प्रदेश म विधानसभा चुनाव ले करीबन पांच महीना पहिली छत्तीसगढ़ के राज्य मंत्रिमंडल म थोरबहुत फेरबदल करे जावत हे। शिक्षा अउ आदिम जाति कल्याण मंत्री डॅाक्टर प्रेमसाय सिंह टेकाम ह आज अपन पद ले इस्तीफा दे दीन। मुख्यमंत्री भूपेश बघेल ह बताइन हे कि डॉक्टर टेकाम के इस्तीफा मंजूर कर ले गेहे। खबर मिले हे कि कोंडागांव विधायक मोहन मरकाम ल मंत्री बनाय जाही। श्री मरकाम काली साढ़े ग्यारा बजे राजभवन म मंत्री पद के शपथ लेही। विभाग के बटवारा मुख्यमंत्री काली करही। संभावना हे कि कुछएक मंत्री मनके विभाग म फेरबदल करे जा सकत हे।
एखर पहिली काली संझा कांग्रेस हाइकमान ह , बस्तर के सांसद दीपक बैज ल मोहन मरकाम के जगा प्रदेश कांग्रेस के नवा अध्यक्ष बनाय हे। बछर दू हजार उन्नीस के लोकसभा चुनाव म बस्तर सीट ले सांसद बनइया दीपक बैज बछर दू हजार तेरा अउ अठारा के विधानसभा चुनाव म बस्तर क्षेत्र के चित्रकूट सीट ले विधायक चुने गे रीहिस। चौदा जुलाई उन्नीस सौ इक्यासी के बस्तर जिला के लोहांडीगुड़ा के गढ़िया गांव म जन्में दीपक बैज ह बछर दू हजार आठ म कांग्रेस के छात्र इकाई भारतीय राष्ट्रीय छात्र संगठन-एनएसयूआई ले अपन राजनीतिक सफर शुरू करे रीहिन।
स्वामी आत्मानंद कॉलेज-लोकार्पण
प्रदेश के पहिली स्वामी आत्मानंद अंग्रेजी माध्यम आदर्श महाविद्यालय कांकेर म आज ले शुरू हो गेहे। मुख्यमंत्री भूपेश बघेल ह अपन रायपुर स्थित निवास कार्यालय ले वीडियो कॉन्फ्रेसिंग के जरिया ले आज ए महाविद्यालय के लोकार्पण करीन। ए मउका म मुख्यमंत्री ह कहिन कि अंग्रेजी माध्यम ले जउन लइका मन हायर सेकेंडरी स्कूल ले पढ़के निकलही, ओमन स्वामी आत्मानंद अंग्रेजी माध्यम आदर्श महाविद्यालय म आगू घलो अंग्रेजी माध्यम ले अपन पढ़ाई जारी रख सकही।
ए मउका म श्री बघेल ह एनआईटी रायपुर म चुने गे कांकेर के तीन छात्रा अउ बिलासपुर के केंद्रीय विश्वविद्यालय म चुने गे एक छात्रा ले गोठबात करीन अउ ओमन ल ए सफलता बर शुभकामना दीन।
खबर के मुताबिक कांकेर जिल म स्कूली लइका मन बर राज्य सरकार डहार ले चलाये जात हमर लक्ष्य कार्यक्रम के तहत ए विद्यार्थी मनके चुनइ उच्च शिक्षा बर होय हे। उंहे हमर लक्ष्य कार्यक्रम के तहत कांकेर जिला के पचहत्तर लईका मन ह आईआईटी के प्रवेश परीक्षा जेईई म घलो क्वालीफाई करे हे। ए कार्यक्रम के तहत गरीब परिवार मनके विद्यार्थी मन ल राज्य सरकार डहार ले उच्च शिक्षा बर सहायता राशि दे जाथे।
मंत्रिपरिषद बैठक
राज्य मंत्रिमंडल ह चालू वित्त बछर के पहिली अनुपूरक बजट प्रस्ताव ल अपन मंजूरी दे देहे। मुख्यमंत्री भूपेश बघेल के पगरैती म उंखर निवास कार्यालय म होय मंत्रिपरिषद के बइठका म ये फैसला ले गीस। ए बइठका म नवा रायपुर अटल नगर विकास प्राधिकरण के पुनर्वास योजना म राखी गांव के परियोजना प्रभावित मन ल पात्रता के मुताबिक बाड़ी बनाये बर खुला जमीन देके फैसला ले गीस।
उंहे प्राधिकरण के भूमि स्वामित्व वाले जमीन उपर काबिज पात्र परिवार मन ल निर्धारित सीमा के मुताबिक बसाहट के पट्टा देके फैसला घलो ले गेहे। ए बइठका म राज्य म आने-आने वर्ग ल उद्योग स्थापना बर आने-आने प्रकार के छूट, अनुदान अउ रियायत के घोषणा करे गेहे। उंहे राज्य म कतकोन प्रकार के उद्योग के स्थापना ल प्रोत्साहित करे बर औद्योगिक नीति के तहत विशेष निवेश प्रोत्साहन पैकेज संबंधी नियम ल सामिल करे के फैसला घलो ले गीस।
राजनांदगांव खेल अकादमी
केंद्रीय खेल अउ युवा कल्याण मंत्रालय ह खेलो इंडिया अभियान के तहत राजनांदगांव म बास्केटबॉल के दू ठिन अकादमी बनाये के मंजूरी दे देहे। ये दूनों अकादमी राजनांदगांव के दिल्ली पब्लिक स्कूल अउ युगांतर पब्लिक स्कूल म चलाये जाही। केंद्र सरकार डहार ले मान्यता प्राप्त ए दूनों अकादमी म बालक अउ बालिका दूनो वर्ग म ए खेल के प्रशिक्षण के सुविधा उपलब्ध रीही। ए अकादमी म चुने गे खिलाड़ी मन उपर केंद्र सरकार करीबन सवा छै लाख रूपिया हर बछर खर्च करही।
राजनांदगांव के सांसद संतोष पांडेय अउ भाजपा के प्रदेश अध्यक्ष अरूण साव ह ए दूनों अकादमी बर प्रधानमंत्री नरेंद्र मोदी अउ केंद्रीय खेल मंत्री अनुराग ठाकुर के प्रति आभार जताइन।
महिला समूह ऋण
राज्य सरकार ह चालू वित्त बछर म महिला कोष के माध्यम ले महिला समूह मन ल इकतीस करोड़ रूपिया के ऋण देके लक्ष्य राखे हे। ये कर्जा ढाई हजार महिला समूह मन दे जाही। एखरे संग सक्षम योजना के तहत प्रदेश के पांच सौ माइलोगिन मन ल चार करोड़ रूपिया के कर्जा दे जाही। ये फैसला छत्तीसगढ़ महिला कोष के शासी बोर्ड अउ आम सभा के बइठका म ले गीस। महिला अउ बाल विकास मंत्री अनिला भेंड़िया के पगरैती म होय ए बइठका म नवीन कौशल्या समृद्धि योजना के संचालन महिला कोष के माध्यम ले कराए जाय के मंजूरी घलो दे गेहे।
छत्तीसगढ़ महिला कोष के शासी बोर्ड के बइठका म आने आने बैंक के प्रतिनिधि मनले गोठबात करके ऋण अउ ब्याज के प्रक्रिया ल अउ सरल बनाय बर घलो चर्चा करे गीस। बइठका म महिला अउ बाल विकास मंत्री ह अधिकारी मनले कीहिन कि शिविर के माध्यम ले लक्षित महिला समूह अउ पात्र माइलोगिन मन ल महिला कोष संबंधी योजना के जानकारी दे जावय, जेखर ले ओमन आर्थिक रूप ले आत्मनिर्भर बनके एखर जादा ले जादा फायदा उठा सकय।
माओवादी आत्मसमर्पण
बीजापुर जिला म दू लाख रूपिया के इनामी माओवादी ह आज पुलिस के आगू आत्मसमर्पण कर दीस। जिला के पुलिस अधीक्षक अांजनेय वार्ष्णेय ह बताइन हे कि समर्पण करइया माओवादी बीजापुर के स्थानीय तीन टुकड़ी म शामिल रीहिस। ओखर उपर सिलगेर के हिंसक घटना समेत छै बड़े घटना म सामिल रेहे के आरोप हे।
खबर के मुताबिक सिलगेर म होय माओवादी घटना म केंद्रीय सुरक्षा बल के बाईस झिन जवान शहीद होगे रीहिस। पुलिस अधीक्षक ह बताइन कि ए माओवादी ल राज्य सरकार के पुनर्वास योजना के तहत दस हजार रूपिया के नगद राशि दे गीस।
खेल अकादमी-चयन ट्रायल
खेल अउ युवा कल्याण विभाग डहार ले रायपुर अउ बिलासपुर म संचालित आवासीय अउ गैर आवासीय अकादमी बर रायपुर म ग्यारा अउ बारह जुलाई के होय चयन ट्रायल म साढ़े छै सौ ले जादा खिलाड़ी मन सामिल होइन। ये चयन ट्रायल रायपुर के कोटा स्थित स्वामी विवेकानंद स्टेडियम अउ सरदार वल्लभभाई पटेल अंतरराष्ट्रीय हॉकी मैदान म होइस।
खेल विभाग के मुताबिक ए ट्रायल म तीरंदाजी, फुटबॉल, हॉकी अउ एथलेटिक्स के अकादमी मन बर खिलाड़ी के शारीरिक क्षमता अउ खेल कौशल के परीक्षण करे गीस। एमा ले आने आने अकादमी बर पात्र खिलाड़ी के चयन सूची जल्दीच जारी करे जाही।
अउ अब पेस हे मौसम के हाल –
प्रदेश म अवइया चौबीस घंटा के दउरान कुछएक जगा म हल्का ले मध्यम बरसा होय के संभावना हे। मौसम विभाग के अनुसार ए बेरा मानसून द्रोणिका राजस्थान ले अरूणाचल प्रदेश तक बने हुए हे। उंहे उत्तरप्रदेश के उपर एक चक्रीय चक्रवाती घेरा घलो सक्रिय हे। एखर असर ले प्रदेश के एक-दू जगा म गरज-चमक संग आकाशीय बिजली गिरे के चेतावनी घलो दे गेहे।
अउ अब थोरकुन समाचार सार म-
– जांजगीर-चांपा जिला म अकलतरा के आर.के. सिंह उच्च्तर माध्यमिक स्कूल म चौदा अउ पंद्रह जुलाई के वाई-टवेंटी इंडिया कार्यशाला राखे जाही।
– भारतीय जनता पार्टी के महिला मोर्चा ह वन मंत्री मोहम्मद अकबर डहार ले शराब बंदी ल लेके देगे बयान के खिलाफ रायपुर म रैली निकालिन अउ मंत्री के निवास के घेराव करीन।
– रेलवे के बुनियादी ढांचा संबंधी मरम्मत काम के सेती आज दुर्ग ले अउ काली भोपाल ले चलइया अमरकंटक एक्सप्रेस रद्द रीही । उंहे जरूरी मरम्मत काम के सेती सिलयारी समपार फाटक आज रतिहा आठ बजे ले पंद्रह जुलाई के संझा छै बजे तक बंद रीही।
अउ
– महासमुंद जिला के रेहटीखोल गांव म पुलिस ह एक झिन आरोपी ल गिरप्तार करके उंखर तीर ले एक करोड़ रूपिया के गांजा जब्त करे हे।