आज विश्व आदिवासी दिवस मनाय जात हे। ए मउका म प्रदेस के जम्मों जिला मुख्यालय मन म कतकोन कारीकरम चलत हे। मुख्य कारीकरम रइपुर के शहीद स्मारक भवन म होइस। जेमा नगरीय प्रशासन मंत्री डॉक्टर शिव कुमार डहरिया ह सामिल होइन। मुख्यमंत्री भूपेश बघेल ह जगदलपुर म राखे गे विश्व आदिवासी दिवस कारीकरम म सामिल होइन।
ए दउरान मुख्यमंत्री ह बस्तर जिला बर छै सौ तैंतीस करोड़ रूपिया के लागत ले बनइया आने-आने विकास काम के लोकार्पण अउ भूमिपूजन करीन। मुख्यमंत्री ह ए मउका म बस्तर संभाग के जम्मों जिला मुख्यालय मन म बीएड अउ डीएड कॉलेज सुरू करे के घोषणा के संगेसंग शासकीय महाविद्यालय तोकापाल अउ लोहंडीगुड़ा म छात्रावास बनाय जगदलपुर के धरमपुरा म पुलिस थाना भवन बनाय आदिवासी समाज मनके रोजगार बर शासकीय चिकित्सा महाविद्यालय जगदलपुर म इण्डोर स्टेडियम के संगेसंग कतकोन जघा म रद्दा अउ पुल-पुलिया बनाय के काम सामिल हे।
ए मउका म मुख्यमंत्री ह पांच हजार छै सौ तैंतीस ग्राम पंचायत मनल आदिवासी परब सम्मान निधि के दूसर किस्त के रूप म करीबन दू करोड़ इक्यासी लाख रूपिया ले जादा के रासि जारी करीन। मुख्यमंत्री ह जगदलपुर के जिला न्यायालय चौक के नाम ल भूमकाल चौक करे के घोषणा करीन। कार्यक्रम के दउरान ओमन एकेडमी ऑफ डंास आर्ट एंड लिटरेचर-बादल के स्टूडियो अउ वेबसाईट के शुभारंभ करीन।
संगेसंग ओमन बादल के त्रै-मासिक पत्रिका कंागेर घाटी के पंद्रा गुफा मन उपर आधारित कॉफी टेबल बुक अउ आमी आंव बस्तरिया लोकगीत के वीडियो के विमोचन करीन। कार्यक्रम म मुख्यमंत्री ह छै सौ छियानबे हितग्राही मन ल वनअधिकार पत्र, आने-आने सरकारी योजना के तहत सत्ताईस हजार ले जादा हितग्राही मन ल जरूरी दस्तावेज अउ सहायता राशि के चेक बांटीन। ओमन अनुसूचित जनजाति समुदाय के विशिष्ट प्रतिभा मन ल घलो सम्मानित करीन।
विश्व आदिवासी दिवस-02
उंहे मुख्यमंत्री ह जगदलपुर के बाद सरगुजा के सीतापुर म राखे गे विश्व आदिवासी दिवस के कार्यक्रम म घलो शामिल होइन। ए मउका म ओमन तीन सौ चौंतीस करोड़ तेईस लाख रूपिया के लागत के विकासकाम के लोकार्पण अउ भूमिपूजन करीन।
उहें, मुंगेली म विश्व आदिवासी दिवस के मउका म जिला स्वीप के तहत आदिवासी मन ल मतदाता जागरूकता अभियान के जानबा देवत ओमन ल वोट डाले बर शपथ देवाय गीस। ए मउका म विधिक जागरूकता शिविर घलो लगाय गीस।
मेरी माटी मेरा देश
देश बर प्राण गवईया वीर मनके सम्मान म इक्कीस दिन के राष्ट्रव्यापी ‘‘मेरी माटी मेरा देश‘‘ अभियान आज ले सुरू होगे हे, जउन ह तीस अगस्त तक चलही। एमा देस भर म राज्य, गांव अउ विकास खंड स्तर के संगेसंग सहरी निकाय मन म घलो बिसेस कारीकरम होही। ए अभियान म स्वतंत्रता सेनानी अउ सुरक्षाबल मन ल समर्पित स्मारक पट्टिका लगाय जाही। संगेसंग वीर मनके सम्मान म पंच प्राण प्रतिज्ञा वसुधा वंदन, अउ वीर मनके वंदन जइसे कारीकरम घलो होही। प्रधानमंत्री ह हालेच म आकाशवाणी ले प्रसारित मन की बात कारीकरम म ए अभियान के घोषणा करीन।
अभियान म अमृत कलश यात्रा घलो निकाले जाही। जेमा दिल्ली म अमृत वाटिका बनाय बर सात हजार पांच सौ कलश मन म देस के कोना-कोना ले माटी लाय जाही। ए अभियान ह बारा मार्च दू हजार इक्कीस के सुरू होय आजादी के अमृत महोत्सव के समापन कारीकरम होही।
आयुष्मान कार्ड
प्रदेश के लोगन मन के स्वास्थ्य ह बने रहय एखर बर आयुष्मान कार्ड बनाय जात हे। ए मामला म छत्तीसगढ़ के धमतरी जिला ह राज्य म दूसर स्थान म हवय। जिला म पाछू चार अउ पांच अगस्त के स्कूल छात्रावास, आंगनबाड़ी केंद्र, राशन दुकान के संगेसंग आने सार्वजनिक जगा मन म विशेष अभियान चलाके नौ हजार सात सौ ले जादा आयुष्मान कार्ड बनाये गीस।
जानबा के मुताबिक आयुष्मान कार्ड बनाय बर आधार कार्ड या राशन कार्ड होना जरूरी हे।
बसपा पार्टी उम्मीदवार
बहुजन समाज पार्टी ह अवइया विधानसभा चुनई ल देखत प्रदेश के नौ विधानसभा सीट बर अपन उम्मीदवार के घोषणा कर देहे। एमा मस्तूरी विधानसभा क्षेत्र ले दाउराम रत्नाकर, नवागढ़ ले ओमप्रकाश बाजपेयी, जांजगीर-चंापा ले राधेश्याम सूर्यवंशी, जैजेपुर ले केशवप्रसाद चंद्रा, ल उम्मीदवार बनाय गेहे। त उंहे इंदु बंजारे ल पामगढ़, डॅाक्टर विनोद शर्मा ल अकलतरा, श्याम टंडन ल बिलाईगढ़, रामकुमार सूर्यवंशी ल बेलतरा, अउ आनंद तिग्गा ल सामरी विधानसभा क्षेत्र के प्रत्याशी घोषित करे गेहे।
राज्यपाल-दीक्षांत समारोह
राज्यपाल विश्वभूषण हरिचंदन ह आज ओ.पी. जिंदल विश्वविद्यालय रायगढ़ के तीसर दीक्षांत समारोह म वर्चुवल रूप ले सामिल होइन। ए मउका म ओमन किहीन कि डिग्री के संगेसंग राष्ट्र निर्माण के दीक्षा लेके छात्र मन ह नवा भारत अउ आत्मनिर्भर भारत बनाय म अपन भूमिका निभा सकथे। दीक्षांत समारोह म बाईस स्वर्ण, चोबीस रजत अउ बाईस ठन कांस्य पदक के संगेसंग पांच सौ बाईस छात्र मन ल पीएचडी, स्नाकोत्तर, स्नातक अउ डिप्लोमा के उपाधि दे गीस। ए समारोह म छत्तीसगढ़ विश्वविद्यालय विनियामक आयोग के अध्यक्ष डॉक्टर उमेश कुमार मिश्र, विश्वविद्यालय के कुलाधिपति शालू जिंदल अउ कुलपति डॉक्टर आर.डी. पाटीदार सामिल होईन।
राज्यसभा-विधेयक पेश
अनुसूचित जाति संशोधन विधेयक दू हजार तेईस ल विचार अउ पारित करे बर आज राज्यसभा म पेस करे गीस। केन्द्रीय सामाजिक न्याय मंत्री डॉक्टर विरेन्द्र कुमार ह विधेयक ल पेस करीन। ए विधेयक छत्तीसगढ़ म अनुसूचित जाति मन के सूची ल संशोधित करे बर संविधान अनुसूचित जाति आदेस उन्नीस सौ पचास म संशोधन हे।
विधेयक उपर चर्चा के सुरूआत करत बीजू जनता दल के सुलता देव ह किहीन कि ओखर पार्टी ह विश्व आदिवासी दिवस के मउका म पेस करे गे विधेयक के समर्थन करथे। ओमन किहीन कि ए विधेयक म छत्तीसगढ़ के महार अउ महरा जाति मन ल अनुसूचित जाति के सूची म सामिल करे जाय।
मुख्य न्यायधीश-दौरा
छत्तीसगढ़ उच्च न्यायालय के मुख्य न्यायाधीश रमेश सिन्हा ह काली महासमुंद जिला न्यायालय परिसर के निरीक्षण करीन। ए दउरान ओमन न्यायालय के कक्ष, पार्किंग उद्यान अउ वकील मन के बइठक व्यवस्था के जानबा लीन। उहें, मुख्य न्यायाधीश ह लम्बा समय ले रूके जमानत अर्जी के घलो जानकारी लीन।
सड़क हादसा-लघु फिल्म
प्रदेश म सड़क दुर्घटना ल कम करे बर छत्तीसगढ़ के पुलिस ह एक ठिन नवा पहल करे हे। जेमा सड़क सुरक्षा उपर केंद्रित लघु फिल्म के माध्यम ले लोगन मन ल जागरूक करे जाही। पुलिस विभाग ह ए बारे म एक ठिन फिल्म महोत्सव के आयोजन घलो करे हे। ए फिल्म म प्रतिभागी अउ फिल्म के कहानी लिखइया मन बर पंजीकरण के तिथि ल दस अगस्त ले बढ़ाके सतरा अगस्त कर देहे।
अउ अब थोरकुन समाचार सार म-
– कंाग्रेस के राष्ट्रीय अध्यक्ष मल्लिकार्जुन खड़गे ह तेरा अगस्त के जांजगीर जिला म होवइया भरोसे के सम्मेलन कार्यक्रम म सामिल हो सकथे। एखर बर जिला प्रशासन ह तियारी शुरू कर देहे।
– मोहला-मानपुर अंबागढ़ चौकी जिला के कलेक्टर एस. जयवर्धन ह आज प्रधानमंत्री फसल बीमा योजना के तहत प्रचार रथ ल हरा झंडी दिखाके रवाना करीन।
– छत्तीसगढ़ राज्य ओपन स्कूल डहार ले होवइया हाईस्कूल अउ हायर सेकण्डरी परीक्षा म प्रवेश के आखरी तारीख चौदा अगस्त तक बढ़ा दे गेहे।
– छत्तीसगढ़ माध्यमिक शिक्षामंडल डहार ले होय हाईस्कूल अउ हायर सेकण्डरी पूरक परीक्षा के परिणाम घोषित कर दे गेहे।
– शिक्षक सीधी भर्ती म व्याख्याता पद बर दूसर चरण के अभ्यर्थी मनके ऑनलाईन काउंसिलिंग आज ले शुरू होके, पंद्रह अगस्त तक चलही।
– राज्य के शासकीय औद्योगिक प्रशिक्षण संस्था मन म प्रशिक्षण अधिकारी मनके आने आने पद के भर्ती बर होय चयन परीक्षा के परिणाम घोषित कर दे गेहे। काउंसिलिंग आज ले शुरू होके सोला अगस्त तक चलही।
– संस्कृति विभाग डहार ले मुख्यमंत्री लोक कलाकार प्रोत्साहन योजना के तहत प्रदेश के कलाकार मनले पच्चीस सितंबर तक अर्जी मंगाय गेहे।
– जांजगीर-चंापा जिला के खोखसा गांव म मां-बेटा के गाड़ी के चपेट म आय ले बेटा के मउकाच म प्राण छूटगे त उंहे मंा के हालत गंभीर बताय जात हे।
– राजनंादगंाव जिला के गांव सुरगी म खेत म काम करत बेरा करंट लगे ले एक झिन सियनहा किसान दंपत्ति के मउकाच म प्राण छूटगे।