छत्तीसगढ़ के लोक परब ‘हरेली‘ काली प्रदेसभर म मनाय जाही। मान्यता ले सावन महीना के अमावस्या के दिन मनाय जवइया हरेली परब म किसान अपन कुल देवी-देवता अउ खेती कारज म बउरे जवइया औजार मन के पूजा-पाठ करथे। इही दिन लइका अउ युवा मन गेड़ी चढ़के तिहार के उछाह मनाथे।
इही ल देखत ए दरी प्रदेस हरेली तिहार के मउका म वन विभाग डहार ले गेड़ी बेचे के सुरूआत करे गेहे। सुनइया मन ल बतादन कि वन विभाग के कार्यालय अउ सी-मार्ट म गेड़ी राखे गे हें। स्थानीय स्तर म घलो लोगन गेड़ी बिसाय सकथें।
उहें, हरेली तिहार के दिन ले ही पचहत्तर दिन तक चलइया विश्व प्रसिध्द बस्तर दसेरा के घलो सुरूआत होथे। ए परब के पहिली दिन काली माई दंतेश्वरी मंदिर म पाटजात्रा के रसम करे जाही। एमा बस्तर संभाग के सबो गणमान्य नागरिक, मांझी-चालकी, पुजारी अउ रावत सामिल होही।
मुख्यमंत्री अपील
मुख्यमंत्री भूपेश बघेल ह हरेली तिहार के मउका म प्रदेसवासी मनले पौधा लगाय के अपील करीन हे। मुख्यमंत्री ह लोगन ले पौघा लगावत बेरा के फोटो सोशल मीडिया के जरिए ले ‘‘हैशटैग हरियर हरेली‘‘ लिख के साझा करे के अपील करीन हे। मुख्यमंत्री ह किहीन हे कि फोटो के संग ‘‘हरेली तिहार है हरियाली का और हरियाली ही तो श्रृंगार है हमारी छत्तीसगढ़ महतारी का‘‘।
उहें, प्रधान मुख्य वन संरक्षक ह बताइन कि वन विभाग डहार ले ग्रामीण मन ल निःशुल्क पौधा उपलब्ध कराय जाही।
छत्तीसगढ़िया ओलंपिक
हरेली तिहार के मउका म प्रदेस म काली ले छत्तीसगढ़िया ओलंपिक के सुरूआत होही। करीबन दू महीना दस दिन तक चलइया ए प्रतियोगिता छै चरण म आयोजित करे जाही। एमा लइका-सियान सबो झन हिस्सा ले सकहीं। प्रतियोगिता म दल अउ एकल श्रेणी म सोलह ठन पारंपरिक खेल मन ल जोड़े गेहे। ए दरी छत्तीसगढ़िया ओलंपिक म एकल श्रेणी म रस्सी कूद अउ कुस्ती ल घलो जोड़े गेहे। प्रतियोगिता के समापन अवइया सत्ताईस सितंबर के होही।
छत्तीसगढ़िया ओलंपिक के आयोजन सबले पहिली ग्रामीण नगरीय क्षेत्र म राजीव युवा मितान क्लब स्तर म सत्रह ले बाईस जुलाई तक नॉकआउट पध्दति ले होही। उहें, जोन स्तर म ए प्रतियोगिता छब्बीस ले इकतीस जुलाई तक होही। विकासखंड अउ नगरीय स्तर म सात ले इक्कीस अगस्त तक आयोजन होही। उहें, जिला स्तर म पच्चीस अगस्त ले सात सितंबर तक अउ संभाग स्तर म दस सितंबर ले बीस सितंबर तक आयोजित करे जाही। राज्य स्तर के खेल प्रतियोगिता पच्चीस सितंबर ले सत्ताईस सितंबर तक होही।
मुख्यमंत्री-कलाकार रूबरू
मुख्यमंत्री भूपेश बघेल ह किहीन कि छत्तीसगढ़िया संस्कृति ल संवारे बर कलाकार मनके महत्वपूर्ण योगदान हे। भेंट-मुलाकात कारीकरम के तहत आज रइपुर म मुख्यमंत्री ह छत्तीसगढ़ के कलाकार मन ले भेंट करीन। ए मउका मन ओमन पद्मश्री अउ राज्य अलंकरण विजेता मनके संग आने लोक अउ फिलिम कलाकार संगेसंग निर्माता निर्देशक मन ले भेंट करके कतकोन बिषय उपर गोठ-बात करीन।
मुख्यमंत्री ह हरेली तिहार कि बधाई देवत कलाकार मनके सुवागत करीन। श्री बघेल ह किहीन कि कलाकार ह जब अपन प्रस्तुति देथें त ओमन समाज के जनभावना ल दर्शाथें। उहें, पंडवानी, भरथरी, पंथी जइसन विधा ल छत्तीसगढ़ के कलाकार मन ही अंतर्राष्ट्रीय स्तर म चिनहारी करवांय हें।
भाजपा सांस्कृतिक प्रकोष्ठ-प्रेसवार्ता
उहे, दूसर डहार छत्तीसगढ़ प्रदेस भाजपा सांस्कृतिक प्रकोष्ठ ह आरोप लगाय हे कि राज्य सरकार ल अपन कार्यकाल के आखिरी दिन म राजनीतिक सुवारथ बर कलाकार मनके सुध आय हे। रईपुर म एक प्रेसवार्ता लेके प्रकोष्ठ के संयोजक राजेश अवस्थी अउ पद्मश्री अनुज शर्मा ह किहीन कि राज्य सरकार ह अपन कलाकार मनके मानदेय म कटौती करे के संग भेदभाव करे हे।
ओमन आरोप लगाइन कि राज्य सरकार ह अब तक राजभाषा आयोग अउ फिलिम आयोग के अध्यक्ष नियुक्त नइ करीस। प्रकोष्ठ के पदाधिकारी अउ भाजपा नेता मन यहू आरोप लगाइन कि राज्य म वरिष्ठ कलाकार मनके अपमान करे जावत हे। भाजपा नेता अनुज शर्मा ह किहीन कि कांग्रेस सरकार ह लोक कलाकार अउ साहित्यकार मन ल पेंसन नइ देके उंखर संग छलावा करे हे।
राज्यपाल आत्मकथा विमोचन
छत्तीसगढ़ के राज्यपाल विश्वभूषण हरिचंदन के आत्मकथा उपर लिखे गे किताब के आज नई दिल्ली म विमोचन करे गीस। ‘‘बैटल नॉट यटओवर‘‘ नाव ले लिखे गे किताब के विमोचन राष्ट्रीय विधि आयोग के अध्यक्ष ऋतुराज अवस्थी अउ सुप्रीम कोर्ट के न्यायाधीश वी गोपाल गौडे ह करीन। मूल रूप ले उड़िया भाषा म लिखे गे आत्मकथा के अंग्रेजी म अनुवाद परसिध्द लेखक अउ अकादमी पुरस्कार ले सम्मानित प्रोफेसर भगवान जयसिंह ह करे हें।
ए मउका म छत्तीसगढ़ के राज्यपाल श्री हरिचंदन ह किहीन कि ए आत्मकथा म ओमन अपन जिनगी के संघर्ष अउ उंखर ले मिले सीख ल साझा करे हें।
भाजपा-घोषणा पत्र समिति बैठक
रईपुर के कुशाभाउ ठाकरे परिसर स्थित भाजपा प्रदेस मुख्यालय म काली घोषणापत्र समिति के बइठका होइस। जेमा पार्टी के प्रदेस प्रभारी अउ चुनाव प्रभारी ओम माथुर, प्रदेस सह प्रभारी नितिन नबीन, प्रदेस अध्यक्ष अरूण साव राष्ट्रीय उपाध्यक्ष डॉक्टर रमन सिंह के संग संयोजक विजय बघेल मउजूद रिहीन।
बइठका म प्रदेस प्रभारी श्री माथुर ह किहीन कि पार्टी के घोषणा पत्र म समाज के आखिरी मनखे तक फायदा पहुंचाय के बात ल चेत म राखे जाही। ताकि घोषणापत्र म करे गे वादा मन ले हर वर्ग के उत्थान हो सकय।
ए बइठका म पार्टी के प्रदेस अध्यक्ष ह ए दावा करीन कि भाजपा ह छत्तीसगढ़ के खुशहाली बर घोषणा पत्र दिही। एखर बर समिति के सदस्य विधानसभा स्तर तक जाके लोगन ले सुझाव लिही। ए मउका म घोषणा पत्र समिति के संयोजक अउ सांसद विजय बघेल ह किहीन कि ए दारी विकास मूलक घोषणा पत्र तइयार होही।
भाजपा-आरोप पत्र समिति बैठक
उहें, रइपुर के कुशाभाउ ठाकरे परिसर म भाजपा आरोप पत्र समिति के बइठका घलो होइस। बइठका म भाजपा प्रदेस अध्यक्ष अरूण साव ह आरोप लगाइन कि कांग्रेस के प्रदेस सरकार वादाखिलाफी, भ्रष्टाचार, माफियाराज अउ नसा ल बढ़ावा देवत हे। ओमन किहीन कि अइसन मुद्दा ल लेके भाजपा ह विस्तार ले आरोप पत्र जारी करही।
बइठका म भाजपा-आरोप पत्र समिति के संयोजक अजय चंद्राकर ह किहीन कि कांग्रेस सरकार अपन वादाखिलाफी के सेती लोगन के बिस्वास खो चुके हे। ओमन किहीन कि विधानसभा के मानसून सत्र म भाजपा ह राज्य सरकार के खिलाफ अविस्वास प्रस्ताव लानही।
शैक्षणिक संस्थाओं-यातायात नियम
प्रदेस के शैक्षणिक संस्थान मन म सड़क सुरक्षा के नियम के पालन करवाय बर सबो जिला कलेक्टर अउ एसपी मन ल निरदेस जारी करे गेहे। स्कूल शिक्षा विभाग के डहार ले जारी पत्र म केहे गेहे कि स्कूली लइका मनके यातायात दुर्घटना के मामला कमती करे बर जरूरी कदम उठाय जाय।
पत्र म केहे गेहे कि दुर्घटना के परमुख कारण विशेष रूप ले वाहन मालिक, चालक, पालक अउ सोयम स्कूली लइका मन डहार ले सड़क सुरक्षा अउ यातायात नियम के पालन नइ करे जाना हे। एखर सेती सहर अउ नगरीय इलाका म दुर्घटना ले बांचे बर संयुक्त प्रयास ले रणनीति बनाके कड़ाई ले पालन कराय जाय।
और अब पेश है मौसम का हाल-
ए बेरा मानसून ह जम्मों प्रदेस म सक्रिय हे। काली बिलासपुर , रइपुर, दुरूग संभाग के कुछेक जघा म भारी बरसा होय के चेतावनी दे गेहे। उहें, जादातर जघा म हल्का ले मध्यम बरसा या गरज-चमक के संग छींटा पडे़ के संभावना हे।
अउ अब थोरकुन समाचार सार म-
– मुख्यमंत्री भूपेश बघेल ह काली रइपुर म ‘‘कका मीट क्रिएटर्स‘‘ के नांव ले आयोजित कारीकरम म सोशल मीडिया क्रिएटर्स ले अपील करीन कि ओमन छत्तीसगढ़िया संस्कृति ल बढ़ावा देवंय।
अउ
– मुख्यमंत्री भूपेश बघेल ह काली हरेली तिहार के मउका म प्रदेसवासी मनले पौधा लगाय के अपील करीन हे। मुख्यमंत्री ह लोगन ले पौघा लगावत बेरा के फोटो सोशल मीडिया के जरिए ले ‘‘हैशटैग हरियर हरेली‘‘ लिख के साझा करे के साझा करे बर घलो किहीन हें।