राज्य सरकार ह स्वास्थ्य सुविधा मनले जुड़े जरूरी सेवा मन म काम करे ले मना करे जइसन जुड़े प्रतिषेध आदेश ल तुरते प्रभाव ले लागू कर देहे। गृह विभाग ले जारी आदेश के मुताबिक लोक स्वास्थ्य ले जुड़े जम्मों काम अउ स्वास्थ्य सुविधा जइसन सेवा मन म काम करइया डॅाक्टर, नर्स, स्वास्थ्य कर्मी अउ एंबुलेंस सेवा म काम करइया अधिकारी कर्मचारी मन डहार ले काम करे ले मना करे जाय वाले प्रतिषेध करे गेहे। ए नियम के लागू होय के बाद अब जरूरी सेवा मन म काम करइया कर्मचारी मन ह काम करे ले मना करहीं त उंखर मनके खिलाफ विभागीय कार्यवाही करे जाही।
माल अउ सेवा कर-जीएसटी परिषद ह कैंसर अउ गंभीर बीमारी मनके इलाज के दवई अउ विशेष चिकित्सा बर खाद्य उत्पाद मनले जीएसटी छूट देके फैसला लेहे। केंद्रीय वित्त मंत्री ह काली नई दिल्ली म जीएसटी परिषद के पचासवां बइठका के अध्यक्षता करीन। बइठका के बाद वित्त मंत्री ह कीहिन कि ऑनलाइन गेमिंग, घुड़दौड़ अउ कैसीनो उपर अठाईस प्रतिशत कर लगाये जाही।
केंद्रीय रसायन अउ उर्वरक मंत्री मनसुख मांडविया ह भारत के औषधि महानियंत्रक ल निर्देश देहे कि ओमन नकली दवा बनइया कंपनी मनके खिलाफ कड़ा कार्रवाई करंय। ओमन कीहिन कि देश म दवई मन ल बने ढंग ले बनाय जाय, एमा कोनो प्रकार के कोताही झन बरते जाय। श्री मांडविया ह काली नई दिल्ली म दवा कंपनी मनके प्रतिनिधि मनले भेंट करीन।
केंद्र सरकार ह आंध्रप्रदेश, कर्नाटक अउ महाराष्ट्र ले तुरते टमाटर बिसाय के निर्देश देहे। जेखर ले चिल्हर भाव म होवत बढ़ोत्तरी ल रोके के प्रयास करे जा सकय। उपभोक्ता मामला विभाग ह राष्ट्रीय कृषि सहकारी विपणन परिसंघ अउ राष्ट्रीय सहकारी उपभोक्ता परिसंघ ल केहे हे कि ओमन तीन राज्य के मंडी मनले टमाटर खरीदे अउ प्रमुख खपत होवइया केंद्र मन म भेजय। मंत्रालय ह यहू केहे हे कि आने आने क्षेत्र मन म मौसम के सेती फसल कमती होय हे। जेखर कारण भाव म बढ़ोत्तरी होवत हे।
बोर्रागुहालू अउ करकावालसा के बीच पहाड़ ले बड़े बडे़ पथरा गिरे के सेती किंरदुल-विशाखापट्नम रेल लाइन म पाछू अठारा घंटा ले रूके गाड़ी मनके अवई जवई शुरू होगे हे। ए रेल लाइन म अब सिरिफ मालगाड़ी मन ल चलाये जात हे। उंहे पैसेंजर अउ नाईट एक्सप्रेस ह चौदा जुलाई तक रद्द रीही।
जगदलपुर स्टेशन अधीक्षक एम.आर. नायक ह बताइन कि पाछू दस जुलाई के रेल पटरी म बड़े बडे़ चट्टान गिरके आय रीहिस, जेखर सेती रेल लाइन ल क्षति पहुंचे रीहिस। जेला अब ठीक कर ले गेहे। पंद्रह जुलाई ले पैंसेंजर ट्रेन अउ नाइट एक्सप्रेस पहिली के टाइम म चलही। उंहे बिलासपुर रेलमंडल डहार ले यात्री मनके सुविधा ल देखत सिकंदराबाद-रायपुर-सिकंदराबाद एक्सप्रेस अउ हैदराबाद-रक्सौल-हैदराबाद एक्सप्रेस ल पेद्दपल्ली जंक्शन म घलो एक मिनट बर रोके जाही।
छत्तीसगढ़ के राज्यपाल विश्वभूषण हरिचंदन ह अपन ओडिशा प्रवास के दउरान आज ओडिशा के पूर्व मंत्री अउ समाजवादी नेता स्वर्गीय प्रदीप किशोर दास के जन्म शताब्दी समारोह म शामिल होइन। ए मउका म राज्यपाल ह समाजवादी नेता ल श्रद्धांजलि अर्पित करत ओखर योगदान ल सुरता करीन।
भारतीय जनता पार्टी के प्रदेश प्रवक्ता संदीप शर्मा ह मांग करे हे कि राज्य सरकार ह सार्वजनिक वितरण प्रणाली-पीडीएस मामला म दोषी अधिकारी मनके खिलाफ होय कार्रवाई के रिपोर्ट ल सार्वजनिक करंय।
ओमन कीहिन कि करीबन छै सौ करोड़ रूपिया के पीडीएस घोटाला के मामला म राज्य सरकार ह विधानसभा के कमिटी के बजाय अधिकारी मनले जांच कराय के बात करे रीहिन। पूर्व मुख्यमंत्री डॅाक्टर रमनसिंह ह विधानसभा म ए मामला ल उठाय रीहिन। श्री शर्मा ह कीहिन कि विधानसभा म खाद्य मंत्री ह ए बात ल माने रीहिन कि करीबन पांच हजार राशन दुकान मन म इकचालीस हजार टन चांउर के कमी पाय गेहे। फेर ए बारे म अभी तक कोनो जांच रिपोर्ट जारी नइ करे गेहे।
राष्ट्रीय स्वयंसेवक संघ-आर.एस.एस. के अखिल भारतीय प्रांत प्रचारक मनके तीन दिन तक चलइया बइठका काली ले तमिलनाडु के उटी म होवइया हे। ए वार्षिक बइठका ल संगठनात्मक बिसय उपर गोठबात करे बर हर बछर राखे जाथे। बइठका म आर.एस.एस. के सर संघचालक डॉक्टर मोहन भागवत, सर कार्यवाह दत्तात्रेय होसबाले के संगेसंग जम्मों राज्य के प्रांत संचालक, सह प्रांत संचालक, क्षेत्र संचालक के संगेसंग जम्मां कार्य विभाग के अखिल भारतीय अधिकारी मन घलो सामिल होही। बइठका म अवइया कार्यक्रम के योजना अउ वर्तमान परिस्थिती के बारे म गोठबात करे जाही।
छत्तीसगढ़ के सभ्यता अउ संस्कृति उपर केंद्रित लोक परब हरेली सतरा जुलाई के मनाये जाही। इही दिन ले पचहत्तर दिन तक चलइया विश्व प्रसिद्ध बस्तर दशहरा परब के घलो शुरूआत होथे। परब के पहिली दिन मां दंतेश्वरी मंदिर म पाटजात्रा के रसम अदा करे जाही। जेमा बस्तर संभाग के जम्मों बड़का लोगन मन मांझी-चालकी, पुजारी अउ रावत मन सामिल होही।
राज्य के मुख्य निर्वाचन पदाधिकारी रीना बाबासाहेब कंगाले के अध्यक्षता म चौदा जुलाई के रायपुर म राज्य स्तरीय स्वीप कोर समिति के बइठका होही। बइठका म राज्य म एसो होवइया विधानसभा चुनई म मतदान प्रतिशत ल बढ़ाय बर मतदाता जागरूकता ले जुड़े कतकोन स्वीप कार्यक्रम कराय ल लेके गोठबात करे जाही।
गरियाबंद जिला म बिंद्रानवागढ़ के पूर्व विधायक ओमकार शाह ह गोंडवाना गणतंत्र पार्टी ले इस्तीफा दे देहे। ओमन बछर दू हजार उन्नीस म विधानसभा चुनाव गोंडवाना गणतंत्र पार्टी कोति ले लड़े रहिन। एखर पहिली श्री शाह ह बिंद्रानवागढ़ ले दू बार कांग्रेस पार्टी के विधायक रही चुके हे।
मुख्यमंत्री भूपेश बघेल ह राजनांदगांव जिला के मदनवाड़ा म बारह जुलाई दू हजार नौ के माओवादी मन संग मुठभेड़ म शहीद होय विनोद चौबे अउ अठाईस पुलिस कर्मी मन ल उंखर शहादत उपर श्रद्धांजलि देहे। मुख्यमंत्री ह अपन ट्वीट संदेश म कीहिन कि माओवादी मनले मुकाबला करत पुलिस अधीक्षक स्वर्गीय विनोद चौबे अउ उंखर टीम ह अपन प्राण गंवा दीन।
जानबा के मुताबिक एस.पी. विनोद चौबे छत्तीसगढ़ के नक्सल ऑपरेशन म देश के पहिली शहीद आईपीएस अधिकारी रीहिन। मरणोपरांत ओमन ल कीर्तिचक्र ले सम्मानित करे गीस।
प्रदेश म अवइया सोला जुलाई ले बरसा एक घांव फेर सुरू होही। जउन ह बस्तर संभाग ले सुरू होके प्रदेश के आने-आने क्षेत्र म आगू बाढ़ही। मौसम विभाग ले मिले जानबा के मुताबिक एक ठिन उपरी हवा के चक्रीय चक्रवाती घेरा उत्तर तटीय आंध्रप्रदेश के उपर बने हे, जेखर असर ले अवइया चौबीस घंटा के दउरान प्रदेश के कतकोन जगा म हल्का ले मध्यम बरसा होय के संभावना हे। उंहे एक दू जगा म गरज-चमक के संग गाज गिरे के घलो चेतावनी दे गेहे।
– प्रदेश म ए बेरा रोका-छेका अभियान चलाये जात हे। इही कड़ी म आज कांकेर जिला प्रशासन ह आदेश जारी करीन कि मवेशी मन ल लावारिस छोड़इया मालिक मनके खिलाफ प्राथमिकी दर्ज कराय जाही।
– प्रदेश कांग्रेस कमेटी के आह्वान म आज राजधानी रायपुर म संगठन ले जुड़े पदाधिकारी मन ह प्रदेश प्रभारी कुमारी शैलजा के अगवाई म मौन प्रदर्शन करीन।
– उंहे नियमितीकरण के मांग ल लेके संविदा कर्मचारी मन ह आज रायपुर के बुढ़ातालाब म प्रदर्शन करीन।
अउ
– दुर्ग जिला के मोहन नगर थाना क्षेत्र म पुलिस ह महाराष्ट्र के नागपुर ले ब्राउन शुगर लाके बेचे के मामला म एक झिन आरोपी ल गिरप्तार करे हे। उंखर तीर ले करीबन साढ़े दस ग्राम के ब्राउन शुगर बरामद करे गेहे।