मुख्यमंत्री ह आज रायपुर स्थित निवास कार्यालय म एक ठिन उच्च स्तरीय बइठका लेके आंखी आय के बीमारी ल रोके के उपाय के समीक्षा करीन। समीक्षा बइठका म मुख्यमंत्री ह किहीन कि कंजक्टिवाइटिस ले बांचे के उपाय अउ सावधानी के बने ढंग ले प्रचार-प्रसार करे जाय। ओमन किहीन कि अस्पताल मन म आंखी के बीमारी के मरीज मनके ईलाज पहिली करे जाय।
बइठका म उप मुख्यमंत्री अउ स्वास्थ्य मंत्री टी.एस. सिंहदेव ह किहीन कि पाछू हफ्ता जउन मरीज मिले रिहीन ओमन अब ठीक होगे हे। दुर्ग अउ रायपुर म सबले जादा मरीज मिले रिहीन।
कंजेक्टिवाइटिस-दिशा-निर्देश
उहें, स्वास्थ्य विभाग ह स्कूल, छात्रावास, आवासीय विद्यालय अउ आश्रम छात्रावास मन म आंखी के बीमारी ले बचाव बर जरूरी दिशा निर्देश जारी करे बर केहे हे। संगेसंग लइका मन ल ए संक्रमण के लक्षण, उपचार अउ बचाव के जानबा देके निर्देश घलो दे हे। ए बारे म स्कूल, शिक्षा अउ आदिमजाति, के संगेसंग अनुसूचित जाति विकास विभाग के संचालक ह परिपत्र जारी कर देहे। जेमा केहे गेहे, कि राज्य म मउसम के सेती आंखी आय के बीमारी बाढ़ के गेहे। ए बीमारी म रोगी मन के आंखी लाल हो जथे। चुभन के संगेसंग आंसू आथे अउ कभू-कभू सूजन घलो आ जथे। स्वास्थ्य विभाग ह सलाह दे हे, कि एंटीबायोटिक ड्राप जइसे जेंटामाइसिन, सिप्रोफ्लॉक्सेसिन अउ मॉक्सीफ्लॉक्सेसिन के छै घांव एक-एक बूंद तीन दिन तक डालना चाही। तीन दिन म आराम नइ मिले त अइसन स्थित म आंखी के डॉक्टर के तीर जाके ईलाज कराना चाही।
मुख्यमंत्री पुलिस महानिरीक्षक बैठक
मुख्यमंत्री ह आज अपन रायपुर स्थित निवास कार्यालय म प्रदेस के जम्मों रेंज के नवा महानिरीक्षक अउ उप महानिरीक्षक मन के संग बइठका लीन। ए दउरान मुख्यमंत्री ह प्रदेस म कानून व्यवस्था अउ माईलोगिन मन के सुरक्षा ल लेके अधिकारी मन ल जरूरी निरदेस दीन। ओमन पुराना गुंडा बदमाश, जुआ सट्टा अउ ऑनलाइन गेमिंग उपर कड़ाई ले रोक लगाय बर किहीन बइठका म मुख्य सचिव अमिताभ जैन अउ पुलिस महानिदेशक अशोक जुनेजा घलो सामिल होईन।
राज्य सरकार ह राजनांदगांव अउ रायगढ़ ल नवा पुलिस रेंज बनाय हे। अउ संगेसंग भारतीय पुलिस सेवा के छै झिन अधिकारी मन के प्रभार बदले गेहे।
जारी आदेश के मुताबिक राहुल भगत ल पुलिस महानिरीक्षक राजनांदगांव अउ रामगोपाल गर्ग ह पुलिस उप महानिरीक्षक रायगढ़ के जिम्मेवारी सौंपे गेहे। अइसने, आनंद छाबड़ा ल पुलिस महानिरीक्षक बिलासपुर त रतनलाल डांगी ल निदेशक नेताजी सुभाषचंद्र बोस राज्य अकादमी पुलिस चंद्रखुरी के संग पुलिस महानिरीक्षक रायपुर रेंज के प्रभार दे गेहे। उहें, अंकित कुमार गर्ग ल सरगुजा के पुलिस महानिरीक्षक बनाय गेहे। एति बद्रीनारायण मीणा ल पुलिस महानिरीक्षक दुर्ग के जवाबदारी दे गेहे। रतनलाल डांगी के रायपुर पुलिस महानिरीक्षक के पदभार लेके सेति पुलिस महानिरीक्षक अजय यादव ह रायपुर रेंज के प्रभार ले मुक्त होहीं।
त उहें, गृह विभाग ह घलो बड़का फेर बदल करत छैंसठ निरीक्षक अउ पांच सौ तैंतीस उप निरीक्षक मनके तबादला करे हे।
राशन कार्ड-केवाईसी
‘‘वन नेशन-वन राशनकार्ड योजना‘‘ के तहत राष्ट्रीय खाद्य सुरक्षा अधिनियम के राशन कार्डधारी हितग्राही मनके ई-केवाईसी इकतीस अगस्त तक करे जाही। ए बारे म खाद्य नागरिक आपूर्ति विभाग डहार ले जम्मों कलेक्टर मन ल जानबा दे दे गेहे।
ए योजना म राशन कारड म दर्ज जम्मों सदस्य मनके आधार नंबर के जानकारी प्रमाणीकृत होना जरूरी हे। खाद्य विभाग के अधिकारी मन ह बताइन कि प्रदेस म चलत शासकीय उचित मूल्य के दुकान मन ल दे गे ई-पास उपकरण म ई-केवाईसी के सुविधा हवय, जउन ह मुफत म करे जाही। एखर बर राशनकार्डधारी के मुखिया अउ राशन कार्ड म दरज जम्मों सदस्य मन अपन-अपन आधार नंबर के संग शासकीय उचित मूल्य के दुकान में जाके अपन ई-केवाईसी करा सकही। ई-केवाईसी के कार्यवाही के संगेसंग राशन घलो दे जाही।
मन की बात
प्रधानमंत्री नरेन्द्र मोदी ह तीस जुलाई ईतवार के दीन आकाशवाणी ले ‘‘मन की बात‘‘ कारीकरम म अपन विचार साझा करही। मासिक रेडियो कारीकरम के ए ह एक सौ तीन कड़ी होही। ए कारीकरम ल आकाशवाणी अउ दूरदर्शन के जम्मों नेटवर्क म प्रसारित करे जाही। हिंदी म प्रसारण के तुरते बाद आकाशवाणी ले क्षेत्रीय भाषा मन म घलो मन की बात के प्रसारण होही।
साय-समीक्षा
छत्तीसगढ़ राज्य औद्योगिक विकास निगम के अध्यक्ष नंदकुमार साय ह काली गौरेला-पेण्ड्रा-मरवाही जिला मुख्यालय म अधिकारी मनके संग बइठका लेके निगम के काम-काज के समीक्षा करीन। बइठका म डॉक्टर साय ह किहीन कि प्रदेस के वैद्य मन के पहिचान करके औषधीय जड़ी-बूटी मन ल सकेले बर कार्य योजना तइयार करे जाय। ओमन औद्योगिक विकास के तहत छत्तीसगढ़ औषधिय पादप बोर्ड ले मिल के वनौषधि पार्क बनाय उपर घलो जोर दीन।
भारतीय जनता पार्टी ह देस म पीएम प्रणाम योजना लागू करे जाय के सेति प्रधानमंत्री नरेन्द्र मोदी ल आभार जताय हे। पार्टी के प्रदेस प्रवक्ता संदीप शर्मा ह किहीन कि प्रधानमंत्री के अगुवई म केन्द्र सरकार ह किसान मनके कल्याण अउ विकास बर सरलग काम करत हे।
स्वीप-कार्यक्रम
प्रदेस म होवइया विधानसभा चुनई ल देखत चुनाव आयोग डहार ले ‘‘स्वीप कार्यक्रम‘‘ के माध्यम ले लोगन मन ल मतदान के प्रति जागरूक करे बर जन जागरूकता अभियान चलाय जात हे। इंही कड़ी म आज बिलासपुर जिला के तिफरा म श्रवण बाधित दिव्यांग छात्र-छात्रा मन ल मतदान के थीम उपर आधारित सांकेतिक अउ बढ़िया राखी बनाके लोगन मन ल वोट डारे बर प्रेरित करीन। संगेसंग लइका मन ह मतदान के महत्व बिषय उपर आधारित निबंध अउ स्लोगन लेखन प्रतियोगिता म घलो भाग लीन।
‘पोदला उरस्कना‘
बस्तर संभाग म आज ले वृक्षारोपण कार्यक्रम ‘‘पोदला उरस्कना‘‘ सुरू होइस । ए कारीकरम नौ अगस्त तक चलही। बस्तर रेंज के पुलिस महानिरीक्षक सुंदरराज पी. अउ कांकेर जिला के पुलिस अधीक्षक दिव्यांग पटेल ह शासकीय कन्या उच्चतर माध्यमिक विद्यालय कांकेर म शहीद रामकुमार यादव के सुरता म वृक्षारोपण कारीकरम के सुरूआत करीन। अइसने बस्तर संभाग के आने जिला दंतेवाड़ा, सुकमा, बीजापुर, कोंडागांव अउ नारायणपुर म घलो शहीद जवान अउ माओवादी हिंसा म मारे गे लोगन मनके सुरता म वृक्षारोपण कारीकरम के सुरूआत करे गीस।
बातों-बातों-में
सुनइया मन ल बतादन कि प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत नई राष्ट्रीय शिक्षा नीति उपर शशांक शर्मा ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली उनतीस जुलाई के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
जांजगीर जिला चिकित्सालय-प्रमाण पत्र
केन्द्रीय स्वास्थ्य अउ परिवार कल्याण मंत्रालय ह जांजगीर जिला चिकित्सालय ल बढ़िया स्वास्थ्य सेवा बर राष्ट्रीय गुणवत्ता आश्वासन मानक प्रमाण पत्र देहे। एखर अलावा अस्पताल ल बढ़िया प्रसूति सुविधा अउ बाल चिकित्सा अउ सेवा मन बर घलो लक्ष्य अउ मुस्कान कारीकरम के तहत गुणवत्ता प्रमाण पत्र दे गेहे।
जानबा के मुताबिक केन्द्रीय स्वास्थ्य मंत्रालय के टीम ह पाछू महिना जांजगीर जिला अस्पताल के निरीक्षण करके मरीज मन बर जरूरी सेवा के जांच परीक्षण करे जाही।
पर्यवेक्षक-आवेदन
महिला अउ बालविकास विभाग म पर्यवेक्षक पद बर परिसीमित सीधी भर्ती म आंगन बाडी़ कार्यकर्ता के रूप म पांच साल के अनुभव रखइया पैंतालीस साल ले जादा उमर के कार्यकर्ता मन घलो अरजी कर सकथे। ए बारे म विभाग डहार ले जारी कर दे गेहे।
युवा संगम क्रॉस कल्चरल कार्यक्रम
एक भारत-श्रेष्ठ भारत कार्यक्रम के तहत दिल्ली म होवइया युवा संगम क्रॉस कल्चरल कार्यक्रम म भाग लेबर काली छत्तीसगढ़ के टीम ह दिल्ली बर रवाना होईन। टीम ल एनआईटी रायपुर के निदेशक डॉक्टर एन.वी. रमणा राव ह हरा झंडी देखाके रवाना करीन।
छत्तीसगढ़ के टीम ह काली अउ परन दीन नई दिल्ली के प्रगति मैदान म होवइया कार्यक्रम म नागालैंड के टीम के संग क्रॉस कल्चरल लोक नृत्य के प्रदर्सन करही।