प्रदेस के उचित मूल्य दुकान म करीबन इंक्यावन सौ करोड़ रूपिया के घोटाला के आरोप लगावत भाजपा विधायक मन ह आज विधानसभा के मानूसन सत्र के बेरा सदन ले बहिर्गमन कर दीन। प्रदेस के पूर्व मुख्यमंत्री अउ भाजपा विधायक डॉक्टर रमन सिंह ह ए सवाल पूछे रिहीन। फेर आज उंखर अनुपस्थिति म भाजपा के एक आने विधायक सौरभ सिंह ह सदन म ए प्रश्न पूछीन। एमा राज्य सरकार ले ए जानकारी मांगे गे रिहीस कि राज्य के एक लाख तैंतीस हजार ले जादा उचित मूल्य म दुकान म कतका गड़बड़ी पाय गीस। मार्च दू हजार तेईस के रिपोर्ट आय के बाद जिम्मेवार अधिकारी मनके खिलाफ का कार्रवाई करे गीस। ए बिसय म डॉक्टर रमन सिंह छत्तीसगढ़ न्यायालय ल घलो पत्र लिखे रिहीस। विभागीय मंत्री ह बतईन कि ए मामला के जांच बर केन्द्र ले एक टीम आय रिहीस। फेर, ओ टीम ह अपन जांच म सिकईत ल निराधार पईस। मंत्री के जुवाब के बाद सदन म हंगामा होय लगीस। एखर बाद विपक्ष ह राज्य सरकार उपर घोटाला के आरोप लगावत सदन ले बहिर्गमन कर दीन।
उहें, आज नांदघाट रद्दा बनाय म कथित गड़बड़ी अउ रईपुर नगर निगम ल आने-आने मद ले मिले रकम ल बउरे के मुद्दा जोर-सोर ले उठाय गीस। भाजपा विधायक बृजमोहन अग्रवाल ह आरोप लगईन कि राजधानी के आधा ले जादा रद्दा के हालत जर्जर होगे हे।
आज सदन म प्रश्नकाल के बेरा भाजपा विधायक शिवरतन शर्मा ह बलौदाबाजार ले नांदघाट तक रद्दा बनाय म कथित गड़बड़ी के मुद्दा उठईन। एखर जुवाब म लोक निर्माण मंत्री ताम्रध्वज साहू ह किहीन कि केन्द्रीय सड़क अनुसंधान के रिपोर्ट म काखरो उपर कार्रवाई के निरदेस नइ दे गेहे।
विस-अनपूरक बजट
छत्तीसगढ़ विधानसभा म चालू वित्तीय बछर बर करीबन छह हजार बत्तीस करोड़ रूपिया के पहली अनुपूरक बजट काली चर्चा के बाद पारित होगे। ए अनुपूरक बजट ल मिलाके राज्य के वार्षिक बजट अब एक लाख सत्ताईस हजार पांच सौ बत्तीस करोड़ रूपिया के होगे हे। मुख्यमंत्री ह पहिली अनुपूरक बजट ल प्रस्तुत करे के बेरा सदन म बोलत किहीन कि चालू खरीफ मौसम के सुरूवाती दिन म कमती बरसा ह किसान मनके संसो ल बढ़ा दे रिहीस। फेर अभी बने बरसा होवत हे। एखर सेती एसो बने फसल होय के संभावना हरय। मुख्यमंत्री ह किहीन कि प्रदेस के सबो मध्यम अउ बड़े बांध म दू तिहाई जलभराव होगे हे। ओमन किहीन कि ए पहिली अनुपूरक बजट म राजस्व, गृह, ऊर्जा, लोक स्वास्थ्य परिवार कल्याण, लोक निर्माण विभाग अउ ग्रामीण आवास समेत आने-आने मद म अतिरिक्त राशि के प्रावधान करे गेहे।
सीएम-घोषणा प्रतिक्रिया
राज्य सरकार कोति ले काली विधानसभा म पेस करे गे अनुपूरक बजट म करे गे घोसना म मुख्य विपक्षी दल भाजपा ह प्रतिक्रया जताय हे। पार्टी के राष्ट्रीय उपाध्यक्ष अउ प्रदेस के पूर्व मुख्यमंत्री डॉक्टर रमन सिंह ह किहीन कि राज्य सरकार ह पाछु करीबन साढ़े चार बछर म अपन चुनावी घोषणा पत्र के कतकोन वादा ल पूरा नइ करे हे। एखर सेती अनुपूरक बजट म आने-आने वरग ल बहलाय-फुसलाय के परयास करे गेहे। ओमन किहीन कि राज्य सरकार ह महंगाई भत्ता ल बढ़ा देहे। फेर एरियर्स के भुगतान अभी तक नइ करे हे। ओमन राज्य संविदा कर्मचारी मन ल नियमित नइ करे जाय बर राज्य सरकार आलोचना करत किहीन कि ए कर्मचारी मनके वेतन म मामूली बढ़वार करे गेहे।
उहें, प्रदेस के नेता प्रतिपक्ष नारायण चंदेल ह अनुपूरक बजट म अपन प्रतिक्रिया म किहीन कि कांग्रेस ह अपन चुनावी घोसना पत्र म दैनिक वेतनभोगी मन ल नियमित करे के बात केहे रिहीन। फेर अभी तक ए संबंध म कोनों किसम के फइसला नइ ले गेहे।
जल जीवन मिशन-कार्रवाई
प्रदेस म जल जीवन मिशन के काम के गुणवत्ता म कमी पाय अउ निविदा म होय गड़बड़ी म राज्य सरकार कठोर कार्रवाई करे के निरदेस दीन हे। मुख्यमंत्री ह किहीन कि जल जीवन मिशन के काम म कोनों भी किसम के गड़बड़ी पाय म तुरते कार्रवाई करे जाय।
रेडक्रास सोसायटी बैठक
राष्ट्रपति द्रौपदी मुर्मू के अगुवई म भारतीय रेडक्रॉस सोसायटी के बइठका नई दिल्ली म होइस। एमा जम्मों राज्य के राज्यपाल अउ रेडक्रॉस समिति के पदाधिकारी सामिल होइन। छत्तीसगढ़ के राज्यपाल विश्वभूषण हरिचंदन, चेयरमैन अशोक अग्रवाल अउ सीईओ एम.के राउत ह घलो ए बइठका म भाग लीन। बइठका म रेडक्रॉस सोसायटी के पाछु बछर के लेखाजोखा बताय गीस अउ बने प्रदर्सन करइया रेडक्रॉस समिति, रेडक्रास स्वयंसेवक मन ल सम्मानित करे गीस। बइठका के बाद छत्तीसगढ़ रेडक्रॉस के पदाधिकारी मन ह केन्द्रीय स्वास्थ्य मंत्री मनसुख मांडविया ले भेंट करके ओमन ल छत्तीसगढ़ रेडक्रॉस समिति के संबंध म जानकारी दीन।
बारिश
बस्तर संभाग के आने-आने जिला म होवत सरलग बरसा के सेती जनजीवन अस्त-व्यस्त होगे हे। बीजापुर अउ सुकमा जिला के नंदियां-नरवा म जलस्तर बाढ़े ले अवई-जवई यातायात म मुश्किल होवत हे। उहें, पड़ोसी राज्य तेलंगाना, ओड़िशा अउ महाराष्ट्र ले लगे छत्तीसगढ़ के कतकोन क्षेत्र म जनजीवन प्रभावित होय हे। पाछु चौबीस घंटा म तेलंगाना म गोदावरी नंदियां के जलस्तर दस फीट तक बाढ़े हे। आज नंदियां के जलस्तर तिरालीस फीट तक पहुंचे के आसंका जताय गेहे। एखर सेती नंदियां के डुबान क्षेत्र म रहवइया लोगन ल सुरक्षित जघा म अमराय के काम सुरू होगे हे। गोदावरी नंदियां के बाढ़त जलस्तर के सेती दंतेवाड़ा अउ सुकमा जिला म सबरी नंदियां के जलस्तर बाढ़ सकत हे। एला देखत कोंटा क्षेत्र म प्रसासन ह राहत अउ बचाव दल ल मुस्तैद कर देहे।
बीजापुर जिला म घलो दू दिन होवत सरलग बरसा के सेती भोपाल-पट्टनम तारलागुड़ा राष्ट्रीय राजमार्ग म रामपुरम पुल तीर अवई-जवई रूक गेहे। पुल के दूनों कोति गाड़ी के लाइन लगे हे, जेमा यात्री मन फंसे हे। एखर मनके मदद खातिर बीजापुर जिला प्रशासन अउ तेलंगाना सरकार के अधिकारी सरलग परयास करत हे। राहत दल के करमचारी मन ह प्रभावित यात्री मन बर देपला आश्रम म खाय-पीये के व्यवस्था करे हे। उहें, बरसा म फंसे गाड़ी मन ल ट्रेक्टर के मदद ले बाहिर निकाले जात हे।
ओति, राजनांदगांव जिला म घलो सरलग बरसा के सेती नंदिया-नरवां उफान म हवय। जिला के घुमरिया नंदियां के एनीकट म नहाय बर गे एक मनखे बोहा गे रिहीस। गोताखोर मन ह काली ए मनखे के सव बरामद करे हे। ए घटना के बाद जिला प्रशासन ह मुनादी कराके लोगन ल नंदियां-नरवा के बहाव वाले क्षेत्र म नइ जाय के सलाह देहे।
इही बीच, जिला के मोंगरा बैराज अउ आने जलाशय ले पानी छोड़े जात हे, जेखर सेती शिवनाथ नंदिया के जल स्तर बाढ़त हे। एला देखत नंदियां के तीर-तखार के क्षेत्र म जिला राहत दल के सदस्य सरलग गश्त करत हे। कलेक्टर डोमन सिंह ह विभागीय अधिकारी मनके बइठका लेके बाढ़ के स्थिति के समीक्षा करीन।
मुख्यमंत्री-युवा संवाद
मुख्यमंत्री भूपेश बघेल के युवा मन ले भेंट-मुलाकात के कारीकरम इतवार तेईस जुलाई के रईपुर म प्रस्तावित हवय। ए दउरान मुख्यमंत्री ह रईपुर संभाग के सबो जिला ले अवइया युवा अउ महाविद्यालय के पढ़ईया लइका मनके संगेसंग मितान क्लब के सदस्य अउ प्रतियोगी परीक्षा के तियारी करत प्रतिभागी मन ले गोठबात करही। श्री बघेल ए कारीकरम ले ‘‘मेरे सपनों का नवा छत्तीसगढ‘‘ गढ़े बर युवा मन ले सुझाव लीहीं। ए बेरा म प्रतिभागी मन कोति ले पूछे गे सवाल के जुवाब मुख्यमंत्री ह घलो दीही। ए आयोजन बर बूढ़ापारा इंडोर स्टेडियम म जरूरी तैयारी करे जात हे। एखर बर रईपुर कलेक्टर डॉक्टर सर्वेश्वर नरेन्द्र भूरे ह जिला के प्रमुख अधिकारी मन संग काली बइठका लेके तियारी के समीक्षा करीन।
देवभोग-हाथी
ओड़िशा के कालाहांडी वन क्षेत्र म घुमत सात ठन हाथी के झुंड ले बिछड़े एक नान्हें हाथी आज गरियाबंद जिला के देवभोग बस्ती म आ गे। देवभोग के रेंजन छबिलाल धु्रव ह बतईन कि लोगन ल ऐहतियात खातिर हाथी ले दुरिहा रेहे के सलाह दे गेहे। उहें, देवभोग क्षेत्र के सबो पंचायत म हाईअलर्ट जारी करे गेहे।
ट्रेन-परिचालन
रेल यात्री मनके सुभीता ल देखत रेलवे प्रशासन कोति ले गाड़ी कोरबा-विशाखापट्टनम लिंक एक्सप्रेस आज ले सम्बलपुर रेलमंडल के आमबोदला स्टेसन म रूकही। रेलवे प्रशासन के मुताबिक अभी एला छह महीना बर करे गेहे।
उहें, बिहार म समस्तीपुर रेलमंडल के किशनपुर अउ रामभद्रपुर स्टेसन के बीच रेललाइन के दोहरीकरण के सेती तेईस ले पच्चीस जुलाई तक बिलासपुर ले होके जवइया सिंकदराबाद-रक्सौल एक्सप्रेस अउ दरभंगा-सिकंदराबाद एक्सप्रेस ल आने रद्दा ले चलाय जाही।