प्रधानमंत्री नरेन्द्र मोदी ह काली विडियो कॉन्फ्रेसिंग के माध्यम ले देसभर के पांच सौ आठ रेलवे स्टेशन मन के पुनर्विकास के आधारशिला रखही। अमृत भारत स्टेशन योजना के अंतर्गत चौबीस हजार चार सौ सत्तर करोड़ रूपिया ले जादा के लागत ले स्टेशन मनके पुनर्विकास करे जाही। ए स्टेशन सत्ताईस ठन राज्य अउ केन्द्र शासित प्रदेस मन म फैले हुए हे। ए योजना म छत्तीसगढ़ के सात ठन स्टेशन- रइपुर, बिलासपुर, दुर्ग, अकलतरा, भिलाई पावर हाउस, तिल्दा-नेवरा अउ महासमुंद घलो सामिल हे। ए स्टेशन मन ल सिटी सेंटर के रूप म विकसित करे बर मास्टर प्लान तैयार करे जात हे। इंहा, अत्याधुनिक यात्री सुविधा उपलब्ध कराय जाही।
हर घर तिरंगा अभियान
केन्द्र सरकार तेरह ले पन्द्रह अगस्त के बीच हर घर तिरंगा अभियान चलाही। एला देखत हुए इंडिया पोस्ट, हर घर तिरंगा के उत्सव मनाय बर देस भर म एक लाख साठ हजार डाक घर के माध्यम ले राष्ट्रीय ध्वज के बिक्री करही। ई-पोस्ट ऑफिस सुविधा के माध्यम ले घलो राष्ट्रीय ध्वज ल खरीदे जा सकत हे। ए अभियान पाछू बछर बेहद सफल होय रिहीस हे। ओ बखत तेईस करोड़ परिवार मन ह अपन घर म तिरंगा फहराए रिहीन।
फसल बीमा योजना
प्रधानमंत्री फसल बीमा योजना के अंतर्गत चालू खरीफ बछर म किसान मन अपन फसल के बीमा आगामी सोलह अगस्त तक करा सकत हे। प्रदेस म भारतीय कृषि बीमा कंपनी डहार ले उद्यानिकी फसल जइसे -टमाटर,भांटा,जाम , केरा,पपीता, मिर्चा अउ अदरक बर पुनर्गठित मौसम आधारित फसल बीमा योजना संचालित करे जात हे। इच्छुक ऋणी अउ अऋणी किसान मन निकटतम राष्ट्रीय बैंक शाखा, क्षेत्रीय ग्रामीण बैंक, जिला सहकारी बैंक, प्राथमिक सहकारी समिति, लोकसेवा केन्द्र, भारत सरकार के बीमा पोर्टल अउ डाक विभाग के माध्यम ले फसल बीमा करा सकत हे।
इंही, बीच प्रधानमंत्री फसल बीमा योजना के प्रचार-प्रसार बर रइपुर कलेक्टर ह रथ ल झंडी देखा के रवाना करीन। ए मउका म कलेक्टर ह सबो किसान मन ल अपील करे हे कि ओमन समय सीमा ल ध्यान म रखत हुए तत्काल अपन फसल मन के बीमा करावय।
रानू साहू-याचिका खारिज
कोयला अउ मनी लॉन्ड्रिंग मामला म गिरफ्तार निलंबित आईएएस अधिकारी रानू साहू के जमानत के याचिका ल विशेष न्यायाधीश अजय सिंह राजपूत के कोर्ट ह खारिज कर दे हे। रानू साहू डहार ले काली कोर्ट म जमानत याचिका लगाय गे रिहीस। शुक्रवार के कोर्ट के समय खतम होय के कारण ईडी के अधिवक्ता अपन पक्ष नइ रख सकीस। आज उंखर पक्ष ल सुने के बाद कोर्ट ह अपन फैसला सुनाइस। उहें, काली रानू साहू ल कोर्ट म पेश करे गे रिहीस, जिहां उंखर न्यायिक रिमांड के अवधि अठ्ठारा अगस्त तक बढ़ा दे गेहे।
इंही, बीच कोयला घोटाला मामला म निलंबित आईएएस समीर बिश्नोई, कारोबारी सूर्यकांत तिवारी, सुनील अग्रवाल समेत दूसर आरोपी मन के घलो न्यायिक रिमांड के अवधि खत्म होय उपर आज कोर्ट म पेश करे गीस। ए सब्बों आरोपी मन के घलो न्यायिक रिमांड अवधि तेइस अगस्त तक बढ़ा दे गेहे।
गौरतलब हे कि कोयला घोटाला मामला म अब तक चार अधिकारी समेत चौदह झन ल गिरफ्तार कर जेल भेजें जा चुके हे।
भाजपा महिला मोर्चा-बैठक
भारतीय जनता पार्टी महिला मोर्चा डहार ले आज कुशाभाऊ ठाकरे एकात्म परिसर स्थित पार्टी कार्यालय म रइपुर अउ दुर्ग संभाग स्तरीय बइठका होइस। ए बइठका म महिला मोर्चा के राष्ट्रीय पदाधिकारी निशा सिंह, स्मिता बरूआ, आरती सिंह, प्रदेस अध्यक्ष शालिनी राजपूत समेत दूसर पदाधिकारी मन मौजूद रिहीन।
माओवादी-आत्मसमर्पण
सुकमा जिला म सात झन महिला समेत बाईस झन माओवादी मन ह सुरक्षा बल के समक्ष आत्मसमर्पण कर दीन। जिला के पुलिस अधीक्षक किरण चव्हान ह बताइन कि ए माओवादी मन ह डब्बा कोंटा म जिला पुलिस बल, डीआरजी, सीआरपीएफ अउ कोबरा बटालियन के अधिकारी मन के समक्ष आत्मसमर्पण करीन। ए सबो माओवादी मन चिंतागुफा अउ भेज्जी थाना क्षेत्र म सक्रिय रिहीन।
फाइलेरिया/कृमि मुक्ति दिवस
फाइलेरियारोधी दवा के सेवन के प्रति जन-जागरूकता बढ़ाय के उद्देश्य ले आगामी दस अगस्त ले प्रदेस के सात ठन जिला म सामूहिक दवा सेवन के अभियान के सुरूआत करे जाही। ए दउरान दुर्ग, बालोद, बेमेतरा, जांजगीर चांपा,सक्ति, महासमुंद अउ मुंगेली जिला के तेईस ठन विकास खंड के सड़सठ लाख लोगन मन ल फाइलेरिया के दवा खवाय जाही।
उहें, प्रदेस म दस अगस्त ले राष्ट्रीय कृमि मुक्ति दिवस घलो मनाय जाही। एखर दउरान एक ले उन्नीस बछर तक के सबो लइका अउ किशोर-किशोरी मन ल कृमि नाशक दवा खवाय जाही। आंगनबाड़ी केन्द्र, शासकीय विद्यालय, स्वास्थ्य केन्द्र, अनुदान प्राप्त निजी स्कूल अउ तकनीकी शिक्षा संस्थान मन म घलो कृमि के दवा के सेवन कराय जाही।
प्रथम मुख्य न्यायाधीश-निधन
छत्तीसगढ़ उच्च न्यायालय के प्रथम मुख्य न्यायाधीश न्यायमूर्ति डब्ल्यू.ए. शिश्ॉाक के मणिपुर के इंफाल म निधन होगे हे। चार दिसंबर दू हजार के छत्तीसगढ़ उच्च न्यायालय म प्रथम मुख्य न्यायाधिपति के रूप म इखर नियुक्ति होय रिहीस अउ चौबीस जनवरी दू हजार दू तक ओमन ए पद म रिहीन।
श्री शिशॉक के निधन म छत्तीसगढ़ उच्च न्यायालय के मुख्य न्यायाधीश रमेश सिन्हा समेत दूसर न्यायाधीश अउ अधिकारी मन ह उनला श्रध्दांजलि अर्पित करीन।
डिप्टी कलेक्टर-स्थानांतरण
बीजापुर जिला के पोटाकेबिन म पाछू होय घटना के बाद कलेक्टर राजेन्द्र कुमार कटारा ह छात्रावास म विद्यार्थी मन डहार ले मोबाइल फोन लाय उपर प्रतिबंध लगा देहे। ए संबंध म कलेक्टर ह छात्रावास अधीक्षक मन ल निरदेस जारी करे देहे। कलेक्टर ह किहीन हे कि अगर छात्रावास के विद्यार्थी मन ल अपन परिजन मन से बात करना होही त छात्रावास अधीक्षक के मोबाइल फोन के उपयोग कर सकत हे। कलेक्टर ह छात्रावास अधीक्षक मन ल इहू किहीन कि मोबाइल फोन के उपयोग ले लइका मन ल बचाय जाय अउ संस्थान म विद्यार्थी मोबाइल लेके झन आवय, एखर कड़ाई ले पालन सुनिश्चित करे जाय।
हल्बी/गोण्डी-समाचार बुलेटिन
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन ह रिले करही। ए बखत के अंक म ‘‘कबीरधाम‘‘ जिला के गतिविधी मन के बारे म जानकारी दे जाही।
अउ अब थोरकुन समाचार सार म-
– मुख्यमंत्री भूपेश बघेल ह आज गोधन न्याय योजना के तहत गोबर विक्रेता, गौठान समिति अउ महिला समूह ल पंद्रह करोड़ उनतीस लाख रूपिया के रासि उंखर बैंक खाता म ऑनलाइन जमा करीन।
– छत्तीसगढ़ विधानसभा म पूर्व नेता प्रतिपक्ष स्वर्गीय महेंद्र कर्मा के आज जयंती हे। ए बेरा म मुख्यमंत्री भूपेश बघेल ह उंखर छायाचित्र म पुष्प अर्पित कर उनला नमन करीन।
– रायगढ़ म हर बछर होवइया दस दिवसीय चक्रधर समारोह ह ए बखत तीन दिन के होही अउ एखर आयोजन नगर निगम के ऑडिटोरियम म करे जाही।
अउ
– संघ लोक सेवा आयोग डहार ले आयोजित सेंट्रल आर्म्ड पुलिस फोर्स म सहायक कमांडेन्ट भर्ती बर परीक्षा काली छै अगस्त के दू पॉली म ले जाही।