प्रधानमंत्री नरेन्द्र मोदी ह आज राजस्थान के सीकर म राखे गे समारोह म देसभर म सुरू करे गे सवा लाख ‘‘पीएम किसान समृद्धि केन्द्र‘‘ ल राष्ट्र ल समर्पित करीन। ए मउका म प्रधानमंत्री ह ‘यूरिया गोल्ड‘ के सुभारंभ करीन। श्री मोदी ह डिजिटल वाणिज्य के नेवटर्क म डेढ़ हजार किसान उत्पादक संगठन मन ल सामिल करे जाय के सुभारंभ घलो करीन। ओमन प्रधानमंत्री किसान सम्मान निधि के अंतर्गत चौदहवां किस्त के रूप म करीबन सत्रह हजार करोड़ रूपिया के धनराशि साढ़े आठ करोड़ ले जादा लाभार्थी मनके खाता म ऑनलाइन जमा करीन। ए मउका म प्रधानमंत्री ह पांच नवा मेडिकल कॉलेज के उद्घाटन करीन अउ सात मेडिकल कॉलेज मनके आधारसिला राखीन। प्रधानमंत्री ह छह एकलव्य आदर्श आवासीय विद्यालय अउ एक केन्द्रीय विद्यालय के घलो उद्घाटन करीन।
कार्यक्रम ल संबोधित करत प्रधानमंत्री ह किहीन कि पीएम किसान समृद्धि केन्द्र ह किसान मनके समृद्धि के रद्दा ल प्रशस्त करही। ए केन्द्र किसान मन बर एकल खिड़की जइसन काम करही, जिहां किसान मनके समस्या के एके संग समाधान करे जाही। प्रधानमंत्री ह किहीन कि केन्द्र सरकार ह देस के गांव मन म घलो सहर जइसन सुविधा देवाय के कोसिस करत हे।
ओमन किहीन कि देस के हरेक हिस्सा म नवा एम्स अउ मेडिकल कॉलेज खोले जावत हे, जेखर ले स्थानीय जनता ल सुघ्घर स्वास्थ्य सुविधा अपन तीर-तखार म मिल सकय। श्री मोदी ह किहीन कि बड़ संख्या म एकलव्य आदर्श स्कूल खोले जावत हे, जेखर फायदा आदिवासी परिवार मन ल मिलत हे।
मेरी माटी-मेरा देश
केन्द्र सरकार डहार ले ‘‘मेरी माटी-मेरा देश‘‘ कार्यक्रम अवइया नौ ले पन्द्रह अगस्त के दउरान देसभर म राखे जाही। एखर तहत देस के करीबन साढ़े सात हजार विकासखंड ले चुने गे युवा दिल्ली के कर्तव्य पथ म इकट्ठा होही। ए कार्यक्रम म भाग लेवइया युवा अपन राज्य के ग्राम पंचायत या जम्मों गांव के माटी ल घलो अपन संग लेके आही।
खबर के मुताबिक आजादी के अमृत महोत्सव साबरमती ले दाण्डी मार्च के संग बारह मार्च दू हजार इक्कीस ले सुरू होय रिहीस। इही कड़ी म ‘मेरी माटी-मेरा देश‘‘ कार्यक्रम के परिकल्पना आजादी के अमृत महोत्सव कार्यक्रम के समापन के रूप म करे गेहे।
नीति आयोग-डेल्टा रैंकिंग
नीति आयोग डहार ले आकांक्षी जिला म कृषि अउ जल संसाधन के क्षेत्र म करे गे विकास काम के रैंकिंग म राजनांदगांव जिला ल देस म तीसर स्थान मिले हे। खबर के मुताबिक नीति आयोग डहार ले आकांक्षी जिला म विकास के आने-आने क्षेत्र बर बेरा-बेरा म डेल्टा रैंकिंग जारी करे जाथे। इही कड़ी म कृषि संबंधी सुघ्घर काम बर राजनांदगांव जिला ल देस म तीसर स्थान दे गेहे। एखर तहत खेती के रकबा बढ़ाय अउ नवा जल स्त्रोत तैयार करे के संगेसंग पशु मनके टीकाकरण जइसन काम के आधार म देस के आकांक्षी जिला के उपलब्धि के आंकलन करे जाथे।
मुख्यमंत्री भूपेश बघेल ह ए उपलब्धि बर राजनांदगांव जिला प्रशासन अउ उहां के कृषि अउ पंचायत विभाग के अधिकारी अउ कर्मचारी मन ल सुभकामना दीन हे।
राज्यपाल-बैठक
राज्यपाल विश्वभूषण हरिचंदन ह रईपुर म केन्द्र सरकार के आने-आने विभाग प्रमुख मनके बइठका लेके विभागीय गतिविधि मनके जानकारी लीन। बइठका म राज्यपाल ह किहीन कि केन्द्र सरकार डहार ले चलत योजना मनके फायदा आम लोगन तक पहुंचाय के संगेसंग योजना मन ल तुरते ढंग ले लागू करे जाय। ओमन किहीन कि अधिकारी मन ल आम लोगन के बीच जाके केन्द्र सरकार के योजना के जानकारी देना चाही अउ योजना मन ले जुड़े उंखर परेसानी ल दूरिहा करे के कोसिस करना चाही।
मल्टीमीडिया चित्र प्रदर्शनी
प्रधानमंत्री नरेन्द्र मोदी के अगुवई म एनडीए सरकार के नौ बछर पूरा होय के मउका म जांजगीर-चांपा जिला के अकलतरा म मल्टीमीडिया चित्र प्रदर्शनी चलत हे। सेवा, सुशासन अउ गरीब कलयाण बिसय म केन्द्रित ए प्रदर्सनी के दूसर दिन आज रंगोली अउ चित्रकला प्रतियोगिता के आयोजन करे गीस। सूचना अउ प्रसारण मंत्रालय के केन्द्रीय संचार ब्यूरो, प्रादेशिक कार्यालय रईपुर डहार ले राखे गे ए कारीकरम म अकलतरा विधायक सौरभ सिंह ह किहीन कि प्रधानमंत्री नरेन्द्र मोदी के अगुवई म भारत विकास के पथ म निरंतर आगू बाढ़त हे। ओमन प्रदर्सनी बर सीबीसी के प्रयास के सराहना करीन।
वन-संरक्षण संशोधन विधेयक
लोकसभा म वन-संरक्षण संशोधन विधेयक पारित कर देहे। ए विधेयक उन्नीस सौ अस्सी के वन-संरक्षण अधिनियम म संसोधन ले जुड़े हे। एमा कुछ बिसेस प्रकार के भूमि ल अधिनियम के दायरा ले बाहिर राखे के प्रावधान करे गेहे।
केन्द्रीय वन मंत्री भूपेन्द्र यादव ह विधयेक म संक्षिप्त चर्चा के उत्तर देवत किहीन कि वन संरक्षण-संसोधन विधेयक ले आदिवासी समुदाय के हित मनके रक्षा होही अउ सीमावर्ती क्षेत्र मजबूत होही। संगेसंग कृषि वानिकी ल बढ़ावा मिलही अउ वनवासी मन बर विकास के संभावना अउ बाढ़ही। श्री यादव ह कुछेक विपक्षी सदस्य मन डहार ले उठाय गे ए चिंता ल खारिज करीन कि ए कानून के बने ले आदिवासी समुदाय ल उंखर जमीन ले बेदखल करे जा सकत हे।
एर्राबोर घटना-आरोपी गिरफ्तार
सुकमा जिला के एर्राबोर म आवासीय विद्यालय के सात बछर के नोनी संग दुराचार के मामला म पुलिस ह आरोपी ल गिरफ्तार कर लेहे। जिला के पुलिस अधीक्षक किरण चव्हाण ह बतईन कि अतिरिक्त पुलिस अधीक्षक गौरव मंडल के अगुवई म आठ सदस्य मन ह मामला के जांच के दउरान आवासीय विद्यालय के अधीक्षिका समेत जम्मों कर्मचारी मन ले पूछताछ करीन। ए मामला म अधीक्षिका डहार ले घटना के सूचना तुरते नइ दे जाय अउ मामला ल छुपाय के कोसिस करे बर ओला घलो पॉक्सो कानून के तहत गिरफ्तार करके अदालत म पेस करे गीस। पुलिस अधीक्षक ह बतईन कि आरोपी ए आवासीय विद्यालय म काम करइया चपरासी के पति हरय, जेखर विद्यालय परिसर म अवई-जवई रिहीस।
इही बीच, भारतीय जनता पार्टी के प्रदेस प्रवक्ता अउ विधायक रंजना साहू ह एर्राबोर म नोनी संग होय दुष्कर्म के मामला म पारदर्सी जांच के संग पीड़ित नोनी अउ उंखर परिवार ल न्याय देवाय के मांग करे हे। आज रईपुर के एकात्म परिसर म भाजपा कार्यालय म पत्रकार मन ले गोठबात करत रंजना साहू ह आरोप लगईन कि ए मामला म एक झिन आरोपी के गिरफ्तार के बावजूद परिस्थिति ए बात के संकेत करत हे कि आरोपी मनके संख्या जादा रिहीस। श्रीमती साहू ह राज्य म कानून व्यवस्था उपर सवाल उठावत किहीन कि ए मामला म अब तक मुख्यमंत्री, गृह मंत्री अउ बस्तर के मंत्री के कोनों बयान नइ आना घलो दुर्भाग्यपूर्ण हे। विधायक श्रीमती साहू ह ए बात उपर सवाल उठईन कि बालिका छात्रावास म पुरूष मन ल काबर आवन दे जाथे। ओमन छात्रावास के एक कमरा म चालीस ले पचास नोनी मनके रेहे के व्यवस्था अउ उंखर सुरक्षा उपर घलो सवाल उठईन।
प्रधानमंत्री फसल बीमा योजना
चालू खरीफ मौसम बर प्रधानमंत्री फसल बीमा योजना के तहत इकतीस जुलाई तक आवेदन जमा करे जा सकत हे। ए योजना म किसान मन ल मौसम के सेती होवइया फसल संबंधी नुकसान के एवज म मुआवजा बर बीमा के फायदा दे जाही। कृषि विभाग के अधिकारी मन बतईन कि प्रदेस के जम्मों जिला के किसान धान के संगेसंग मक्का, सोयाबीन, अरहर, मूंग, उड़द, कोदो, कुटकी अउ रागी जइसन फसल के बीमा करा सकत हे।
छात्रावास-मंजूरी
आदिम जाति अउ अनुसूचित जाति विकास विभाग ह रईपुर म पिछड़ा वर्ग पोस्ट मैट्रिक बालक अउ बालिका छात्रावास सुरू करे के मंजूरी दे देहे। फिलहाल किराया के भवन म प्रस्तावित ए छात्रावास म सौ सीट होही। ए छात्रावास बर भवन उपलब्ध कराय के इच्छुक मनखे या संस्था इकतीस जुलाई तक जरूरी दस्तावेज के संग आदिवासी विकास विभाग के रईपुर स्थित कार्यालय म आवेदन जमा कर सकत हे।
मोबाइल पशु चिकित्सा इकाई
प्रदेस के गौठान मन म पशु चिकित्सा अउ पशु मन ल होवइया आने-आने बीमारी मनके जांच बर जल्दीच मोबाइल पशु चिकित्सा इकाई के सेवा सुरू करे जाही। एखर माध्यम ले गौठाने म जानवर मनके जांच अउ इलाज के सुविधा मिलही। प्रदेस के पशुधन विकास मंत्री रविन्द्र चौबे ह काली अपन निवास परिसर ले मोबाइल पशु चिकित्सा इकाई के जांच करीन। ओमन जल्दीच एखर सुभारंभ घलो करही।
ए संबंध म कृषि उत्पादन आयुक्त डॉक्टर कमलप्रीत सिंह बतईन कि गौठान म पशु मनके जांच अउ इलाज बर पशुधन विकास विभाग डहार ले टोल फ्री नंबर- एक नौ छह दू म सलाह लेके सुविधा जल्दीच सुरू करे जाही।