अभी मिले जानकारी के मुताबिक विधानसभा म आज मुख्यमंत्री ह कतकेन घोषणा करीन हे। राज्य के करीबन पांच लाख शासकीय सेवक मन ल चार प्रतिशत अतिरिक्त महंगाई भत्ता दे जाही। उंहे संविदा वेतन म काम करत सैंतीस हजार कर्मचारी मन ल कर्मचारियो के वेतन म सत्ताईस प्रतिशत के बढ़ोत्तरी करे जाही। एखर अलावा स्कूल शिक्षा विभाग म काम करत अतिथि शिक्षक मन ल प्रति माह दू हजार रूपिया अतिरिक्त मानदेय दे जाही।
पटवारी मन ल घलो हर महीना पांच सौ रूपिया के संसाधन भत्ता दे जाही। एखर अलावा मुख्यमंत्री ह शासकीय विभाग मन म काम करत अकुशल, अर्धकुशल, कुशल अउ उच्च कुशल दर के कर्मचारी मन ल चार हजार रूपिया मासिक के श्रम सम्मान राशि दे जाय के घलो घोषणा करीन हे।
विस-अविश्वास प्रस्ताव
छत्तीसगढ़ विधानसभा म मानसून सत्र के दूसर दिन आज मुख्यमंत्री भूपेश बघेल ह सदन म अनुपूरक बजट पेस करीन। ये अनुपूरक बजट करीबन छै हजार इकतीस करोड़ रूपिया के हे।
बजट पेस होय के बाद भाजपा के बृजमोहन अग्रवाल ह ए गोठ उपर आपत्ति जताइन कि सदस्य मन ल बजट के प्रति नइ मिले हे एखरे सेती एमा तुरते चर्चा कैसे हो सकही। विपक्ष ह एखर उपर सवाल उठाइस। एखर बाद विधानसभा अध्यक्ष ह सदन के कार्यवाही दस मिनट बर स्थगित कर दीस ताकि सदस्य मन ह अनुपूक बजट के प्रति ले लेवंय।
एखर बाद सदन म अनुपूरक बजट उपर चर्चा होइस एमा सत्ता पक्ष अउ विपक्ष के कतकोन सदस्य मन भाग लीन।
एखर पहिली सदन म मुख्य विपक्षी दल भाजपा ह सरकार के खिलाफ ह अविश्वास प्रस्ताव लाइस, जेला आसंदी ह स्वीकार करत हुए एखर उपर चर्चा के ेअनुमति दे देहे। अब ए सत्र म अविश्वास प्रस्ताव उपर काली चर्चा होही।
विस-बेरोजगारी भत्ता
छत्तीसगढ़ विधानसभा के मानसून सत्र के दूसर दिन आज सदन म बेरोजगारी भत्ता के मुद्दा उठीस । बेरोजगारी भत्ता ल लेके भाजपा विधायक अजय चंद्राकर ह रोजगार कार्यालय म पंजीयन के योग्यता के संबंध म जानकारी मांगीन। एखरे संग ओमन ह आरोप लगाइन कि राज्य सरकार ह दावा करथे कि ओ ह कतकोन लोगन मन ल रोजगार देहे। फेर बेरोजगारी के आंकड़ा जुटाय वाले संस्था ह एखर ले अलग आंकड़ा देथे।
श्री चंद्राकर ह प्रदेश म बेरोजगारी भत्ता देबर बनाय गे नियम अउ शर्त के जानकारी मांगीन। एखर जवाब म उच्च शिक्षा मंत्री उमेश पटेल ह बताइन कि एसो बीस जून तक एक लाख बहत्तर हजार ले जादा जवान लईका मन ल बेरोजगारी भत्ता बर पंजीयन कराइन। एमा ले लगभग एक लाख पंद्रह हजार पात्र होय हे, जबकि तैंतीस हजार पांच सौ झिन अपात्र पाय गेहे। एखर उपर विधायक चंद्राकर ह पूछिन कि बिना कोनो ल नौकरी दे तैंतीस हजार ले जादा मन अपात्र कैसे होगे।
इही बीच विधायक शिवरतन शर्मा ह कहिन कि राज्य सरकार प्रदेश के बेरोजगार युवा मन ल गुमराह करीन हे। नेता प्रतिपक्ष नारायण चंदेल ह बेरोजगारी भत्ता ल लेके सरलग मापदंड बदले के आरोप लगाय हे। एखर बाद मंत्री उमेश पटेल के जवाब ले असंतुष्ट भाजपा विधायक ह सदन म जमके हंगामा करीन।
विस-शराब घोटाला
छत्तीसगढ़ विधानसभा म आज शराब घोटाला के मामला म सत्तापक्ष अउ विपक्ष के बीच जोरदरहा बहस होइस। गोठ के शुरूआत करत भाजपा विधायक शिवरतन शर्मा ह जानना चाहिन कि विशेष आबकारी शुल्क म कतका पइसा मिले हे। उंहे गौठान, शिक्षा अउ स्वास्थ्य बर एमा ले कतका पइसा संबंधित विभाग ल भेजे गेहे। ए सवाल के जवाब म आबकारी मंत्री कवासी लखमा ह बताइन कि एक हजार उनसठ करोड़ रूपिया गौठान अउ शिक्षा विभाग ल पांच सौ अंठावन करोड़ रूपिया दे गेहे। जेमा विपक्ष ह आरोप लगाइस कि पइसा विभाग ल नइ दे गेहे। बल्कि ओखर दुरूपयोग करे गेहे।
इही बीच नेता प्रतिपक्ष नारायण चंदेल ह जहरीला शराब ले होत मौत उपर राज्य सरकार ल घेरे के कोसिस करीन। ओमन ह कहिन कि जिहां जहरीला शराब पीये ले मउत होय हे। उंहे शराब के कोनो अधिकृत दुकान ही नइ रीहिस।
विस-नग्न प्रदर्शन मामला
छत्तीसगढ़ विधानसभा म आज भाजपा ह फर्जी जाति प्रमाण पत्र ले नौकरी पाये वाले मन उपर कार्रवाई करे के मांग ल लेके सदन म जोरदरहा हंगामा करीन। विपक्ष के सदस्य मन ह अनुसूचित जाति अउ अनुसूचित जनजाति समुदाय के जवान लईका मन डहार ले काली विधानसभा रद्दा म करे गे नग्न विरोध प्रदर्शन ल राज्य सरकार शर्मनाक बताइन अउ प्रदर्शन करइया मन ल गिरप्तार करे उपर सवाल उठात ओमन ल तुरते छोड़े के मांग करीन।
इही बीच विपक्ष ह एखर उपर स्थगन प्रस्ताव लाके चर्चा कराय के मांग करीन, जेला विधानसभा अध्यक्ष ह अस्वीकार कर दीन। एखर बाद विपक्षी सदस्य मन ह नाराबाजी करत गर्भगृह म चल दीन। जेखर बाद विपक्षी सदस्य मन खुदेच निलंबित होगे।
बारिश
प्रदेश के सुकमा, बीजापुर समेत कतकोन जिला म पाछू चौबीस घंटा ले सरलग होवत बरसा के सेती लोगन मन ल बड़का परेसानी होवत हे। उंहे कतकोन नदिया नाला ह उफान म हवय, जेखर चलत आय-जाय म परसानी होय के समाचार मिले हे।
सुकमा जिला म सरलग होत बरसा के सेती दोरनापाल ले जगरगुण्डा जाय वाले रद्दा म मुकरम नाला म पुलिया के उपर ले पानी बोहात हे। उंहे सबरी नदी के जलस्तर ह घलो बाढ़ गेहे। संगेसंग छिंदगढ़-रेड्डीपाल के बीच फूल नदी के पानी ह घलो पुलिया के उपर आगे हे। नदी-नाला के बाढ़त जलस्तर ल देखत कलेक्टर हरिश एस. अउ पुलिस अधीक्षक किरण चौहान ह कोंटा इलाका म पुलिस अउ प्रशासनिक अमला ल स्थिति उपर नजर राखे बर कीहिन हे। संगेसंग लोगन ले अपील करे गेहे कि ओमन ह उफनत नदी-नाला ल पार झन करय।
उंहे बीजापुर जिला म घलो भारी बरसा के सेती कलेक्टर राजेंद्र कुमार कटारा ह जिला के सबो स्कूल अउ आंगनबाड़ी केंद्र म आज एक दिन के छुट्टी दे रीहिन। ओति राजनांदगांव जिला म घलो सरलग होत बारिश ले अइसने हाल बने हे। जेला देखत हुए जिला के मोंगरा, घुमरिया अउ सूखा नाला बैराज ले अभी के बेरा म लगभग सतरा हजार क्यूसेक पानी ल शिवनाथ नदी म छोड़े जात हे।
इही बीच मौसम विभाग ह अवइया बारा घंटा के भीतरी दंतेवाड़ा अउ बीजापुर जिला बर रेड अलर्ट जारी करत हुए एक-दू ठिन जगा म भारी बरसा होय के चेतावनी दीन हे। उंहे सुकमा के संगेसंग राजनांदगांव, बस्तर, नारायणपुर अउ कांकेर जिला के एक-दू ठिन जगा म जोरदरहा पानी गिरे के संभावना जताइन हे।
सीमेंट फैक्ट्री हादसा-मुआवजा
बलौदाबाजार जिला के हिरमी गांव के एक ठिन सीमेंट फैक्ट्री म काली संझा ऑक्सीजन सिलेण्डर फटे ले उंहा काम बुता करत तीन झिन मजदूर मनके मउत होगे।
जानबा के अनुसार ए घटना ले गुस्साये ग्रामीण मन ह फैक्ट्री प्रबंधन ले मुआवजा अउ एक झिन मनखे ल नौकरी देके मांग करत हुए काली संझा ले संयंत्र के दरवाजा के आगू प्रदर्शन करत रीहिन। जेखर बाद सरलग होत हंगामा के बीच प्रबंधन के संग बइठका करे के बाद रतिहा करीब दू बजे परिजन अउ प्रबंधन के बीच समझौता होइस। जेखर चलत प्रबंधन कोति ले हरएक मृतक मनके घरवाला मन ल पैंतीस- पैंतीस लाख रूपिया अउ एक झिन मनखे ल नौकरी देके घोषणा करे गीस।
ए संबंध म जनप्रतिनिधि, परिजन, ठेकेदार अउ कंपनी प्रबंधन के बीच लिखित समझौता होइस अउ मृतक के घरवाला मन ल तुरते पांच-पांच लाख रूपिया के राशि नकद दे गीस, तब जाके ये हंगामा ह शांत होइस।
गुणवत्ता आश्वासन प्रमाण पत्र
केंद्रीय स्वास्थ्य मंत्रालय ह जगदलपुर अउ बलरामपुर जिला चिकित्सालय के संगेसंग कोरबा जिला के करतला सामुदायिक स्वास्थ्य केंद्र ल राष्ट्रीय गुणवत्ता, आश्वासन मानक प्रमाण पत्र देहे। ए संस्थान ल ए प्रमाण पत्र अच्छा स्वास्थ्य सेवा अउ मरीज मन ल बेहतर इलाज उपलब्ध कराय बर दे गेहे।