प्रधानमंत्री नरेंद्र मोदी अवइया छै अगस्त के देश के पांच सौ आठ रेलवे स्टेशन मनके पुर्नविकास के आधारशिला रखहीं। अमृत भारत स्टेशन योजना के तहत चौबीस हजार करोड़ रूपिया के लागत ले देशभर म पांच सौ आठ रेलवे स्टेशन के पुर्नविकास करे जाही। ए स्टेशन ल सिटी सेंटर के रूप म विकसित करे बर मास्टर प्लान तैयार करे जावत हे।
ए योजना के तहत रायपुर, बिलासपुर, दुग,र् अकलतरा, भिलाई पावर हाउस, तिल्दा-नेवरा अउ महासमुंद समेत छत्तीसगढ़ के सात स्टेशन सामिल हरय।
स्टेशन भवन के डिजायन स्थानीय संस्कृति विरासत अउ वास्तुकला ले प्रेरित होही। ए स्टेशन म हाईटेक यात्री सुविधा देवाय जाही।
मेरी माटी मेरा देश
देश के खातिर अपन जीवन के बलिदान देवइया वीर मन ल श्रद्धांजलि देबर नौ ले तीस अगस्त तक मेरी माटी मेरा देश अभियान चलाय जाही। एखर तहत गांव ले लेके राष्ट्रीय स्तर तक राष्ट्रव्यापी जनभागीदारी कार्यक्रम आयोजित करे जाही। उंहे ग्राम पंचायत मन म स्मारक पट्टिका स्थापित करे जाही। संगरा नई दिल्ली म अमृत वाटिका के निर्माण करे जाही। एखर बर अमृत कलश यात्रा निकालके देशभर के आने आने जगा ले माटी इकट्ठा करे जाही। ये जानकारी आज नई दिल्ली म सूचना प्रसारण अउ दूरसंचार विभाग के सचिव अपूर्व चंद्रा, संस्कृति सचिव गोविंद मोहन, अउ युवा कार्यक्रम सचिव मीता राजीव लोचन ह संयुक्त संवाददाता सम्मेलन म दीन। ए मउका म प्रसार भारती के सीईओ गौरव द्विवेदी घलो मौजूद रीहिन।
अपूर्व चंद्रा ह कीहिन कि मेरी माटी मेरा देश आजादी के अमृत महोत्सव के समापन कार्यक्रम होही। संस्कृति सचिव गोविंद मोहन ह बताइन कि ए कार्यक्रम बर एक ठिन वेबसाईट लांच करे गेहे । जेमा आम नागरिक माटी या माटी के दीया हाथ म लेके अपन सेल्फी अपलोड कर सकत हे। संघरा नागरिक के रूप म अपन कर्त्तव्य ल पूरा करे अउ राष्ट्र के रक्षा करइया वाला मन ल सम्मान करे उपर ध्यान केंद्रित करत पंचप्राण के प्रतीज्ञा लेके वेबसाईट ले डिजीटल प्रमाण पत्र डाउनलोड कर सकत हे।
सीएम-छात्रावास
दुर्ग के स्वामी विवेकानंद टेक्नीकल यूनिवर्सिटी म सेंटर ऑफ एक्सीलेंस के स्थापना करे जाही। पंद्रह करोड़ रूपिया के लागत ले बनने वाला ए संस्थान म स्टार्टअप यूनिट्स बर जगा होही। संगरा प्रयोगशाला घलो होही। मुख्यमंत्री भूपेश बघेल ह ये घोषणा युवा मनले भेंट-मुलाकात के दउरान करीन।
मुख्यमंत्री ह यहू कीहिन कि छात्रावास म रहइया छात्र मन बर बारा प्रतिशत के दर ले जउन जीएसटी लगाय गेहे, यदि ये निर्णल ल वापिस नइ लीही त छत्तीसगढ़ के विद्यार्थी मन बर ए राशि के वहन राज्य सरकार करही।
जागरूकता रथ
कृषि मंत्री ताम्रध्वज साहू ह आज दुर्ग ले प्रधानमंत्री फसल बीमा योजना के प्रचार प्रसार बर आठ ठिन जागरूकता रथ ल रवाना करीन। ये जागरूकता रथ गांव गांव घूमके किसान मन ल बीमा संबंधी जानकारी दीहीं अउ ओमन ल बीमा कराय बर प्रेरित करही।
राज्यपाल-ब्लड सेंटर शिलान्यास
राज्यपाल अउ छत्तीसगढ़ रेड क्रास के अध्यक्ष विश्वभूषण हरिचंदन ह भारतीय रेडक्रास सोसायटी राज्य शाखा रायपुर डहार ले सिविल लाइन रायपुर म बनाये जावत अत्याधुनिक ब्लड सेंटर के शिलान्यास करीन। ए ब्लड बैंक म अत्याधुनिक मशीन के माध्यम ले जांच करके रक्त के संग्रहण करे जाही। जेखर ले जरूरतमंद मरीज मन ल सुरक्षित रक्त उपलब्ध कराय जा सकय।
सड़क मवेशी जुर्माना
सड़क म मवेशी मनके सेती होवइया दुर्घटना अउ अवई जवई म होवत परेसानी ल देखत रायपुर जिला प्रशासन ह सख्त रवइया अपनाय के निर्णय लेहे। अब सड़क म पशु मनके पाय जाय म पशुपालक मनले एक हजार रूपिया जुर्माना वसूल करे जाही।
कलेक्टर डॅाक्टर सर्वेश्वर नरेंद्र भूरे ह आज जिला पंचायत के मुख्य कार्यपालन अधिकारी नगर निगम राष्ट्रीय राजमार्ग प्राधिकरण अउ पुलिस विभाग के अधिकारी मन संग बइठका के दउरान ए संबंध म आदेश जारी करीन। ओमन कीहिन कि अब ग्रामीण क्षेत्र मन म सड़क सार्वजनिक स्थान या उद्यान मन म पशु मनके घूमत पाय म संबंधित पशुपालक मनले एक हजार रूपिया जुर्माना वसूले जाही। एखर बर ग्राम पंचायत के सचिव ल अधिकृत करे गेहे।
मुख्य न्यायाधीश दौरा
छत्तीसगढ़ उच्च न्यायालय के मुख्य न्यायाधीश रमेश सिन्हा ह बेमेतरा जिला न्यायालय परिसर के औचक निरीक्षण करीन। ओमन जम्मों कक्षा के संगेसंग परिसर म वाहन के पार्किंग, स्वच्छता, वॉशरूम अधिवक्ता अउ पक्षकार मनके बइठक व्यवस्था के घलो जायजा लीन। निरीक्षण के दउरान न्यायालय के भवन पुराना होय के सेती लाइब्रेरी, रिकॉर्ड रूम समेत कुछएक जगा मन म सीलन पाय गीस। उंहे अधिवक्ता कक्ष म घलो पानी रिसे के सेती ओमन नाराजगी जतावत व्यवस्था म जरूरी सुधार करे के निर्देश दीन।
बारिश
राजधानी रायपुर समेत प्रदेशभर म पाछू तीन दिन ले होवत बारिश के सेती नदी नाला उफान म हे, उंहे राज्य के जम्मों बांध मनके जलस्तर बाढ़ गेहे। मिले जानकारी अनुसार राज्य के बारा बड़का अउ चौंतीस मध्यम जलाशय मन म लगभग अठहत्तर प्रतिशत जल भराव हो चुके हे।
जल संसाधन विभाग के अनुसार मुंगेली जिला के मनियारी जलाशय म शत प्रतिशत जलभराव हो चुके हे। अइसने कोरबा जिला के मिनीमाता-बांगो, बालोद के तांदुला, कांकेर के दुधाव, बिलासपुर के खारंग अउ गरियाबंद के सिकासेर म अस्सी प्रतिशत अउ धमतरी के गंगरेल बांध म लगभग पचहत्तर प्रतिशत जलभराव हो चुके हे। एखर अलावा बालोद के खरखरा, कबीरधाम के छिरपानी, राजनांदगांव के पिपरिया नाला, दुर्ग के खपरी जलाशय म शत प्रतिशत, बालोद के गोंदली, कबीरधाम के सुतियापाटी अउ कर्रा नाला, राजनांदगांव के मटियामोती अउ धारा, कोरिया के झुमका अउ सरगुजा के बरनई जलाश म नब्बे प्रतिशत ले जादा जलभराव हो चुके हे। ओति कैचमेंट एरिया ले सरलग पानी के आवक ल देखत कुछएक बांध मनले पानी छोड़े जात हे।
ओति बिलासपुर जिला म घलो अरपा नदी के जलस्तर बाढ़ गेहे। एखरे संघरा भैंसाझार बैराज ले घलो अरपा नदी म पानी छोड़े जात हे। एला देखत अरपा नदी के आसपास के बस्ती मन बर अलर्ट जारी करे गेहे।
जेईई-नीट
प्रदेश म संचालित एकलव्य आदर्श आवासीय विद्यालय मन म कक्षा बारहवीं म पढ़ईया विद्यार्थी मन ल जेईई अउ नीट प्रवेश परीक्षा के तैयारी बर ऑनलाईन कोचिंग के निशुल्क सुविधा देवाय जाही। आदिम जाति अउ अनुसूचित जाति विकास मंत्री मोहन मरकाम के अध्यक्षता म आज मंत्रालय म राखे गे छत्तीसगढ़ राज्य स्तरीय आदिम जाति कल्याण आवासीय अउ आश्रम संस्थान समिति के संचालक मंडल के बइठका म ए प्रस्ताव के अनुमोदन करे गीस। बइठका के दउरान निर्णय ले गीस कि एकलव्य विद्यालय के प्राचार्य अउ दूसर कर्मचारी मनके स्थानांतरण राज्य समिति के अनुमोदन ले ही करे जाही।
दूरदर्शन आवेदन
दूरदर्शन केंद्र रायपुर के प्रादेशिक समाचार एकांश बर बुलेटिन एडिटर, सीनियर कॉरस्पॉन्डेंट, वीडियोग्राफर, वीडियो पोस्ट प्रोडक्शन असिस्टेंट, पैकेजिंग असिस्टेंट, कॉपी एडिटर, कंटेट एक्जीक्यूटिव, ब्रॉडकास्ट एक्जीक्यूटिव, अउ एंकर-कम-कॉरस्पॉन्डेंट पद म नियुक्ति बर संविदा आधार म ऑनलाईन अर्जी मंगाय गेहे। ऑनलाईन अर्जी के आखरी तारीख पांच अगस्त हवय। अर्जी करइया मन पूरा जानबा प्रसार भारती के वेबसाईट – प्रसार भारती डॅाट जीओवी डॅाट इन /पी.बी. वैकेंसीज – म देख सकथे।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत नई राष्ट्रीय शिक्षा नीति उपर शशांक शर्मा ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली पांच अगस्त के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।