प्रधानमंत्री नरेन्द्र मोदी ह किहीन कि ए बछर स्वतंत्रता दिवस ले पहिली शहीद मन के सम्मान म ‘‘मेरी माटी-मेरा देश‘‘ अभियान सुरू करे जाही। आकाशवाणी ले मन की बात कारीकरम म ओमन किहीन कि अमृत महोत्सव के दउरान शहीद मन के सुरता म कतकोन कारीकरम आयोजित होहीं अउ लाखों ग्राम पंचायत म बिसेस शिलालेख घलो स्थापित करे जाही। श्री मोदी ह किहिन कि ‘‘मेरी माटी-मेरा देश‘‘ अभियान के तहत देस भर म अमृत कलश यात्रा निकाले जाही।
ओमन किहीन कि दिल्ली म राष्ट्रीय समर स्मारक के तिर अमृत वाटिका बनाय जाही, जेमा देस भर ले सकेले गेय माटी अउ पौधा के उपयोग करे जाही।
प्रधानमंत्री ह किहिन कि पउर साल स्वतंत्रता दिवस के मउका म देसभर म हर घर तिरंगा अभियान चलाय गे रिहीस। त एसो घलो हर घर तिरंगा फहराय जाना चाही।
मन की बात-02
प्रधानमंत्री ह नशा जिनिस के समस्या के समाधान बर लोगन के उदिम ल संहराइन हे। ओमन ह किहीन कि नशामुक्त भारत अभियान के सुरूआत पन्द्रह अगस्त बछर दू हजार बीस म करे गे रिहीस। एखर मंसा नवा पीढ़ी ल नशा जिनिस ले दूरिहा राखे बर हे। ओमन बताइन कि अब तक ए अभियान ले 11 करोड़ ले जादा लोगन जुड़े हें।
प्रधानमंत्री ह ए गोठ उपर जोर देवत किहीन कि बरसात के बेरा पौधारोपण अउ जल संरक्षण बर महत्वपूर्ण होथे। श्री मोदी ह सावन महिना म कांवर यात्रा उपर घलो अपन बिचार राखत किहीन कि ए बेरा 12 ज्योतिर्लिंग म अड़बड़ संख्या म श्रध्दालु पहुंचत हें।
प्रधानमंत्री हज यात्रा ले हाल ही म लहुटे मुस्लिम समाज के महिला मनके चिट्ठी के गोठ करीन। ओमन किहीन कि 4 हजार ले जादा महिला मन बगैर कोनो पुरूष संगवारी के ही हजयात्रा पूरा करे हें। ओमन एला बड़का बदलाव बताइन अउ सउदी अरब सरकार के आभार जताइन।
मन की बात-छत्तीसगढ़
प्रधानमंत्री के ‘मन की बात‘ कारीकरम ल प्रदेस म घलो कतकोन जघा सुने गीस। ए कड़ी म रइपुर जिला के मांढर म भाजपा प्रदेस अध्यक्ष अरूण साव के संग समाज के आने वर्ग के लोगन ‘मन की बात‘ कारीकरम ल सुनिन। ए मउका म प्रधानमंत्री के गोठ ले प्रभावित होके धरसींवा विधानसभा क्षेत्र के 500 ले जादा लोगन भाजपा म सामिल होइन।
ए मउका म भाजपा प्रदेस अध्यक्ष श्री अरूण साव ह आईआईएम रोहतक के सर्वे रिपोर्ट के जरिए ले बताइन कि कारीकरम ल करीबन 23 करोड़ लोगन नियमित रूप ले सुनथें।
ए कारीकरम म सांसद सुनील सोनी के संग पार्टी के वरिष्ठ नेता घलो मौजूद रिहीन।
दीपक तिवारी-स्थायी जज
न्यायमूर्ति दीपक कुमार तिवारी काली छत्तीसगढ़ उच्च न्यायालय के स्थायी जज के रूप म शपथ लेहीं। हाईकोर्ट के मुख्य न्यायाधीश रमेश सिन्हा, न्यायमूर्ति श्री दीपक कुमार तिवारी ल शपथ देवाहीं।
बतादन कि न्यायमूर्ति श्री तिवारी के नियुक्ति बछर दू हजार इक्कीस के हाईकोर्ट म अतिरिक्त न्यायाधीश के रूप म करे गे रिहीस।
मोर बिजली ऐप-2.0
मुख्यमंत्री भूपेश बघेल ह ‘‘मोर बिजली ऐप‘‘ के दूसर वर्जन के सुभारंभ करीन। ऐप के पहिली वर्जन ल बिजली उपभोक्ता मन जादा पसंद करीन। जेखर सेती नागरिक सेवा ल बिस्तार करत दूसर वर्जन तियार करे गीस हे। एखर ले उपभोक्ता मन ल 36 प्रकार के सेवा मिलही।
अपन कोरबा प्रवास के दउरान काली मुख्यमंत्री ह किहीन कि ऐप म बिजली विभाग ले जुडे़ सबो जानकारी छत्तीसगढ़ी बोली म उपलब्ध होही। ओमन बताइन कि नवा ऐप म बिजली के जानकारी, गणना, बिजली दर, बिल भुगतान सुविधा, ऑनलाइन भुगतान, नजदीक भुगतान केन्द्र, पाछू दू बछर के बिल भुगतान के विवरण अउ बिजली बिल हाफ योजना म मिले छूट के जानकारी के संगे बिजली आपूर्ति अउ बिल ले जुड़े सिकायत घलो करे जा सकही।
मुख्य न्यायाधीश-केंद्रीय जेल
छत्तीसगढ़ उच्च न्यायालय के मुख्य न्यायाधीश रमेश सिन्हा बिलासपुर केंद्रीय जेल के निरीक्षण करीन। ए दउरान ओमन पुरूष अउ महिला कारागार के अवलोकन करत बंदी मन ले गोठबात करीन अउ उहां, मूलभूत सुविधा के जानकारी लेइन। न्यायमूर्ति श्री सिन्हा ह अधिकारी मन ले लइका मन के संग जेल म रहइया महिला बंदी मनके एक सूची बनाय के निरदेस दीन हें। संगे अइसन लइका मन बर जेल म उपलब्ध शिक्षा, खेलकूद अउ स्वास्थ्य सुविधा म जरूरी सुधार करे बर घलो किहीन। मुख्य न्यायाधीश ह छोटे अपराध म सजा काटत बिचाराधीन बंदी मन के घलो एक सूची बनाय बर किहीन हें। ओमन यहू किहीन कि बंदी मन ल कानूनी जानकारी सरल ले सरल भाषा म देंय।
मतदाता सूची-पुनरीक्षण
प्रदेस म अवइया दू अगस्त ले मतदाता सूची के दूसरइया पुनरीक्षण कारज सुरू होही। ए दउरान सूची म नवा मतदाता मन के नांव जोड़े जाही अउसंशोधन घलो करे जाही। राज्य के मुख्य निर्वाचन पदाधिकारी रीना बाबासाहेब कंगाले ह इकतीस अगस्त तक चलइया ए बिसेस कारीकरम म लोगन ल सहयोग बढ़ाय के अपील करिन हें।
पुनरीक्षण कारज के बेरा 12 अउ 13 अगस्त ओखर बाद 19 अउ 20 अगस्त के मतदान केन्द्र मन म बिसेस सिविर के आयोजन करे जाही। उहें, मतदाता सूची के अंतिम प्रकाशन 4 अक्टूबर के होहीं।
वजन त्यौहार
प्रदेस के आंगनबाड़ी केन्द्र मन म लइका मनके पोषण जांच बर 1 अगस्त ले 13 अगस्त तक वजन तिहार मनाय जाही। ए दउरान शहरी अउ ग्रामीण क्षेत्र के आंगनबाड़ी केन्द्र मन म लइका मन के वजन करा सकहीं।
महिला अउ बाल विकास विभाग ह वजन तिहार के तियारी अउ कार्य योजना के संबंध म सबो जिला कलेक्टर अउ विभागीय अधिकारी मन ल जरूरी निरदेस दें हे।
डॉ. खूबचंद बघेल जयंती-समारोह
दुरूग जिला म पाटन क्षेत्र के दरबार मोखली गांव म डॉक्टर खूबचंद बघेल जयंती समारोह आयोजन करे गीस। ए मउका म मुख्यमंत्री भूपेश बघेल ह दरबार मोखली अउ सेमरी गांव बर करीबन एक करोड़ सत्तर लाख रूपिया के आने-आने बिकास कारज के लोकार्पण करीन।
एखर ले पहिली मुख्यमंत्री ह स्वतंत्रता संग्राम सेनानी स्वर्गीय घनाराम बंछोर अउ स्वर्गीय गेंदलाल बंछोर के मूर्ति के अनावरण करीन। कारीकरम म मुख्यमंत्री ह किहीन कि पाटन क्षेत्र स्वतंत्रता संग्राम सेनानी मन के गढ़ हे।
विश्व बाघ दिवस
भारत म बाघ के आबादी छै दशमलव एक फीसदी के वार्षिक बढ़ोत्तरी के संग 3 हजार 925 होय के अनुमान हे। विश्व बाघ दिवस के मउका म पर्यावरण, वन अउ जलवायु परिवर्तन राज्य मंत्री अश्विनी कुमार ह काली रिपोर्ट जारी करीन। पाछू बछर मैसूरू म प्रोजेक्ट टाइगर के 50 बछर पूरे के मउका म प्रधानमंत्री नरेन्द्र मोदी ह बाघ के आबादी 3 हजार एक सौ सड़सठ घोषित करे रिहीन।
उहें, विश्व बाघ दिवस के मउका म उत्तराखंड के जिम कार्बेट राष्ट्रीय उद्यान म बाघ संरक्षण ले जुड़े मुद्दा उपर जागरूकता अउ इको डेव्हलपमेंट कमेटी आधारित प्रदर्सनी लगाय गीस। जेमा छत्तीसगढ़ के तीन टाइगर रिजर्व अचानकमार, इंद्रावती अउ उदंती-सीतानदी के प्रदर्सनी ल देसभर के लोगन मन संहराइन। ए प्रदर्सनी म वन क्षेत्र के शहद, जैविक उत्पाद, बेल मेटल आर्ट के संगे स्व-सहायता समूह के डहार ले संचालित आजीविका ले जुड़े कारज के जानकारी दे गीस। प्रदर्सनी म बस्तर के गुजराल सिंह ल ट्रायबल आर्ट कैटेगरी म पहिली पुरस्कार मिलिस।
एथलेटिक्स प्रतियोगिता
सक्ती जिला म चिस्दा के जवाहर नवोदय विद्यालय म आयोजित बत्तीसवां क्षेत्रीय एथलेटिक्स प्रतियोगिता के समापन होइस। ए प्रतियोगिता म नवोदय विद्यालय समिति के भोपाल संभाग के 11 संकुल के 98 छात्र मन हिस्सा ले रिहीन। विजेता प्रतिभागी मन ल सक्ती जिला कलेक्टर नुपुर रासि पन्ना ह पुरस्कार दीस।