मुख्यमंत्री घोषणा
मुख्यमंत्री भूपेश बघेल ह कहिनकि राज्य लोक सेवा आयोग के परीक्षा म साक्षात्कार के अंक कम करे जाही। उंहे लिखित परीक्षा के परिणाम के संग अवइया परीक्षा म अभयर्थी मनके वर्गवार कटऑफ सूची लिखित परीक्षा के संग जारी करे जाही। बिलासपुर के बहतराई इंडोर स्टेडियम म युवा मन के संग भेंट-मुलाकात कार्यक्रम म मुंख्यमंत्री ये घोषणा करीन। ओमन कहिन कि लोक सेवा आयोग के परीक्षा म अभ्यर्थी मनके सुविधा बर एक मानक पुस्तक तैयार करे जाही। उंहे बिलासपुर म लोक सेवा आयोग के परीक्षा के अभयर्थी मन बर एक छात्रावास घलो बनाये जाही।
मतदाता सूची-पुनरीक्षण
प्रदेश म अवइया विधानसभा चुनाव ल देखत मतदाता सूची के विशेष संक्षिप्त पुनरीक्षण काली ले सुरू होवत हे। ए दउरान सूची म नवा मतदाता मनके नाम जोड़े जाही अउ संसोधन के काम घलो करे जाही। एखर तहत गांव मन म विशेष ग्राम सभा के आयोजन करे जाही, जेमा मतदाता सूची मनके वाचन होही। संगेसंग गांव मन म मतदाता जागरूकता बर रैली घलो निकाले जाही।
ए बारे म प्रदेस के मुख्य निर्वाचन पदाधिकारी रीना बाबासाहेब कंगाले ह बतईन कि मतदाता सूची पुनरीक्षण अभियान म जादा ले जादा लोगन मन ल जोड़े बर काली रईपुर म वॉकेथान के आयोजन करे जाही। ए वॉकेथान बिहनिया सात बजे जी.ई. रोड स्थित गांधी उद्यान चउक ले सुरू होके सहीद स्मारक भवन म सिराही। ओमन सहर के जम्मों वर्ग के लोगन ले ए वॉकेथान म भाग लेके अनुरोध करे हे। मुख्य निर्वाचन पदाधिकारी ह बतईन कि मतदाता सूची के आखिरी प्रकासन चार अक्टूबर के करे जाही।
भाजपा अनुसूचित जाति मोर्चा-बैठक
एखर पहिली भारतीय जनता पार्टी के अनुसूचित जाति मोर्चा के राष्ट्रीय पदाधिकारी मनके बइठका आज राजधानी रईपुर के अग्रसेन धाम म राखे गीस। एमा मोर्चा के राष्ट्रीय अध्यक्ष लाल सिंह आर्य, महामंत्री शंभूनाथ टुंडिया, पार्टी के अनुसूचित जाति मोर्चा के प्रदेस प्रभारी सतीश मालवीय अउ मोर्चा के प्रदेस अध्यक्ष नवीन मार्कण्डेय के संगेसंग प्रदेस भाजपा अध्यक्ष अरूण साव सामिल होइन। बइठका म अवइया चुनाव ल लेके पार्टी के रणनीति उपर विचार करे गीस।
बइठक म सामिल होय के पहिली भाजपा अनुसूचित जाति मोर्चा के राष्ट्रीय अध्यक्ष लाल सिंह आर्य ह कलेक्ट्रेट चउक म डॉक्टर भीमराव अंबेडकर अउ छत्तीसगढ़ महतारी के मूर्ति म फूलमाला चढ़ईन। एखर बाद ओमन तेलीबांधा के गुरू घासीदास मंदिर म पूजापाठ घलो करीन।
अनुसूचित जाति मोर्चा प्रेस-बैठक 01
भारतीय जनता पार्टी अनुसूचित जाति मोर्चा के राष्ट्रीय अध्यक्ष लाल सिंह आर्य ह राज्य सरकार उपर अनुसूचित जाति के युवा मन के संग छल करे के आरोप लगाय हे। आज रायपुर म पत्रकार मनले गोठबात करत श्री आर्य ह कहिन कि पाछू दिन अनुसूचित जाति वर्ग के युवा मन डहार ले राज्य सरकार ले ये मांग करे गे रीहिस कि गलत तरीका ले अनुसूचित जाति वर्ग के प्रमाण पत्र बनाके नौकरी हासिल करइया अभ्यर्थी मन के खिलाफ कानूनी कार्रवाई करे जाय। श्री आर्य ह कहिन कि ए गुस्साये युवा मन ल राज्य सरकार तक अपन बात पहुंचाय बर रायपुर म नग्न प्रदर्शन करे बर विवश होना पड़ीस। श्री आर्य ह कहिन कि राज्य सरकार ह अनुसूचित जाति वर्ग के आरक्षण प्रतिशत घलो कर म कर देहे। एखर ले राज्य सरकार के दलित विरोधी चेहरा उजागर होत हे।
संगेसंग ओमन अनुसूचित जाति वर्ग के विद्यार्थी मन बर केंद्र ले मिलइया पोस्ट मैट्रिक छात्रवृत्ति के राशि म राज्य के अंशदान तुरते जमा कराय के मांग घलो करीन।
अउ अब पेस हे मौसम के हाल…
प्रदेस म अवइया एक-दू दिन के दउरान सरगुजा अउ बिलासपुर संभाग म आने-आने जघा म भारी बरसा हो सकत हे। मौसम विभाग के मुताबिक काली बिहनिया साढ़े आठ बजे तक जशपुर, बलरामपुर, रायगढ़ अउ कोरबा जिला के कुछेक जघा म जादा बरसा होय के चेतावनी दे गेहे। उहें, सूरजपुर, पेण्ड्रा, बिलासपुर अउ सरगुजा जिला म एक-दू जघा म घलो भारी बरसा होय के संभावना हे। अइसने, तीन अगस्त के बिहनिया साढ़े आठ बजे तक सरगुजा, पेण्ड्रा, बिलासपुर, रायगढ़ अउ कोरबा जिला म एक-दू जघा म भारी बरसा होय के संभावना हे।
इही बीच, प्रदेस के कुछेक जघा म पाछु दू-तीन ले होय बरसा के सेती अभी घलो बस्तर क्षेत्र म बाढ़ के स्थिति बने हे। बीजापुर अउ सुकमा जिला म नंदियां-नरवा उफान म हवय।
शिक्षक पोस्टिंग घोटाला-कार्रवाई
प्रदेश म शिक्षक मनके पदस्थापना म कथित गड़बड़ी के सिलसिला म राज्य सरकार ह संयुक्त संचालक समेत दस झिन अधिकारी मन ल निलंबित कर देहे। ए बारे म स्कूल सिक्षा विभाग के आदेस म केहे गेहे कि सरगुजा संभाग म काउंसिलिंग के बाद राज्य सरकार डहार ले करीबन तीन हजार सिक्षक मनके पदोन्नति के एकमुश्त आदेस जारी करे गे रिहीस। फेर, संयुक्त संचालक डहार ले एखर पालन नइ करत व्यक्तिगत पदस्थापना आदेस जारी करे गीस, जेखर ले जम्मों सिक्षक मनके वरिष्ठता सूची प्रभावित हो सकत हे। ए संबंध म मिले सिकायत मनके सरगुजा के संभाग आयुक्त डहार ले जांच कराय गीस। जांच म पदस्थापना जारी करे के बदला म सरगुजा संभाग म पदस्थ प्रभारी संयुक्त संचालक डहार ले अवैधानिक रूप ले पइसा के लेनदेन करे जाय के घलो पुष्टि होय हे, जउन ह सिविल सेवा आचरण नियम के अनुकूल नइ हे। ए गलती ल देखत प्रभारी संयुक्त संचालक हेमंत उपाध्याय ल तुरते निलंबित कर दे गीस।
कृषि मंत्री-समीक्षा
प्रदेश के कृषि मंत्री ताम्रध्वज साहू ह किहीन हे कि राज्य म जैविक खेती ल बढ़ावा दे बर बिसेस प्रयास करे जाना चाही। कृषि विभाग के समीक्षा बइठका म श्री साहू ह किहीन कि किसान मन ल बेरा-बेरा म खाद-बीजा समेत जरूरी सुविधा मिलना चाही अउ एमा कोनों प्रकार के लापरवाही नइ होना चाही। कृषि मंत्री ह किसान समृद्धि योजना अउ शाकम्भरी योजना के किसान मन ल जादा ले जादा लाभ देवाय बर अधिकारी मन ले बिसेस अभियान चलाय बर किहीन। श्री साहू ह किहीन कि फसल बीमा योजना के जानकारी किसान मन ल दे जाय। संगेसंग ओमन ल उद्यानिकी फसल के फायदा ले बर घलो केहे जाय।
पशुधन विभाग बैठक
प्रदेश के रद्दा मन म घूमत पशु मन ल रोके बर विशेष कोशिश करे जावत हे। एखर पहिली पशुधन विकास विभाग डहार ले पशु के पहिचान बर ओमन ल टैग लगाये जावत हे। संगेसंग पशु मनके गला म रेडियम बेल्ट घलो बांधे जावत हे। एखर अलावा पशुपालक मन ल ये समझाईश घलो दे जात हे कि ओमन अपन पशु ल रद्दा म झन छोड़य, अउ कहूं अइसे पाय जाही त पशुपालक मन उपर अर्थदण्ड के कार्रवाई करे जाही।
खबर के मुताबिक छत्तीसगढ़ उच्च न्यायालय ह पाछू दिन पशु के सेती रद्दा म होवइया सड़क दुर्घटना ल रोके बर राज्य सरकार ल जरूरी उपाय करे के निर्देश दे रीहिन।
वजन त्यौहार
प्रदेस म लइका मन के पोषण स्तर के जांच बर आज ले आंगनबाड़ी केन्द्र मन म वजन तिहार मनाय जावत हे। तेरह अगस्त तक चलइया ए तिहार के दउरान सहरी अउ ग्रामीण क्षेत्र मनके आंगनबाड़ी केन्द्र मन म माता-पिता मन अपन लइका मनके वजन करा सकही। महिला अउ बाल विकास विभाग ह सबो जिला कलेक्टर अउ विभागीय अधिकारी मन ले केहे हे कि आंगनबाड़ी केन्द्र मन म दर्ज लइका मन के संग बाहिर ले अवइया लइका मनके घलो वजन करे जाय। उहें, घुमन्तु लइका अउ काम चलत क्षेत्र मन म रहइया श्रमिक परिवार के लइका मनके वजन ले बर गाड़ी के व्यवस्था करे जाही। एखरे संग किशोरी बालिका मन म खून के कमी के जांच घलो करे जाही।
वजन तिहार ले मिले आंकड़ा के आधार म कुपोषण के दर म कमी लाय बर लक्ष्य के निर्धारण करके जिला स्तर म कार्य योजना बनाय जाही।