छत्तीसगढ़ सर्व विभागीय संविदा कर्मचारी मनके एक महीना ले चलत हड़ताल आज सिरागे। ए कर्मचारी मन पाछू तीन जुलाई ले नियमितीकरण के मंाग ल लेके रायपुर के माना स्थित तूता के धरना वाले जगा म अनिश्चितकालीन हड़ताल म बइठे रीहिन। राज्य शासन ले मिले आश्वासन के बाद संविदा कर्मी मन ह हड़ताल ल खतम करके काम म लहुटे के फैसला लेहे। जानबा के मुताबिक अपन मंाग ल लेके प्रदेश के करीबन पैंतालिस हजार संविदा कर्मी मन हड़ताल म बइठे रीहिन।
महंगाई भत्ता आदेश
राज्य सरकार ह प्रदेश के सरकारी कर्मचारी मनके चार प्रतिशत के उपराहा महंगाई भत्ता देके आदेश जारी कर देहे। अब ए कर्मचारी मन ल एक जुलाई ले बयालिस फीसदी महंगाई भत्ता मिलही। जानबा के मुताबिक सातवंा वेतनमान के तहत चार फीसदी महंगाई भत्ता बढ़ाय गेहे। छठा वेतनमान के तहत अब सरकारी कर्मचारी मन ल दू सौ इक्कीस प्रतिशत महंगाई भत्ता मिलही।
चिटफंड कंपनी
मुख्यमंत्री ह आज रायपुर ले वीडियो कॉन्फ्रेसिंग के माध्यम ले सात जिला मनके पैंतीस हजार ले जादा चिटफंड कंपनी के पीड़ित निवेशक मनल चार करोड़ तेरा लाख रूपिया ले जादा के पईसा लहुटइन। एमा रायपुर बिलासपुर राजनंादगंाव, धमतरी मनेन्द्रगढ़ कोरिया अउ मोहला मानपुर अंबागढ़ चौकी जिला के निवेशक मन शामिल हे।
जानबा के मुताबिक मुख्यमंत्री के निर्देश म अब तक राज्य के इक्यासी हजार ले जादा पीड़ित निवेशक मन ल करीबन अड़तीस करोड़ रूपिया के राशि लहुटाय जा चुके हे। ए मामला म दू सौ आठ चिटफंड कंपनी के खिलाफ चार सौ बांसठ प्रकरण दर्ज करे गेहे।
मतदाता सूची-पुनरीक्षण
प्रदेश म अवइया विधानसभा चुनई ल देखत आजले एकीकृत मतदाता सूची के प्रारंभिक प्रकाशन के विशेष संक्षिप्त पुनरीक्षण के काम शुरू होगे। इकतीस अगस्त तक चलइया ए कार्यक्रम म नवा वोटर मनके नाम जोड़े जाही अउ सुधारे के काम घलो करे जाही।
एति खराब मौसम के सेती आज रायपुर म होवइया वॉकेथन स्थगित कर दे गेहे। एति मुंगेली जिला म आज मतदाता जागरूकता बर वॉकेथान राखे गीस। जेमा युवा, दिव्यांग अउ थर्ड जेंडर के संगेसंग कतकोन लोगन मन भाग लीन। उंहे कोरिया जिला म जिला निर्वाचन अधिकारी विनय कुमार लंगेह ह आम मतदाता अउ नवा युवा मतदाता मन ल मतदान कोति जागरूक करे बर मोटर सायकिल रैली ल हरा झंडी दिखाके रवाना करीन।
भाजपा कोर ग्रुप बैठक-सदस्यता
भारतीय जनता पार्टी के कोर ग्रुप के बइठका आज रायपुर स्थित प्रदेश भाजपा कार्यालय परिसर म होइस। बइठका म पार्टी के राष्ट्रीय संगठन महामंत्री बी.एल. संतोष प्रदेश प्रभारी ओम माथुर, सह प्रभारी नीतिन नबीन, प्रदेश अध्यक्ष अरूण साव, राष्ट्रीय उपाध्यक्ष लता उसेण्डी, क्षेत्रीय संगठन महामंत्री अजय जामवाल के संगेसंग नेता प्रतिपक्ष नारायण चंदेल, पूर्व अध्यक्ष विष्णुदेव साय अउ बड़का पदाधिकारी मन शामिल होय हे।
एखर पहिली प्रदेश प्रभारी ओम माथुर, सह प्रभारी नीतिन नबीन, प्रदेश अध्यक्ष अरूण साव, के अगवई म आज एक हजार ले जादा लोगन मन ह भाजपा के सदस्यता लीन। एमा पूर्व महापौर ओमप्रकाश देवंागन, पांच झिन पार्षद, के संगेसंग पिछड़ा वर्ग अउ आने समाज के बड़का नेता मन घलो सामिल होइन। उंहे पूर्व शिक्षा अधिकारी जी.आर. चंद्राकर ह घलो भाजपा म शामिल होय हे।
मुख्यमंत्री-प्रधानमंत्री पत्र
प्रदेश के मुख्यमंत्री ह प्रधानमंत्री नरेंद्र मोदी ल चिट्ठी लिखके प्रदेश म प्रधानमंत्री आवास योजना म प्रतीक्षा सूची के बांचे आवास बर लक्ष्य आवंटित करे के विनती करे हे। मुख्यमंत्री ह एखरे संग प्रधानमंत्री ले प्रदेश म आवास प्लस के करीबन आठ लाख बीस हजार हितग्राही परिवार मन बर घलो लक्ष्य आवंटित करे के विनती करे हे। मुख्यमंत्री ह प्रधानमंत्री ले केहे हे कि बांचे आवास मनके संगेसंग राज्य ल आवास प्लस के घलो लक्ष्य दे जाय।
अंगदान महोत्सव
अंगदान कोति लोगन मन ल जागरूक करे बर प्रदेश म काली तीन अगस्त के भारतीय अंगदान दिवस महोत्सव मनाये जाही। राष्ट्रीय स्वास्थ्य मिशन ह ए बारे म जम्मों जिला के मुख्य चिकित्सा अउ स्वास्थ्य अधिकारी के संगेसंग राज्य स्वास्थ्य संसाधन केंद्र के संचालक मन ल ए बारे म दिशा निर्देश देहे। संचालक, चिकित्सा शिक्षा ह घलो जम्मों सरकारी मेडिकल कॉलेज के डीन मन ल चिट्ठी लिखके ए आयोजन के निर्देश देहे।
जानबा के मुताबिक केंद्रीय स्वास्थ्य मंत्रालय ह अंगदान के प्रति लोगन मन ल जानबा देबर अउ एखर ले जुड़े संसो ल दूर करे बर जम्मों राज्य मन म काली अंगदान महोत्सव मनाये जात हे।
हर घर तिरंगा अभियान
केंद्र सरकार ह तेरा ले पंद्रह अगस्त के बीच हर घर तिरंगा अभियान चलाही। एला देखत इंडिया पोस्ट ह हर घर तिरंगा उत्सव मनाये बर देशभर म एक लाख साठ हजार पोस्ट ऑफिस के माध्यम ले राष्ट्रीय झंडा के बिक्री करही। संगेसंग ई-पोस्ट ऑफिस सुविधा के माध्यम ले घलो राष्ट्रीय झंडा बिसाय जा सकथे।
माओवादी मुठभेड़
गरियाबंद जिला के कुल्हाड़ी घाट के तीर भालू डिग्गी के जंगल म सुरक्षा बल अउ माओवादी मनके बीच मुठभेड़ होय हे फेर एमा कोनो के हताहत होय के खबर नइ मिले हे।
जिला के पुलिस अधीक्षक अमित तुकाराम कांबले ह बताइन कि गंाव भालू डिग्गी ले चार किलोमीटर दूरिहा बांस पेड़ के जंगल म माओवादी मनके कैम्प होय के सूचना के बाद सीआरपीएफ अउ जिला पुलिस के संयुक्त टीम ह सर्चिंग म निकले रीहिन, इही दउरान सुरक्षा बल मन ल देखके माओवादी मन ह गोलीबारी शुरू कर दीन। जवान मन डहार ले जवाबी कार्रवाई करे के बाद माओवादी मन ह कैम्प छोड़के भाग गे।
खेल समाचार
सिडनी म चलत ऑस्ट्रेलियाई ओपन बैडमिंटन टूर्नामेंट म छत्तीसगढ़ के बैडमिंटन खिलाड़ी आकर्षि कश्यप ह विश्व के चौतीसवंा रैंक के खिलाड़ी मलेशिया के गो जिन वेई ल हरा देहे। आकर्षि कश्यप के अवइया मुकाबला देश के स्टार बैडमिंटन खिलाड़ी पी.वी. सिंधू ले होही।
उंहे कनाडा म चलत वेटलिफ्टिंग प्रतियोगिता म बेमेतरा सिटी कोतवाली के पूर्व निरीक्षक अंबर सिंह भारद्वाज ह पच्यासी किलोग्राम वर्ग म स्वर्ण अउ रजत पदक पाय हे। कनाडा के विन्नीपेग शहर म चलत ए प्रतियोगिता म अंबर सिंह ह फ्रांस के खिलाड़ी ल हराके स्वर्ण पदक जीतिन, त उंहे दूसर केटेगरी म रजत पदक घलो जीते हे।
एति दिल्ली म चलत एशियन गेम्स म राजनंादगांव जिला के ज्ञानेश्वरी यादव ह वेटलिफ्टिंग म उनचास किलोग्राम वजन समूह म कुल एक सौ छिहत्तर किलोग्राम वजन उठाके जूनियर, सीनियर समूह म स्वर्ण पदक जीते हे। उंहे पुरूष वर्ग म इही जिला के जगदीश विश्वकर्मा ह छियानबे किलोग्राम वजन समूह म कुल तीन सौ इकचालीस किलोग्राम वजन उठाके कांस्य पदक जीते हे।
दूरदर्शन आवेदन
डी.डी. न्यूज महानिदेशालय नई दिल्ली डहार ले दूरदर्शन केंद्र रायपुर के प्रादेशिक समाचार एकंाश बर बुलेटिन एडिटर, सीनियर कॉरस्पॉन्डेंट, वीडियोग्राफर, वीडियो पोस्ट प्रोडक्शन असिस्टेंट, पैकेजिंग असिस्टेंट, कॉपी एडिटर, कंटेट एक्जीक्यूटिव, ब्रॉडकास्ट एक्जीक्यूटिव, अउ एंकर-कम-कॉरस्पॉन्डेंट पद म नियुक्ति बर संविदा आधार म ऑनलाईन अर्जी मंगाय गेहे। ऑनलाईन अर्जी के आखरी तारीख पांच अगस्त हवय। अर्जी करइया मन पूरा जानबा प्रसार भारती के वेबसाईट – प्रसार भारती डॅाट जीओवी डॅाट इन – म देख सकथे।
मौसम
मौसम विभाग ह अवइया बारा घंटा के दउरान रायगढ़, कोरबा, अउ सरगुजा जिला के एक-दू जगा म अतिभारी बरसा होय के चेतावनी देहे। उंहे कोरिया, सूरजपुर, जशपुर, बलरामपुर, पेण्ड्रा, मुंगेली, बिलासपुर, जंाजगीर, रायपुर अउ बलौदाबाजार जिला मनके एक दू जगा म भारी बरसा होय के संभावना जताय हे। विभाग ह दुर्ग, बेमेतरा, कबीरधाम, महासमुुंद अउ राजनंादगंाव जिला मन म घलो बने बरसा होय के संभावना जताय हे।
एति राजधानी रायपुर के संगेसंग प्रदेश के कतकोन जिला मन म आज बीहनिया ले हल्का ले तेज बरसा होवत हे। राजधानी म सरलग होवत बरसा के सेती नीचे के बस्ती मन म पानी भरे जइसन स्थिति बन गेहे।