कोंडागांव विधायक मोहन मरकाम के मंत्रिमंडल म सामिल होय के बाद मुख्यमंत्री भूपेश बघेल ह तीन मंत्री के विभाग म फेरबदल करे हे। उप मुख्यमंत्री टी.एस. सिंहदेव ल लोक स्वास्थ्य अउ परिवार कल्याण, चिकित्सा, शिक्षा,बीस सूत्रीय कार्यान्वयन, वाणिज्यकर के संग उर्जा विभाग घलो सौंपे गेहे। उहें, ताम्रध्वज साहू ल गृह, जेल, लोक निर्माण, धार्मिक न्यास, धर्मस्व, पर्यटन के संग कृषि विकास, किसान कल्याण अउ जैव प्रौद्यौगिकी के जिम्मेदारी दे गेहे। रविन्द्र चौबे ल पंचायत अउ ग्रामीण विकास, संसदीय कार्य, पशुधन विकास, मछली पालन, जल संसाधन, आयकट के संग स्कूल शिक्षा अउ सहकारिता के जिम्मेदारी दे गेहे। उहें, मोहन मरकाम ल आदिम जाति, अनुसूचित जाति, अन्य पिछड़ा वर्ग अउ अल्पसंख्यक विभाग सौंपे गेहे।
भाजपा-घोषणा पत्र समिति
भारतीय जनता पार्टी के प्रदेस प्रभारी ओम माथुर अउ सह प्रभारी नितिन नबीन ह आज रईपुर म घोषणा पत्र समिति अउ आरोप पत्र समिति के बइठका लेवत हे। बइठका म घोषणा पत्र समिति के संयोजक सांसद विजय बघेल, आरोप पत्र समिति के संयोजक अजय चंद्राकर के अलावा समिति के सदस्य उपस्थित हे।
इंही, बीच पार्टी के प्रदेस अध्यक्ष अरूण साव ह घोषणा करीन कि भाजपा संविदा, अनियमित, दैनिक वेतन भोगी अउ आने प्रकार के अस्थाई कर्मचारी मन के मांग ल अपन घोषणा पत्र म सामिल करही। श्री साव ह काली सर्व विभागीय संविदा कर्मचारी महासंघ के बैनर तले नवा रईपुर के तुता म आंदोलन करके कर्मचारी मन ले मुलाकात करीन अउ ओमन ल समर्थन दीन। श्री साव ह किहीन कि राज्य म भाजपा के सरकार बनत हे। कर्मचारी मनके न्याय संगत मांग पूरा करे जाही।
मरकाम-बैठक
आदिम जाति अउ अनुसूचित जाति मंत्री मोहन मरकाम ह आज रईपुर म विभागीय अधिकारी मनके बइठका लीन। बइठका म ओमन ह विभागीय योजना के प्रगति के समीक्षा करीन। ए दउरान श्री मरकाम ह किहीन कि विभाग म अनुसूचित जनजाति, अनुसूचित जाति, अन्य पिछड़ा वर्ग अउ अल्पसंख्यक वर्ग के जनसंख्या के पचयासी प्रतिसत ले जादा योजना संचालित करे जात हे। ओमन ह किहीन कि ए योजना के क्रियान्वयन पारदर्शिता के संग करे जाना चाही।
भूतपूर्व सैनिक-सम्मान निधि
रईपुर संभाग के सत्तर बछर ले जादा उमर के भूतपूर्व सैनिक मन ल सम्मान निधि दे जाही। एखर बर ओमन ल अपन सेवा पुस्तिका प्रमाण पत्र, पहिचान पत्र, आधार कार्ड के प्रति, बैंक पासबुक के प्रति अउ निवास प्रमाण पत्र के संग जिला सैनिक कल्याण कार्यालय म आवेदन करना होही। दस्तावेज के जांच के बाद सही पाय गे आवेदन ल संचालनालय सैनिक बोर्ड के अनुमोदन बर भेंजे जाही। सैनिक बोर्ड ले अनुमोदन के बाद भूतपूर्व सैनिक मन ल निर्धारित सम्मान निधि दे जाही। जेन उंखर खाता म सीधा जमा होही।
तीजन बाई-स्वास्थ्य
मुख्यमंत्री भूपेश बघेल ह छत्तीसगढ़ के जनइया पंडवानी गायिका पद्मविभूषण डॉक्टर तीजन बाई के तबियत के जानकारी लीन। श्री बघेल ह परिवार के लोगन मन ले फोन म बात करके ओमन ल भरोसा दिलाईन। मुख्यमंत्री ह परिवार के लोगन मन ले किहीन कि राज्य सरकार डहार ले तीजन बाई के स्वास्थ्य लाभ बर हरसंभव सहायता दे जाही।
जानबा, के मुताबिक तीजन बाई के तबियत ठीक नइ हो कारण ओमन ल भिलाई के सेक्टर-9 अस्पताल म भरती कराय गे रिहीस। फेर, तबियत पहिली ले ठीक होय के बाद काली ओमन ल घर ले आय हे।
कुलपति-नियुक्ति
दुर्ग के अंजोरा स्थित वासुदेव चंद्राकर कामधेनु विश्वविद्यालय के कुलपति के कार्यभार दुर्ग संभागायुक्त ल सौंपे गेहे। राजभवन ले जारी आदेस के अनुसार विश्वविद्यालय के वर्तमान कुलपति डॉक्टर दक्षिणकर नारायण पुरोषत्तम के कार्यकाल आज पन्द्रह जुलाई के खतम होवत हे। एला देखत हुए नवा कुलपति के चयन तक विश्वविद्यालय के कुलपति पद के जिम्मेदारी संभागायुक्त ले दे गेहे।
जानबा के मुताबिक कुलपति चयन बर एक समिति के गठन करे गेहे। डॉक्टर बीजायानंद सिंह ह ए चयन समिति के अध्यक्ष हे। उहें, बिसेस सचिव डॉक्टर अय्याज एफ. तंबोली अउ पूर्व असिसटेंट डायरेक्टर जनरल डॉक्टर सी.एस. प्रसाद ल सदस्य बनाय गेहे।
डिप्टी कलेक्टर-कार्यमुक्त
राज्य सरकार ह अइसन इकत्तीस डिप्टी कलेक्टर ल एकतरफा कार्यमुक्त कर देहे। जेनमन ह स्थानांतरण के बाद घलो नवा जघा म पदभार ग्रहण नइ करे रिहीस। जारी आदेस के अनुसार ए इकत्तीस अधिकारी मन ल नवा पदस्थापना म कार्यभार ग्रहण करे बर आज मंझनिया भारमुक्त कर दे गेहे।
मुख्य निर्वाचन पदाधिकारी-बैठक
मुख्य निर्वाचन पदाधिकारी रीना बाबासाहेब कंगाले ह काली रईपुर म राज्य स्तरीय स्वीप कोर समिति के बइठका लीन। बइठका म ओमन ह राज्य म ए बछर होवइया विधानसभा चुनाव म मतदान प्रतिसत ल बढ़ाय बर मतदाता जागरूकता ले संबंधित आने-आने स्वीप गतिविधि के संचालन उपर चर्चा करीन। ओमन ह बताइन कि निर्वाचक नामावली के बिसेस संक्षिप्त पुनरीक्षण कर अवइया दू अगस्त ले नवा मतदाता मन ल जोड़े के अभियान सुरू करे जात हे। ए दउरान युवा मतदाता ल जोड़े बर सब्बों महाविद्यालय मन म बिसेस सिविर के आयोजन करे जाही। अइसन दिव्यांग अउ वरिष्ठ नागरिक जेखर नाम मतदाता सूची म दर्ज नइ हे। ओमन ल घलो प्राथमिकता ले जोड़े जाही। एखर अलावा बारह, तेरह, अठ्ठारा अउ उन्नीस के सब्बों जिला म बिसेस सिविर के आयोजन करे जाही। इंही, दिन सब्बों मतदान केन्द्र मन म स्थानीय बीएलओ मउजूद रइही। बइठका म राज्य स्तरीय स्वीप कोर कमेटी के गठन घलो करे गीस।
उहें, मुख्य निर्वाचन पदाधिकारी रीना बाबासाहेब कंगाले ह सुगम चुनाव बर गठित राज्य स्तरीय संचालन समिति के घलो बइठका लीन। बइठका म ओमन ह मतदान केन्द्र मन म दिव्यांग अउ बुजुर्ग मतदाता मन ल सब्बो जरूरी सुविधा मुहैया कराय बर जरूरी तइयारी करे के निरदेस दीन। ओमन ह मतदान केन्द्र तक मतदाता मन के सुगम पहुंच, सौचालय, रैंप, साइनेज अउ पेयजल के उपलब्धता के समीक्षा कर इंखर समुचित व्यवस्था बर जरूरी तइयारी करे बर किहीन।
जिले की चिट्ठी
प्रादेशिक समाचार एकांश, आकाशवाणी रायपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छह बज के पांच मिनट ले छह बज के दस मिनट तक प्रसारित करे जाही। ए कारीकरम ल छत्तीसगढ़ स्थित आकाशवाणी के सब्बों केन्द्र रिले करही। ए बार के अंक म ‘‘जांजगीर-चांपा‘‘ जिला के गतिविधि के बारे म जानकारी दे जाही।
हल्बी/गोण्डी-समाचार बुलेटिन
श्रोता मन ल बतादन काली रविवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनो बुलेटिन आकाशवाणी केन्द्र जगदलपुर ले प्रसारित करे जाही। एला बस्तर संभाग म सुने जा सकत हे। हल्बी म समाचार बुलेटिन बिहनिया साढ़े सात बजे ले अउ गोण्डी म समाचार बुलेटिन संझा साढ़े छे बजे ले प्रसारित करे जाही।
अउ अब पेस हे मौसम के हाल –
अवइया चौबीस घंटा के दउरान प्रदेस के सरगुजा, जशपुर, पेण्ड्रा रोड, कोरबा, कबीरधाम, बिलासपुर, मुंगेली अउ रायगढ़ जिला के एक-दू जघा म मध्यम ले भारी बारिश होय के संभावना हे। उहें, थोरकुन देरी पहिली राज्य के सरगुजा, बिलासपुर, बस्तर, रईपुर अउ दुर्ग संभाग के जिला मन म गरज-चमक के संग कुछ जघा म तेज बरसा होईस।
मौसम विभाग के अनुसार आज ले प्रदेस म जादा पानी गिरे के आसार हे। काली सोलह जुलाई के प्रदेस के कतकोन जघा म हल्का ले मध्यम बरसा होय या गरज-चमक के संग छींटा पड़े के संभावना हे। उहें, एक-दू जघा म आकाशीय बिजली गिरे अउ जादा बरसा होय के चेतावनी दे गेहे।
अउ अब थोरकुन समाचार सार म-
– केन्द्र सरकार ह छत्तीसगढ़ राज्य लघु वनोपज संघ ल वैश्विक स्तर म पर्यावरण, सामाजिक कल्याण अउ सुसासन के क्षेत्र म अच्छा काम करे बर पृथ्वी अवार्ड ले सम्मानित करीन। ए पुरस्कार नई दिल्ली म प्रदान करे गीस।
अउ
– प्रदेस म संचालित प्रयास आवासीय विद्यालय के कक्षा ग्यारहवीं म लेटरल एंट्री के माध्यम ले काली सोलह जुलाई के प्रवेश परीक्षा आयोजित करे जाही। ए परीक्षा रईपुर, बिलासपुर, दुर्ग, सरगुजा अउ बस्तर संभाग मुख्यालय म होही।