केन्द्रीय गृह अउ सहकारिता मंत्री अमित शाह ले आज रईपुर म जनजाति समाज, अनुसूचित जाति समाज अउ सहारा इंडिया के निवेशक मन के प्रतिनिधिमंडल ह भेंट करीन अउ उंखर अभिवादन करीन। ए समाज के प्रतिनिधि मंडल ह बारा जाति मन ल जनजाति समाज अउ माहरा अउ महारा समाज ल अनुसूचित जाति समाज में सामिल करे के संगेसंग सहारा निवेशक मन बर रिफंड पोर्टल सुरू करे बर केंद्रीय गृह मंत्री के आभार जताइन।
सूचना अउ प्रसारण मंत्री अनुराग सिंह ठाकुर ह मीडिया संगठन मन ले ब्रेकिंग न्यूज के नाम ले गलत सूचना के प्रसार ले बांचे बर सावधानी बरते के आग्रह करीन। नई दिल्ली म पांचवा ओड़िसा पत्रकारिता पुरस्कार समारोह म श्री ठाकुर ह ए बात के जोर दिन कि पत्रकार आमलोगन तक सूचना ल तुरते अउ सही ढंग ले प्रसारित करे म महत्वपूर्ण भूमिका निभाथे। ओमन किहीन कि फर्जी अउ पेड न्यूज देस म दियांर असन फैलत हे। अउ कोविड महामारी के दउरान ए ह वायरस ले जादा लोगन मन के जान लेहे। श्री ठाकुर ह किहीन कि गलत सूचना बिसेस रूप ले दूर-दराज के क्षेत्र म डर के मानसिकता ल जनम देथे। जेहा टीकाकरण के प्रति लोगन मन म भय पैदा करे के काम करत हे।
राष्ट्रीय प्रसारण दिवस
आज राष्ट्रीय प्रसारण दिवस हरय। बछर उन्नीस सौ सत्ताईस म इंही दिन बाम्बे स्टेशन ले एक निजी कंपनी इंडियन ब्रॉडकॉस्टिंग कंपनी के डहार ले पहिली प्रसारण होय रिहीस। आठ जून उन्नीस सौ छत्तीस के इंडियन स्टेट ब्रॉडकॉस्टिंग सेवा ल ऑल इंडिया रेडियो नाम दे गे रिहीस। अगस्त उन्नीस सौ सैंतीस म केन्द्रीय समाचार संगठन अस्तित्व म आइस। लोकप्रिय फिल्म संगीत के विख्यात विविध भारती सेवा के सुरूआत बछर उन्नीस सौ संतावन म होइस।
सूचना अउ प्रसारण मंत्री अनुराग सिंह ठाकुर ह किहीन कि सामुदायिक रेडियो जनभागीदारी अउ जन आंदोलन म बड़का भूमिका निभा सकथे। दिल्ली म क्षेत्रीय सामुदायिक रेडियो सम्मेलन के उद्घाटन करत ओमन किहीन कि समुदाय तक सूचना के प्रसार म सामुदायिक रेडियो ह बड़का योगदान दे हे। केन्द्रीय मंत्री ह किहीन कि सामुदायिक रेडियो सेवा सुरू करे म लाईसेंस जारी करे के प्रक्रिया ल सरल बना दे गेहे। ए बेरा म केन्द्रीय मंत्री ह राष्ट्रीय सामुदायिक रेडियो पुरस्कार घलो प्रदान करीन।
उहें, सूचना प्रसारण मंत्रालय के सचिव अपूर्व चंद्रा ह किहीन कि सामुदायिक रेडियो चलइया, देस के लोगन ले जुडे़ रेहे के जरूरत ल पूरा करत हे।
मुख्यमंत्री-भेंट मुलाकात
मुख्यमंत्री भूपेस बघेल ह प्रदेश म छत्तीसगढ़ी भाषा म अध्यापक मन के भर्ती करे के घोषणा करे हे। मुख्यमंत्री ह आज रईपुर म युवा मन के संग भेंट-मुलाकात कारीकरम के बेरा राज्य म दंत चिकित्सक के दू साल ग्रामीण क्षेत्र म पदस्थ करे अउ धमतरी स्थित सासकीय कन्या महाविद्यालय म पीजी कोर्स सुरू करे के ऐलान करीन। ओमन स्वास्थ्य केन्द्र म फिजियोथेरेपिस्ट के नियुक्ति अउ फिजियोथेरेपी कालेज म छात्रावास के व्यवस्था करे के घोषणा करीन।
विस चुनाव-प्रशिक्षण कार्यक्रम
प्रदेस म होवइया विधानसभा चुनाव ल देखत जम्मों जिला के रिटर्निंग अधिकारी अउ सहायक रिटर्निंग अधिकारी मन बर रईपुर म प्रसिक्षण कार्यक्रम के आयोजन करे गीस। चार दिवसीय प्रसिक्षण भारत निर्वाचन आयोग के निर्देसन म मुख्य निर्वाचन पदाधिकारी कार्यालय डहार ले आयोजित करे गे रिहीस। छत्तीसगढ़ प्रशासन अकादमी निमोरा म आयोजित ए प्रसिक्षण म देस के आने-आने राज्य ले आए राष्ट्रीय स्तर के मास्टर ट्रेनर मन ह निर्वाचन ले जुड़े कतकोन विषय के जानकारी दीन। राज्य के मुख्य निर्वाचन पदाधिकारी रीना बाबासाहेब कंगाले ह उद्घाटन सत्र म प्रसिक्षण के महत्व के बारे म जानकारी दीन। ए बेरा राज्य भर ले आए लगभग तीस सौ अधिकारी मन ल मतदान के संगेसंग मेडिकल इमरजेंसी ले बचाव संबंधी प्रसिक्षण दे गीस।
भाजपा-संपर्क से समर्थन अभियान
केंद्र सरकार के योजना मन के प्रचार-प्रसार करे बर प्रदेस के हर विधानसभा क्षेत्र म भारतीय जनता पार्टी डहार ले ‘‘संपर्क से समर्थन अभियान‘‘ चलाय जात हे। इंही बेरा म काली राजनांदगांव जिला के डोंगरगांव विधानसभा क्षेत्र म पिछड़ा मोर्चा के प्रदेस कार्यसमिति के सदस्य डॉक्टर नीरेन्द्र साहू ह ए अभियान के सुरूआत करीन। ए दउरान करेठी अउ बड़भूम गांव म जनचौपाल लगा के आम लोगन मन ल केन्द्र सरकार के आने-आने जन कल्याणकारी योजना के बारे म जानकारी दीन।
स्मृति ईरानी-बाल देखभाल संस्थान
केन्द्रीय महिला अउ बाल विकास मंत्री स्मृति ईरानी ह आश्वासन दीन हे कि केन्द्र सरकार ओ क्षेत्र म बाल देखभाल संस्थान स्थापित करे बर सहायता उपलब्ध करही, जिहां लइका मन के खिलाफ अपराध के संख्या बढ़त जात हे अउ अतिरिक्त संस्थान नइ हे, श्रीमति ईरानी काली मुंबई म बाल संरक्षण, सुरक्षा अउ कल्याण विषय म क्षेत्रीय संगोष्ठी म ए बात ल किहीन।
दास्तान-ए-कबीर कार्यक्रम
मुख्यमंत्री भूपेश बघेल ह काली रईपुर म आयोजित ‘दास्तान-ए-कबीर‘ कार्यक्रम म सामिल होईन। ओमन संत कबीर के दास्तानगो ल पूरा सुनीन। ए बेरा म श्री बघेल ह किस्सागोई के माध्यम ले केहे सुने के परंपरा ल जोरदरहा ढंग ले लोगन मन के आघु लाय बर, कारीकरम म प्रस्तुति देवइया युवा कलाकार मन के पहल के प्रशंसा करीन।
मुख्यमंत्री ह किहीन कि कबीर ल हम सुनत आवत हन अउ सुनत हन तभो ले मन नइ भरय। श्री बघेल ह किहीन कि पुस्तक पढ़े म जे बात समझ नइ आय ओ छोटे-छोटे कहानी अउ घटना के माध्यम ले समझे जा सकथे।
दुर्ग पुलिस-कार्रवाई
दुर्ग जिला के मोहन नगर थाना क्षेत्र स्थित बाम्बे आवास म आज बिहनिया छापा मार कार्रवाई म पुलिस ह दस संदिग्ध मनखे मन ल गिरफ्तार करीन। अठ्ठारा निरीक्षक अउ लगभग ढाई सौ पुलिसकर्मी आज बिहनिया ए क्षेत्र के जम्मों इलाका ल घेर लीन अउ संदिग्ध लोगन के खिलाफ कार्रवाई सुरू करीन।
जिला के अतिरिक्त पुलिस अधीक्षक संजय ध्रुव ह बताइन कि ए कॉलोनी सहर ले दूरिहा होए के सेती इंहा के कतकोन घर म अपराधिक प्रवृत्ति के मनखे मन के रेहे के जानकारी मिले रिहीस। जेकर आधार म कार्रवाई करे गीस। जेन मन ल गिरफ्तार करे गेहे उंखर खिलाफ आने-आने थाना म वारंट अउ चोरी के मामला दर्ज हे। पुलिस के ए कार्रवाई म स्थानीय लोगन मन राहत महसूस करत हे।
स्वतंत्रता संग्राम सेनानी लोकमाण्य बालगंगाधर तिलक अउ चंद्रशेखर आजाद के आज जयंती हरय। ए बेरा म मुख्यमंत्री भूपेश बघेल ह रईपुर स्थित अपन निवास कार्यालय म ए स्वतंत्रता संग्राम सेनानी मन के छायाचित्र म श्रध्दा सुमन अर्पित करीन। मुख्यमंत्री ह स्वतंत्रता बर उंखर संघर्ष ल याद करत किहीन कि ओमन अपन जिनगी देस-प्रेम बर समर्पित कर दीन।
उहें, अविभाजीत मध्यप्रदेस के पूर्व मंत्री बिसाहू दास महंत जी के पुण्यतिथि म मुख्यमंत्री ह ओमन ल श्रध्दा-सुमन अर्पित करीन।
छत्तीसगढ़ पुलिस-लघु फिल्म
सड़क सुरक्षा अभियान के तहत अब राज्य म लघु फिल्म के माध्यम ले जन जागरूकता के परयास करे जाही। एखर बर लोगन मन ले राष्ट्रीय सड़क सुरक्षा लघु फिल्म महोत्सव के तहत लघु फिल्म बनाय बर प्रविष्ट आमंत्रित करे गेहे। छत्तीसगढ़ पुलिस के ए अभियान म लघु फिल्म मन ल अलग-अलग श्रेणी म राज्य सरकार डहार ले पुरस्कृत करे जाही। प्रतियोगिता म भाग लेवइया इच्छुक प्रतिभागी छब्बीस जुलाई तक ऑनलाइन आवेदन कर सकथे। एखर जानकारी छत्तीसगढ़ पुलिस के वेबसाइट ले ले जा सकत हे।
लघु फिल्म छत्तीसगढ़ी, गोंड़ी, हल्बी, धुर्वा के संगेसंग आने-आने स्थानीय बोली म होना चाही। फिल्म के समय सीमा दू मिनट निर्धारित करे गेहे।
– छत्तीसगढ़ राज्य अउ राज्य के बाहिर के पात्र यू-ट्यूब चैनल्स ल इम्पैनलमेंट करे बर जनसंपर्क संचालनालय ह अवइया तीन अगस्त तक ऑनलाइन आवेदन आमंत्रित करे हे।
अउ
– गरियाबंद के तीर उदंती सीतानदी टाईगर रिजर्व क्षेत्र म दुर्लभ वन्यजीव पैंगोलीन अने साल खपरी के तस्करी के मामला म वन विभाग के टीम ह ओड़िसा के दू आरोपी मन के खिलाफ कार्रवाई करे हे।