प्रधानमंत्री नरेन्द्र मोदी ह आज नवा भर्ती होवइया 70 हजार ले जादा अभ्यर्थी मन ल वीडियो कॉन्फ्रेंसिंग के जरिया नियुक्ति पत्र बांटिन। ए मउका म ओमन किहीन कि रोजगार मेला देस के युवा मन ल मजबूत करे अउ राष्ट्र के प्रगति म उंखर मन के सक्रिय भागीदारी ल प्रोत्साहित करे के एक ठिन परयास हवय। बछर 2047 तक भारत ल एक विकसित राष्ट्र बनाय के परयास म युवा मन के भूमिका बड़ महत्वपूर्ण हवय।
प्रधानमंत्री ह किहीन कि आजादी के अमृत महोत्सव के दउरान देस के विकास पथ म बढ़त एक सरकारी कर्मचारी के रूप म काम के मउका पाना बड़ गौरव अउ सम्मान के बात हे। बैंकिंग क्षेत्र के संबंध म गोठियात ओमन किहीन के आज भारत ह एक मजबूत बैंकिंग व्यवस्था वाला देस हवय वर्तमान म देस म तकरीबन 50 करोड़ जन-धन खाता खोले गे हवय। अउ ए ह हरेक बैंक कर्मी खातिर बड़ गर्व के विषय हवय। गौरतलब हवय के रोजगार मेला देस के 44 ठिन जघा मन म आयोजित करे गीस। जेखर जरिया केन्द्र अउ राज्य सरकार के विभाग मन म नवा नियुक्ति करे जावत हे।
ईडी-आईएएस गिरफ्तार
प्रवर्तन निदेशालय-ईडी ह भारतीय प्रशासनिक सेवा के अधिकारी रानू साहू ल आज गिरफ्तार कर लीन। ईडी ह ओला आज रइपुर के बिसेस अदालत म पेश करीन। जिंहा सुनवाई के दउरान ईडी ह रानू साहू के 14 दिन के रिमांड मांगीस, फेर बिसेस अदालत ह दुनों पक्ष ल सुने के बाद रानू साहू ल 25 जुलाई तक 3 दिन के रिमांड म ईडी ल सौपिन हवय। जानबा, के मुताबिक ए गिरफ्तारी ईडी डहार ले दर्ज एक ठिन नवा पी.एम.एल.ए. अउ लेवी घोटाला म करे गीस हे।
ईडी के टीम ह काली प्रदेस म 18 ठिन जघा म छापा मारे रिहीन। ईडी ह रईपुर के देवेन्द्र नगर म रानू साहू के शासकीय आवास के तलासी घलो ले रिहीन। एखर अलावा कांग्रेस नेता रामगोपाल अग्रवाल अउ कोरबा नगर-निगम आयुक्त प्रभाकर पाण्डेय के घर म घलो तलासी ले रिहीन।
अभी के बेरा म आई.ए.एस. अधिकारी रानू साहू कृषि विभाग के निदेशक हवय। ओहा कोयला घोटाला मामला म गिरफ्तार होवइया प्रदेस के दूसर आई.ए.एस. हवय। आई.ए.एस. समीर विश्नोई पहिली ही ए मामला म गिरफ्तार हो चुकीस हे। ए मामला म अब तक कांग्रेस नेता सूर्यकांत तिवारी, लक्ष्मीकांत तिवारी, कारोबारी नितिन चंद्राकर अउ राज्य प्रशासनिक सेवा अधिकारी सौम्या चौरसिया के गिरफ्तारी हो चुकीस हवय।
विधायक-इस्तीफा
जनता कांग्रेस छत्तीसगढ़ के विधायक प्रमोद शर्मा ह आज पार्टी ले अपन इस्तीफा दे दीस हवय। ओह बलौदाबाजार विधानसभा सीट के विधायक हवय। ओमन रेणु जोगी ल अपन त्याग पत्र सौंपिन। बछर 2018 ओमन पूर्व मुख्यमंत्री अजीत जोगी के पार्टी जनता कांग्रेस छत्तीसगढ़ डहार ले चुनाव लड़े रिहीन अउ जीते घलो रिहीस। अभी अमित जोगी पार्टी के अध्यक्ष हवय।
विधानसभा-अविश्वास प्रस्ताव
छत्तीसगढ़ विधानसभा म राज्य सरकार के खिलाफ विपक्ष डहार ले पेस करे गे अविश्वास प्रस्ताव ल अस्वीकृत कर दे गीस। मुख्यमंत्री भूपेश बघेल के अविश्वास प्रस्ताव म चर्चा के दउरान विपक्ष ह सदन ले बाहर चले गीस, जेखर ले मतदान नइ हो सकिस अउ आसंदी ह अविश्वास प्रस्ताव ल अस्वीकृत कर दीन।
एखर पहिली मुख्यमंत्री भूपेश बघेल ह अविश्वास प्रस्ताव के विरोध म चर्चा के दउरान जवाब म किहिन कि जब हमर सरकार बनिस त हमन ‘‘गढ़बो नवा छत्तीसगढ़‘‘ के बात करे रिहीन अउ एला साकार करे के दिसा म हमर सरकार सरलग काम बूता करत हवय। मुख्यमंत्री ह किहीन कि विपक्ष डहार ले प्रस्तुत विश्वास प्रस्ताव के मुद्दा मन म कोनो तथ्य नइ हवय। प्रजातंत्र म विपक्ष के अधिकार होथे कि ओमन अविश्वास करे। सत्ता पक्ष के पास घलो मउका होथे कि अपन बात ल रखय। श्री बघेल ह किहीन कि विपक्ष ह 109 ठिन आरोप लगाइन फेर एको ठिन तथ्य नइ दीस। मुख्यमंत्री ह किहीन कि पहिली जब अविश्वास प्रस्ताव आवत रिहीस त माओवादी समस्या उपर बात होत रिहीस फेर ए दरी माओवादी समस्या के बारे म बात नइ होइस जउन हमर सरकार के उपलब्धि हवय। ओमन किहीन कि राज्य म कांग्रेस सरकार आय के बाद किसान मन के जिनगी बदले हवय। बस्तर अउ सरगुजा म घलो परिवर्तन आय के संगेसंग माईलोगिन मन के जिनगी म बदलाव आय हवय।
केन्द्रीय गृह मंत्री-बैठक
केन्द्रीय गृह मंत्री अमित शाह, केंद्रीय स्वास्थ्य मंत्री अउ छत्तीसगढ़ चुनाव सह प्र्रभारी मनसुख मंडाविया आज रईपुर पहुंचिन। श्री शाह अवइया विधानसभा चुनाव ल लेकर भाजपा कार्यालय कुशाभाउ ठाकरे परिसर म बइठका लेवत हवय। बइठका म भाजपा के प्रदेस प्रभारी ओम माथुर अउ सह प्रभारी नितिन नबीन घलो उपस्थित हवयं।
जी.पी. सिंह-अनिवार्य सेवानिवृत्ति
भारतीय पुलिस सेवा के अधिकारी जी.पी.सिंह ल केन्द्र सरकार ह अनिवार्य सेवानिवृत्ति दे दीस हवय। आय ले जादा संपत्ति राखे के मामला म पाछू तकरीबन दू बछर ले जी.पी.सिंह निलंबित रिहीस। 1994 बैच के अधिकारी श्री सिंह पहिली, राज्य के एंटी करप्शन ब्यूरो के अतिरिक्त महानिदेशक रिहीन। ओ ह रईपुर संभाग के महानिरीक्षक के पद म घलो कार्य करे रिहीन।
जानबा के मुताबिक आई.पी.एस.-जी.पी.सिंह के खिलाफ आय ले जादा संपत्ति मामला म ई.ओ.डब्ल्यू. म दर्ज करे गे हवय उहें, रईपुर के कोतवाली पुलिस ह ओकर खिलाफ राजद्रोह के मामला घलो दर्ज करीस हवय। राज्य सरकार डहार ले जी.पी.िंसंह ल बर्खास्त करे बर प्रस्ताव भेजे गे रिहीस जेखर बाद केन्द्र सरकार उनला अनिवार्य सेवानिवृत्ति दे दीस हवय।
विधानसभा-अलंकरण समारोह
छत्तीसगढ़ विधानसभा म आज उत्कृष्टता अलंकरण अउ विदाई समारोह के आयोजन करे गीस। राज्यपाल विश्वभूषण हरिचंदन ह समारोह म बछर 2022 खातिर उत्कृष्ट विधायक के रूप म संगीता सिन्हा अउ रंजना डिपेन्द्र साहू ल सम्मानित करीन। उहें जागरूक विधायक के रूप म धर्मजीत सिंह ल सम्मानित करे गीस। कारीकरम म उत्कृष्ट संसदीय पत्रकार के रूप म राहूल जैन, इलेक्ट्रानिक मीडिया ले देवव्रत भगत अउ कैमरा मैन रोहित श्रीवास्तव ल साल , श्रीफल, स्मृति चिन्ह अउ प्रशस्ति पत्र लेकर सम्मानित करे गीस।
आईटीआई आधुनिकीकरण-एमओयू
राज्य के 36 ठिन शासकीय आईटीआई के आधुनिकीकरण खातिर तकनीकी शिक्षा एवं कौसल विकास विभाग तथा टाटा टेक्नोलॉजिस के बीच एमओयू म आज हस्ताक्षर करे गीस। मुख्यमंत्री भूपेश बघेल के उपस्थिति म आज विधानसभा परिसर के कार्यालय कक्ष म आयोजित कार्यक्रम म तकरीबन 1 हजार 1सौ 88 करोड़ 36 लाख रूपिया के परियोजना म हस्ताक्षर होइस।
जानबा के मुताबिक ए परियोजना म राज्य के 36 आईटीआई म युवा मन ल – 6 ठिन नवा ट्रेड म अउ 23 शॉर्ट टर्म कोर्स म प्रशिक्षण दे जाही। ए परियोजना ले हर बछर 10 हजार ले जादा युवा मन ल नवा जमाना के तकनीकी प्रशिक्षण मिलही।
आवव अब जानथन मउसम के हाल
मउसम विभाग ह राजनांदगांव, दंतेवाड़ा, सुकमा, कांकेर, बीजापुर अउ नारायणपुर जिला म यलो अलर्ट जारी कर दीन हवय। ए जिला मन म अवइया 24 घंटा के दउरान एक-दू जघा मन म मध्यम ले भारी बरसा होय के संभावना हवय। उहें, प्रदेस के कुछू जघा मन म अवइया 24 घंटा के दउरान हल्का ले मध्यम बरसा होय के अउ गरज-चमक के संग छींटा पड़े के संभावना हवय।