भारतीय जनता पार्टी के रायपुर संभाग प्रभारी अउ विधायक सौरभ सिंह ह राज्य सरकार उपर दू सौ उनतीस करोड़ रूपिया के गोबर घोटाला के आरोप लगाय हे। आज रायपुर म एक ठन प्रेसवार्ता म ओमन बताइन कि सरकार ह गोधन न्याय योजना म दू सौ छियांलिस करोड़ रूपिया के गोबर खरीदी करीन। जबकि गोबर ले आने-आने सामान बनाके मात्र सतरा करोड़ रूपिया म बेचे गीस। अइसे म बाकी दू सौ छियांलिस करोड़ रूपिया कहां गीस। एखर हिसाब सरकार के मंत्री मन ह घलो नइ दे पावत हे। ओमन बताइन कि विधानसभा म नेता प्रतिपक्ष नारायण चंदेल ह गोबर खरीदी ल लेके सरकार ले सवाल घलो करे रीहिन।
जांजगीर म आज भारतीय जनता पार्टी के विधानसभा स्तर के बइठका होइस। जेमा अवइया विधानसभा चुनाव ल लेके रणनीति बनाय गीस। बइठका के बाद पत्रकार मनले नेता प्रतिपक्ष नारायण चंदेल ह कीहिन कि बइठका म विधानसभा चुनाव के रणनीति के अलावा दूसर आने-आने विषय उपर घलो चर्चा होइस।
प्रदेश म ए बछर होवइया विधानसभा चुनाव ल देखत सबो राजनीतिक दल मन ह अपन-अपन तैयारी ल तेज कर दे हवय। इही सिलसिला म काली भाजपा के विधानसभा विस्तार योजना के प्रदेश प्रभारी अउ पूर्व संगठन महामंत्री रामप्रताप सिंह अउ सह प्रभारी रूपनारायण सिन्हा ह दंतेवाड़ा म भाजपा पदाधिकारी अउ कार्यकर्ता मनके बइठका लीन।
ए दउरान श्री सिंह ह मंडल अउ बूथ स्तर म चलत कार्यक्रम अउ शक्ति केंद्र अउ विस्तारक मनके स्थिति के जानकारी लीन। ओमन कीहिन कि दंतेवाड़ा विधानसभा चुनाव म हमर मनके लक्ष्य जीत हेाना चाही।
प्रदेश म हाट-बाजार क्लीनिक योजना के जइसन अब मवेशी मनके इलाज बर जल्दीच मोबाइल वेटनरी वाहन शुरू करे जाही। ये वाहन तय कार्यक्रम के मुताबिक गौठान म पहुंचहीं, जिहंा ग्रामीण मन अपन मवेशी के इलाज करा सकही। ये जानकारी मुख्यमंत्री भूपेश बघेल ह आज राजधानी रायपुर स्थित अपन निवास कार्यालय म सर्व यादव समाज के प्रतिनिधि मंडल ल संबोधित करत बेरा दीन।
छत्तीसगढ़ उच्च न्यायालय ह कथित शराब घोटाला अउ मनी लॉन्ड्रिंग के मामला म गिरप्तार कारोबारी अनवर ढेबर ल तीन हप्ता के अंतरिम जमानत दे दे हवय। अधिवक्ता मतीन सिद्दीकी ह बताइन कि ढेबर ह मेडिकल ग्राउण्ड म हाईकोर्ट ले अंतरिम जमानत मंागे रीहिन। जेला न्यायमूर्ति दीपक तिवारी के सिंगल बैंच ह मंजूर कर लीस। खबर के मुताबिक प्रवर्तन निदेशालय-ईडी ह कारोबारी अनवर ढेबर ल मनी लॉन्ड्रिंग के मामला म गिरप्तार करे रीहिन।
दुर्ग जिला सहकारी केंद्रीय बैंक के पूर्व अध्यक्ष प्रीतपाल बेलचंदन ल आज पुलिस ह गिरप्तार कर लेहे। श्री बेलचंदन उपर पदस्थापना के दउरान करीबन पंद्रह करोड़ रूपिया के आर्थिक अनियमितता करे के आरोप हे।
अतिरिक्त पुलिस अधीक्षक संजय ध्रुव ह बताइन कि बेलचंदन के खिलाफ मिले शिकायत के बाद जिला प्रशासन के टीम ह जांच करे रीहिस। जांच म ए पाये गीस कि बेलचंदन ह अपन कार्यकाल के दउरान बछर दू हजार पंद्रह ले दू हजार बीस के बीच पंजीयक सहकारी संस्था छत्तीसगढ़ ले बिना अनुमति के दू सौ चौंतीस प्रकरण म तेरा करोड़ रूपिया ले जादा के अनुदान राशि अउ बछर दू हजार सोला ले दू हजार उन्नीस तक एकमुश्त समझौता योजना म एक सौ छियांसी प्रकरण म करीबन दू करोड़ रूपिया के राशि के योजना ल अधिकार क्षेत्र ले बाहिर जाके लागू करे रीहिन, जेखर ले बैंक ल आर्थिक नुकसान होय हे।
मणिपुर के घटना के विरोध म सर्व आदिवासी समाज ह आज बस्तर संभाग म बंद के आह्वान करे रीहिन। ए दउरान जगदलपुर, बीजापुर, अउ दंतेवाड़ा संघरा सबो जिला मुख्यालय म बंद के असर देखे बर मिलिस। मंझनियंा तक सबो व्यावसायिक प्रतिष्ठान मन बंद रीहिन, फेर ए दउरान जरूरी सेवा जइसे अस्पताल, दवई दुकान अउ पेट्रोल पंप खुले रीहिस। चेंबर ऑफ कॉमर्स घलो बंद ल अपन समर्थन दे रीहिस।
वन नेशन वन राशन कार्ड योजना म राष्ट्रीय खाद्य सुरक्षा अधिनियम के राशन कार्डधारी हितग्राही मनके ई-केवाईसी अवइया इकतीस जुलाई तक करे जाही। ए योजना म राशन कार्ड म दर्ज सबो सदस्य मनके आधान नंबर के जानकारी प्रमाणिकृत होना जरूरी हे। खाद्य विभाग के अधिकारी मनह बताइन कि प्रदेश म चलत शासकीय उचित मूल्य के दुकान ल देगे ई-पास उपकरण म ई-केवाईसी सुविधा मौजूद हे, जउन ह निशुल्क हे।
छत्तीसगढ़ अधिकारी-कर्मचारी फेडरेशन ह अवइया एक अगस्त ले होवइया अनिश्चितकालिन हडताल ल स्थगित कर देहे। फेडरेशन ह मुख्यमंत्री भूपेश बघेल के संग होय बइठका के बाद ये फैसला ले हवय। फेडरेशन के पदाधिकारी मनह बताइन कि मुख्यमंत्री ह उंखर पांच सूत्रीय मंाग ल पूरा करे के आश्वासन दीन हे।
खबर के मुताबिक फेडरेशन ह केंद्र के समान मंहगाई भत्ता, सातवंा वेतनमान म गृह भाड़ा भत्ता, पिंगुआ कमिटी के रिपोर्ट, पेंशन अउ नियमितीकरण जइसन मंाग ल लेके हड़ताल म जाय के घोषणा करे रीहिन।
मौसम विभाग ह प्रदेश के एक-दू जगा म भारी बरसा होय के चेतावनी देहे। मिले जानकारी के अनुसार एक ठन चक्रीय चक्रवाती घेरा पश्चिम मध्य बंगाल के खाड़ी अउ ओखर ले लगे उत्तर पश्चिम बंगाल के खाड़ी अउ उत्तर तटीय आंध्रप्रदेश अउ दक्षिण तटीय ओडिशा के उपर स्थित हे। एखर असर ले काली प्रदेश के अधिकांश जगा म हल्का ले मध्यम बरसा अउ गरज चमक के संग छींटा पड़े के संभावना हे। उंहे बस्तर संभाग के एक दू जगा म भारी ले अतिभारी बरसा हो सकत हे।
गरियाबंद जिला के वाटरफॅाल चिंगरापगार म काली संझा अचानके बाढ़ के पानी आये ले करीबन पांच सौ पर्यटक मन फस गे रीहिन। एखर सूचना मिलते साथ जिला प्रशासन के टीम ह मउका म पहंुचीस अउ रेस्क्यू अभियान शुरू करीन। ए दउरान पुलिस अउ नगर सैनिक के जवान मन ह रेस्क्यू अभियान चलाके सबो पर्यटक मन ल बाहिर निकाल लीन।
आदिम जाति अउ अनुसूचित जनजाति अउ अल्पसंख्यक विकास मंत्री मोहन मरकाम आजले अठाईस जुलाई तक सरगुजा, बिलासपुर, कोंडागंाव अउ बस्तर जिला के प्रवास म रीही। ये दउरान श्री मरकाम स्थानीय कार्यक्रम म शामिल होय के संग विभागीय कामकाज के समीक्षा करही।
निर्धारित कार्यक्रम के अनुसार श्री मरकाम काली पच्चीस जुलाई के अंबिकापुर अउ छब्बीस के बिलासपुर म विभागीय समीक्षा बइठका लीहीं।
कंागेर घाटी राष्ट्रीय उद्यान के स्थापना दिवस तीरथगढ़ म मनाये गीस। ए मउका म मुख्य वन संरक्षक मोहम्मद शहीद ह कीहिन कि कंागेर घाटी म अवइया हर पर्यटक इंहा के संुदरई म मोहा जाथे। ओमन ह लोगन ले उद्यान म प्लास्टिक के उपयोग नइ करे के अपील करीन।
उंहे राष्ट्रीय उद्यान के निदेशक धम्मशील गनवीर ह कहिन कि सबो लोगन के प्रयास ले घाटी ल विश्व मानचित्र म लाये बर दिशा मिलत हे। ये उद्यान ह प्राकृतिक सुंदरता, जैव विविधता अउ आदिवासी संस्कृति के अनूठा मेल हे, जउन ह देश अउ विदेश के पर्यटक मन ल लुभावत हे। ए मउका म राष्ट्रीय उद्यान के प्रबंधन अउ संरक्षण इको टूरिज्म म विशेष योगदान देवइया इको विकास समिति के सदस्य, जिप्सी सफारी संचालक, नेचर गाईड, मैना मित्र, मगर मित्र, पेट्रोलिंग गॉर्ड अउ मैदानी कर्मचारी मन ल सम्मानित करे गीस।
– जांजगीर चंापा जिला के शिवरीनारायण म काली अपेक्स बैंक के अध्यक्ष बैजनाथ चंद्राकर ह सहकारी बैंक के नवा शाखा के नवा भवन के लोकार्पण करीन। संगेसंग ओमन ह नवा एटीएम के शुरूआत घलो करीन।
– कोंडागांव जिला के ग्राम बफना अउ नेवता के बीच एक ठन मालवाहक गाड़ी के पलटे ले आठ झिन घायल होगे, ए सबो मन ल अस्पताल म भर्ती करे गीस।