राज्यसभा म अनुसूचित जनजाति आदेश-पंाचवंा संशोधन विधेयक ध्वनिमत ले पारित कर देहे। विधेयक के माध्यम ले छत्तीसगढ़ के बारे म संविधान के अनुसूचित जनजाति आदेश 1950 म संशोधन के प्रस्ताव हे। ए विधेयक म छत्तीसगढ़ म अनुसूचित जनजाति मनके सूची म धनुहार, धनुवार, किसान, सौंरा, सौरा अउ ंिबझिया समुदाय ल शामिल करे के प्रावधान हे। विधेयक म भुइन्या, भुइयंा अउ भुयान समुदाय मन ल भरिया भूमिया समुदाय के हिस्सा माने जाय के प्रावधान हे। विधेयक म पंडो समुदाय के नाव के तीन देवनागरी संस्करण ल घलो शामिल करे के प्रावधान हे।
राज्यपाल
राज्यपाल विश्वभूषण हरिचंदन ह कीहिन कि योग ह भारत के देन हरय। एखर ले छात्र मनके शारीरिक अउ मानसिक विकास बाढ़थे। आज रायपुर म प्रायवेट विश्वविद्यालय केसमीक्षा बइठका म ओमन कीहिन कि पढ़ई लिखई के संगेसंग छात्र मन ल समाज अउ राष्ट्र के घलो जिम्मेवारी निभाना चाही।
बइठका म राष्ट्रीय शिक्षा नीति दू हजार बीस के क्रियान्वयन के संगेसंग आने आने विषय उपर विश्वविद्यालय ले जानकारी ले गीस। उंहे राज्यपाल ह आज केंद्र शासन के विभाग प्रमुख मनके बइठका घलो लेवत हे।
मतदाता सूची विशेष पुनरीक्षण
प्रदेश म ए बेरा मतदाता सूची के विशेष संक्षिप्त पुनरीक्षण के काम चलत हे। मतदाता सूची के प्रारंभिक प्रकाशन दू अगस्त के होही। इही दिन राज्य म विशेष ग्रामसभा म मतदाता सूची ल पढ़े जाही। ये मतदाता सूची बर राज्य के मुख्य निर्वाचन पदाधिकारी कार्यालय के वेबसाईट म घलो देखे जा सकथे। इकतीस अगस्त तक मतदाता सूची म नाव जोड़े, काटे अउ संशोधन बर दावा – आपत्ति ले जाही।
बारह, तेरह, उन्नीस अउ बीस अगस्त के बूथ स्तर म विशेष श्वििर लगाये जाही। शिविर म एक अक्टूबर दू हजार तेइस के जेखर उमर अठारा साल पूरा हो जाही ओ युवा मनके मतदाता सूची म नाव जोड़े बर अर्जी ले जाही। मतदाता सूची के आखरी प्रकाशन चार अक्टूबर के होही।
स्वीप कार्यक्रम-समीक्षा/प्रशिक्षण
राज्य म अवइया विधानसभा चुनई ल देखत भारत निर्वाचन आयोग के बड़का अधिकारी मन ह प्रदेश म चलाये जात स्वीप कार्यक्रम के समीक्षा करीन। रायपुर म दू दिन के समीक्षा सह प्रशिक्षण कार्यक्रम म आयोग के अधिकारी मन ह स्वीप नोडल अधिकारी मन ल जरूरी निर्देश दीन। जानबा के मुताबिक स्वीप कार्यक्रम के समीक्षा बर भारत निर्वाचन आयोग म स्वीप के संचालक संतोष अजमेरा, सचिव संतोष कुमार, स्वीप के वरिष्ठ सलाहकार आर.के. सिंह अउ रजनी उपाध्याय दू दिन के दउरा म रायपुर आये रीहिन।
कार्यक्रम म स्वीप के संचालक ह मतदाता जागरूकता अउ मतदान प्रतिशत बढ़ाय बर आयोग डहार ले करे जात आने आने स्वीप गतिविधि के जानबा दीन। ओमन प्रदेश म नवविवाहित माइलोगिन मनके नाव मतदाता सूची म जोड़े बर चलाये जात कार्यक्रम के प्रशंसा करीन। ए दउरान ओमन मुख्य निर्वाचन पदाधिकारी कार्यालय डहार ले तियार करे गे मास्कोट चुनई चिरई के अनावरण घलो करीन।
उंहे मुख्य निर्वाचन पदाधिकारी रीना बाबा साहेब कंगाले ह प्रशिक्षण के उद्घाटन सत्र ल संबोधित करत बने ढंग ले अवइया विधानसभा चुनई ल कराय के बात कीहिन।
अंतरर्राज्यीय समनव्य बैठक
छत्तीसगढ़ के सीमा वाले राज्य मनके बड़का पुलिस अधिकारी मनके अंतर्राज्यीय समन्वय बइठका हैदराबाद म होइस। ए बइठका म छत्तीसगढ़ के पुलिस महानिदेशक अशोक जुनेजा के संगेसंग महाराष्ट्र, तेलंगाना अउ आंध्रप्रदेश के पुलिस महानिदेशक मन पहुंचे रीहिन।
उंहे छत्तीसगढ़ के अतिरिक्त पुलिस महानिदेशक नक्सल अभियान विवेकानंद सिन्हा अउ बस्तर रेंज के पुलिस महानिदेशक सुंदर राज पी. घलो ए बइठका म शामिल होइन। बइठका म अवइया विधानसभा चुनई ल देखत माओवादी विरोधी अभियान कानून व्यवस्था अउ आपराधिक गतिविधि के उपर प्रभावी रोक लगाये जइसन विसय उपर गोठबात होइस।
सुकमा घटना-भाजपा प्रतिनिधिमंडल
सुकमा जिला म एर्राबोर आश्रम के नाबालिग छात्रा के संग कथित रूप ले दुराचार के मामला के जांच बर पूर्व मंत्री लता उसेण्डी के अगवई म भाजपा के एक ठिन प्रतिनिधि मंडल ह आज घटनास्थल पहुंचीन। प्रतिनिधि मंडल म विधायक रंजना साहू अउ भाजपा महिला मोर्चा के प्रदेश अध्यक्ष शालिनी राजपूत घलो शामिल होइन।
जानबा के मुताबिक ए मामला म पुलिस ह अज्ञात आरोपी मनके खिलाफ मामला दर्ज करे हे अउ संगेसंग कलेक्टर ह आवासीय विद्यालय के अधीक्षक अउ सहायक अधिक्षक ल निलंबित करे के निर्देश देहे। उंहे ए मामला के जांच बर सुकमा पुलिस अधीक्षक ह आठ सदस्यीय टीम के गठन घलो करे हे।
भाजपा प्रेसवार्ता
भाजपा के प्रदेश प्रवक्ता अमित साहू ह कीहिन हे कि युवा मतदाता मनले गोठबात करे के बजाय मुख्यमंत्री ह युवा मनके पीड़ा अउ गुस्सा ल महसूस करय। ओमन रायपुर म राखे गे एक ठिन प्रेसवार्ता म कीहिन कि राज्य के कंाग्रेस सरकार ह अब तक के अपन कामकाज म युवा मन संग छल-कपट करके उंखर मनके प्रतिभा ल चोट पहुंचाय हे, ओखर कंाग्रेस ल बड़का कीमत चुकाय बर पड़ही। लोक सेवा आयोग अउ व्यावसायिक परीक्षा मंडल म जउन ढंग ले पइसा के खेल खेले जात हे, एखर ले युवा मन म निराशा हे।
मल्टी मीडिया चित्र प्रदर्शनी
प्रधानमंत्री नरेंद्र मोदी के अगवई म एनडीए सरकार के नौ साल पूरा होय के मउका म जांजगीर-चंापा जिला के अकलतरा म आजले तीन दिन तक मल्टी मीडिया चित्र प्रदर्शनी लगाय गेहे। सेवा, सुशासन अउ गरीब कल्याण विसय उपर आधारित ये प्रदर्शनी के आयोजन सूचना अउ प्रसारण मंत्रालय के केंद्रीय संचार ब्यूरो प्रादेशिक कार्यालय रायपुर डहार ले करे गेहे। उद्घाटन के मउका म अतिथि मन ह कारगिल विजय दिवस के सेनानायक मन ल सुरता करत केंद्र सरकार के कल्याणकारी योजना मनके जानबा दीन।
एखर पहिली केंद्रीय संचार ब्यूरो प्रादेशिक कार्यालय प्रमुख शैलेष फाये ह प्रतियोगी परीक्षा के तियारी करइया छात्र मनले विश्ेाष रूप ले प्रदर्शनी देखे के अपील करीन। प्रदर्शनी के पहिली दिन प्रगति के पथ पर अग्र्र्र्रसर भारत विशय उपर निबंध प्रतियोगिता के आयोजन करे गीस।
छत्तीसगढ़िया ओलंपिक-दूसरा चरण
छत्तीसगढ़िया ओलंपिक म जोन स्तर के खेल आजले शुरू होगे। दूसर चरण के ये प्रतियोगिता ह इकतीस जुलाई तक चलही। पहिली चरण म राजीव युवा मितान क्लब स्तर के मुकाबला गांव अउ नगरीय क्षेत्र मन म सतरा ले बाईस जुलाई तक होइस। ग्रामीण क्षेत्र के विजेता मन ल विकासखंड स्तर के प्रतियोगिता म अउ शहरी क्षेत्र के विजेता प्रतिभागी मन ल नगरीय क्लस्टर स्तर के प्रतियोगिता म भाग लेके मउका मिलही।
छत्तीसगढ़िया ओलंपिक खेल छै चरण म राखे गेहे। ए प्रतियोगिता के आखरी चरण पच्चीस ले सत्ताईस सितंबर तक होही। ए ओलंपिक म दलीय श्रेणी म गिल्ली डंडा, पिट्ठूल, संखली, लंगड़ी दौड़, कबड्डी, खो-खो, रस्साकसी अउ बांटी जइसन खेल मन ल शामिल करे गेहे। त उंहे एकल श्रेणी म बिल्लस, फुगड़ी, गेड़ी दौड़, भंवरा, सौ मीटर दौड़, लंबी कूद, रस्सी कूद अउ कुश्ती ल शामिल करे गेहे।
लघु फिल्म महोत्सव पंजीयन
राष्ट्रीय सड़क सुरक्षा लघु फिल्म महोत्सव म पंजीकरण के आखरी तारीख ल बढ़ाके दस अगस्त तक कर देहे। उंहे प्रतिभागी मन बर फिल्म प्रविष्ठि के आखरी तारीख बारह अगस्त तक बढ़ा दे गेहे। राष्ट्रीय सड़क सुरक्षा लघु फिल्म महोत्सव बर अब तक प्रदेश के आने आने क्षेत्र के अस्सी झिन प्रतिभागी मनह पंजीयन कराय हे । त उंहे उत्तर प्रदेश, गुजरात, मध्यप्रदेश के संगेसंग अउ कतकोन राज्य ले चौंसठ ठिन अर्जी मिले हे।
मौसम
मौसम विभाग ह अवइया चौबीस घंटा के दउरान सुकमा अउ बीजापुर जिला के एक दू जगा म भारी ले अतिभारी बरसा होय के चेतावनी देहे अउ संगेसंग दंतेवाड़ा, कंाकेर अउ नारायणपुर जिला म घलो भारी बरसा होय के संभावना बताय हे। मौसम विभाग के मुताबिक अवइया छत्तीस घंटा के दउरान राजनंादगांव, सुकमा अउ कंाकेर जिला के एक दू जगा म भारी बरसा हो सकथे।
अउ अब थोरकुन समाचार सार म-
– सुकमा पुलिस अधीक्षक किरण चौहान ह माओवादी मनके शहीदी सप्ताह ल देखत जम्मों जवान मन ल अलर्ट कर देहे। माओवादी मन ह अठाईस जुलाई ले तीन अगस्त तक शहीदी सप्ताह मनाय के घोषणा करे हे।
अउ
– प्रदेश म चलाये जात एकलव्य आदर्श आवासीय विद्यालय मन बर शैक्षणिक अउ गैर शैक्षणिक कर्मचारी मनके भर्ती बर ऑनलाईन अर्जी इकतीस जुलाई तक मंगाय गेहे।