भारतीय प्रशासनिक सेवा: अधिकारी तबादला
एक ठिन आने आदेस म निलेश कुमार क्षीरसागर ल संयुक्त मुख्य निर्वाचन पदाधिकारी छत्तीसगढ़ अउ राज्य प्रशासनिक सेवा के अधिकारी प्रभाकर पाण्डे ल मुख्य कार्यपालन अधिकारी ल जिला पंचायत मुंगेली के पद म पदस्थ करे गेहे।मुख्यमंत्री-लोकार्पण
मुख्यमंत्री भूपेश बघेल ह आज कोरबा जिला म एक हजार तीन सौ बीस मेगावाट के सुपर क्रिटिकल थर्मल पॉवर स्टेशन के शिलान्यास करीन। इंहा छै सौ साठ मेगावाट के दू इकाई स्थापित होही। जेखर अनुमानित लागत लगभग बारह हजार नौ सौ पन्द्रह करोड़ रूपिया हे। ए सुपर क्रिटिकल थर्मल पॉवर स्टेशन प्रदेस के सबले बड़का अउ आधुनिक संयंत्र होही। वर्तमान म छत्तीसगढ़ राज्य विद्युत उत्पादन कंपनी के कुल उत्पादन क्षमता दू हजार नौ सौ अठहत्तर मेगावाट हे।
उहें, मुख्यमंत्री ह कोरबा म स्वामी आत्मानंद शासकीय अंग्रेजी माध्यम आदर्श महाविद्यालय अउ प्रियदर्सनीय इंदिरा स्टेडियम परिसर म आवासीय खेल अकादमी के सुभारंभ करीन। खेल अकादमी म खिलाड़ी मन ल फुटबॉल, बॉलीबाल, बास्केट बॉल अउ स्वीमिंग जइसन खेल के प्रसिक्षण मिलही। एखर संग मुख्यमंत्री ह कोरबा म स्वर्गीय बिसाहू दास महंत स्मृति मेडिकल कॉलेज के नवा भवन के भूमिपूजन करीन। ए भवन एक सौ चोबीस एकड़ म तीन सौ पच्चीस करोड़ रूपिया के लागत ले तइयार होही। संगेसंग मुख्यमंत्री ह अपन कोरबा प्रवास के दउरान ई-पुस्तकालय अउ प्यारेलाल कंवर स्मृति पुस्तकालय के लोकार्पण संग कलेक्टरेट कार्यालय परिसर म छत्तीसगढ़ महतारी के प्रतिमा के अनावरण घलो करीन।
भाजपा-राष्ट्रीय उपाध्यक्ष
भारतीय जनता पार्टी के राष्ट्रीय अध्यक्ष जगत प्रकाश नड्डा ह अवईया चुनाव ल नजर म राखत केन्द्रीय पदाधिकारी मनके घोषणा कर दे हे। एमा छत्तीसगढ़ के पूर्व मुख्यमंत्री डॉक्टर रमन िंसंह, राज्यसभा सांसद सरोज पाण्डे अउ पूर्व मंत्री लता उसेंडी ल राष्ट्रीय उपाध्यक्ष बनाय गेहे। एखर संग केन्द्रीय टीम म तेरह राष्ट्रीय उपाध्यक्ष, आठ राष्ट्रीय महामंत्री अउ तेरह राष्ट्रीय सचिव बनाय गेहे। संगेसंग राष्ट्रीय महामंत्री संगठन, राष्ट्रीय सह-संगठन महामंत्री, कोषाध्यक्ष अउ सह-कोषाध्यक्ष के नियुक्ति घलो करे गेहे।
मुख्य न्यायाधीश-दौरा
छत्तीसगढ़ उच्च न्यायालय के मुख्य न्यायाधीश रमेश सिन्हा ह हाईकोर्ट े के मामला के सुनवाई के बाद काली जांजगीर चांपा जिला न्यायालय, परिवार न्यायालय अउ विधिक सेवा के प्राधिकरण के कक्षा मन के निरीक्षण करीन। निरीक्षण के दउरान ओमन ह परिसर म अस्त-व्यस्त पार्किंग, कोर्ट प्रांगण म अवारा पशु मनके विचरण, भवन के दिवाल मन म सीपेज अउ शौचालय के अस्वच्छ होना पाईन। एमा ओमन ह नराजगी जतात सबो समस्या के तुरते निराकरण बर जिला न्यायाधीश ल निरदेस दीन।
मन की बात
प्रधानमंत्री नरेन्द्र मोदी काली बिहनिया 11 बजे आकाशवाणी म ‘‘मन की बात‘‘ कारीकरम म देस-विदेस के लोगन संग अपन विचार साझा करही। मासिक रेडियो कारीकरम के ए ह एक सौ तीन कड़ी होही। ए कारीकरम ल आकाशवाणी, दूरदर्शन अउ सूचना तथा प्रसारण मंत्रालय के यूट्यूब चैनल मन म घलो ए कारीकरम के सीधा प्रसारण करे जाही। हिंदी म प्रसारण के तुरते बाद आकाशवाणी ले क्षेत्रीय भाषा मन म घलो ‘‘मन की बात‘‘ के प्रसारण होही।
मतदाता सूची-पुनरीक्षण
छत्तीसगढ़ म अवईया विधानसभा चुनाव ल देखत मतदाता सूची बिसेस संक्षिप्त पुनरीक्षण कारीकरम के तहत दू अगस्त के सबो मतदान केन्द्र मन म मतदाता सूची के, पहिली प्रकासन करे जाही। एखर तहत मतदाता सूची म नाम जोड़े, कांटे अउ संसोधन बर दू अगस्त ले इकतीस अगस्त तक दावा-आपत्ति ले जाही। ए दउरान बारह अउ तेरह अगस्त संग उन्नीस अउ बीस अगस्त के मतदान केन्द्र मन म बिसेस सिविर के आयोजन करे जाही। मतदाता सूची के आखिरी प्रकासन चार अक्टूबर के होही।
छत्तीसगढ़ के मुख्य निर्वाचन पदाधिकारी रीना बाबासाहेब कंगाले के अध्यक्षता म पुनरीक्षण कारीकरम म जनभागीदारी सुनिश्चित करे बर छत्तीसगढ़ के आने-आने एनजीओ के संग बइठका आयोजित करे गीस।
युवा उत्सव कार्यक्रम
गरियाबंद के शासकीय वीर सुरेन्द्र साय स्नातकोत्तर महाविद्यालय म अमृत कला के पांच प्रण के थीम म जिला स्तरीय युवा उत्सव के आयोजन करे गीस केन्द्र सरकार के नेहरू युवा केन्द्र, युवा करीकरम अउ खेल मंत्रालय डहार ले आयोजित ए कारीकरम के तहत चित्रकला, कविता लेखन, मोबाइल फोटो ग्राफी अउ सांस्कृतिक नृत्य जइसन प्रतियोगिता होईस। एमा बड़े संख्या म प्रतिभागी मन ह हिस्सा लीन।
मुहर्रम
मुहर्रम आज देस के आने-आने भाग मन म श्रध्दा अउ आस्था के संग मनाय जात हे। करबला म सत्य अउ न्याय के रक्षा बर पैगम्बर मोहम्मद के नवासा हजरत इमाम हुसैन अउ उंखर साथी के सहादत के सुरता म मुहर्रम मनाय जाथे। ए मउका म ताजिया निकाले जाथे अउ करबला के शहीद मनके सर्वोच्च बलिदान के सुरता म मजलिस मन के आयोजन करे जाथे।
एति छत्तीसगढ़ म घलो मुहर्रम के मउका म राजधानी रायपुर संग कतकोन सहर म ताजिया निकाले जात हे। रायपुर म करबला म हजरत हुसैन के बड़का कुर्बानी ल सुरता करत मजलिस माने धार्मिक बइठका के आयोजन आज रतिहा करे जाही। रायपुर म ए बेरा ताजिया के संगेसंग मातमी जुलूस निकाले जात हे। जेमा बड़का संख्या म मुश्लिम समाज के लोगन सामिल होवत हे।
माओवादी-मुठभेड़
सुकमा जिला म आज सुरक्षा बल अउ माओवादी मनके बीच मुठभेड़ होईस। पुलिस अधीक्षक किरण चव्हाण घटना के पुष्टि करत बताइन कि डीआरजी अउ कोबरा बटालियन के जवान केड़वाल इलाका म सर्चिंग अभियान म निकले रहिन इंही, दउरान माओवादी मन ह सुरक्षा बल मन उपर गोलीबारी सुरू कर दीन। जवान म ह घलो जवाबी कार्रवाई करीन। ए घटना ले कोन्हो ल हताहत होय के खबर नइ हे।
कंजेक्टिवाइटिस-निर्देश
उप मुख्यमंत्री अउ स्वास्थ्य मंत्री टी.एस. सिंहदेव ह कहिन कि प्रदेस म आंखी के बीमारी-कंजेक्टिवाइटिस ले बचाव बर पर्याप्त मात्रा म आई ड्राप्स अउ दवाई उपलब्ध हे। ओमन ह लोगन ले डॉक्टरी सलाह के बिना स्टेरायडयुक्त एंटीबायोटिक के उपयोग नही करे के अपील करे हे। रईपुर म मीडिया ले गोठबात करत श्री सिंहदेव ह बताइन कि प्रदेस के स्कूल मन म, कॉलेज अउ छात्रावास मन म कंजेक्टिवाइटिस ले बचाव अउ रोकथाम बर जानकारी प्रसारित करे जात हे। इंही, बीच लोकशिक्षण संचालनालय ह सबो संयुक्त संचालक अउ जिला शिक्षा अधिकारी मन ल आई फ्लू आंखी के बीमारी अउ मौसमी बीमारी के संबंध म निरदेस जारी करे हे। जेन स्कूल मनके लइका मन म आई फ्लू के समस्या हे, त ओमन ल स्कूल आय ले मना अउ घर म रहे के सलाह दे बर कहिन । संगेसंग मौसमी बीमारी ले बचाव के उपाय अउ ओमन ल जागरूक करे बर सबो स्कूल मन म जानकारी दे के निरदेस घलो दे गेहे।