विश्व आदिवासी दिवस
काली विश्व आदिवासी दिवस के मउका म प्रदेश के सबो जिला मुख्यालय म गरिमामय कार्यक्रम के आयोजन करे जाही। ए संबंध म सामान्य प्रशासन विभाग ह सबो जिला कलेक्टर मन ल दिशा निर्देश जारी कर देहे। ए कार्यक्रम म राज्य सरकार के मंत्री अउ विधायक मनके संग पंचायत प्रतिनिधि मन ल विशेष रूप ले नेवता देबर कहे गे हवय। मुख्यमंत्री भूपेश बघेल सरगुजा अउ बस्तर जिला के कार्यक्रम म शामिल होही।
उंहे विधानसभा अध्यक्ष डॅाक्टर चरणदास महंत जांजगीर चांपा जिला के कार्यक्रम म मौजूद रइहीं। ए मउका म राज्य सरकार डहार ले प्रदेश के अनुसूचित क्षेत्र के साढ़े पांच हजार ले जादा पंचायत मन ल मुख्यमंत्री आदिवासी परब सम्मान निधि योजना के दूसरा किस्त के रूप म करीबन तीन करोड़ रूपिया के राशि उंखर बैंक खाता म ऑनलाईन तरीका ले जमा कराय जाही। एमा हर पंचायत ल पांच हजार रूपिया दे जाही। कार्यक्रम म वन अधिकार पत्र, सामुदायिक वन अधिकार पत्र अउ वन संसाधन अधिकार पत्र घलो दे जाही।
मेरी माटी मेरा देश
मेरी माटी मेरा देश अभियान काली ले पूरा देश म शुरू होवत हे। तीस अगस्त तक चलइया ये अभियान म छत्तीसगढ़ के सबो जिला म कतकेन कार्यक्रम कराय जाही। ए संबंध म प्रदेश के संस्कृति विभाग डहार ले आने-आने विभाग के सचिव अउ जिला कलेक्टर मन ल परिपत्र जारी कर दे गेहे। ये अभियान म ग्राम पंचायत स्तर म शिला पट्टिका के स्थापना करे जाही। जेखर माध्यम ले अपन बलिदान देवइया वीर मन ल श्रद्धांजलि दे जाही।
ए कार्यक्रम के मुख्य उद्देश्य स्वाधीनता संग्राम ले जुड़े वीर मनके सम्मान करना हे। जउन मन ह आजादी बर अपन सबकुछ न्यौछावर कर दीन। ए कार्यक्रम दू भाग म होही। पहिली स्तर म ग्राम पंचायत म कार्यक्रम होही अउ दूसर कार्यक्रम मिट्टी यात्रा के रूप म होही। जउन ह पंचायत स्तर ले दिल्ली तक होही। ये कार्यक्रम के समापन मउका म नई दिल्ली म प्रधानमंत्री डहार ले आजादी के अमृत महोत्सव उपर केंद्रित स्मारिका राष्ट्र ल समर्पित करे जाही।
पेंशनर-महंगाई-राहत
प्रदेश के सेवानिवृत्त शासकीय कर्मचारी मन ल महंगाई राहत म चार प्रतिशत के बढ़ोत्तरी बर प्रक्रिया शुरू कर दे गेहे। फेर मध्यप्रदेश पुनर्गठनअधिनियम के प्रावधान के अनुसार घोषणा म अमल बर मध्यप्रदेश के सहमति होना जरूरी हे। एला देखत छत्तीसगढ़ सरकार ह मध्य प्रदेश शासन के सहमति प्राप्त करे बर मुख्यमंत्री शिवराज सिंह चौहान ल चिट्ठी लिखिन हे।
मुख्यमंत्री-वित्त मंत्री पत्र
मुख्यमंत्री भूपेश बघेल ह केन्द्र ले छात्रावास म अउ पेईंग गेस्ट के रूप म रहइया छात्रा मनके किराया म बारह प्रतिसत जीएसटी ल हटाय के मांग करीन हे। केन्द्रीय वित्त मंत्री निर्मला सीतारमण ल भेजे गे चिट्ठी म मुख्यमंत्री ह किहीन हे कि जीएसटी ले जुड़े फइसला ल प्राधिकरण ह हाल म पढ़ई बर बाहिर गे, छात्रावास म रहइया अउ पेईंग गेस्ट के रूप म रहइया लइका मनके किराया के संग बारह प्रतिसत जीएसटी लगाय जाय के घोसना करीन हे। श्री बघेल ह कहिन कि ए घोसना ले गरीब अउ निम्न मध्यम वर्ग के पालक मन उपर आर्थिक बोझ पड़े के संभावना हे, जेला देखत किराया म जीएसटी लगाय जाय के फैसला ल वापिस ले जाय।
भाजपा-मवेशी
भाजपा ह पंद्रह अगस्त के बाद प्रदेश के प्रमुख रद्दा म आवारा घुमइया मवेशी मन ल सरकारी दप्तर मन म ले जाके छोड़े के एलान करे हे। नेता प्रतिपक्ष नारायण चंदेल ह कीहिन हे कि हाल म छत्तीसगढ़ उच्च न्यायालय ह सड़क दुर्घटना ल रोके के उद्देश्य ले आवारा मवेशी मनके सड़क म घुमे के मामला म राज्य सरकार ले जवाब मांगे रीहिन।
उच्च न्यायालय के प्रधान न्यायाधीश रमेश सिन्हा अउ न्यायाधीश रजनी दुबे के खंडपीठ ह सड़क म मवेशी मनके अवई जवई ल रोके खातिर पंचायत ले लेके राज्य स्तर म आठ झन सदस्य के समिति बनाय बर केहे रीहिन। ए मामला म अवइया सुनवाई चार सितंबर के होही।
सेवानिवृत्त कर्मचारी वेतन
राज्य सरकार के जउन कर्मचारी मन पाछू तीस जून के सेवानिवृत्त होइन हे। ओमन ल एक जुलाई के लागू वेतन वृद्धि देके उपराहा फायदा दे जाही। ए संबंध म राज्य के वित्त विभाग ह आदेश जारी कर देहे। संगेसंग छत्तीसगढ़ उच्च न्यायालय के आदेश के अनुपालन म सेवानिवृत्ति ले जुड़े प्रकरण म नब्बे दिन के अंदर याचिकाकर्ता ल सेवानिवृत्ति के समय मिलइया राशि के संग एरियर्स के भुगतान घलो करे जाय के निर्देश देगे हवय।
सहकारिता मंत्री समीक्षा
बस्तर संभाग म जिला केंद्रीय सहकारी बैंक के सात अउ सरगुजा संभाग म तीन ठन नवा शाखा जल्दीच शुरू करे जाही। ए संबंध म सहकारिता मंत्री रविंद्र चौबे ह काली विभागीय समीक्षा बइठका म अधिकारी मन ल जरूरी निर्देश दीन। ओमन कीहिन कि सहकारी बैंक के नवा शाखा शुरू करे के संबंध म भारतीय रिजर्व बैंक ले प्राप्त दिशा-निर्देश के आधार म जरूरी तैयारी जल्दीच पूरा करे जाही। बइठका म बताये गीस कि बस्तर संभाग म सहकारी बैंक के सात ठन नवा एटीएम अउ सरगुजा संभाग म पांच ठन नवा एटीएम लगाय गे हवय।
जल जीवन मिशन
प्रदेश म जल जीवन मिशन म घर म पीये के साफ पानी पहुंचाये खातिर अभी तक करीबन अठाईस लाख नल कनेक्शन देगे हवय। एखरे संग उनचालिस हजार ले जादा स्कूल, साढ़े सैंतीस हजार आंगनबाड़ी केंद्र अउ साढ़े पंद्रह हजार ले जादा ग्राम पंचायत अउ सामुदायिक स्वास्थ्य केंद्र म घलो नल कनेक्शन देगे हवय। ये अभियान म करीबन डेढ़ लाख नल कनेक्शन देवाय के संग रायपुर जिला प्रदेश म पहिली स्थान म हवय।
जन्म/मृत्यु पंजीकरण
राज्यसभा ले मंजूरी के बाद संसद ह काली जनम अउ मृत्यु पंजीकरण संसोधन विधेयक पारित कर देहे। लोकसभा एला पहिलीच ले मंजूरी दे दे हवय। विधेयक उपर चर्चा के जवाब देवत केन्द्रीय गृह राज्यमंत्री नित्यानंद राय ह किहीन कि ए विधेयक जन्म अउ मृत्यु पजीकरण ल आसान बनाय खातिर लाय गे हवय अउ ए ह पूरा तरीका ले डिजिटल होही। श्री राय ह किहीन कि ड्राइविंग लाइसेंस बनवाय अउ सैक्षणिक संस्थान म प्रवेस जइसन कतकोन काम बर ए ह जरूरी दस्तावेज होही। ओमन किहीन कि नवा प्रावधान ले जन्म अउ मृत्यु प्रमाण पत्र सात दिन के भीतर बनवाय जा सकत हे।
लोकसभा म कालीच व्यक्तिगत डिजिटल डाटज्ञ संरक्षण विधेयक पारित घलो होगीस। ए विधेयक म लोगन के व्यक्तिगत डाटा के सुरक्षा अउ वैधानिक उद्देश्य बर एखर उपयोग ल सुनिश्चित करे के प्रावधान हे। केन्द्रीय इलेक्ट्रॉनिकी अउ सूचना प्रौद्योगिकी मंत्री अश्विनी वैष्णव ह किहीन कि ए विधेयक के अनुसार कोनों भी व्यक्ति काखरो व्यक्तिगत डाटा ल ओखर सहमति के आधार म ही उपयोग कर सकत हे। विधेयक म भारतीय डाटा संरक्षण बोर्ड के स्थापना के प्रावधान घलो करे गेहे। विधेयक म केहे गे हवय कि व्यक्तिगत डाटा के सुरक्षा के उल्लंघन करे जाय म डाटा संरक्षण बोर्ड डहार ले मामला के जांच करे जाही। अइसन मामला म ढाई सौ करोड़ रूपिया के जुर्माना घलो लगाय जा सकत हे।
लखमा-समीक्षा
राज्य सरकार ह मौसम बदले के सेती कंजक्टिवाइटिस, डायरिया अउ मलेरिया जइसन बीमारी मनले बांचे खातिर पोटाकेबिन, आश्रम अउ छात्रावास मन म पर्याप्त मात्रा म दवई दे जाय के निर्देश दीन हे। ए संबंध म उद्योग मंत्री कवासी लखमा ह सुकमा म विभागीय अधिकारी मनके समीक्षा बइठका म कीहिन कि जिला के सबो स्वास्थ्य केंद्र म डॅाक्टर मनके मौजूदगी सुनिश्चित करे जाय।
मौसम
प्रदेश म अवइया चौबीस घंटा के दउरान एक दू जगा म हल्का ले मध्यम बरसा होय या गरज चमक के संग बौछार पड़े के संभावना हे। मौसम विभाग के अनुसार ए समय बंगाल के खाड़ी ले लेके उत्तर प्रदेश के उपरी हवा म एक ठन चक्रीय चक्रवाती घेरा बने हे, संगेसंग उत्तर प्रदेश ले मणिपुर तक एक ठन द्रोणिका घलो सक्रिय हे। जेखर असर ले प्रदेश के एक दू जगा म भारी बरसा होय के संग आकाशीय बिजली गिरे के चेतावनी घलो दे गेहे।
मुख्य सचिव समीक्षा
प्रदेश के सड़क म घूमंतु मवेशी मनके सेती होवइया सड़क दुर्घटना ल रोके बर विशेष प्रयास करे जावत हे। ए संबंध म छत्तीसगढ़ उच्च न्यायालय ले मिले निर्देश के अनुपालन म बनाये गे उच्च स्तरीय समिति के काली तीसरा बइठका मुख्य सचिव अमिताभ जैन के अध्यक्षता म होइस। जेमा अब तक के कार्यवाही के समीक्षा करे गीस।