मतदाता सूची म नाम जुड़वाय बर काली अउ परनदीन यानि बारा अउ तेरा अगस्त के मतदान केंद्र म विशेष शिविर के आयोजन करे जाही। जउन लोगन के नाम अभी तक मतदाता सूची म दर्ज नइ हे ओमन विशेष शिविर म जाके आवेदन दे सकत हे संगेसंग जेन मतदाता के नाम या पता गलत दर्ज होय हे वोमन घलो ए शिविर म एला सुधरवा सकत हे । ए विशेष शिविर म आधार नंबर ल मतदाता परिचय पत्र ले घलो जोड़े जाही।
छत्तीसगढ़ के मुख्य निर्वाचन पदाधिकारी रीना बाबा साहेब कंगाले ह किहीन कि लोकतंत्र ल सशक्त बनाय म श्रमिक मन के भागीदारी जरूरी हे। ए बात ओमन जिला प्रशासन रइपुर डहार ले औद्यौगिक क्षेत्र सरोरा म राखे गे मतदाता जागरूकता कार्यक्रम म किहीन। मुख्य निर्वाचन पदाधिकारी ह मजदूर मनले किहीन कि चुनाव लोकतंत्र के सब ले बड़का परब होथे। चुनाव म सबो झन के सक्रिय सहभागिता ले ही हमन जन-प्रतिनिधि मनके चुनाव करथन, एला सार्थकता तभे मिलही जब उद्योग के जम्मों मनखे अपन मताधिकार ल बउरही। ओमन अवइया चुनाव म पुरूष मनके संग क्षेत्र के महिला मन ले घलो वोट डाले के अपील करीन।
मेरी माटी मेरा देश
प्रदेश म ए दिन म मेरी माटी मेरा देश अभियान चलाये जात हे। एखर तहत महासमुंद, बालोद अउ जशपुर म नेहरू युवा केंद्र के युवा मन डहार ले ग्राम पंचायत म पचहत्तर स्वदेशी पौधा लगाये गीस, जेला अमृत वाटिका के नाम दे गेहे। ए दउरान युवा मन माटी ल हाथ म लेके पंचप्रण के शपथ लीन अउ सेल्फी लेके वेबसाइट म अपलोड करीन।
एति नेहरू युवा केंद्र बिलासपुर अउ यूनिसेफ छत्तीसगढ़ के संयुक्त तत्वावधान म गौरेला-पेण्ड्रा-मरवाही जिला के ग्राम पंचायत मंझगांव म प्रगतिशील युवा मंडल कोति ले पौधा लगाये गीस।
उंहे कबीरधाम जिला के माकरी ग्राम पंचायत म घलो लक्ष्य युवा मंडल ह पंचप्रण के शपथ लेबर पौधा रोपण करीन। अइसने सूरजपुर जिला म ए अभियान के तहत ग्राम पंचायत पस्ता म कटहल के पचहत्तर पौधा लगाये गीस। संघरा शपथ ग्रहण कार्यक्रम के आयोजन करे गीस।
अंतर्राष्ट्रीय युवा दिवस
राज्यपाल विश्वभूषण हरिचंदन ह प्रदेश के संग देशवासी मनले आहवान करे हे कि सबो लोगन मन हर घर तिरंगा अभियान म उछाह ले भाग लेवय। ओमन कीहिन कि हम देश के आजादी के पचहत्तर बछर ल आजादी के अमृत महोत्सव के रूप म मनावत हन। ए मउका म सबो घर म तिरंगा फहराये के ए महाअभियान ले न सिरिफ तिरंगा बर हमर व्यक्तिगत जुड़ाव मजबूत होही बल्कि राष्ट्र निर्माण के भावना घलो हमर दिल म मजबूत होही।
काली अंतर्राष्ट्रीय युवा दिवस हरय ए मउका म राज्यपाल विश्व भूषण हरिचंदन ह युवा मन ल बधाई अउ सुभकामना दीन हे। राज्यपाल ह किहीन कि युवा शक्ति ले ही देस के उन्नति होथे। युवा दिवस मनाय के उद्देश्य सामाजिक , आर्थिक अउ राजनीतिक मुद्दा मन म युवा मनके भागीदारी बढ़ाना हे अउ देस कि विकास म ओखर योगदान ल रेखांकित करना हे। राज्यपाल ह किहीन कि युवा मन ल हरित कौशल ले जोड़ के पर्यावरण अउ वन क्षेत्र म कौशल विकास के एक अच्छा पहल सरकार डहार ले करे जात हे।
मिनीमाता पुण्यतिथि
छत्तीसगढ़ के पहिली महिला सांसद मिनीमाता के आज पुण्यतिथि हरय। ए मउका म राजधानी रायपुर के शहीद स्मारक भवन म मिनीमाता स्मृति दिवस अउ प्रतिभा सम्मान समारोह राखे गीस। ए मउका म मुख्यमंत्री भूपेश बघेल ह सतनामी समाज के जादा वाले विकासखंड म मॉडल जैतखाम के निर्माण के घोषणा करीन। ओमन कार्यक्रम म सामाजिक उत्थान के दिशा म अच्छा काम करइया सतनामी समाज के ग्यारा महिला मन ल प्रतीक स्वरूप सम्मानित करीन, संघरा ओमन गुरू घासीदास साहित्य अउ संस्कृति अकादमी के नवा बने सदस्य मन ल पद अउ कर्त्तव्यनिष्ठा के शपथ दिलाइन।
भाजपा-शिकायत
भारतीय जनता पार्टी ह राष्ट्रीय बाल अधिकार संरक्षण आयोग ले छत्तीसगढ़ म नवजात लइका मनके मउत के जांच कराय के मांग करीन हे। भाजपा अध्यक्ष अरूण साव के अगुवई म सांसद विजय बघेल, गोमती साय अउ गुहाराम अजगल्ले ह ए संबंध म नई दिल्ली म आयोग ले शिकायत करीन हे।
आयोग ल सौंपे अपन पत्र म भाजपा नेता मन किहीन कि छत्तीसगढ़ विधानसभ म उप मुख्यमंत्री टी.एस. सिंहदेव कोति ले दे गे जानकारी अनुसार राज्य म जनवरी दू हजार उन्नीस ले जून दू हजार तेइस तक शून्य ले पांच साल तक उन्तालीस हजार दू सौ सड़सठ लइका मनके मउत होय हे जउन बहुत चिंता के बात हे।
भाजपा नेता मन आरोप लगाइन कि ए आकड़ा ले स्पष्ट हे कि राज्य सरकार नवजात शिशु मन ल स्वास्थ्य सुविधा देवाय म विफल रहे हे। ओमन आयोग ले ए मामला के जांच अउ जरूरी कार्रवाई करे के आग्रह करीन हे।
राष्ट्रीय कृमि मुक्ति दिवस
उप मुख्यमंत्री अउ स्वास्थ्य मंत्री टी.एस. सिंहदेव ह काली राष्ट्रीय कृमि मुक्ति दिवस अउ फाइलेरिया ले बचाव बर सामूहिक दवा सेवन अभियान के वर्चुवल सुभारंभ करीन। ए अभियान के तहत राज्य के जम्मों जिला मन म एक साल ले उन्नीस साल तक के लइका अउ किशोर मन ल कृमि मारे के दवा अलबेंडाजॉल के गोली खवाय गीस। दवा खाय ले छूटे लइका मन ल सत्रह अगस्त के माप-अप दिवस म एला खवाय जाही।
ए कार्यक्रम के अंतर्गत सात जिला दुर्ग, बालोद, बेमेतरा, जांजगीर-चांपा, सक्ति, महासमुंद अउ मुंगेली म सामूहिक दवा सेवन अभियान सुरू करे जात हे, जउन इक्कीस अगस्त तक चलही।
संभाग आयुक्त बैठक
रइपुर संभाग आयुक्त डॉक्टर संजय अलंग ह वीडियो कॉन्फ्रेंसिंग के माध्यम ले संभाग म सड़क म ले आवारा पशु मन ल हटाए ओखर सेती सड़क दुर्घटना ल रोके के कार्रवाई के समीक्षा करीन। वीडियो कॉन्फ्रेंसिंग ले होय ए बइठका म पुलिस महानिरीक्षक रतन लाल डांगी समेत संभाग के जम्मों पांच जिला रइपुर, बलौदाबाजार भाटापारा, गरियाबंद, धमतरी अउ महासमुंद के कलेक्टर सामिल होइन। बइठका के दउरान डॉक्टर अलंग ह अवारा मवेशी मन ल सड़क ले हटा के गौठान, कांजी हाउस या गौसाला म रखे के संगेसंग ग्रामीण अउ मवेशी पालक मनले गोठ-बात करके समस्या के समाधान निकाले के निरदेस जम्मों कलेक्टर मन ल दीन।
बइठका म बताय गीस कि रइपुर संभाग म पाछू एक हफ्ता म ग्यारह हजार ले जादा मवेशी मन ल सड़क ले हटाय गे हे। ओमन ल बड़का गौठान, गांव के कांजीहाउस या गौसाला म सुरक्षित राखे गे हे। एखरे संग मवेशी के मालिक मनले लगभग पैंतालीस हजार रूपिया जुर्माना घलो वसूल करे गे हे।
गांजा-बरामद
महासमुंद जिला के सिंघोड़ा पुलिस ह एक ठिन अंतर्राज्यीय गांजा तस्कर ल गिरफ्तार करे हे। आरोपी के कार ले दू क्विंटल गांजा बरामद करे गेहे। जेखर अनुमानित कीमत पचास लाख रूपिया बताय गेहे। पुलिस के पूछताछ म भिलाई निवासी आरोपी युवक ह बताइस के ओ ह गांजा ओड़िसा ले महाराष्ट्र ले जावत रिहीस।
बातों-बातों-में
सुनइया मन ल बतादन कि प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत नई राष्ट्रीय शिक्षा नीति उपर शशांक शर्मा ले लेगे भेंटवार्ता प्रसारित करे जाही। एखर दूसरइया कड़ी के प्रसारण आकाशवाणी के रायपुर केन्द्र डहार ले काली बारा अगस्त के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
– छत्तीसगढ़ राज्य ओपन स्कूल डहार ले सितंबर अक्टूबर दू हजार तीस म ले जाने वाला परीक्षा के समय-सारिणी तय कर दे गेहे। एखर तहत हायर सेकेण्डरी के परीक्षा छब्बीस सितंबर ले बारह अक्टूबर तक अउ हाई-स्कूल के परीक्षा छब्बीस सितंबर ले दस अक्टूबर ले जाही।
– संस्कृति विभाग डहार ले राज्य के आर्थिक रूप ले कमजोर होनहार कलाकार छात्र मनले अर्थाभाव ग्रस्त होनहार कलाकार छात्रवृत्ति प्रोत्साहन बर पच्चीस सितंबर तक आवेदन मंगाए हे।
अउ
– नारायणपुर जिला म सुरक्षा बल ह ताडोनार-आकाबेड़ा रद्दा म पांच किलो के वजनी आईईडी बरामद करे गेहे। जेला बम निरोधक दस्ता ह मउकाच म निष्क्रिय कर दीस।