स्वतंत्रता दिवस-प्रधानमंत्री
राष्ट्र आज सतहत्तरहवां स्वतंत्रता दिवस मनावत हे। प्रधानमंत्री नरेन्द्र मोदी ह दिल्ली के लाल किला के प्राचीर ले राष्ट्रीय ध्वज फहरात राष्ट्र ल संबोधित करीन। ए मउका म प्रधानमंत्री ह किहीन कि निष्ठा, पारदर्शिता अउ निष्पक्षता ल बढ़ावा दे बर भारत ल विकसित राष्ट्र बनाना हमर सामुहिक जिम्मेवारी होना चाही। प्रधानमंत्री ह किहीन कि सरकार पारंपरिक कौसल ल बढ़ावा दे बर अवइया महीना ले ‘विश्वकर्मा योजना‘ सुरू करही।
प्रधानमंत्री ह किहीन कि देस म आतंकी घटना म कमी आय हे अउ नक्सली क्षेत्र म परिवर्तन होय हे। ओमन किहीन कि हमर लक्ष्य गांव म दू करोड़ लखपति दीदी बनाय के हे। एखर बर महिला स्व-सहायता समूह ल ड्रोन चलाय के प्रसिक्षण दे जाही, जेखर उपयोग किसानी काम म होही। ओमन किहीन कि जनऔषधि केन्द्र ले लोगन ल सस्ता दर म दवई मिलत हे। अवइया दिन म ए केन्द्र के संख्या पच्चीस हजार करे जाही।
स्वतंत्रता दिवस समारोह म देसभर ले आने-आने व्यवसाय के करीबन अट्ठारह सौ लोगन ल उंखर जीवनसाथी संग बिसेस अतिथि के रूप म बलाय गे रिहीस। एमा छत्तीसगढ़ के पांच किसान उत्पादक संगठन के दस झिन प्रतिनिधि समेत आने-आने क्षेत्र के उनतीस झिन लाभार्थी परिवार सामिल रिहीन।
स्वतंत्रता दिवस-01
छत्तीसगढ़ म आज स्वतंत्रता दिवस देशभक्ति अउ उछाह के संग मनाय गीस। राजधानी रईपुर के पुलिस परेड मैदान म राखे गे मुख्य समारोह म मुख्यमंत्री भूपेश बघेल ह ध्वजारोहण करके परेड के सलामी लीन। ए मउका म मुख्यमंत्री ह कतकोन घोसना करीन। ओमन किहीन कि छत्तीसगढ़ साहित्य अकादमी सम्मान अब तीन श्रेणी म दे जाही। गोंडी, हल्बी, सरगुजिया बोली के संगेसंग हिन्दी पद्य अउ हिन्दी गद्य के साहित्यकार मन ल ए सम्मान दे जाय के फइसला लीन हे। एमा साहित्यकार मन ल पांच लाख रूपिया नगद अउ प्रमाण पत्र दे जाही। समारोह म बोलत मुख्यमंत्री ह प्रदेस म रेसम कीट अउ मधुमक्खी पालन ल कृषि के दर्जा दे अउ ‘छत्तीसगढ़ कुक्कुट पालन प्रोत्साहन योजना‘ सुरू करे के घोसना करीन। एखरे संग अब कुक्कुट पालन मन ल कमती दर म बिजली देवाय जाही।
कार्यक्रम म मुख्यमंत्री ह नोनी अउ माईलोगिन मन ले छेड़छाड़ अउ दुष्कर्म के आरोपी मन ल सरकारी नौकरी म रोक लगाय के ऐलान करीन। उहें, मुख्यमंत्री ह दूर-दराज के सरकारी स्कूल मन म ग्यारहवीं अउ बारहवीं के पढ़ईया लइका मन ल इंजीनियरिंग अउ मेडिकल के परीक्षा के तैयारी करे खातिर देस के बने कोचिंग संस्था ले ऑनलाइन कोचिंग मुफत म देवाय जाही। एखर बर जम्मों विकासखंड मुख्यालय म ऑनलाइन कोचिंग कक्षा के बेवस्था करे जाही। मुख्यमंत्री ह किहीन कि प्रदेस के सबो जिला म कम से कम एक कॉलेज म पोस्ट ग्रेजुएट कक्षा के पढ़ई के सुभीता देवाय जाही।
स्वतंत्रता दिवस-02
उहें, सरकारी कॉलेज म पढ़ईया लइका मन ल कॉलेज आय-जाय बर बस ले मुफत म परिवहन सुविधा मिलही। राज्य के जउन क्षेत्र म छत्तीसगढ़ी भासा बोले जाथे, उहां छत्तीसगढ़ी भासा अउ आदिवासी क्षेत्र म उहां के स्थानीय बोली ल कक्षा पहली ले पांचवीं तक पाठ्यक्रम के रूप म एक बिसय म रूप म सामिल करे जाही।
श्री बघेल ह शहरी स्वच्छता दीदी अउ सहरी आजीविका के क्षेत्र म काम करत सामुदायिक संगठन के मानदेय म बीस-बीस प्रतिसत अउ अंशकालीन सफाई कर्मचारी अउ मध्यान्ह भोजन ले जुड़े रसोईया मनके मानदेय म पांच-पांच सौ रूपिया प्रतिमाह बढ़वार करे के घोसना करीन। श्री बघेल ह प्रदेस म निर्माण ले जुड़े श्रमिक मन बर मुख्यमंत्री निर्माण श्रमिक सहायता पेंसन योजना सुरू करे के ऐलान करीन। एमा दस साल ले पंजीयन होय मजदूर जिखर आयु साठ बछर पूरा होगे हे, ओमन बर जीवनभर हर महीना पन्द्रह सौ रूपिया मासिक पेंसन दे जाही।
समारोह म मुख्यमंत्री ह प्रदेस के सात झन अधिकारी मन ल पुलिस वीरता पदक, ग्यारह झिन अधिकारी मन ल भारतीय पुलिस पदक, दू अधिकारी ल गृह रक्षक अउ नागरिक सुरक्षा सराहनीय सेवा पदक अउ एक झन ल राष्ट्रपति के विशिष्ट सेवा पदक ले सम्मानित करीन। उहें, ओमन सुराजी गांव योजना म तीन ठिन गौठान ल बने काम बर इनाम दीन। एमा राजनांदगांव जिला के गांव के अमलीडीह, दुरूग जिला के चंदखुरी अउ सारंगगढ़-बिलाईगढ़ जिला के हिर्री गौठान प्रबंधन समिति सामिल हे। ए मउका म म केन्द्रीय बल म सीआईएसएफ अउ राज्य बल म छत्तीसगढ़ जेल ल मार्चपास्ट म पहिली पुरस्कार दे गीस। सांस्कृतिक कारीकरम म लक्ष्मीनारायण कन्या स्कूल अव्वल स्थान बनईस। पाछु मुख्यमंत्री ह स्वतंत्रता दिवस के मउका म राजधानी रईपुर के टाउनहाल म जनसंपर्क विभाग कोति ले राखे गे छायाचित्र प्रदर्सनी के सुभारंभ करीन।
स्वतंत्रता दिवस-राजभवन/जिले-01
स्वतंत्रता दिवस के मउका म आज राज्यपाल विश्वभूषण हरिचंदन ह राजभवन म झंडा फहरा के परेड के निरीक्षण करीन। ओमन राजभवन के कर्मचार के परिवार वाले अउ लइका मन ल भेंट करीन। उहें, जिला मुख्यालय म विभागीय मंत्री अउ संसदीय सचिव मन ह झंडा फहरा के मुख्यमंत्री के प्रदेस के जनता के नाव संदेस के वाचन करीन।
उप मुख्यमंत्री टी.एस. सिंहदेव ह अंबिकापुर, विधानसभा अध्यक्ष डॉक्टर चरणदास महंत ह मनेन्द्रगढ़-चिरमिरी-भरतपुर जिला मुख्यालय, मंत्री रविन्द्र चौबे ह बेमेतरा, ताम्रध्वज साहू ह दुरूग अउ मंत्री मोहम्मद अकबर ह कवर्धा म तिरंगा फहरईन। अइसने, मंत्री अमरजीत भगत ह राजनांदगांव, जयसिंह अग्रवाल ह गौरेला-पेण्ड्रा-मरवाही, अनिला भेंडिया ह बालोद, उमेश पटेल ह रायगढ़, मोहन मरकाम ह कोंडागांव, कवासी लखमा ह सुकमा, गुरू रूद्रकुमार ह मुंगेली, डॉक्टर शिवकुमार डहरिया ह जांजगीर-चांपा अउ सांसद ज्योत्सना चरणदास महंत ह कोरबा म झंडा फहरईन। नवा रईपुर के इंद्रावती भवन म राजस्व आपदा प्रबंधक सचिव नीलम महादेव एक्का ह ध्वजारोहण करीन।
रईपुर के इंदिरा गांधी कृषि विश्वविद्यालय म कुलपति डॉक्टर गिरीश चंदेल ह झंडा फहरईन। ए दउरान आजादी के अमृत महोत्सव म ‘मेरी माटी-मेरा देस‘‘ कारीकरम म कृषि महाविद्यालय रईपुर के दू सौ स्वयंसेवक मन ह अमृतकाल के पंचप्रण के शपथ लीन अउ पौधा लगईन।
अखिल भारतीय आयुर्विज्ञान संस्थान-एम्स रईपुर म चिकित्सा क्षेत्र म नवा सोध अउ अनुसंधान के प्रतिमान स्थापित करे के आह्वान के संग स्वतंत्रता दिवस मनाय गीस। ए बेरा म आजादी के अमृत महोत्सव म आधारित एक सेल्फी प्वाइंट घलो बनाय गे रिहीस, जिहां एम्स के सिक्षक, अधिकारी-कर्मचारी अउ छात्र मन सेल्फी लीन। कारीकरम म एम्स के अधिष्ठाता प्रोफेसर आलोक चन्द्र अग्रवाल ह झंडा फहरईन।
स्वतंत्रता दिवस-राजभवन/जिले-02
दक्षिण पूर्व मध्य रेलवे के बिलासपुर मुख्यालय समेत सबो रेलमंडल मन म स्वतंत्रता दिवस समारोह मनाय गीस। महाप्रबंधक आलोक कुमार ह बिलासपुर म झंडा फहरा के परेड के सलामी लीन।
एसईसीएल बिलासपुर म आज स्वतंत्रता दिवस समारोह म सह-प्रबंध निदेशक डॉक्टर प्रेमसागर मिश्रा ह तिरंगा फहरईन।
उहें, रईपुर के छत्तीसगढ़ स्टेट पावर कंपनी के मुख्यालय म पावर कंपनी के चेयरमेन अंकित आनंद ह ध्वजारोहण करीन।
उहें, प्रदेस भाजपा अध्यक्ष अउ सांसद अरूण साव ह रईपुर के प्रदेस कार्यालय कुशाभाऊ ठाकरे परिसर म अउ प्रदेस संगठन महामंत्री पवन साय ह जिला कार्यालय म ध्वजारोहण करीन। अइसने, प्रदेस कांग्रेस अध्यक्ष अउ सांसद दीपक बैज ह प्रदेस कांग्रेस मुख्यालय राजीव भवन म तिरंगा फहरईन।
ऐति, दुरूग जिला के खेल ग्राम पुरई म फ्लोटिंग स्वीमिंग एकेडमी के खिलाड़ी मन ह अनोखा ढंग ले स्वतंत्रता दिवस मनईन। ओमन तरिया म तवरत तिरंगा फहरईन हे।
अउ अब थोरकुन समाचार सार म-
– हर-घर तिरंगा अभियान म भाजपा कार्यकर्ता मन ह सक्ती जिला म महानदी बरेकेल कला म नाव म बइठ के तिरंगा यात्रा निकालीन।
अउ
– जांजगीर-चांपा जिला के कुदरी बैराज म नहाय बर गे दू झन छात्र के बुड़े ले मउत होगे।