‘हर घर तिरंगा‘
देसवासी मन म राष्ट्रप्रेम के भावना ल जागृत करे बर ‘‘हर घर तिरंगा अभियान‘‘ आज ले चालू होगे हे। प्रधानमंत्री नरेंद्र मोदी ह सबो देस वासियों मन ले पन्द्रह अगस्त तक चलइया ए अभियान म भाग ले बर अउ हर घर तिरंगा डॉट कॉम वेबसाइट म तिरंगा संग फोटो अपलोड करे के अपील करे हे। प्रधानमंत्री ह किहीन कि तिरंगा ह स्वतंत्रता अउ राष्ट्रीय एकता के भावना के प्रतीक हरय। ओमन किहीन कि हरेक भारतीय ह भावनात्मक रूप ले तिरंगा संग जुड़े हवय। अउ ए ह राष्ट्र ल आगू बढ़ाय खातिर अउ जादा मेहनत करे बर प्रेरित करथे।
उहें, केंद्रीय संस्कृति मंत्रालय ह केहे हे कि तिरंगा संग फोटो अपलोड कर के हरेक मनखे ए अभियान म सामिल हो सकत हे। ए अभियान के उद्देस्य सामूहिक भागीदारी अउ जन भागीदारी ल बढ़ाय के भावना के संगे आजादी के अमृत महोत्सव के तिहार मनाना हे।
एति छत्तीसगढ़ म घलो हर घर तिरंगा अभियान ल उच्छाह संग मनाय जात हे। बिलासपुर रेल मंडल डहार ले अधिकारी कर्मचारी अउ आम नागरिक मन ल अपन सोसल मीडिया अकांउट म तिरंगा प्रदर्सित करे बर बढ़वई दे जात हे।
पुलिस इंस्पेक्टर-पदक
केन्द्र सरकार ह प्रदेस के तीन झिन पुलिस अधिकारी मन ल एक्सीलेंस इन्वेस्टिगेसन बर ए बछर के यूनियन होम मिनिस्टर मेडल देके घोषणा करे हे। जेमा सब इंस्पेक्टर नीता राजपूत, सब इंस्पेक्टर आसीर्वाद रहाटगांवकर अउ इंस्पेक्टर नवीन बोरकर सामिल हे।
मुख्यमंत्री भूपेश बघेल अउ गृह मंत्री ताम्रध्वज साहू ह तीन झिन अधिकारी मन ल मेडल मिले के बधाई अउ सुभकामना दीन हे।
मेरी माटी-मेरा देश-चित्र प्रदर्शनी
आजादी के अमृत महोत्सव के चलत प्रदेस ए बेरा ‘‘मेरी माटी मेरा देस‘‘ ए अभियान चलाय जात हे। इंही, कड़ी म केंद्रीय संचार ब्यूरो प्रादेसिक कार्यालय रइपुर के तत्वाधान म बिलासपुर जिला के नगर पंचायत बिल्हा म काली ले तीन दिन वाले मल्टी मीडिया चित्र प्रदर्सनी राखे जाही। ए दउरान हरेक दिन कई ठिन प्रतियोगिता अउ सांस्कृतिक कारीकरम होही। चित्र प्रदर्सनी के आगू दिन बिल्हा के विधायक धरमलाल कौशिक कारीकरम के माई पहूना होही।
ओति मुंगेली के शासकीय विज्ञान महाविद्यालय के राष्ट्रीय सेवा योजना इकाई डहार ले वसुधा संवर्धन अउ वीरों का अभिनंदन समारोह राखे गीस। ए कारीकरम म सेना के पूर्व जवान इच्छाशंकर सिंह, महानंद साहू, धमेन्द्र राजपूत अउ पुलिस जवान सुनील दिवाकर के अभिनंदन करे गीस। उहें, महाविद्यालय जघा म स्थित अमृत वाटिका कई किसम के पौधा रोपे गीस।
ध्वजारोहण/स्वतंत्रता दौड़
प्रदेस म परन दिन स्वतंत्रता दिवस ल देसभक्ति अउ उच्छाह के संग मनाय जाही। मुख्यमंत्री भूपेश बघेल ह राजधानी रइपुर के पुलिस परेड ग्राउण्ड म राखे गे, बड़का समारोह म झण्डा फहराके परेड के सलामी लिहीं। उहें, विधानसभा अध्यक्ष डॉक्टर चरणदास महंत, मनेन्द्रगढ़-भरतपुर-चिरमिरी जिला मुख्यालय म झण्डा फहराही फेर उप मुख्यमंत्री टी.एस. सिंहदेव ह सरगुजा म झण्डा फहराही। अइसने आने जिला मुख्यालय मन म राखे गे। स्वतंत्रता दिवस समारोह म राज्य सरकार के मंत्री मन, संसदीय सचिव मन अउ जन-प्रतिनिधि मन झण्डा फहराही।
इंही बीच, स्वतंत्रता दिवस के पहिली काली चौदह अगस्त के स्वतंत्रता दौड़ राखे जाही। ए कारीकरम म जन-प्रतिनिधि पढ़ईया लइका, खिलाड़ी अउ सरकारी विभाग के अधिकारी कर्मचारी के संगे आम लोगन घलो सामिल होही। ओति राजनांदगांव म घलो बिहनिया सात बजे स्टेट हाई स्कूल ले स्वतंत्रता दौड़ सुरू होही। जउन ह कई ठन रद्दा ले होवत वापिस स्टेट हाई स्कूल मैदान म संपन्न होही।
मतदाता सूची विशेष शिविर
छत्तीसगढ़ म अवईया विधानसभा के चुनाव के पहिली मतदाता सूची के बिसेस संक्षिप्त पुनरीक्षण के काम चलत हे। भारत निर्वाचन आयोग के निरदेस ले आज घलो एखर बर सिविर राखे गे रिहीस। उन्नीस अउ बीस अगस्त के घलो ए बिसेस सिविर राखे जाही। जेखर मन के नाव वोटल लिस्ट म नइ जुड़े हे या फेर गलत नाव अउ पता दर्ज हे ओमन घलो ए सिविर म एला सुधरवा सकत हे। ए बिसेस सिविर म आधार नंबर ल मतदाता परिचय पत्र ले घलो जोड़े जाही।
भाजपा-प्रवेश
लोरमी के विधायक धर्मजीत सिंह, पूर्व आईएफएस अधिकारी एस.एस.डी. बड़गैय्या अउ धीरेन्द्र गिरी गोस्वामी आज भाजपा म सामिल होगे हे। विधानसभा चुनाव बर सह प्रभारी बनाय गेहे केन्द्रीय स्वास्थ्य मंत्री मनसुख मांडविया ह ओमन ल पार्टी के सदस्यता देवाइन। ए मउका म पूर्व मुख्यमंत्री डॉक्टर रमन िंसंह, पार्टी के सह प्रभारी नितिन नबीन, प्रदेस अध्यक्ष अरूण साव अउ नेता प्रतिपक्ष नारायण चंदेल घलो मौजूद रिहीन।
भाजपा म सामिल होय के बाद धर्मजीत सिंह ह पत्रकार मन ले गोठबात करत किहीन कि विश्व के सबले बड़का दल भाजपा म सामिल होना मोर बर गौरव वाले बात हे। ए बतादन कि श्री सिंह ह चार घांव के विधायक हरय।
भरोसे का सम्मेलन
जांजगीर-चांपा जिला म आज भरोसे का सम्मेलन कारीकरम राखे गे रिहीस। जेमा कांग्रेस के राष्ट्रीय अध्यक्ष अउ राज्यसभा म नेता प्रतिपक्ष मल्किर्जुन खड़गे सामिल होइन। ए मउका म श्री खड़गे ह चार सौ सड़सठ करोड़ रूपिया के कई ठिन विकास काम के लोकार्पण अउ शिलान्यास करीन। संगे चिटफंड कंपनी के छै सौ ले जादा निवेसक मन ल चवालीस लाख रूपिया ले जादा के चेक दीन। संगेसंग ओमन हितग्राही मन ल ट्राइसिकल अउ आने जिनिस बांटिन उहें, जिला म दसवीं, बारहवीं परीक्षा म मेरिट लिस्ट म आय पढ़ईया लइका मन ल टैबलेट बांटिन।
सम्मेलन म बोलत श्री खड़गे ह किहीन कि राज्य के कांग्रेस सरकार ह जउन वादा करे रिहीस ओला पूरा करे हे। ओमन यहू किहीन कि किसान मन के कर्जा माफी ल लेके जवान लइका मन ल बेरोजगारी भत्ता देके काम घलो राज्य सरकार करत हे। उहें, प्रदेस के बयालीस लाख परिवार मन ल बिजली बिल हाफ योजना के फायदा मिलत हे। ओमन बताइन कि राज्य सरकार ह सांस्कृतिक क्षेत्र म घलो कई ठिन काम करे हे। देवगुड़ी योजना अउ रामवन गमन, पर्यटन परिपथ बनाके सांस्कृतिक धरोहर मन ल सहेजे के काम चलत हे।
कारीकरम म मुख्यमंत्री भूपेश बघल ह किहीन कि राज्य सरकार ह सबो वर्ग मन के संरक्षण अउ ओमन ल आगू बढ़ाय के काम करत हे। ओमन किहीन कि छत्तीसगढ़ के परंपरा अउ संस्कृति ल देस-विदेस म नवा चिन्हारी मिले हे। श्री बघेल ह किहीन कि राज्य सरकार किसान, मजदूर, गरीब, महिला, जवान लइका समेत सबो वर्ग ल आगू बढ़ाय के काम करत हे। ए मउका म ओमन जांजगीर-चांपा म बने नवा मेडिकल कॉलेज ल मिनीमाता के नाव म करे के घोषणा करीन।
एखर पहिली, श्री खड़गे ह कई ठिन विभाग डहार ले लगाय गे स्टॉल अउ प्रदर्सनी के अवलोकन करीन।
भूकंप झटका
प्रदेस के कोरबा गौरेला-पेण्ड्रा-मरवाही जिला म आज भूकंप के हल्का झटका महसूस करे गे हे। रिक्टर स्केल म एखर तीव्रता चार दसमलव पांच (4.5) दर्ज करे गेहे। भूकंप के झटका जनाते साठ लोगन मन डर्रा के घर ले बाहिर निकल गीन। बताय जात हे कि बिहनिया करीबन नौ बज के नौ मिनट म भूकंप के झटका जनाइस। जेखर केन्द्र कोरबा जिला के पसान तीर बताय गेहे।
पावर लिफ्टिंग
उत्तराखंड के काशीपुरा म होय सीनियर नेसनल पावर लिफ्टिंग चैंपियनशिप म दक्षिण पूर्व मध्य रेलवे के खिलाड़ी मन जोरदरहा प्रदर्सन करे हे। जे. रामा लक्ष्मी ह संतावन किलोग्राम वर्ग समूह म अउ हरि ओम ह एक सौ पचास किलोग्राम वर्ग समूह म स्वर्ण पदक अपन नाव करीन। उहें, संतोषी मांझी ह तिरसठ किलोग्राम वर्ग समूह म रजत पदक अपन नाव करीन।
मौसम
प्रदेस म अवइया चौबीस घंटा के दउरान एक-दू जघा म थोरकून ले जादा बरसा या फेर गरजइ-चमकई के संगे सिटीर-साटर पानी गिर सकत हे। मौसम विभाग ले मिले जानकारी के मुताबिक हिमालय के तराई म एक ठिन द्रोणिका होय के सेति प्रदेस म एक-दू जघा म गाज घलो गिर सकत हे।