प्राथमिक कृषि ऋण समिति
प्राथमिक कृषि ऋण समिति आज ले देशभर म सार्वजनिक सेवा केंद्र ले दे जात सेवा प्रदान करही। ये जानकारी केंद्रीय सहकारिता मंत्री अमित शाह ह आज नई दिल्ली के विज्ञान भवन म ए सेवा मनके औपचारिक उद्घाटन करत दीन। एखर तहत प्राथमिक कृषि ऋण समिति बैंकिंग, बीमा, आधार पंजीकरण, स्वास्थ्य सेवा, विधि सेवा, प्रधानमंत्री कल्याण योजना जइसे तीन सौ से जादा सेवा के संचालन करही। देशभर म तेरह करोड़ किसान समेत ग्रामीण नागरिक मन ल ए सेवा के लाभ पहुंचही।
प्राथमिक कृषि ऋण समिति के जरिया सार्वजनिक सेवा केंद्र के सेवा मनके वितरण के बारे म राष्ट्रीय सेमीनार के उद्घाटन करत अमित शाह ह बताइन कि वर्तमान म एक लाख समिति म ले सतरा हजार प्राथमिक कृषि ऋण समिति पहिली ले ये सेवा देवत हे।
ईडी-छापा
प्रवर्तन निदेशालय-ईडी ह आज रायपुर, बिलासपुर अउ कोरबा म कारोबारी अउ अधिकारी मनके घर म छापामार कार्रवाई करीन। रायपुर देवेन्द्र नगर स्थित आईएएस अधिकारी रानू साहू उंखर पति जे.पी. मौर्या के घर म ईडी के जांच अउ कार्रवाई चलत हे। उंहें, कांग्रेस नेता राम गोपाल अग्रवाल के घर म घलो ईडी के टीम जांच पड़ताल करत हे।
ओति, कोरबा म निगम कमिश्नर प्रभाकर पांडेय के घर म घलो ईडी के टीम पहुंचे हे, जिहां दस्तावेज मनके जांच करे जावत हे। ईडी के टीम के संग सीआरपीएफ के जवान घलो अफसर के घर के बाहिर तैनात करे गेहे।
आईएएस कॉन्क्लेव
काली ले राजधानी रायपुर म तीन दिन के आईएएस कॉन्क्लेव के आयोजन करे जाही। एमा प्रदेशभर के सबो आईएएस अधिकारी सामिल होहीं। कार्यक्रम के आखरी दिन मुख्य अतिथि के रूप म मुख्यमंत्री भूपेश बघेल सामिल होही।
सोशल मीडिया-फेक न्यूज कार्रवाई
अब सोशल मीडिया फेक न्यूज, हेट स्पीच अउ अफवाह फैलाये वाला पोस्ट उपर पुलिस डहार ले कड़ा कार्रवाई करे जाही। ए संबंध म पुलिस मुख्यालय ह जम्मों जिला के पुलिस अधीक्षक मन ल दिशा-निर्देश जारी करके सोशल मीडिया के मॉनिटरिंग के निर्देश देहे।
एखरे संग आपत्तिजनक पोस्ट के सूचना देवइया मनके पहचान गोपनीय राखे के विशेष हिदायत दे गेहे। पुलिस मुख्यालय डहार ले जारी पत्र म केहे गेहे कि वर्तमान म सोशल मीडिया के समाज म बड़का प्रभाव हे। कई ठिन प्रकरण म सोशल मीडिया म प्रचारित अफवाह या आपत्तिजनक पोस्ट के सेती कानून व्यवस्था के विपरीत परिस्थिति घलो बने हुए हे। एखरे सेती शांति व्यवस्था बनाये राखे बर सोशल मीडिया के सरलग मॉनिटरिंग जरूरी हे। पत्र म केहे गेहे कि सोशल मीडिया म आपत्तिजनक पोस्ट करइया मनके खिलाफ कानून के तहत कड़ा कार्रवाई करे जाही।
टॉपर्स टॉक
जिला प्रशासन डहार ले प्रतियोगी परीक्षा के तियारी करइया युवा मनके मार्गदर्शन बर आज राजधानी रायपुर स्थित पंडित दीनदयाल उपाध्याय ऑडिटोरियम म टॉपर्स टॉक के आयोजन करे गीस। कार्यक्रम के दउरान यूपीएससी के सिविल सर्विस परीक्षा म उत्कृष्ट स्थान पाने वाला युवा मन स्थानीय प्रतिभागी मन ल सफलता बर मार्गदर्शन दीन।
टॉपर्स टॉक म यूपीएससी दू हजार बाईस सिविल सेवा परीक्षा के टॉपर ईशिता किशोर ह अपन अनुभव साझा करीन। ओमन कीहिन कि प्रतियोगी परीक्षा बर खुद के अनुशासन सबले जादा जरूरी हरय। ओमन बताइन कि पहिली दू प्रयास म ओमन असफल रीहिन, फेर अपन गलती ल ढूंढके ओला सुधार के लगातार तियारी करीन। ईशिता ह कीहिन कि हमन जउन निर्णय ले लेहन ओला करनाच हे अउ ओमा अपन सौ प्रतिशत देनाच हे।
उंहे यूपीएससी के परीक्षा म ऑल इंडिया सेंकड रैंक के गरिमा लोहिया ह बताइन कि छोटे बड़े शहर के प्रतियोगी परीक्षा के तियारी म कोनो फरक नइ पड़य। ओमन बताइन कि बक्सर जइसे छोटे शहर म रहिके ओमन तियारी करीन अउ सफल होइन।
कार्यक्रम म बछर दू हजार बाईस के परीक्षा म सतरहवां रैंक पवइया अविनाश कुमार, छत्तीसगढ़ ले सर्वोच्च रैंक पाने वाला अभिषेक चतुर्वेदी अउ साल दू हजार इक्कीस के परीक्षा म भारतीय प्रशासनिक सेवा म चयनित प्रखर चंद्राकर ह घलो प्रतिभागी युवा मन संग अपन अनुभव साझा करीन।
कार्यक्रम के दउरान कलेक्टर, डॅाक्टर सर्वेश्वर नरेंद्र भूरे ह कीहिन कि टॉक के उद्देश्य छत्तीसगढ़ ले जादा ले जादा प्रतिभागी मन ल प्रतियोगी परीक्षा बर प्रेरित करना अउ ओमन के जादा ले जादा सहभागिता सुनिश्चित करना हे। उंहे आईपीएस प्रशांत अग्रवाल ह कहिन कि यूपीएससी परीक्षा बर लगन अउ समर्पण करे जरूरत हे ।
विस-अविश्वास प्रस्ताव
छत्तीसगढ़ विधानसभा के मानसून सत्र के चौथा अउ आखरी दिन आज विपक्ष डहार ले सरकार के खिलाफ पेस अविश्वास प्रस्ताव उपर सदन म चर्चा होवत हे। भाजपा के वरिष्ठ विधायक बृजमोहन अग्रवाल ह अविश्वास प्रस्ताव म चर्चा के शुरूआत करीन। चर्चा के शुरूआतेच म अनुसूचित जाति जनजाति के युवा मन डहार ले हाले म करे गे प्रदर्शन ल लेके जोरदार हंगामा होइस। बृजमोहन अग्रवाल ह कहिन कि जउन सरकार म अपन मांग ल लेके लोगन मन ल निर्वस्त्र होके प्रदर्शन करना पढ़थे, वइसे सरकार के खिलाफ अविश्वास प्रस्ताव लाये के अलावा अउ कोनो रास्ता नइ बचय।
एमा कांग्रेस विधायक धनेन्द्र साहू ह कहिन कि भाजपा विधायक जउन नौजवान मनके नग्न प्रदर्शन के बात कहत हे ओमन के चरित्र उजागर होगे हे। एखर बाद दूनो पक्ष म लगातार हंगामा होय लगीस।
चर्चा के दौरान मंत्री रविंद्र चौबे ह कहिन कि दिल्ली पहलवान मन संग अउ मणिपुर म महिला मन संग होय घटना ल लेके विपक्ष ल घेरे के कोसिस करे गीस, जेखर बाद पक्ष अउ विपक्ष म नोंकझोंक शुरू होगे।
राज्यपाल-बैठक
राज्यपाल विश्वभूषण हरिचंदन पच्चीस जुलाई के राज्य के जम्मों शासकीय विश्वविद्यालय अउ छब्बीस जुलाई के राज्य के निजी विश्वविद्यालय मनके शैक्षणिक गतिविधि, अनुसंधान कार्य अउ दूसर काम के समीक्षा करहीं। बइठका म उच्च शिक्षा विभाग के वरिष्ठ अधिकारी, सबो शासकीय अउ निजी विश्वविद्यालय के कुलपति मौजूद रीहीं।
उंहे राज्यपाल श्री हरिचंदन छब्बीस जुलाई के ही राजधानी रायपुर स्थित केंद्रीय शासनके विभाग प्रमुख अउ संस्था प्रमुख मनके घलो बइठका लीहीं। ए दौरान उंखर विभाग डहार ले संचालित योजना मनके प्रगति के समीक्षा करे जाही।
मलेरिया मौत
गरियाबंद जिला के गोबरा गांव म मलेरिया ले दू लईका मनके मउत होगे, उंहे पांच झिन दूसर मनखे मन मलेरिया ले संक्रमित पाय गेहे। बीएमओ गजेंद्र ध्रुव ह एखर पुष्टि करत बताइन कि गांव म स्वास्थ्य विभाग के टीम शिविर लगाके दूसर ग्रामीण मनके मलेरिया जांच करत हे। उंहे संक्रमित मनके इलाज करे जात हे।
बारिश
प्रदेश के कई जिला मन म पाछू दू दिन ले होय बारिश के सेती नदिया नाला उफान म हे। राजनांदगांव के आने आने बैराज म सरलग बाढ़त जलस्तर ल देखत शिवनाथ नदी म पानी छोड़े जात हे। जल संसाधन विभाग ले मिले जानकारी के अनुसार सूखा नाला बैराज ले छै सौ, घुमरिया नाला ले एक सौ पच्चीस अउ खातुटोला बैराज ले तीन सौ पच्चीस क्यूसेक पानी छोड़े जात हे। एखर सेती शिवनाथ नदी म जलस्तर सरलग बाढ़त हे। उंहे मुनादी करवाके लोगन मनल नदी के बहाव क्षेत्र म नइ जाय के सलाह दे जात हे।
इही जिला के गांव तुमड़ीबोड़ म आज गाज के चपेट म आय ले एक युवक के मउत होगे। बताये जात हे कि तीन झिन युवक गांव के एक नर्सरी म मछरी पकड़े बर गे रीहिन, इही बेरा गाज गिरगे।
उंहे कोरबा जिला के हंसदेव बांगो बांध के तीन ठिन गेट आज खोल दे गेहे। ए बांध ले दू हजार छै सौ क्यूसेक पानी छोड़े जात हे।
इही जिला के लेमरू थाना क्षेत्र स्थित देवपहरी जलप्रपात म घूमे बर गे रीहिन तीन झिन मनखे अचानक पानी के बहाव तेज होय ले फंस गीन। जांजगीर चांपा निवासी ए तीन मनखे मनले एक झिनके बोहाय के सूचना मिलत हे। मिले जानकारी अनुसार स्थानीय ग्रामीण मनके मदद ले बचाव के प्रयास करे जात हे।
माओवादी आत्मसमर्पण
सुकमा जिला म आज तीन झिन माओवादी मन ह पुलिस के आगू आत्मसमर्पण करे हे। पुलिस अधीक्षक किरण चव्हाण ह बताइन कि एसजीएस डिप्टी कमांडर मड़कम हूॅंगा उर्फ लोकेश झीरम घाटी हमला म शामिल रीहिस। उंहे दू झिन दूसर आत्मसमर्पित माओवादी मन उपर एक-एक लाख रूपिया के इनाम घोषित रीहिस।
बातों-बातों में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत छत्तीसगढ़ से पद्मश्री पुरस्कार के लिए चयनित जानी-मानी पंडवानी गायिका उषा बारले से भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली अठाईस जनवरी के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।