छत्तीसगढ़ सरकार ह केंद्र सरकार कोति ले पंचायत मन बर देगे रकम म तीन हजार दू सौ अड़सठ करोड़ इकतीस लाख रूपिया के उपयोग करे हे। ये जानकारी केंद्रीय पंचायती राज राज्य मंत्री कपिल मोरेश्वर पाटिल ह लोकसभा म दीन।
रायपुर सांसद सुनील सोनी के अतारंकित प्रश्न के जवाब म केंद्रीय पंचायती राज राज्य मंत्री ह बताइन कि छत्तीसगढ़ सरकार ह सूचित करे हे कि पंचायती राज मंत्रालय के मानदंड के पालन करत पंचायत मन बर देगे रकम म पंद्रह जुलाई तक तीन हजार दू सौ अड़सठ करोड़ के उपयोग करे गेहे। केंद्रीय राज्य मंत्री ह बताइन कि छत्तीसगढ़ सरकार ल तीन बछर म चार हजार एक सौ सतरा करोड़ चौरानबे लाख रूपिया के रकम देगे रीहिस।
राष्ट्रीय शिक्षा नीति
राष्ट्रीय शिक्षा नीति के तीसर वर्षगांठ म आज रायपुर म पत्रकार वार्ता राखे गीस। एमा आईआईटी भिलाई के निदेशक प्रोफेसर राजीव प्रकाश, एनआईटी रायपुर के निदेशक प्रोफेसर एन.वी. रमणा राव, आईआईएम रायपुर के प्रभारी निदेशक प्रोफेसर कमल जैन, केंद्रीय विद्यालय संगठन के उपायुक्त विनोद कुमार अउ आरडीएसडीई के उपनिदेशक रजनीश कुमार झा ह गोठबात करीन।
ये पत्रकार वार्ता के विषय राष्ट्रीय शिक्षा नीति के लक्ष्य अउ उपलब्धी रीहिस। ए शिक्षा नीति म ए बात के विशेष ध्यान दे गेहे कि शिक्षा विद्यार्थी केंद्रित होना चाही अउ संगेसंग ए रोजगार देवइया घलो होना चाही। एखर अलावा ए शिक्षा नीति म केहे गेहे कि विद्यार्थी मन ल शिक्षा उंखर अपन भाषा म मिलना चाही।
भाजपा समिति घोषणा
भारतीय जनता पार्टी के प्रदेश अध्यक्ष अरूण साव ह विधानसभा चुनाव बर आने-आने समिति के घोषणा करीन हे। एमा कंट्रोल रूम, विमान अउ हेलिकॉप्टर व्यवस्था समिति, विधिक विभाग, आईटी, सोशल मीडिया, प्रिंट अउ इलेक्ट्रानिक मीडिया, आवास विभाग व्यवस्था समिति अउ प्रचार प्रसार साहित्य निर्माण समिति शामिल हे।
एखर संगेसंग सांस्कृतिक दल प्रचार समिति, केंद्रीय नेता मनके प्रवास अउ स्वागत समिति, वाहन व्यवस्था, प्रशासकीय अनुमति, आने राज्य ले अवइया कार्यकर्ता मनके समन्वय समिति, क्रय समिति, चुनाव आयोग संपर्क अउ वित्त समिति बनाय गेहे। एमा संयोजक, सह-संयोजक अउ सदस्य मनके नियुक्ति करे गेहे।
भाजपा प्रदर्शन
जांजगीर-चांपा जिला के कचहरी चौक म स्थानीय समस्या ल लेके भाजपा कार्यकर्ता मन ह विधानसभा स्तरीय धरना-प्रदर्शन करीन अउ राज्य सरकार के नीति के खिलाफ नारेबाजी करीन। ये बेरा म नेता प्रतिपक्ष नारायण चंदेल अउ पूर्व नेता प्रतिपक्ष धरमलाल कौशिक मौजूद रीहिन।
एति राजधानी रायपुर म पूर्व मंत्री राजेश मूणत के अगवई म पश्चिम विधानसभा के कार्यकर्ता एकात्म परिसर ले रैली निकाल के कलेक्टोरेट पहुंचके घेराव करीन।
सुकमा छात्रावास-दुष्कर्म
सुकमा जिला के एर्राबोर के शासकीय कन्या अवासीय विद्यालय के नाबालिग छात्रा ले दुष्कर्म के मामला आगू आय हे। पोटाकेबिन अधीक्षक ह ए मामला के शिकाइत उंहा के थाना म दरज कराय हे। पुलिस ह अज्ञात आरोपी मन खिलाफ मामला दरज कर ले हे। घटना के बाद कलेक्टर अउ पुलिस अधीक्षक अवासीय विद्यालय पहुंचिन। कलेक्टर ह आवासीय विद्यालय के अधीक्षक अउ सहायक अधीक्षक ल निलंबित करे के निरदेस दीन हे। उहें, मंत्री कवासी लखमा ह ए घटना के संबंध म जानकारी लीन अउ दोषी मन के खिलाफ कार्रवाई करे निरदेस दीन। सुकमा पुलिस अधीक्षक किरण चव्हाण ह ए मामला के जांच बर कोंटा के अतिरिक्त पुलिस अधीक्षक गौरव मंडल के अगुवई म आठ सदस्य वाले टीम के गठन करे हे।
इही बीच भारतीय जनता पार्टी के कार्यकर्ता मन ह ये मामला ल लेके प्रदर्शन करीन। ओमन राज्य सरकार उपर आरोपी ल बचाय के आरोप लगाइन। उंहे पूर्व मंत्री लता उसेण्डी विधायक रंजना साहू, महिला मोर्चा अध्यक्ष शालिनी राजपूत काली घटना के जगा म जाके गांव के लोगन अउ पीड़ित परिवार ले भेंट करही।
वजन त्यौहार
प्रदेस के सहरी अउ ग्रामीण क्षेत्र के आंगनबाड़ी केंद्र मन म लईका मनके पोषण स्तर के जांच खातिर एक ले तेरा अगस्त तक वजन तिहार मनाये जाही। वजन तिहार के बेरा आंगनबाड़ी केंद्र मन म जाके अभिभावक अपन लईका मनके वजन कराही। उंहे वजन तिहार के दउरान किशोर नोनी मन म एनीमिया के स्तर म सुधार के आकलन करे जाही। ए संबंध म महिला बाल विकास विभाग ह तियारी ल लेके जम्मों कलेक्टर अउ विभागीय अधिकारी मन ल दिशा निर्देश जारी करे हे।
माओवादी आत्मसमर्पण
राजनांदगांव जिला ले लगे महाराष्ट्र के गढ़चिरौली क्षेत्र म आठ लाख रूपिया के दू झिन इनामी माओवादी मन ह पुलिस के आगू आत्मसर्पण करीन हे। ये माओवादी मन उपर बीजापुर जिला म बछर दू हजार सतरा म सीआरपीएफ जवान मन उपर होय हमला के बेरा एंबुस लगाये के आरोप हवय। ये हमला म सीआरपीएफ के पच्चीस झिन जवान शहीद होय रीहिन।
ईवीएम मोबाइल वैन
रायपुर जिला म मतदाता जागरूकता अभियान स्वीप म जागरूकता के कतकोन कार्यक्रम चलाये जात हे। एमा मुख्य निर्वाचन पदाधिकारी रीना बाबा साहेब कंगाले ह आज प्रशिक्षण प्रशासन अकादमी निमोरा ले ईवीएम मोबाइल प्रदर्शन वैन ल हरियर झंडी दिखाके रवाना करीन । ये मोबाइल वैन ल आने-आने मतदान केंद्र मन म ले जाय जाही। जिहां लोगन ल वोट डारे बर जागरूक करे जाही।
इही बीच विधानसभा निर्वाचन म शत प्रतिशत मतदान खातिर अब जिला प्रशासन कोति ले सोशल मीडिया के मदद ले जाही। सोशल मीडिया के कतकोन प्लेटफार्म जइसे इंस्टाग्राम, ट्वीटर, फेसबुक, यू-ट्यूब चैनल म वोट डारे के जानकारी अउ ओखर महत्व ल बतइया वीडियो रील्स बनाये जाही। संगेसंग वोट डारे के तरीका अउ मतदान करत बेरा का सावधानी राखे जाय ये जम्मों जानकारी घलो अपलोड करे जाही। ये अभियान बर कलेक्टर अउ जिला निर्वाचन अधिकारी डॅाक्टर सर्वेश्वर नरेंद्र भूरे ह बइठका लेके मतदाता जागरूकता अभियान म मदद करे के आह्वान करीन।
जिला स्तरीय युवा उत्सव
नेहरू युवा केंद्र रायपुर कोति ले गरियाबंद म अठाईस जुलाई के जिला स्तरीय युवा उत्सव के आयोजन करे जाही। नेहरू युवा केंद्र ले मिले जानकारी के मुताबिक ये कार्यक्रम के थीम- अमृतकाल के पांच प्रण रखे गेहे। एमा चित्रकला, फोटोग्राफी, कविता लेखन, भाषण अउ लोकनृत्य प्रतियोगिता होही। ये प्रतियोगिता म पंद्रह ले उनतीस आयु वर्ग के युवा भाग ले सकत हे।
मल्टी मीडिया चित्र प्रदर्शनी
केंद्रीय संचार ब्यूरो के प्रादेशिक कार्यालय रायपुर कोति ले जांजगीर-चांपा जिला के अकलतरा म काली छब्बीस जुलाई ले तीन दिन बर मल्टी मीडिया चित्र प्रदर्शनी लगाय जाही। सेवा, सुशासन अउ गरीब कल्याण के नौ बछर के उपलब्धि म आधारित ये मल्टी मीडिया चित्र प्रदर्शनी के शुभारंभ अकलतरा विधायक सौरभ सिंह करही। कार्यक्रम के अगवई नगरपालिका अध्यक्ष शांति भारते करही। उंहे माइपहुना के रूप म समाज सेविका आरती सिंह, अशोक अग्रवाल अउ ईश्वर खंडेलिया शामिल होही। ये मउका म आने-आने प्रतियोगिता अउ सांस्कृतिक कार्यक्रम होही।
सिटी बस सेवा
रायपुर विमानतल ले दुर्ग तक जवइया एसी सिटी बस के सेवा शुरू होगे हे। आज ये बस ल विवेकानंद विमानतल ले रवाना करे गीस। ये बस तेलीबांधा, पचपेड़ी नाका, भाटागांव ले होत दुर्ग शहर तक पहुंचही।
ये बस विवेकानंद विमानतल ले बीहनिया साढ़े आठ, सवा दस मंझनियां ढाई बजे अउ संझाकुन छै बजे छुटही। अइसने ये बस दुर्ग ले सुपेला, पावर हाउस, भिलाई-तीन, टाटीबंध अउ तेलीबांधा होत एयरपोर्ट पहुंचही। ये बस के रायपुर ले दुर्ग तक के किराया सौ रूपिया होही।
मौसम
मौसम विभाग ह काली दक्षिण छत्तीसगढ़ के कुछएक जगा म भारी बरसा होय के चेतावनी देहे। उंहे प्रदेश के कतकोन जगा म गरज-चमक, छींटा बौछार संग हल्का ले मध्यम बरसा होय के संभावना हवय। संगेसंग एक दू जगा म गाज गिरे के आशंका जताय गेहे।
इही बीच राजनांदगांव के जंगलेसर एनीकट म संगवारी मन संग नहाय बर गे एक मनखे के बूडे ले मउत होगे। उंहे प्रशासन ह एनीकट के तीर तखार के सुरक्षा बढ़ा देहे अउ लोगन ल चेताय खातिर गांव मन म मुनादी कराय जात हे।