प्रधानमंत्री नरेंद्र मोदी ह कीहिन हे कि वोकल फॅार लोकल अब जन आंदोलन बन गेहे। जे ह देश म कपड़ा क्षेत्र ल घलो नवा गति देहे। आज दिल्ली के प्रगति मैदान स्थित भारत मंडपम म नौवां राष्ट्रीय हथकरघा दिवस समारोह ल संबोधित करत ओमन कीहिन कि कपड़ा क्षेत्र म जउन योजना शुरू करे गेहे। ओ ह बुनकर अउ कारीगर मन ल न्याय देवावत हे।
प्रधानमंत्री ह कीहिन कि सरकार ह हथकरघा उद्योग ल बढ़ावा देबर बिना गारंटी के कर्जा देत हे अउ संगेसंग हथकरघा बुनकर मन बर कमती भाव म कच्चा माल घलो देवावत हे। प्रधानमंत्री ह जेम पोर्टल के जिकर करत कीहिन कि अब हर छोटे उद्यम ह सोझे जेम उपर अपन उत्पाद ल बेच सकथे। प्रधानमंत्री ह कहिन कि एक जिला एक उत्पाद के माध्यम ले आने आने जिला के विशेष उत्पाद मन ल बढ़ावा देबर पहल शुरू करे गेहे। कार्यक्रम के दउरान ओमन कपड़ा अउ शिल्प के एक ठिन भंडार भारतीय वस्त्र एवं शिल्प कोष के ई पोर्टल के घलो शुभारंभ करीन।
मंत्रिपरिषद निर्णय
प्रदेश के शिक्षण संस्था मन म अब पहिली ले चलत आरक्षण व्यवस्था ले प्रवेश के काम पूरा करे जाही। मुख्यमंत्री के अगवई म आज रायपुर म राखे गे राज्य मंत्रिपरिषद के बइठका म ये फैसला ले गीस। एमा अब राज्य के स्कूल अउ कॉलेज मन म अनुसूचित जाति, जनजाति अउ अन्य पिछड़ा वर्ग के छात्र मन ल अंठावन प्रतिशत आरक्षण मिलही।
जानबा के मुताबिक उच्चतम न्यायालय ह पाछू एक मई के राज्य सरकार कोति ले दायर एसएलपी म पारित अपन अंतरिम आदेश म राज्य म पहिली ले चलत आरक्षण व्यवस्था के मुताबिक नियुक्ति अउ चयन प्रक्रिया ल जारी राखे बर राहत दे रीहिन। अब राज्य सरकार ह उच्चतम न्यायालय के अंतरिम आदेश के मुताबिक राज्य के शैक्षणिक संस्था मन म आरक्षण व्यवस्था ल लागू करे के फैसला लेहे।
इही बीच सामान्य प्रशासन विभाग ह जम्मों विभाग मन ल उच्चतम न्यायालय के आदेश के मुताबिक शैक्षणिक संस्थान मन म आरक्षण लागू करे जाय के आदेश ल लागू कर देहे।
विश्व आदिवासी दिवस
विश्व आदिवासी दिवस के मउका म नौ अगस्त के प्रदेश के जम्मों जिला मुख्यालय मन म कार्यक्रम राखे जाही। ए मउका म राज्य स्तरीय कार्यक्रम म प्रदेश के अनुसूचित क्षेत्र मनके पांच हजार छै सौ तैंतीस पंचायत मन ल मुख्यमंत्री आदिवासी परब सम्मान निधि योजना के तहत दूसर किस्त के रूप म दू करोड़ इक्यासी लाख रूपिया के राशि जारी करे जाही। एमा हरएक पंचायत ल पांच हजार रूपिया के हिसाब से पईसा मिलही।
एति राजधानी रायपुर के महंत घासीदास संग्रहालय म नौ अगस्त ले छत्तीसगढ़ आदिवासी सांस्कृतिक परंपरा प्रयास से प्रभाव तक विसय उपर केंद्रित फोटो प्रदर्शनी के आयोजन करे जाही। तीन तक चलइया ए प्रदर्शनी के उद्देश्य जनजातीय संस्कृति ल बचाय अउ ओला संजोय म मदद देना हे।
अंप्रेटिसशिप योजना-कार्यशाला
केंद्र सरकार के कौशल विकास अउ उद्यमशीलता विभाग डहार ले देश के करीबन दू सौ पचास जिला मन म राष्ट्रीय अंप्रेटिसशीप योजना उपर जन जागरूकता अभियान चलाय जात हे। ए योजना म चुने गे जिला मन म कार्यशाला राख के प्रतिभागी मन ल ए योजना के बारे म जानबा दे जाही। कार्यशाला म स्कूल अउ कॉलेज के संगेसंग औद्योगिक प्रतिष्ठान के प्रतिभागी मन भाग लीहीं।
जानबा के मुताबिक ए योजना म छत्तीसगढ़ के सात जिला ल चुने गेहे। रायपुर अउ बिलासपुर म कार्यशाला पहिली ले होगे हे।
मुख्यमंत्री-प्रधानमंत्री पत्र
मुख्यमंत्री ह प्रधानमंत्री नरेंद्र मोदी ल चिट्ठी लिखके छत्तीसगढ़ ले जवइया यात्री रेलगाड़ी मनके बने ढंग ले सही बेरा म चलय एखर बर बिनती करे हे। मुख्यमंत्री ह अपन चिट्ठी म लिखे हे कि रेलवे डहार ले पहिली ले कोनो सूचना नइ देके यात्री रेलगाड़ी मन ल निरस्त करे के सूचना जारी कर देथे। एखर ले अवइया जवइया यात्री मन ल अब्बड़ परसानी उठाय बर पड़त हे।
मोहन मरकाम-स्टॉप डेम
आदिम जाति अउ अनुसूचित जाति विकास मंत्री मोहन मरकाम ह कोंडागांव जिला म करीबन सात करोड़ रूपिया के लागत ले मसोरा ले छुई ढोढा रद्दा म नारंगी नदिया उपर बनइया स्टॉप डेम के आधारशिला रखीन। ए मउका म ओमन छुई ढोढा म राखे गे कार्यक्रम म इक्यासी झिन हितग्राही मन ल वन अधिकार पत्र दीन। श्री मरकाम ह बताइन कि जउन हितग्राही मन ल वन अधिकार पत्र दे गेहे, वोमन अब अपन भुंइया म खेती किसानी बर कृषि ऋण घलो ले सकही।
छत्तीसगढ़िया ओलंपिक तिथि संशोधन
प्रदेश म चलत छत्तीसगढ़िया ओलंपिक के विकासखंड, नगरीय क्लस्टर, अउ जिला स्तर के प्रतियोगिता के तारीख मन म बदलाव करे गेहे। अब विकासखंड अउ नगरीय क्लस्टर स्तर के प्रतियोगिता अठारा ले तेईस अगस्त तक अउ जिला स्तर के प्रतियोगिता सत्ताईस अगस्त ले चार सितंबर तक होही। संभाग अउ राज्य स्तर के प्रतियोगिता पहिली बताय मुताबिक दस सितंबर ले बीस सितंबर अउ राज्य स्तर के प्रतियोगिता पच्चीस सितंबर ले सत्ताईस सितंबर तक होही।
हर घर तिरंगा
आजादी के अमृत महोत्सव के तहत हर घर तिरंगा अभियान चलाये जात हे। इही कड़ी म नारायणपुर कलेक्टर अजित बसंत ह अधिकारी मन ल तेरा ले पंद्रह अगस्त के दउरान जम्मों ऑफिस अउ घर मन म तिरंगा फहराय बर लोगन मन ल जानबा देके निर्देश देहे। जानबा के मुताबिक ए बेरा राज्य के जम्मों पोस्ट ऑफिस मन म राष्ट्रीय झंडा बिसाय जात हे।
भाजपा-सहारा निवेशक हेल्प डेस्क
भाजपा के छत्तीसगढ़ इकाई ह आज राजधानी रायपुर के जवाहर बाजार म सहारा पीड़ित मनके पइसा ल लहुटाय बर सहारा पोर्टल हेल्प डेस्क के शुभारंभ करीन। ए मउका म पूर्व मंत्री अउ विधायक बृजमोहन अग्रवाल ह कहिन कि सहारा निवेशक मन ल न्याय देवाय बर केंद्र के मोदी सरकार ह पूरा प्रयास करत हे। ओमन बताइन कि ए पोर्टल के माध्यम ले सहारा इंडिया म कतकोन साल ले रूके निवेशक मनके पइसा ह वापिस मिल जाही।
माओवादी आत्मसमर्पण
कांकेर जिला म आज एक झिन इनामी माओवादी ह पुलिस अधीक्षक के आगू आत्मसमर्पण करीन। एखर उपर पांच लाख रूपिया के इनाम घोषित रीहिस। ये माओवादी बरगढ़, बलांगीर अउ महासमुंद डिवीजन म सक्रिय रेहे के संगेसंग कतकेन माओवादी घटना म सामिल रेहे के आरोप हे।
गांजा बरामद
कोंडागांव जिला के केशकाल पुलिस ह आज एक ठिन कार ले एक कुंटल छब्बीस किलोग्राम गांजा बरामद करे हे। मउका ले आरोपी ह गाड़ी ल छोड़के भाग गेहे। पुलिस ह अज्ञात आरोपी के खिलाफ मामला दर्ज करके जांच शुरू कर देहे। हमर संवाददाता ले मिले जानबा के मुताबिक विश्रामपुरी चौक के तीर राष्ट्रीय राजमार्ग म पुलिस के टीम ह गाड़ी मनके जांच करत रीहिन, इही दउरान जगदलपुर ले आवत एक ठिन कार ल रोके के प्रयास करे गीस। फेर चालक ह गाड़ी ल आगू ले जाके ओला रोक के भाग गीस। पुलिस ह गाड़ी ले करीबन तेरा लाख रूपिया के गांजा जब्त करे हे।
फुटबॉल प्रतियोगिता
तेईसवां राज्य स्तरीय शालेय क्रीड़ा प्रतियोगिता के तहत जगदलपुर म होय सुब्रतो मुखर्जी फुटबॉल प्रतियोगिता म बस्तर जोन के टीम ह पहिली स्थान पाके ओवरऑल चैंपियन के खिताब अपन नाव कर लेहे। त उंहे सरगुजा जोन के टीम ह दूसर अउ दुर्ग जोन के टीम ह तीसर स्थान म अपन जगा बनाय हे। अब बस्तर संभाग के टीम ह ए महीना के आखिर म दिल्ली म होवइया राष्ट्रीय सुब्रतो मुखर्जी फुटबॉल प्रतियोगिता म छत्तीसगढ़ के अगवई करही।
मौसम
मौसम विभाग ह अवइया चौबीस घंटा के दउरान प्रदेश के एक दू जगा म गरज-चमक के संग गाज गिरे के चेतावनी देहे। विभाग के मुताबिक बंगाल के खाड़ी म एक ठिन चक्रीय चक्रवाती घेरा बने हे। जेखर प्रभाव ले प्रदेश के कोनो कोनो जगा म हल्का ले मध्यम बरसा होय के संभावना हे।