प्रधानमंत्री नरेंद्र मोदी ह लोकसभा म विपक्ष डहार ले पेस अविश्वास प्रस्ताव म होय चर्चा के जवाब देत कहिन कि विपक्ष ल गरीब के भूख के चिंता नइ हे भलुक सत्ता के भूख उंखर दिमाग म सवार हे। ओमन कहिन कि भारत के जनता ह बछर दू हजार उन्नीस म होय लोकसभा चुनाव म विपक्ष के प्रति अविश्वास जताय रीहिन। श्री मोदी ह विपक्ष उपर कटाक्ष करत कीहिन कि जेखर खुद के बहीखाता बिगड़े हे उही मन हमर ले हिसाब मांगत हे।
प्रधानमंत्री ह कहिन कि विपक्ष बिना कोनो तैयारी के ये अविश्वास प्रस्ताव लेके आय रीहिस। ओमन कीहिन कि ए सदी के ये ह वो कालखंड हरय जब देश के सबो सपना पूरा होही। ये कालखंड जउन गढ़ही ओखर प्रभाव ए देश उपर अवइया एक हजार बछर रीही । ओमन कीहिन कि केंद्र के एनडीए सरकार ह भारत के साख ल संवारे हे अउ आज देश म गरीबी तेजी ले घटत हे।
संशोधन विधेयक
संसद ह संविधान अनुसूचित जाति आदेश संशोधन विधेयक डिजीटल व्यक्तिगत डेटा संरक्षण विधेयक अउ अनुसंधान राष्ट्रीय शोध प्रतिष्ठान विधेयक पारित कर देहे। राज्यसभा ह काली ए तीनो विधेयक ल स्वीकृति दीन। लोकसभा एला पहिली ले पारित कर देहे।
संविधान अनुसूचित जाति आदेश संशोधन विधेयक पारित होय के बाद छत्तीसगढ़ म मेहरा, महार अउ मेहर समुदाय के पयार्यवाची के रूप म महारा अउ महरा समुदाय ल सामिल करे गेहे। केंद्रीय सामाजिक न्याय अउ अधिकारिता मंत्री डॅाक्टर विरेंद्र कुमार ह कहिन कि ए विधेयक छत्तीसगढ़ म ए समुदाय के जीवन अउ स्थिति म सुधार करही।
मुख्यमंत्री-फायरिंग रेंज लक्ष्य
मुख्यमंत्री भूपेश बघेल ह आज रायपुर के माना स्थित पुलिस प्रशिक्षण विद्यालय म आधुनिक कंपोजिट इंडोर फायरिंग रेंज लक्ष्य के उद्घाटन करीन। ओमन ह ए दउरान पुलिसिंग सेवा ल अउ अच्छा बनाय खातिर नवीन पुलिस वाहन ल हरा झंडी दिखाके रवाना करीन। मुख्यमंत्री ह ए मउका म कार्यक्रम ल संबोधित करत कीहिन कि प्रदेश म शांति अउ सुरक्षा व्यवस्था म पुलिस सेवा के अहम भूमिका होथे। एला ध्यान म राखत पुलिस सेवा ल सुदृढ़ बनाय बर जरूरी कदम उठाय जात हे।
ओमन कीहिन कि राज्य के कानून व्यवस्था आने राज्य ले अच्छा हे। ए ह राज्य म पुलिसिंग सेवा के उपलब्धि हरय। मुख्यमंत्री ह ए मउका म रायपुर, बिलासपुर, दुर्ग, बस्तर अउ सरगुजा म रेंज स्तरीय नवा साईबर पुलिस थाना के घलो शुभारंभ करीन। उंहे महिला हेल्प डेस्क संग आने आने भवन के भूमिपूजन अउ लोकार्पण करीन।
खबर के मुताबिक फायरिंग रेंज लक्ष्य के निर्माण छै करोड़ सड़सठ लाख रूपिया के लागत ले करे गेहे। एखर ले छत्तीसगढ़ पुलिस ल अच्छा प्रशिक्षण मिलही।
पर्यावास अधिकार
मुख्यमंत्री भूपेश बघेल ह विश्व आदिवासी दिवस के मउका म काली प्रदेश के जनजाती समूह कमार ल पर्यावास अधिकार मान्यता पत्र बांटीन। एखर संगेसंग छत्तीसगढ़ देश के दूसरा राज्य बन गेहे, जिहंा विशेष रूप ले कमजोर जनजाति समूह ल पर्यावास अधिकार दे गेहे। अइसने कमार जनजाति समूह प्रदेश के पहिली जनजाति समूह हरय, जेला राज्य शासन डहार ले पर्यावास अधिकार मिले हे।
मुख्यमंत्री ह रायपुर म आयोजित वर्चुअल कार्यक्रम म धमतरी जिला के मगरलोड विकासखंड के मगरलोड पाली के बाईस कमार पारा के मुखिया ल पर्यावास अधिकार मान्यता पत्र दीन। ए मउका म श्री बघेल ह कहिन कि राज्य सरकार ह आदिवासी मन ल अधिकार संपन्न बनाय के महत्वपूर्ण काम करे हे अउ ए दिशा म सरकार आगू घलो पहल करत रीही।
अरविंद नेताम इस्तीफा
कंाग्रेस के वरिष्ठ आदिवासी नेता अउ पूर्व केंद्रीय मंत्री अरविंद नेताम ह पार्टी के प्राथमिक सदस्यता ले इस्तीफा दे देहे। विश्व आदिवासी दिवस के मउका म काली श्री नेताम ह अखिल भारतीय कंाग्रेस कमेटी के अध्यक्ष ल भेजे अपन इस्तीफा म छत्तीसगढ़ सरकार ल संवेधानिक अधिकार मनके विपरित काम करे अउ पेसा कानून म आदिवासी समाज ल जल, जंगल, जमीन म ग्रामसभा के अधिकार ल खतम करे के आरोप लगाय हे। श्री नेताम ह राज्य सरकार ल आदिवासी विरोधी बताय हे।
इही बीच भाजपा के पूर्व अध्यक्ष विष्णुदेव साय अउ पार्टी के प्रदेश महामंत्री केदार कश्यप ह कहिन कि पूर्व केंद्रीय मंत्री अरविंद नेताम के कंाग्रेस ले इस्तीफा कंाग्रेस के सरलग आदिवासी विरोधी होय के एक ठिन अउ ठोस प्रमाण हरय। ओमन कहिन कि कंाग्रेस ह आदिवासी मनके संग हर स्तर म छलकपट करे हे। संगेसंग ओमन ल उपेक्षित अउ प्रताड़ित घलो करे हे।
धमलाल कौशिक प्रेसवार्ता
भारतीय जनता पार्टी के पूर्व प्रदेश अध्यक्ष धरमलाल कौशिक ह कहिन कि राज्य म आदिवासी मन ल उंखर हक दिलाय अउ उंखर गौरव बढ़ाय के दिशा म भाजपा ह शुरूआती कदम उठाय रीहिन। विश्व आदिवासी दिवस के मउका म बिलासपुर म काली पत्रकार मनले गोठबात करत श्री कौशिक ह कहिन कि राज्य म आदिवासी मनके आरक्षण बीस प्रतिशत ले बढ़ाके बत्तीस प्रतिशत करे के श्रेय पूर्ववर्ती भाजपा सरकार ल जाथे। ओमन कीहिन कि राज्य के आदिवासी मनके भलाई, सुरक्षा अउ आर्थिक स्थिति ल मजबूत करे म भाजपा ह पंद्रा साल के कार्यकाल म हरसंभव प्रयास करे हे, जेखर सेती आज बस्तर अउ सरगुजा म आदिवासी मनके जीवन स्तर म बहुत कुछ सुधार आय हे।
पहिली के भाजपा शासनकाल म होय विकास के सेती प्रदेश के ग्रामीण क्षेत्र मन म होवइया पलायन ल रोके जा सके हे।
सामाजिक सुरक्षा पेंशन योजना
राज्य सरकार ह निराश्रित, बुजुर्ग, दिव्यांग अउ विधवा के संग परित्यक्ता माइलोगिन मन बर सामाजिक सुरक्षा पेंशन योजना म दे जाय मासिक पेंशन के राशि डेढ़ सौ रूपिया ले बढ़ाके पांच सौ रूपिया हर महीना कर देहे। बढ़े पेंशन के लाभ पाछू एक जुलाई ले मिलही।
माओवादी गिरप्तार
सुकमा जिला म सुरक्षा बल मन ह एक झिन माओवादी ल गिरप्तार करे म सफलता हासिल करे हे। जिला के पुलिस अधीक्षक किरण चौहान ह बताइन कि जिला पुलिस बल अउ कोबरा बटालियन के संयुक्त दल तलाशी अभियान म निकले रीहिन। ए दउरान घेराबंदी करके माओवादी माड़वी देवा ल गिरप्तार करे गीस। बताय जात हे कि गिरप्तार माओवादी पाछू बारा बछर ले जगरगुण्डा क्षेत्र म सक्रिय रीहिस।
दुर्घटना
बस्तर जिला के गीदम रोड म होय सड़क हादसा म एक झिन मनखे के मउत होगे, उंहे बीस झिन मनखे घायल होगे हे। घायल मन ल जगदलपुर के डीमरापाल मेडिकल कॉलेज म भर्ती कराय गेहे।
मुख्यमंत्री भूपेश बघेल ह ए दुर्घटना म दुख जताय हे। ओमन ह मृतक के घरवाले मन ल चार लाख अउ घायल मन ल पच्चीस-पच्चीस हजार रूपिया के आर्थिक सहायता देके घोषणा करे हे। संगेसंग जिला प्रशासन के अधिकारी मन ल घटना म घायल मनके अच्छा इलाज के निर्देश देहे।
एति कोंडागांव जिला के बनियागांव म चारपहिया वाहन के चपेट म आय ले दुपहिया सवार एक झिन माइलोगन संग दू झन मनखे के मउत होगे।
हर घर तिरंगा
केंद्र सरकार डहार ले राष्ट्र निर्माण बर अथक परिश्रम करइया मनके योगदान ल सुरता करत आजादी के अमृत महोत्सव मनाये जात हे। एखर तहत हर घर तिरंगा अभियान चलाये जात हे। इही कड़ी म छत्तीसगढ़ डाक सेवा के निदेशक दिनेश कुमार मिस्त्री ह सबो सचिव मन ल परिपत्र जारी करके केहे हे कि तेरा ले पंद्रह अगस्त तक सबो कार्यालय अउ घर मन म तिरंगा फहराय बर लोगन ल प्रोत्साहित करे जाय।ओमन बताइन कि सबो डाकघर मन म राष्ट्रीय ध्वज बेचे जात हे।
खबर के मुताबिक छत्तीसगढ़ डाक परिमंडल ह आने आने डाकघर मनके माध्यम ले पांच लाख राष्ट्रीय ध्वज बेचे के लक्ष्य राखे हे।