपेयी के आज पुण्यतिथि हरय। ए मउका म राष्ट्रपति, प्रधानमंत्री अउ उपराष्ट्रपति ह उंखर समाधि ‘‘सदैव अटल‘‘ म जाके पुष्पांजलि अर्पित करीन।
ऐति, छत्तीसगढ़ के राज्यपाल विश्वभूषण हरिचंदन ह राजभवन म श्री वाजपेयी ल श्रद्धांजलि दीन।
भाजपा के राष्ट्रीय उपाध्यक्ष अउ प्रदेस के पूर्व मुख्यमंत्री डॉक्टर रमन सिंह ह ओमन ल श्रद्धांजलि देवत किहीन कि छत्तीसगढ़ राज्य बनाय के सपना ल श्री वाजपेयी ह साकार करीन।
त उहें, भाजपा के प्रदेस अध्यक्ष अरूण साव ह घलो श्रद्धांजलि देवत अपन विचार राखीन।
नाचा-अमेरिका
नॉर्थ अमेरिका छत्तीसगढ़ एसोसिएशन-नाचा ह अमेरिका के शिकागो म स्वतंत्रता दिवस के मउका म राखे गे ‘‘इंडिया डे परेड‘‘ के दउरान भारत के भरे-पूरे आदिवासी सामुदायिक संस्कृति के प्रदर्सन करीन। इंडियन कम्युनिटी आउटरीच डहार ले राखे गे परेड म नाचा के सदस्य मन ह छत्तीसगढ़ के आदिवासी परंपरा, लोक जीवन अउ संस्कृति के प्रदर्सन करीन। ए मउका ओमन छत्तीसगढ़ के आदिवासी मनके पहनावा अउ वाद्य यंत्र के संगेसंग नाच दिखाके देखइया मन ल खुस कर दीन। वेशभूषा ल दुरूग जिला के लोक कलाकार रिखी क्षत्रीय डहार ले तैयार करे गे रिहीस।
मुख्यमंत्री ह अमेरिका म रहइया जम्मों भारतीय मन ल भारत के सतहत्तरवां स्वतंत्रता दिवस के बधाई दीन।
मिसल बंदोबस्त रिकार्ड
रायपुर जिला प्रसासन ह मिसल बंदोबस्त ऑनलाइन पोर्टल सुरू करे हे। ए पोर्टल ले अब लोगन मन ह खुद के भूईंया के रिकार्ड मोबाइल फोन म देख के डाउनलोड कर सकही। ए पोर्टल म बछर उन्नीस सौ उनतीस ले उन्नीस सौ पैंतालीस के जुन्ना मिसल बंदोबस्त रिकार्ड घलो हवय।
रईपुर कलेक्टर डॉक्टर सर्वेश्वर भूरे ह बतईन कि लोगन मन ल कागजात बर आफिस के चक्कर लगाय बर पड़त रिहीस, फेर अब ऑनलाइन रिकॉर्ड मिले ले काम ह सरल हो जही। पोर्टल म गांव के नाव, खसरा नंबर अउ किसान के नाव लिखे ले पूरा जानबा मिल जही।
खदान-हादसा
राजनांदगांव जिला म स्थित मनगटा खदान म बुड़े ले तीन झिन मनखे के मउत होगे। हमर संवाददाता ले मिले जानबा के मुताबिक सोमनी थाना क्षेत्र के गांव मनगटा स्थित वन चेतना केन्द्र म चार झिन युवक मन काली पिकनिक मनाय बर गे रिहीस। इही दउरान तीन झिन युवक मन खदान म नहाय बर उतर गे। खदान म जादा गढ्ढा होय के सेती ए तीनों युवक मन बुड़ गे। बाहिर खड़े युवक ह घटना के जानबा पुलिस ल दीन। पुलिस के टीम ह सूचना मिले के बाद गोताखोर मनके मदद ले ए तीनों झन युवक के सव ल बरामद कर लीन।
सहायक आरक्षक-चयन सूची
बस्तर संभाग म सहायक आरक्षक के दू हजार दू सौ अंठावन पद बर होय परीक्षा के चयन सूची जारी कर दे गेहे। एमा दू सौ पचास महिला सहायक आरक्षक मनके घलो चयन होय हे। सहायक आरक्षक मनके भर्ती बर पाछु अट्ठारह जुलाई के सेवा मूल्यांकन करे गे रिहीस, जेखर बाद चुने गे सहायक आरक्षक मनके सारीरिक दक्षता परीक्षा चौबीस जुलाई ले चार अगस्त तक होय रिहीस।
बस्तर रेंज के पुलिस महानिरीक्षक सुंदरराज पी. ह सहायक आरक्षक पद बर चुने गे जम्मों आरक्षक मन ल अपन सुभकामना दे हवय।
अउ अब थोरकुन समाचार सार म-
– वीरांगना अवंतीबाई लोधी के आज जयंती हरय। ए मउका म मुख्यमंत्री ह ओमन ल सुरता करत बछर अट्ठारह सौ संतावन के प्रथम स्वतंत्रता संग्राम म उंखर भूमिका के बारे म बतईन।
– ‘‘मेरी माटी-मेरा देश‘‘ अभियान के तहत कोंडागांव जिला के जैतपुरी गांव म गांव के लोगन अउ स्कूली लइका मन ह सहीद मन ल सुरता करत वृक्षारोपण करीन।
– स्वतंत्रता दिवस के मउका म जनसंपर्क विभाग कोति ले रईपुर के टाउनहाल म छायाचित्र प्रदर्सनी के आयोजन करे गेहे, जेमा सरकारी योजना मनके संगेसंग स्वतंत्रता सेनानी मनके बारे म जानबा दे जावत हे।
अउ
– युवा मन ल प्राईवेट क्षेत्र म रोजगार के बढ़िया मउका देवाय बर रईपुर जिला के आने-आने जगह म काली ले तेईस अगस्त तक रोजगार अउ ऋण मेला के आयोजन करे जाही।