न्यायमूर्ति दीपक कुमार तिवारी ह आज छत्तीसगढ़ उच्च न्यायालय के स्थायी जज के रूप म शपथ लीन। उच्च न्यायालय के मुख्य न्यायाधीश रमेश सिन्हा ह ओमन ल हाईकोर्ट के कोर्ट हाल म आयोजित समारोह म शपथ दिलाइन खबर के मुताबिक न्यायमूर्ति श्री तिवारी के नियुक्ति बछर दू हजार इक्कीस के छत्तीसगढ़ उच्च न्यायालय म अतिरिक्त न्यायाधीश के रूप म करे गे रिहीस।
बेरोजगारी भत्ता-चौथी किस्त
मुख्यमंत्री भूपेश बघेल ह आज रइपुर स्थित अपन निवास कार्यालय म आयोजित कारीकरम म बेरोजगारी भत्ता के चौथा किस्त जारी करे हे। एखर तहत एक लाख बाईस हजार ले जादा हितग्राही मनके खाता म करीबन इकतीस करोड़ इकहत्तर लाख रूपिया के राशि के ऑनलाइन जमा करीन।
ए मउका म मुख्यमंत्री ह किहीन कि युवा मन ल रोजगार ले जोड़ना राज्य सरकार के प्राथमिकता हरय। अउ एखर बर सरलग परयास करत हे। ओमन किहीन कि प्रदेस म युवा मन ल कौशल विकास के प्रशिक्षण दे जात हे। ए ह लगातार चलइया प्रक्रिया हरय। जइसे-जइसे युवा प्रशिक्षित होही ओमन ल कौशल अनुरूप रोजगार ले जोड़े के काम चलत रहीन। ए औसर म उप मुख्यमंत्री टी.एस. सिंहदेव घलो उपस्थित रहीन।
शराब घोटाला मामला-एफआईआर
प्रदेश म कथित शराब घोटाला मामला म प्रवर्तन निदेशालय-ईडी ह ग्रेटर नोएडा के थाना म पांच लोगन के खिलाफ एफआईआर दर्ज कराय हे। एमा छत्तीसगढ़ के तीन अधिकारी, ग्रेटर नोएडा के एक ठिन कंपनी के एमडी संग पांच लोगन के नाम सामिल हे। ईडी कोति ले एफआईआर म बताय गेहे कि राज्य सरकार के आबकारी सचिव निरंजन दास, विशेष सचिव ए.पी. त्रिपाठी, पूर्व उद्योग संचालक अनिल टुटेजा, अनवर ढेबर अउ आने ह शराब माफिया के संग मिलके बडे़ पैमाना म देशी शराब के अवैध रूप से बेचे गीस। एफआईआर म यहू कहे गे हे कि अवैध शराब के बिक्रि बर ग्रेटर नोएडा के कंपनी मेसर्स प्रिज्म होलोग्रामी सिक्योरिटी फिल्म प्राइवेट लिमिटेड ह फर्जी होलोग्राम छापे हे। ए एफआईआर ग्रेटर नोएडा के कासना थाना म दर्ज कराय गेहे। ईडी ह बताइन कि ग्रेटर नोएडा के ए कंपनी ल ठेका देवाय म विभाग के विशेष सचिव ए.पी. त्रिपाठी के बड़का हाथ हे।
खबर के मुताबिक ईडी ह छत्तीसगढ़ म करोड़ रूपिया के शराब घोटाला मामला म मनी लॉंन्ड्रिंग म जांच करत हे।
योग प्रशिक्षण-कार्यक्रम
राजधानी रइपुर म सात दिन ले चलत राज्य स्तरीय संभागीय निःशुल्क योग प्रशिक्षण सिविर के आज समापन होगे। सिविर म सामिल सबो सिखइया मन ल प्रमाण पत्र बांटे गीस। प्रदेस म अब तक सात सौ मास्टर ट्रनर्स तइयार करे जा चुके हे। ए मउका म समाज कल्याण मंत्री अनिला भेड़िया ह किहीन कि योग जीवन के अनिवार्य अंग बन गे हे। योग-आयोग सरलग प्रचार-प्रसार अउ योग प्रशिक्षण कारीकरम के माध्यम ले प्रदेस म स्वस्थ्य जीवन शैली अउ दिनचर्या ल बढ़ावा देत हे। कारीकरम म योग-आयोग के अध्यक्ष ज्ञानेश शर्मा ह किहीन कि आयोग डहार ले रइपुर, बिलासुपर, बस्तर अउ सरगुजा के बाद दुरूग संभाग बर पांचवा योग सिविर आयोजित करे गीस। ऐमा दू सौ चालीस सिखइया सामिल होइन। ओमन बताइन कि सिविर के माध्यम ले तइयार मास्टर ट्रेनर्स अपन-अपन क्षेत्र मन म जाके निःशुल्क योग कक्षा मनके माध्यम ले लोगन के बीच योग के प्रचार-प्रसार करही। श्री शर्मा ह बताइन कि अवइया आठ सितंबर के रइपुर म ‘‘सेतुबंधासन‘‘ के प्रदर्सन करे जाही। एखर माध्यम ले छत्तीसगढ़ योग-आयोग गोल्डन बुक ऑफ वर्ल्ड रिकॉर्ड म अपन नाम दर्ज कराय के प्रयास करही।
प्रधानमंत्री फसल बीमा योजना
प्रदेस म फसल मनके होवइया नुकसान के क्षतिपूर्ति बर प्रधानमंत्री फसल बीमा के आखिरी तारीक बढ़ाके अब सोलह अगस्त कर दे गेहे। पहिली बीमा करे के आखिरी तारीक इकत्तीस जुलाई निर्धारित रहीस। फसल बीमा बर केन्द्र सरकार डहार ले एग्रीकल्चर इंश्योरेंस कंपनी लिमिटेड, एचडीएफसी, इरगो अउ बजाज अल्यांज जनरल इंश्योरेंस कंपनी के चयन करे गे हे। ए योजना म किसान मन ल प्रतिकूल मौसम के सेति होवइया फसल संबंधी नुकसान के एवज म मुआवजा बर बीमा के लाभ दे जाथे। कृषि विभाग के अधिकारी मन ह बताइन कि छत्तीसगढ़ के सबो जिला मनके किसान धान के संग मक्का, सोयाबीन, अरहर, मूॅंग, उड़द, कोदो, कुटकी अउ रागी जइसन फसल के बीमा करा सकथे।
कृषि -कार्यशाला
छत्तीसगढ़ अउ मध्य प्रदेस के कृषि विज्ञान केन्द्र मनके दू दिन के कार्यशाला राजधानी रइपुर के इंदिरागांधी कृषि विश्वविद्यालय म होइस। कार्यशाला के उद्घाटन केंद्रीय कृषि संसदीय समिति के सदस्य अउ सांसद मोहन मंडावी ह करीन। ए मउका म श्री मंडावी ह जैविक खेती ल जोर दीन। ओमन ह वैज्ञानिक मन ल कृषि ले जुड़े विषय मन म किसान मन ल स्थानीय भाषा म सलाह देके अपील करीन। उहें, केंद्रीय बरानी कृषि अनुसंधान संस्थान हैदराबाद के निदेशक डॉक्टर वी.के.सिंह ह कार्यशाला म प्रदेस अउ छत्तीसगढ़ के निकरा परियोजना के तहत गांव म चलत गतिविधि के जानकारी दीन। संगेसंग ओमन ह बदलत तापमान अउ अनियमित बरसा के सेति फसल उत्पादन म कमी अउ जलवायु परिवर्तन के आने दुष्प्रभाव ले निपटे के रणनीति के बारे म बताइन। खबर के मुताबिक छत्तीसगढ़ म ए परियोजना के तहत तीन कृषि विज्ञान केन्द्र दंतेवाड़ा , भांटापारा अउ बिलासपुर ल चिन्हित करे गेहे।
वजन त्यौहार
प्रदेस म लइका मन के पोषण स्तर के जांच बर काली ले ऑंगनबाड़ी केन्द्र मन म वजन तिहार मनाय जाही। तेरह अगस्त तक चलइया ए तिहार के दउरान सहरी अउ ग्रामीण क्षेत्र मनके ऑंगनबाड़ी केन्द्र मन म पालक अपन लइका मनके वजन करा सकही। महिला अउ बालविकास विभाग ह सबो जिला कलेक्टर अउ विभागीय अधिकारी मन ल कहे गेहे कि ऑगनबाड़ी केन्द्र मन म दर्ज लइका मन के संग बहार ले आय लइका मनके घलो वजन ले जाय। उहें, घुमन्तु लइका अउ काम चलत क्षेत्र मन म रहइया श्रमिक परिवार के लइका मनके वजन ले बर चलित वाहन के व्यवस्था करे जाही। एखर संग किशोरी बालिका मन म एनीमिया के स्तर के आंकलन घलो करे जाही।
वजन तिहार ले मिले आंकड़ा के आधार म कुपोषण के दर म कमी लाय बर लक्ष्य के निर्धारण कर जिला स्तर म कार्य योजना बनाय जाही।
विश्व स्तनपान सप्ताह
काली एक अगस्त ले विश्व स्तनपान सप्ताह मनाय जाही। ए मउका म अदाणी फाउंडेशन डहार ले रइपुर जिला के पांच गांव रायखेड़ा, भाटापारा, गैतरा, चिचोली अउ गौरखेड़ा म सुपोषण कारीकरम के तहत कतकोन जागरूकता कारीकरम करे जाही। एखर तहत ऑंगनबाड़ी कार्यकर्ता मन के संग मिल के कुपोषित लइका मन के पहिचान कर पोषण आहार के जानकारी दे जाही। संगेसंग ए संबंध म जन-जागरूकता रैली घलो निकाले जाही।
मतदाता सूची पुनरीक्षण
प्रदेस म दू अगस्त ले मतदाता सूची के दूसरा विशेष संक्षिप्त पुनरीक्षण कारीकरम सुरू होही। ए दउरान सूची म नवा मतदाता मनके नाव जोड़े अउ संशोधन के काम घलो करे जाही। ए मउका म ग्राम स्तर म बिसेस ग्रामसभा के आयोजन घलो करे जाही। जेमा मतदाता सूची के वाचन होही। संगेसंग गांव म मतदाता जागरूकता बर रैली घलो निकाले जाही। उहें, संक्षिप्त पुनरीक्षण के दउरान बारह अउ तेरह अगस्त संग उन्नीस अउ बीस अगस्त के मतदान केन्द्र मन म बिसेस सिविर लगाय जाही। मतदाता सूची के आखिरी प्रकाशन चार अक्टूबर के होही।
अउ अब पेस हे मौसम के हाल…
मौसम विभाग ह अवइया चोबीस घंटा के दउरान प्रदेस के एक-दू जघा मन म गरज-चमक के संग आकाशीय बिजली गिरे के चेतावनी देहे। विभाग के अनुसार उत्तर बंगाल के खाड़ी म एक ठिन निम्नदाब के क्षेत्र बने हुए हे। अउ उपरी हवा म एक ठिन चक्रीय चक्रवात विस्तारित हे। एखर असर ले प्रदेस के कतकोन जघा मन म हल्का ले मध्यम बरसा होय अउ गरज-चमक के संग छींटा पडे़ के संभावना हे।