छत्तीसगढ़ संगरा देशभर म काली सतहत्तरवंा स्वतंत्रता दिवस देशभक्ति अउ उछाह के संग मनाये जाही। प्रधानमंत्री नरेंद्र मोदी नई दिल्ली म ऐतिहासिक लालकिला के प्राचीर ले ध्वजारोहण करहीं अउ राष्ट्र ल संबोधित करही।
प्रदेश म घलो स्वतंत्रता दिवस के मउका म कतकोन कार्यक्रम कराये जाही। राजधानी रायपुर के पुलिस परेड ग्राउंड म राखे गे मुख्य समारोह म मुख्यमंत्री भूपेश बघेल बीहनिया नौ बजे ध्वजारोहण करके परेड के सलामी लीही। एखर बाद ओमन ह पदक अलंकरण अउ पुरस्कार वितरण करहीं। ए मउका म पुलिस परेड ग्राउंड म पीटीआई ड्रील शो अउ सांस्कृतिक कार्यक्रम के संग पुलिस महिला बैंड के प्रस्तुती होही।
उंहे उप मुख्यमंत्री टी.एस. सिंहदेव सरगुजा अउ विधानसभा अध्यक्ष डॅाक्टर चरणदास महंत मनेन्द्रगढ़-चिरमिरी-भरतपुर जिला मुख्यालय म राखे गे समारोह म तिरंगा फहराही। दूसर जिला मुख्यालय म घलो मंत्रीगण, संसदीय सचिव अउ विधायक राष्ट्रीय झंडा फहराही अउ मुख्यमंत्री के प्रदेश के जनता के नाव देगे संदेश के वाचन करही।
स्वतंत्रता दिवस के पहिली संझा जारी अपन संदेश म राज्यपाल विश्वभूषण हरिचंदन ह प्रदेशवासी मन ल पूरा देशवासी, सेना के जवान अउ स्वतंत्रता सेनानी मन ल शुभकामना दीन हे।
स्वतंत्रता दौड़
स्वाधीनता दिवस के एक दिन पहिली आज प्रदेशभर म स्वतंत्रता दौड़ के आयोजन करे गीस। राजधानी रायपुर म निकाले गे तिरंगा रैली म केंद्रीय रिजर्व पुलिस बल-सीआरपीएफ के जवान मन संग आम लोगन ह घलो बढ़ चढ़के हिस्सा लीन।
उंहे दुर्ग म विधायक अरूण वोरा ह स्वतंत्रता दौड़ ल हरा झंडा दिखाइन। ये दौड़ रविशंकर स्टेडियम ले शुरू होके गांधी चौक, पटेल चौक अउ इंदिरा मार्केट होवत वापिस रविशंकर स्टेडियम पहुंचीस । ए दौड़ म महापौर धीरज बाकलीवाल अउ संभाग आयुक्त महादेव कावरे संगरा दूसर बड़े अधिकारी अउ जन प्रतिनिधि मन शामिल होइन।
ओति जगदलपुर के मंा दंतेश्वरी परिसर ले शुरू होय स्वतंत्रता दौड़ ल पद्मश्री धरमपाल सैनी अउ संसदीय सचिव रेखचंद जैन ह हरा झंडा दिखइन।अइसने सुकमा जिला म राखे गे सद्भावना दौड़ जगदलपुर-दंतेवाड़ा चौक ले शुरू होके मिनी स्टेडियम म सिरइस।
उंहे कोंडागांव म राखे गे दौड़ म आम नागरिक, जन प्रतिनिधि, स्कूली लईका अउ अधिकारी कर्मचारी मन ह हिस्सा लीन। ए मउका म विजेता मन ल पुरस्कार घलो दे गीस।
विभाजन विभीषिका स्मृति दिवस
आज विभाजन विभीषिका स्मृति दिवस हरय। प्रधानमंत्री नरेंद्र मोदी ह भारत के विभाजन के दउरान अपन जान गंवाने वाला लोगन मन ल श्रद्धांजलि दीन अउ उंखर पीड़ा ल सुरता करीन।
ए मउका म दक्षिण पूर्व मध्य रेलवे के रायपुर मंडल ह रायपुर स्टेशन परिसर म एक ठन कार्यक्रम के आयोजन करे गीस। कार्यक्रम म मुख्य अतिथि के रूप म सन्निर्माण कर्मकार कल्याण बोर्ड के भूतपूर्व अध्यक्ष मोहन एन्टी संगरा दूसर जन प्रतिनिधि मौजूद रीहिन। कार्यक्रम म भारत स्काउट अउ गाईड डहार ले नुक्कड़-नाटक सफर के प्रस्तुती दे गीस।
पुलिस पदक
केंद्रीय गृह मंत्रालय ह पुलिस पदक के घोषणा कर देहे। ए बखत स्वतंत्रता दिवस म नौ सौ चौवन पुलिस कर्मी मन ल पुलिस पदक ले सम्मानित करे गेहे। स्वतंत्रता दिवस के एक दिन पहिली जारी करे गे ए सूची म छत्तीसगढ़ के पैंतीस पुलिस अधिकारी अउ कर्मी मनके नाम हे। पुलिस विभाग के ये अधिकारी मन ल पुलिस वीरता पदक, विशिष्ट सेवा पदक अउ सराहनीय सेवा पदक ले सम्मानित करे जाही।
डीआईजी रैंक के अधिकारी कमलोचन कश्यप ल विशिष्ट सेवा बर राष्ट्रपति पुलिस पदक दे जाही। उंहे एसपी रैंक के आईपीएस मोहित गर्ग अउ निरीक्षक लक्षमण केवट के संगेच उप निरीक्षक पिल्लूराम मंडावी, जोगीराम पोडियाम, हिडमा पोडियाम संगरा चौबीस झन पुलिस कर्मी मन ल पुलिस वीरता पदक ले सम्मानित करे जाही।
उंहे सराहनीय सेवा बर डीआईजी रैंक के नेहा चंपावत के अलावा रजनराम भगत, भावना पांडे अउ गणपत प्रसाद पांडे संगरा दस झन पुलिस अधिकारी अउ कर्मी मन ल पुलिस पदक दे जाही।
मुख्यमंत्री भूपेश बघेल, गृहमंत्री ताम्रध्वज साहू अउ पुलिस महानिदेशक अशोक जुनेजा ह पुलिस पदक के चुने गे सबो पुलिस अधिकारी कर्मचारी मन ल अपन शुभकामना दीन हे।
स्वतंत्रता सुरक्षा व्यवस्था
स्वतंत्रता दिवस के मउका म बस्तर संभाग म सुरक्षा के कड़ा इंतजाम करे गेहे। स्थानीय पुलिस बल, डीआरजी, एसटीएफ, कोबरा अउ केंद्रीय अर्धसैनिक बल डहार ले अंदरूनी अउ सीमावर्ती क्षेत्र म लगातार गश्त करे जावत हे।
बस्तर रेंज के पुलिस महानिदेशक सुंदरराज पी. बस्तर क्षेत्र के शांति सुरक्षा अउ विकास बर सर्वोच्च बलिदान देवइया सुरक्षा बल के सदस्य मनके शहादत के सुरता करीन। ओमन ह पाछू कुछएक बछर म माओवाद विरोधी अभियान म मिले सफलता के उल्लेख करत आश्वस्त करीन कि अवइया दिन म बस्तर संभाग ले वामपंथ उग्रवाद ल समाप्त करत क्षेत्र ल एक ठन नवा पहचान देवाय जाही।
ईडी-हाईकोर्ट याचिका
प्रवर्तन निदेशालय-ईडी ह छत्तीसगढ़ हाईकोर्ट म याचिका दायर करके शराब घोटाला मामला के सीबीआई जांच के मंाग करीन हे। याचिका म आरोप लगाय गे हवय कि छत्तीसगढ़ सरकार ह आरोपी मन ल संरक्षण देवत हे।
ईडी के विशेष लोक अभियोजक डॅाक्टर सौरभ पांड हे पुष्टि करीन हे कि ईडी डहार ले छत्तीसगढ़ उच्च न्यायालय म एक ठन याचिका दायर करे गेहे। एमा कोयला अउ शराब घोटाला मामला म जेल म बंद आरोपी मनके जिक्र करत राज्य सरकार उपर कथित रूप ले आरोपी मन ल संरक्षण दे संगरा कतकेान दूसर आरोप लगाय गे हवय। याचिका म कोयला घोटाला अउ अवैध वसूली के मामला म जेल म बंद आरोपी मन ल मिलत विशेष सुविधा के हवाला देगे हवय।
ईडी ह शराब घोटाला मामला के बारे म बतावत याचिका म केहे हे कि राज्य सरकार ल ए घोटाला म संज्ञान लेबर लिखे गे चिट्ठी म घलो कोनो कार्रवाई नइ करे गेहे। ईडी डहार ले याचिका म यहू आरोप लगाय गे हवय कि राज्य सरकार पुलिस ले ईडी म निगरानी करावत हे। ये आरोप ल साबित करे बर ईडी ह याचिका संग कुछएक डिजीटल सबूत घलो पेश करे हे।
इही बीच छत्तीसगढ़ हाईकोर्ट ह आबकारी मामला म ईडी डहार ले आरोपी बनाय गे त्रिलोक सिंह ढिल्लन, अउ नीतेश पुरोहित ल अंतरिम जमानत दे देहे। कोर्ट ह जमानत मंजूर करत मामला के अगला सुनवाई चार हफ्ता बाद करे के आदेश जारी करीन हे। उंहे ए मामला के एक झन अउ आरोपी अनवर ढेबर के जमानत घलो चार हफ्ता बर बढ़ा दे गेहे।
एल्मागुंडा-बिजली सेवा
सुकमा जिला के माओवाद प्रभावित एल्मागुंडा म आजादी के बाद पहिली घांव बिजली पहुचे हे। स्वतंत्रता दिवस के एक दिन पहिली चौदा अगस्त के ए गांव म बिजली सेवा शुरू करे गीस। बिजली पहुंचे ले स्थानीय गा्रमीण मन बहुते खुश हे। बताय जात हवय कि सीआरपीएफ के डीआईजी अरविंद राय, जिला कलेक्टर हरीश एस. अउ पुलिस अधीक्षक किरण चौहान के प्रयास ले ए गांव म बिजली सेवा शुरू करे जा सके हे। स्थानीय ग्रामीण मन ह ये उपलब्धि बर सरकार, जिला प्रशासन अउ सीआरपीएफ बर आभार जताइन हे।
ट्रेन परिचालन
दक्षिण पूर्व मध्य रेलवे के आने आने रेलखंड म तकनीकी काम के सेती सोला ले तेईस अगस्त के बीच कुछएक ट्रेन के परिचालन प्रभावित रीही। ए दउरान रायपुर-गेवरा रोड, बिलासपुर-शहडोल, रायपुर-डोंगरगढ़, गोंदिया-कटंगी पैंसेजर अउ रायपुर-दुर्ग मेमू रद्द रीही।
हाथी हमला
महासमुंद जिला म हाथी मनके हमला के दू ठन अलग-अलग घटना म एक झन ग्रामीण के मउत होगे उंहे दू झन दूसर ग्रामीण मन घायल होगे हवय। घटना के बाद वन विभाग ह आसपास के गांव म मुनादी कराके अलर्ट जारी कर देहे। संगेसंग लोगन ल हाथी विचरण वाले क्षेत्र म जाय ले मना करे गेहे। पहिली घटना संाकरा क्षेत्र ले लगे कुशगढ़ गांव के हे। जिहंा आज बीहनिया दंतैल हाथी ह एक झन मनखे ल रौंदके मार दीस।
उंहे दूसर घटना थरगांव केहे जिहंा स्थानीय लोगन अउ वन विभाग के अमला दंतैल हाथी मन ल खदेड़े के प्रयास करत रीहिस, तभे हाथी मन ह हम ला कर दीन, जेमा दू झन मनखे घायल होगीन। बताय गे हवय कि ये दंतैल हाथी मन ह अपन झंुड ले अलग होगे हवय।