प्रधानमंत्री दौरा-
प्रधानमंत्री नरेन्द्र मोदी ह परनदीन सात जुलाई के छत्तीसगढ़ आवत हे। प्रधानमंत्री ह रायपुर के साइंस कालेज मैदान म दू ठिन कार्यक्रम म सामिल होहीं। ओमन ह ए बेरा म कतकोन परियोजना के शिलान्यास अउ लोकार्पण करे के संगेसंग एक ठिन जनसभा ल संबोधित करहीं।
प्रधानमंत्री ह अपन रायपुर प्रवास के बेरा म छत्तीसगढ़ म बुनियादी ढांचा के विकास ल बढ़ावा देबर लगभग छै हजार चार सौ करोड़ रूपिया के पांच ठिन राष्ट्रीय राजमार्ग परियोजनाके शिलान्यास अउ लोकार्पण करही। ए बेरा म जउन परियोजना राष्ट्र ल दे जाही, ओमा जबलपुर-जगदलपुर राष्ट्रीय राजमार्ग म रायपुर ले कोडेबोड़ खंड के तैंतीस किलोमीटर फोरलेन रद्दा सामिल हे। एखर संगेसंग राष्ट्रीय राजमार्ग क्रमांक एक सौ तीस म बिलासपुर ले अंबिकापुर के बीच तिरपन किलोमीटर लंबा बिलासपुर पथरापाली फोरलेन खंड ल घलो देश ल दे जाही।
प्रधानमंत्री ह ए मउका म सिक्स लेन ग्रीनफिल्ड रायपुर विशाखापटनम कॉरिडोर के छत्तीसगढ़ खंड बर तीन राष्ट्रीय राजमार्ग परियोजना के आधारशिला घलो रखहीं। एखर अलावा प्रधानमंत्री ह एक सौ तीन किलोमीटर लंबा रायपुर खरियाररोड रेल लाईन दोहरीकरण परियोजना के संगे केवटी-अंतागढ़ ल जोड़इया सतरा किलोमीटर लंबा नवा रेलवे लाईन परियोजना घलो देश ल देवइया हे।
रायपुर म होय वाले कार्यक्रम के बेरा प्रधानमंत्री ह एक सौ तीस करोड़ रूपिया ले जादा के लागत ले कोरबा म बनत साठ हजार मीटरिक टन प्रतिवर्ष के क्षमता वाले इंडियन ऑयल कॉरपोरेशन के बॉटलिंग प्लांट ल घलो राष्ट्र ल समर्पित करही। एखरे संग प्रधानमंत्री ह ए मउका म आयुष्मान भारत के चलत लाभार्थी मन ल पचहत्तर लाख कारड बाटे के घलो शुरूआत करही।
गोधन न्याय योजना-राशि अंतरण
मुख्यमंत्री भूपेश बघेल ह प्रदेशवासी किसनहा, सरपंच, ग्राम पटेल, गौठान समिति अउ अधिकारी मनले गांवभर म छै ले सतरा जुलाई तक रोकाछेका करे के अपील करे हे। ओमन ह कहिन हे कि मानसून के आय के संगेसंग गांव म बोनी अउ रोपा के काम सुरू होगे हे, अइसन म फसल के रखवाली घलो जरूरी हे। रोकाछेका ले आवारा मवेशी मनले फसल ल बचाय म मदद मिलही। मुख्यमंत्री ह रोकाछेका बर गांव म मुनादी कराय अउ गोठान म पशु बर चारापानी के बेवस्था करे बर कीहिन हे।
मुख्यमंत्री भूपेश बघेल ह आज गोधन न्याय योजना के चलत हितग्राही मन के खाता म अठ्ठारा करोड़ सैंतालीस लाख रूपिया के ऑनलाइन अंतरण करीस। ए मउका म मुख्यमंत्री ह प्रदेशवासी मन ल हरेली तिहार के अग्रिम शुभकामना दीन हे। ओमन ह किसान मनले धान के संगेसंग खरीफ के आने फसल के रकबा बढ़ाय के आग्रह करत हुए कहिन हे कि किसान मन ल धान के अलावा खरीफ के आने फसल घलो लेना चाही।
राज्यपाल-समिति गठन
राज्यपाल विश्वभूषण हरिचंदन ह दुरूग के अंजोरा म दाउ श्री वासुदेव चंद्रकार कामधेनु विश्वविद्यालय म कुलपति के नियुक्ति बर एक झिन समिती के गठन करीन हे। राजभवन सचिवालय जारी करे गे अधिसूचना के अनुसार डॉक्टर बीजायांद सिंह ह समिति के अध्यक्ष होही। उहें, डॉक्टर अय्याज एफ. तम्बोली ह बिसेस सचिव बनाय गेहे। डॉक्टर सी.एस. प्रसाद ह समिति के सदस्य होही। ए समिति ह अधिसुचना प्रसारित होय के तारीख ले छै सप्ताह के भीतरी म कम से कम तीन मनखे के पैनल राज्यपाल ल प्रस्तुत करही।
स्वास्थ्य कर्मचारी-हड़ताल
रइपुर जिला के स्वास्थ्य कर्मचारी मन ह नियमतीकरण समेत अपन कतकोन मांग ल लेके काली ले अनिश्चिकालीन हड़ताल सुरू कर दे गेहे। एला देखत ले स्वास्थ्य विभाग ह जिला के सबो अस्पताल म स्टाफ के वैकल्पिक बेवस्था पूरा कर लेहे।
जिला के मुख्य चिकित्सा अउ स्वास्थ्य अधिकारी डॉक्टर मिथलेश चौधरी ह बताइन कि स्वास्थ्य कर्मचारी डहार ले हड़ताल म जाय ले पहिली सूचना ल देखत हुए सबो स्वास्थ्य संस्था म मरीज मन ल कोनो प्रकार के परेसानी झन होवय एकर बर वैकल्पिक बेवस्था अउ अपातकालीन सेवा म आने स्टाफ के ड्यूटी लगाय गेहे। ए बेरा म रइपुर जिला पंचायत क मुख्य कार्यपालन अधिकारी अविनाश मिश्रा ह जिला चिकित्सालय पंडरी, कालीबाड़ी एमसीएच अस्पताल समेत सामुदायिक अउ प्राथमिक स्वास्थ्य केन्द्र के निरीक्षण करीस।
महिला सफाईकर्मी-हमला
जांजगीर-चांपा जिला के अंधियारीपाठ गांव के मिडिल स्कूल परिसर म एक झिन महिला सफाइकर्मी उपर युवा कांग्रेस के कार्यकर्ता ह धारदार हथियार ले हमला कर दीस। जेकर ले माईलोगिन ह गंभीर रूप ले घायल होगे। जेला अकलतरा के अस्पताल म भरती कराय गे रिहीस। अस्पताल के डॉक्टर मन ह ओला बिलासपुर भेज दे हे। ए घटना के बाद ओरापी विजय यादव के गिरफ्तारी के मांग ल लेके भाजपा महिला मोर्चा के जिलाध्यक्ष रजनी साहू के नेतृत्व म माईलोगिन मन ह करिया पट्टी लगा के अकलतरा के सास्त्री चौक म धरना प्रदर्सन करीन।
जानबा के अनुसार घायल होय माईलोगिन के बेटी ह आरोपी विजय यादव के खिलाफ कुछू महिना के पहिली छेड़-छाड़ करे अउ धमकी दे के सिकायत थाना म दर्ज कराय रीहिन। सिकायत वापिस लेबर आरोपी ह माइलोगिन अउ ओखर बेटी उपर सरलग दबाव बनात रीहिस। जब माइलोगिन ह सिकायत ल वापिस नइ लीस त आरोपी ह आज ओखर उपर जानलेवा हमला कर दीस।
इही बीच नेता प्रतिपक्ष नारायण चंदेल ह महिला सफाईकर्मी उपर होय हमला के निंदा करीन हे। ओमन ह राज्य सरकार उपर आरोप लगाइन हे कि प्रदेश म कानून व्यवस्था ठप हे अउ माइलोगिन मन सुरक्षित नइ हरय।
फर्जी-ईडी
दुर्ग जिला के भिलाई पुलिस ह पाछू दिन म फर्जी ईडी के अधिकारी बनके अपहरण कर अउ दू करोड़ रूपिया के धोखाधड़ी के मामला म बारा झिन आरोपी मन ल गिरप्तार करे हे।
पुलिस ह इंखर तीर ले करीबन एक करोड़़ पच्चीस लाख रूपिया ले जादा के नकद राशि, सोना के जेवर अउ दस नग मोबाइल समेत आने जीनिस बराम दके हे। जिला के पुलिस अधीक्षक शलभ कुमार सिन्हा ह बताइन कि ए आरोपी मन ल पकड़े बर पुलिस के छै ठिन टीम डहार ले मुंबई के गोरेगांव समेत आने आने इलाका के संग नासिक के ओझर अउ डिंडोरी थाना क्षेत्र म सरलग एक हप्ता तक अभियान चलाये गे रीहिस।
युवक डूबे
दुर्ग जिला म शिवनाथ नदिया के तीर महमरा एनीकट म नहाये के दउरान दू झिन युवक मनके बूडे ले मउत होगे। मिले जानबा के अनुसार काली मंझनियां दूनो युवक मन ह अपन संगवारी मन संग महमरा एनीकट म नहाय बर गे रीहिन, इही बेरा एक झिन युवके के गोड़ फिसले ले ओ ह गहरा पानी म बूडे लगीस , जेला बचाय बर ओखर दूसर संगवारी ह घलो गहरा पानी म चल दीस जेखर ले दूनो झनके बूडे ले मउत होगे। जेखर बाद गोताखोर मनके मदद ले दूनो के शव ल बाहिर निकाले गीस।
मौसम
मउसम विभाग के अनुसार एक ठिन उपरी हवा के चक्रीय-चक्रवाती घेरा उत्तर बंगाल के खाड़ी अउ ओखर ले लगे मध्य बंगाल के खाड़ी के उपर बने हुए हे। एकर असर ले प्रदेस भर म चौबीस घंटा के भीतरी म कतकोन जघा म हल्का बारिस के संभावना हे। उहें, मउसम विभाग ह एक -दू ठिन जघा म भारी बारिस होय अउ आकासीय बिजली गिरे के चेतावनी दीन। प्रदेस म अधिकतम तापमान म कुछू बिसेस बदले के संभावना नो हरय।
अउ अब थोरकुन समाचार सार म-
– स्कूल शिक्षा विभाग डहार ले सहायक शिक्षक, शिक्षक अउ व्याख्याता के सीधी भर्ती बर आयोजित परीक्षा के परिणाम घोषित कर दे गेहे। लोक शिक्षण संचालनालय के अधिकारी मन ह बताइन कि एखर बर ऑनलाईन काउंसिलिंग तुरतेच शुरू करे जाही।
अउ
– दुर्ग जिला के पावर हाउस कैम्प-दू म पाछू रतिहा दू ठिन गुट के बीच मारपीट होगे रीहिस, एखर बाद दूनो गुट ह हंगामा करत हुए छावनी थाना के घेराव कर दीन। पुलिस ह ए मामला म तीन झिन आरोपी ल गिरप्तार करे हे ।