प्रधानमंत्री नरेन्द्र मोदी ह आज अमृत भारत स्टेशन योजना के तहत वीडियो कॉन्फ्रेंसिंग के माध्यम ले छत्तीसगढ़ समेत सत्ताईस राज्य के पांच सौ आठ रेलवे स्टेसन के पुनर्विकास के आधारसिला राखीन। ए स्टेसन के पुनर्विकास म करीबन पच्चीस हजार करोड़ रूपिया के लागत आही। प्रधानमंत्री ह किहीन कि हरेक अमृत स्टेशन, सहर के आधुनिक आकांक्षा अउ प्राचीन धरोहर के प्रतीक होही। ओमन किहीन कि अब बछर दू हजार चौदह के तुलना म रेलवे बर बजट सहायता पांच गुना बढ़ाके दू लाख चालीस हजार करोड़ रूपिया कर दे गेहे। ए रेलवे के इतिहास म विकास के एक नवा अध्याय हरय, जेखर ले देस के आम नागरिक मन ल फायदा मिलही। श्री मोदी ह किहीन कि विश्व स्तर म भारत बर भरोसा बाढ़े हे। प्रधानमंत्री ह किहीन कि सरकार ह उत्तर-पूर्वी राज्य मन म रेल नेटवर्क के विस्तार ल प्राथमिकता देवत हे अउ रेलवे के विद्युतीकरण, पटरी मनके दोहरीकरण अउ नवा रद्दा बनाय के काम जोरदरहा चलत हे।
रेलवे स्टेशन पुनर्विकास-02
प्रधानमंत्री ह आज देस के जउन पांच सौ आठ रेलवे टेसन मनके पुनर्विकास काम के वीडियो कान्फ्रेंसिंग के जरिया ले सिलान्यास करीन, एमा छत्तीसगढ़ के सात ठिन रेलवे टेसन घलो हवय। ए योजन के चलत रईपुर, बिलासपुर, दुरूग, तिल्दा-नेवरा, अकलतरा, भिलाई पावर हाउस अउ महासमुंद टेसन के पुनर्विकास करे जाही। ए मउका म रईपुर रेलवे टेसन म राखे गे समारोह म राज्यपाल विश्वभूषण हरिचंदन सामिल होइन। राज्यपाल ह रईपुर रेलवे टेसन के विकास बर तैयार मॉडल ल घलो देखीन। ओमन किहीन कि ए ह तय रूप ले छत्तीसगढ़ के लोगन मनके इच्छा ल पूरा करे के संगे विकास के नवा रद्दा खोले के काम करही।
कार्यक्रम म रईपुर सांसद सुनील सोनी ह प्रधानमंत्री ल धन्यवाद देवत किहीन कि रेलवे टेसन के विकास ल एयरपोर्ट असन बनाय के सोच ह सहराय के लइक हे। कार्यक्रम बेरा अमृत भारत महोत्सव के चलत रईपुर के स्कूल मन म होय कई ठिन प्रतियोगिता के विजेता मन ल राज्यपाल ह पुरस्कार दीन।
इहां ए बतादन कि ए योजना म छत्तीसगढ़ के कुल बत्तीस ठिन रेलवे टेसन ल राखे गेहे। ए योजना के चलत चुने गे रेलवे टेसन मन म वाइड कॉनकोर्स, फुट ओवरब्रिज, लिफ्ट, एस्केलेटर, वेटिंग रूम, वाणिज्यिक क्षेत्र अउ रिटेल काउंटर असन आधुनिक सहुलियत दे जाही।
प्रधानमंत्री-रेलवे स्टेशन पुनर्विकास-03
उहें, केन्द्रीय राज्यमंत्री रेणुका सिंह ह भिलाई पावर हाउस रेलवे टेसन के पुनर्विकास के आधारसिला राखीन। ए टेसन के पुनर्विकास यानि सुघ्घर बनाय के काम ल छब्बीस करोड़ रूपिया के लागत ले करे जाही। ए मउका म ओमन किहीन कि अंबिकापुर ले बरवाडीह तक एक सौ अट्ठायासी किलोमीटर के नवा रेललाइन के प्रपोजल मंत्रालय ल पठोय गेहे। संगे अंबिकापुर ह रेलवे लाइन के माध्यम ले अब सोझे जुड़ गे हवय। इही तरह, अंबिकापुर ले गढ़वा, रांची होवत कोलकाता तक पहुंचे जा सकही।
कार्यक्रम म रईपुर रेलमंडल के ए.जी.एम.आर. विजय कुमार साहू ह दक्षिण-पूर्व मध्य रेलवे म होवइया नौ ठिन टेसन के विकास बारे म जानकारी दीन।
ए मउका म भाजपा प्रदेस अध्यक्ष अउ सांसद अरूण साव ह बिलासपुर रेलवे स्टेसन के कारीकरम म सामिल होइन। उहें, रईपुर रेलवे टेसन म सांसद सुनील सोनी, दुरूग म विजय बघेल, महासमुंद म चुन्नी लाल साहू, जांजगीर म सांसद गुहाराम अजगले अउ अकलतरा रेलवे स्टेसन म विधायक अउ भाजपा के रईपुर संभाग प्रभारी सौरभ सिंह मौजूद रिहीन।
ए मउका म श्री साव ह किहीन कि आज के दिन ह छत्तीसगढ़ बर ऐतिहासिक हरय। ओमन ए योजना बर प्रधानमंत्री नरेन्द्र मोदी अउ रेल मंत्री अश्वनी वैष्णव के आभार जतईन।
मुख्य न्यायाधीश-मुख्यमंत्री मुलाकात
छत्तीसगढ़ उच्च न्यायालय के मुख्य न्यायाधीश न्यायमूर्ति रमेश सिन्हा ह काली रईपुर म मुख्यमंत्री भूपेश बघेल ले मुलाकात करीन। ए दउरान सासन स्तर म माड़हे छत्तीसगढ़ हाईकोर्ट अउ अधीनस्थ कोर्ट मनके कई ठिन बिसय उपर औपचारिक रूप ले गोठबात होइस। बइठका बाद मुख्य न्यायाधीश ह केन्द्रीय जेल रईपुर घलो पहुंच के सबो बैरक मनके निरीक्षण करीन।
मुख्यमंत्री-आईसीएआई जमीन
राज्य सरकार ह नवा रईपुर म ‘वर्ल्ड क्लास सेंटर ऑफ एक्सीलेंस‘ के स्थापना बर आई.सी.ए.आई. ल पांच एकड़ जमीन दीही। मुख्यमंत्री भूपेश बघेल ह आज रईपुर म ‘द इंस्टीट्यूट ऑफ चार्टर्ड अकाउंटेंट्स ऑफ इंडिया‘ के दू दिन वाले राष्ट्रीय अधिवेशन म बोलत ए घोसना करीन। ए मउका म श्री बघेल ह किहीन कि विकास बर तेजी ले बाढ़त छत्तीसगढ़ राज्य म चार्टर्ड अकाउंटेंट्स मन बर सुघ्घर संभावना हे। ओमन किहीन कि व्यापार अउ व्यवसाय ल प्रोत्साहित करे बर नवा रईपुर म एक हजार एकड़ जगह म एसिया के सबले बड़का होलसेल मार्केट बनाय जाही।
खाद-बीज गुणवत्ता
कृषि विभाग डहार ले राज्य म रासायनिक खातू, बीजा अउ कीटनाशक दवई के गुणवत्ता खातिर बिसेस निगरानी राखे जात हे। जिला स्तरीय अधिकारी मन अपन-अपन इलाका म सरलग पहुंच के बीजा, खातू अउ कीटनाशक दवई के सैम्पल लेवत हे, जेखर जांच गुणवत्ता नियंत्रण प्रयोगशाला म करे जात हे। ए खरीफ सीजन म अब तक राज्य म बीजा के नवासी ठिन अउ रासायनिक उर्वरक के पच्चीस ठिन सैम्पल अमानक पाय गेहे, जेखर उपर तत्काल प्रभाव ले बैन लगाय के संगे संबंधित फर्म ल नोटिस जारी करे गेहे।
राजनांदगांव-मतदाता जागरूकता
प्रदेस म प्रस्तावित विधानसभा चुनाव ल लेके राजनांदगांव जिला म प्रशासनिक तैयारी चलत हे। प्रशासन डहार ले सरलग मतदाता जागरूकता कार्यक्रम चलाय जात हे। इही कड़ी म अवइया ग्यारह अगस्त के डोंगरगढ, अट्ठारह के राजनांदगांव अउ पच्चीस अगस्त के छुरिया म मतदाता जागरूकता बर बिसेस कारीकरम राखे जाही। कार्यक्रम ल लेके जिला कलेक्टर ह रिटर्निंग अउ नोडल अधिकारी मनके बइठका लेके स्वीप कार्यक्रम म दिव्यांग वोटर मन ल जोड़े के निरदेस घलो दीन।
रक्षाबंधन-सैनिक राखी
सीमा म तैनात भारतीय सिपाही मनके कलई ह ए बखत रक्षाबंधन के मउका म राजनांदगांव के स्कूली लइका मन डहार ले बनाय गे रंग-बिरंगा राखी ले सजही। गायत्री विद्यापीठ के लइका मन भूतपूर्व सैनिक कल्याण संगठन के आरो ले ए राखी बनाय हे। ए राखी मन म लइका मन ह देस प्रेम के भावना के संगे सुघ्घर संदेस घलो लिखे हे।
इहां ए बतादन कि ए बखत देस के कई ठिन सहर ले सेना मुख्यालय म करीबन ग्यारह लाख ले जादा राखी देस के सैनिक मन तीर पठोय के लक्ष्य हे।
नायब तहसीलदार-राजपत्रित पद
राज्य म अब नायब तहसीलदार मन ल राजपत्रित पद यानि गजेस्टेड पोस्ट के दर्जा दे जाही। मुख्यमंत्री भूपेश बघेल ह आज रईपुर म कनिष्ठ प्रशासनिक सेवा संघ के प्रांतीय सम्मेलन म ए घोसना करीन। सम्मेलन म संघ के प्रमोशन संबंधी मांग उपर मुख्यमंत्री ह ओमन ल भरोसा देवईन हे कि अधिकारी मनके बेरा म प्रमोशन जरूर होही।
राज्य स्तरीय प्रांतीय सम्मेलन म कनिष्ठ प्रशासनिक सेवा संघ के प्रांताध्यक्ष कृष्ण कुमार लहरे, सचिव विक्रांत सिंह राठौर, प्रवक्ता शशिभूषण सोनी समेत राज्यभर ले आय तहसीलदार अउ नायब तहसीलदार मौजूद रिहीन।
भाजपा-सदस्यता
आज सात सौ ले जादा जवान लइका मन ह भाजपा के सदस्यता लीन। रईपुर के एकात्म परिसर स्थित पार्टी मुख्यालय म राखे गे कारीकरम म भाजपा प्रदेस अध्यक्ष अरूण साव ह ए युवा मन ल पार्टी के सदस्यता देवइन। ए मउका म सांसद सुनील सोनी अउ विधायक बृजमोहन अग्रवाल घलो मौजूद रिहीन।
मौसम