छत्तीसगढ़ के मुख्य निर्वाचन पदाधिकारी रीना बाबासाहेब कंगाले ह बताइन कि पाछू दू अगस्त के मतदाता सूची के प्रारंभिक प्रकाशन होगे हे, अब आगू अवईया इकत्तीस अगस्त तक मिले दावा आपत्ति के निराकरण करे जाही। उहें, चार अक्टूबर के मतदाता सूची के आखिरी प्रकाशन होही।मुख्यमंत्री-नियुक्ति पत्र
मुख्यमंत्री भूपेश बघेल ह आज रायपुर म राखे गे कारीकरम म शिक्षक भर्ती के अंतर्गत व्याख्याता मन ल नियुक्ति पत्र अउ पढ़ईया लइका मन ल हायर सेकेण्ड्री सह-आई.टी.आई ट्रेड प्रमाण पत्र बांटिन। ए मउका म मुख्यमंत्री ह किहीन कि आज रोजगार बर आईटीआई पास युवा मनके बड़ जरूरत हे। आईटीआई करे के इच्छुक विद्यार्थी मन ल हायर सेकेण्ड्री पास करे के बाद पूरा एक बछर आईटीआई के प्रशिक्षण लेना पड़थे, फेर अब बारहवीं पास करे के बेरा ही विद्यार्थी मन तिर एक प्रमाण पत्र होही, जो ओमन ल चयनित ट्रेड के एक्सपर्ट बना दीही। ए डिग्री ले ओमन ह जॉब घलो कर सकथे। श्री बघेल ह किहीन कि बारहवीं के संगेसंग आईटीआई के प्रमाण पत्र घलो मिले ले रोजगार के अवसर बड़ही।
कोंडगांव-नगर पालिका अध्यक्ष
कोंडागांव नगरपालिका परिषद के अध्यक्ष हेम कुंवर पटेल के निधन ले खाली होय अध्यक्ष पद बर होय चुनाव म कांग्रेस प्रत्याशी वर्षा यादव ह जीते हे। मतदान म कुल बाईस पार्षद मन भाग लीन, जेमा कांग्रेस प्रत्याशी वर्षा यादव ल ग्यारा वोट मिलिस, उंखर प्रतिद्वंदी भाजपा प्रत्याशी संगीता चक्रधारी ल दस वोट मिलीस फेर एक वोट ह निरस्त होगे।
स्वतंत्रता दिवस-समारोह आमंत्रित
प्रधानमंत्री नरेंद्र मोही ह पंद्रह अगस्त के नई दिल्ली के लाल किला म आयोजित स्वतंत्रता दिवस समारोह म ध्वजारोहण करही। ए कारीकरम म जम्मों देस ले लगभग एक हजार आठ सौ बिसेस पहूना मन सामिल होही। एमा छत्तीसगढ़ ले पांच किसान उत्पादक संगठन के प्रतिनिधि, समेत केन्द्र सरकार के आने-आने योजना के उन्तीस लाभार्थी परिवार ल घलो नेवता मिले हे।
राज्यपाल-विवि उद्घाटन
राज्यपाल विश्वभूषण हरिचंदन ह किहीन हे कि विद्यार्थी मन ल कौसल, ज्ञान अउ बुध्दि ले संपन्न होना चाही, जेखर ले ओमन ह बड़का सहर म पढ़ईया मन ले आगू बड़ सकय। विद्यार्थी मन ल अपनेच राज्य म पढ़ई लिखई के मामला म बराबर गुणवत्ता, बुनियादी ढांचा अउ सुविधा मिले अइसन प्रयास होना चाहिए। राज्पाल ह आंजनेय विश्वविद्यालय के उद्घाटन कारीकरम म ए बात किहीन।
राज्यपाल ह किहीन कि विश्वविद्यालय मन ह मात्र डिग्री लेके जघा झन बने बल्कि ए ह अइसन जघा बने जहां विद्यार्थी मनके सपना ल पोषित करे जाय, संभावना मन ल साकार अउ भविष्य ल आकार दे जाय। विश्वविद्यालय ह बस कक्षा अउ प्रयोगसाला मनके संग्रह नही होना चाहिए। एमा दूनिया अउ समाज ल सुघ्घर बनाय बर नवा-नवा अनुसंधान करके सकारात्मक बदलाव बर प्रतिबध्दता होना चाहिए।
उच्च शिक्षा प्रोत्साहन छात्रवृत्ति योजना
राज्य सरकार ह मुख्यमंत्री उच्च शिक्षा प्रोत्साहन छात्रवृत्ति योजना ल स्वीकृति प्रदान कर दे हे। ए योजना ले उच्च व्यावसायिक संस्थान म प्रवेश के बेरा विद्यार्थी मन ल अधिकतम पचास हजार रूपिया वार्षिक एकमुश्त पैसा दे जाही। ए योजना आईटीआई, एम्स, आईआईएम, एनएलयू जइसन संस्थान मन म प्रवेश लेवइया निम्न आय वर्ग के प्रतिभावान लइका मन के प्रवेश ल सरल बनाय अउ उंहला तुरंत आर्थिक सहायता देबर सुरू करे जात हे। एखर बर विद्यार्थी मनके चयन प्रवेश परीक्षा म मिले नंबर के संग मेरिट सूची म अनाथ, विकलांग लइका अउ विधवा के लइका मन ल प्राथमिकता दे जाही। मिले आवेदन के जांच राज्य स्तरीय समिति करही।
पटवारी-हड़ताल समायोजित
राजस्व और आपदा प्रबंधन विभाग के पटवारी मनके पन्द्रह मई ले पन्द्रह जून तक के करे गे हड़ताल अवधि ल उंखर अर्जित अउ अर्ध्दवैतनिक अवकाश म समायोजित करे के आदेश जारी करे गे हे। राजस्व विभाग ह ए बारे म सब्बों कलेक्टर मन ल पत्र लिखें हे।
विश्व हाथी दिवस
आज विश्व हाथी दिवस हवय। ए मउका म प्रदेस म जन-जागरूकता ले जुड़े अब्बड़ अकन आयोजन करे जावत हे। उहें, वन विभाग कोति ले प्रदेस के हाथी प्रभावित क्षेत्र म मानव-हाथी द्वंद के नियंत्रण बर कारीकरम चलाय जावत हे जेमा गांव म जंगली हाथी दल के अवई के पूर्व सूचना वायरलेस, मोबाईल अउ माईक ले मुनादी करा के दे जाथे। हाथी विचरण क्षेत्र अउ ओ लखटा के ग्रामीण मन ल हाथी ले बचे बर जरूरी समझाइस घलो दे जावत हे।
प्रधान मुख्य वन संरक्षक व्ही. श्रीनिवास राव ह बताइन कि प्रदेस म बड़ मात्रा म खाना-पानी अउ रहवास बर सुघ्घर जघा होय के कारण हाथी के संख्या सरलग बाढ़त हे।
बीएसपी-हॉफ बिजली
राज्य सरकार के हॉफ बिजली बिल योजना के लाभ अब भिलाई स्टील प्लांट टाउनशिप के उपभोक्ता मन ल घलो मिलही। ऊर्जा विभाग ह ए बारे म आदेश जारी कर दे हे। एखर ले पहिली भिलाई टाउनशिप म रहईया उपभोक्ता मन ल बीएसपी प्रबंधन कोति ले बिजली आपूर्ति करे के कारण ए योजना के लाभ नइ मिलत रिहीस।
हॉफ बिजली बिल योजना ले छत्तीसगढ़ राज्य विद्युत वितरण कंपनी के सब्बों घरेलू उपभोक्ता मन ल हर महिना खपत करे गे चार सौ यूनिट तक के बिजली उपर बने बिल के आधा पैसा ही देना होथे।
बाल वैज्ञानिक-प्रदर्शन
बिलासपुर के दयालबंद स्थित आत्मानंद उत्कृष्ट हिंदी माध्यम स्कूल म बाल वैज्ञानिक मनके प्रतिभा ल बढ़ाय बर नीति आयोग के निरदेसन म अटल टिंकरेथन के आयोजन करे गीस। एमा प्रदेस के एक सौ ग्यारा स्कूल के तीन सौ पन्द्रह बाल वैज्ञानिक मन ह आने-आने विषय उपर तइयार करे गे आविष्कार के प्रदर्शन करीन।
केन्द्र सरकार कोति ले सुरू करे गे अटल टिंकरिंग लैब म विद्यार्थी मन ल आने-आने मॉडल तइयार करे के तकनीक सिखाय जात हे।
अउ अब थोरकुन समाचार सार म-
– आज अंतर्राष्ट्रीय युवा दिवस हवय। ए मउका म मुख्यमंत्री भूपेश बघेल ह प्रदेस के सब्बों युवा मन ल बधाई अउ सुभकामना दीन हे।
– दुर्ग जिला म राष्ट्रीय राजमार्ग के कुम्हारी टोल प्लाजा म जीवन रक्षक तकनीक ले सुसज्जित एम्बुलेंस के सुविधा चोबीस घंटा उपलब्ध रइही। एखर ले हाइवे म सड़क दुर्घटना म घायल मनखे मन ल तत्काल मदद अउ प्राथमिक उपचार के सुविधा मिल सकही।
– भिलाई टाउनशिप म डेंगू उपर नियंत्रण अउ जन-जागरूकता बर बीएसपी के जन-स्वास्थ्य विभाग अउ दुर्ग जिला के मलेरिया विभाग कोति ले चलाय जावत अभियान म दवाई के छिड़काव करे गीस।
– सक्ति जिला के डभरा-हसौद मुख्य मार्ग के उपर पुलिया निर्माण के मांग बर भारतीय जनता युवा मोर्चा के कार्यकर्ता मन ह घोघरी गांव तीर प्रदर्सन करीन। एखर ले बने बेरा तक अवई-जवई ह बाधित रहीस।
अउ
– रईपुर जिला के अटारी स्थित स्वामी आत्मानन्द शासकीय अंग्रेजी माध्यम आदर्श महाविद्यालय म प्रवेश के आखिरी तारिख चउदा अगस्त हवय। जेन विद्यार्थी मन ऐमा ऑनलाईन प्रवेश नई ले पाए हे ओ मन ऑफलाईन माध्यम ले खुद उपस्थित होके प्रवेश ले सकथे।