प्रदेस म स्वास्थ्य विभाग के करमचारी मन अपन हड़ताल ल खतम कर देहे। प्रदेस स्वास्थ्य कर्मचारी संग के सदस्य मन आज उप मुख्यमंत्री अउ स्वास्थ्य मंत्री टी.एस. सिंहदेव ले रईपुर म मुलाकात करे बाद हड़ताल सिरोय के एलान करीन। श्री सिंहदेव ह स्वास्थ्य कर्मी मनके मांग उपर सहानूभूतिपूर्वक बिचार करे के संगे सासन के आगू म उंखर मनके बात ल राखे के असवासन दीन। ए कर्मचारी मन अपन कई ठिन मांग ल लेके बीते चार जुलाई ले हड़ताल म रिहीन।
इंहा ए बतादन कि श्री सिंहदेव ह राज्य के लोगन मनके हित म स्वास्थ्य विभाग के कर्मचारी मनले काम म लहूटे के आग्रह करे रिहीन।
भाजपा-राष्ट्रीय कार्यकारिणी
भारतीय जनता पार्टी ह राष्ट्रीय अध्यक्ष जे.पी. नड्डा ह राष्ट्रीय कार्यकारिणी म फेरबदल करे हे। नवा सूची म छत्तीसगढ़ के दू झिन बड़का नेता धरमलाल कौशिक अउ विष्णुदेव साय के नाम घलो हावये।
संगठन म नवा जिम्मेदारी मिले बाद श्री कौशिक ह राष्ट्रीय अउ प्रदेस नेतृत्व बर आभार जताइन हे। ओमन किहीन कि ए दारी छत्तीसगढ़ म भाजपा के सरकार बनाना उंखर एकमात्र मिसन हे। अउ ए जवाबदारी ल निभाय म ओमन लग गे हवय।
इंही बीच, भाजपा के प्रदेस अध्यक्ष अरूण साव ह चुनाव घोषणा पत्र समिति के सदस्य मन के नियुक्ति घलो कर दे हे। इकतीस झिन सदस्य वाले ए समिति म सांसद विजय बघेल ल संयोजक अउ पार्टी के बड़का नेता रामविचार नेताम, अमर अग्रवाल अउ शिवरतन शर्मा ल सह संयोजक बनाय गे हे।
मतदाता सूची-पुनरीक्षण
छत्तीसगढ़ म ए बछर प्रस्तावित विधानसभा चुनाव ल लेके भारत निर्वाचन आयोग ह प्रसासनिक तइयारी तेज कर दे हे। ए बेरा चुनाव के पहिली मतदाता सूची म नाम जोड़े, हटाय अउ सुधारे के काम चलत हे। ए दउरान अधिकारी मन घरों-घर जाके सर्वे करे के काम करत हे। सर्वे म नवा अपंजीकृत नागरिक, मृत अउ स्थायी रूप ले ट्रांसफर होय मतदाता मन के चिनहारी करे जात हे। संगे अठ्ठारा बछर पूरा कर चुके जवान लइका मन के नाम मतदाता सूची म जोड़े खातिर आवेदन घलो भरे जात हे। ए कारीकरम ह एक अक्टूबर तक ले चलही। एखर संगे निर्वाचन आयोग ह ऑनलाइन फार्म भरे बर वोटर हेल्पलाइन ऐप अउ वोटर सर्विस पोर्टल बनाय हे।
निर्वाचन आयोग डहार ले जारी कारीकरम मुताबिक मतदाता सूची के प्रारंभिक प्रकासन प्रदेस के सबो मतदान केंद्र अउ मुख्यनिर्वाचन पदाधिकारी कार्यालय के वेबसाइट म दू अगस्त अउ अंतिम प्रकासन चार अक्टूबर के करे जाही।
एनआईटी-हैंड्स ऑन ट्रेनिंग प्रोग्राम
राष्ट्रीय प्रौद्योगिक संस्थान-एनआईटी रईपुर म छब्बीस जून ले सात जुलाई तक हैंड्स ऑन ट्रेनिंग प्रोग्राम होईस। ए प्रसिक्षण कारीकरम ल संस्थान के सिविल इंजीनियरिंग विभाग अउ आईजीएस रईपुर चैप्टर डहार ले राखे गे रिहीस। ए प्रसिक्षण कारीकरम म सत्ताईस झिन प्रतिभागी मन भाग लीन। समारोह के दउरान भारतीय भू-तकनीकी सोसाइटी रईपुर चैप्टर के स्थापना दिवस घलो मनाय गीस।
समापन समारोह म माईपहूना के रूप म आईजीएस के सचिव डॉक्टर ए.पी. सिंह मउजूद रिहीन। कारीकरम के पगरइती एनआईटी के निदेशक डॉक्टर एन.वी. रमना राव ह करीन।
सिविक एक्शन कार्यक्रम
सिविक एक्शन कार्यक्रम के चलत कलेक्टर एस. जयवर्धन अउ पुलिस अधीक्षक रत्ना सिंह ह मोहला-मानपुर-अंबागढ़ चौकी जिला के माओवाद प्रभावित गांव हुरेली अउ रेतेगांव म चौपाल लगा के गंवई के मनखे मन संग गोठबात करीन। ए दउरान ओमन स्कूली लइका मन ल खेल सामग्री घलो बांटिन।
मुंगेली -अभिव्यक्ति ऐप
मुंगेली जिला पुलिस डहार ले माईलोगिन अउ नोनी मनके सुरक्षा बर बनाय गे अभिव्यक्ति ऐप के प्रचार-प्रसार के संगे ओला डाउनलोड करय अउ रजिस्ट्रेसन खातिर जागरूक करे जात हे। इंही, कड़ी म पुलिस डहार ले जिला के कई ठिन गंवई म सप्ताहिक हॉट बाजार अउ स्कूल मन म माईलोगिन अउ नोनी पीला मन ल अभिव्यक्ति ऐप बारे म बताए गीस।
इंहा, ए बतादन कि छत्तीसगढ़ पुलिस डहार ले माईलोगिन अउ नोनी पीला मनके सुरक्षा खातिर अभिव्यक्ति ऐप लॉन्च करे गेहे। एखर माध्यम ले ओमन थाना जाय बिना कोनो जघा ले भी अपन सिकइत दरज करा सकत हे। जेखर निवारण पुलिस डहार ले तुरते करे जाथे।
राष्ट्रीय कृमि मुक्ति दिवस
छत्तीसगढ़ म अवइया दस अगस्त के राष्ट्रीय कृमि मुक्ति दिवस मनाय जाही। उहें, राज्य के दुरूग, बालोद, बेमेतरा, जांजगीर-चांपा, सक्ती, मुंगेली अउ महासमुंद जिला म दस ले सत्रह अगस्त तक फाइलेरिया उन्मूलन कार्यक्रम म सामूहिक रूप ले दवाई खवाय के कार्यक्रम राखे जाही।
राष्ट्रीय कृमि मुक्ति दिवस के दउरान दस अगस्त के प्रदेस म एक बछर ले उन्नीस बछर तक के सबो लइका मन ल कृमि मुक्ति के दवाई खवाय जाही। दस अगस्त के अभियान बेरा दवाई खाय ले छूटे लइका मन ल सत्रह अगस्त के दवाई खवाय जाही।
कृषि सलाह
कृषि वैज्ञानिक ह प्रदेस के किसान ल बोए के पहिली बीज मनके उपचार अउ अंकुरण परीक्षण करे के सलाह दे हे। कृषि वैज्ञानिक मनके कहना हे कि एखर ले बीजा म कीरा नई लागही अउ फसल के उत्पादन घलो बाढ़ही। किसान मन ल सलाह दे गेहे कि ओमन धान के दस बछर ले जादा जुनना किसम के चुनई झन करय। काबर कि ओमा कीरा, संबंधी रोग ले लड़े के पॉवर नइ रहय। संगे किसान मन जादा देरी ले पाकय तइसन धान के किसम के चुनाव घलो झन करय। काबर कि एखर ले रबीफसल परभावित होथे।
सावन समारोह
काली सावन के पहिली सम्मार हरय। एला देखत राजधानी रईपुर समेत प्रदेस भर के शंकर मंदिर मन म बिसेस इंतजाम करे गेहे।
राजनांदगांव म काली महाकाल चन्द्र मौलेश्वर के पालकी यात्रा निकाले जाही। ए पालकी यात्रा म भगवान चन्द्र मौलेश्वर ल सलामी घलो दे जाही। ए सोभा यात्रा ह नंदई हॉट बाजार ले सुरू होके सहर के कई ठिन रद्दा ले होवत बांसपाई पारा के शिव मंदिर म जाही। पालकी सोभा यात्रा म नामी गायक खिलेश यादव ह अपन टीम संग प्रस्तुति दिही।
उहें, कबीरधाम जिला के भोरमदेव मंदिर म काली कांवड़िया अउ श्रध्दालु मन डहार ले भगवान शिव के जल-अभिषेक अउ बिसेस पूजा-अर्चना करे जाही। काली बिहनिया श्रध्दालु मन कवर्धा के प्राचीन बूढ़ा महादेव मंदिर ले भोरमदेव मंदिर तक बर पद यात्रा सुरू करही। कलेक्टर जनमेजय महोबे ह आज पदयात्रा के तियारी ल लेके निरीक्षण करीन। संगे अधिकारी मन ल श्रध्दालु मन के स्वास्थ्य समेत आने जरूरी सोहलियत दे खातिर निरदेस घलो दीन।
मुख्यमंत्री भूपेश बघेल अउ विधानसभा अध्यक्ष डॉक्टर चरणदास महंत ह सावन महिना के पहिली सोमवार मउका म प्रदेसवासी मन ल बधई अउ सुभकामना दीन हे।
अउ अब थोरकुन समाचार सार म-
– वन मंत्री मोहम्मद अकबर ह आज कबीरधाम जिला के नगवाही गांव म प्रायमरी स्कूल भवन निर्माण काम के भूमिपूजन अउ सिलान्यास करीन।
– रईपुर ग्रामीण विधायक सत्यनारायण शर्मा अउ जिला केंद्रीय सहकारी बैंक के अध्यक्ष पंकज शर्मा ह स्कूली लइका अउ स्वयंसेवी संस्था मनके सदस्य मन संग आज रईपुर के पचपेड़ी नाका ले देवपुरी तक पौधारोपण करके स्वच्छ पर्यावरण के आरो दीन।
अउ
– जांजगीर-चांपा जिला के वेलविसर फॉउनडेसन अकलतरा डहार ले बनाहील गांव के ऋषभ विद्योदय महाविद्यालय म बड़का पत्रकार कुंजबिहारी साहू के सुरता म जैविक खेती अभियान, पौधारोपण, कैरियर गाइडेंस अउ जागरूकता कारीकरम राखे गे रिहीस।