राज्यपाल विश्वभूषण हरिचंदन ह राजभवन म सिंगल यूज प्लास्टिक उपर प्रतिबंध लगाय के निर्देश अधिकारी मन ल देहे। काली अंतर्राष्ट्रीय प्लास्टिक बैग मुक्त दिवस के मउका म राज्यपाल ह कहिन कि राजभवन म उपयोग होवइया कोनो भी सामान बर सिंगल यूज प्लास्टिक के जगा कपड़ा या जूट ले बने थैली मनके इस्तेमाल करे जाय। ओमन कीहिन कि प्लास्टिक ले होवइया प्रदूषण ह विश्व बर बड़ा खतरा हे।
नया भारत उत्सव
प्रधानमंत्री नरेंद्र मोदी के अगवई म केंद्र के एनडी सरकार के नौ साल पूरा होय के मउमा म आज राजधानी रायपुर म नया भारत उत्सव कार्यक्रम राखे गीस। ए मउका म मुख्य अतिथि सांसद अरूण साव ह कहिन कि नौ साल के दउरान देश के आने आने जगा मन म कतकोन विकास के काम करे गेहे। नवा राष्ट्रीय शिक्षा नीति ले लइका मन ल रोजगार आधारित शिक्षा मिलत हे।
उंहे सांसद सुनील सोनी ह कीहिन कि केंद्र सरकार डहार ले चलाये जात कल्याणकारी योजना मनके फायदा लोगन ल मिलत हे। कार्यक्रम के अध्यक्षता करत विधायक बृजमोहन अग्रवाल ह कहिन कि नया भारत उत्सव कार्यक्रम के दउरान लइका मन ह आने आने प्रतियोगिता म भाग लीन, जेखर ले उंखर प्रतिभा आगू आय हे। ओमन प्रतिभागी लइका मन ल इनाम अउ प्रमाण पत्र दीन।
प्रधानमंत्री दौरा
प्रधानमंत्री नरेंद्र मोदी ह अवइया सात जुलाई के छत्तीसगढ़ प्रवास म रीही। ए दउरान ओमन राजधानी रायपुर के साइंस कॉलेज मैदान म राखे गे दू ठन कार्यक्रम म सामिल होही। श्री मोदी ह ए कार्यक्रम म जनसभा ल संबोधित करही। प्रधानमंत्री के अवई ल लेके भारतीय जनता पार्टी डहार ले तैयारी करे जात हे।
ए कार्यक्रम ल देखत भाजपा महिला मोर्चा रायपुर ग्रामीण के बइठका राखे गीस। ए बइठका म भाजपा महिला मोर्चा के प्रदेश अध्यक्ष शालिनी राजपूत ह कीहिन कि प्रधानमंत्री के रायपुर प्रवास ल लेके राज्य के जनता म उछाह देखे जात हे। ओमन कीहिन कि भाजपा संगठन डहार ले देगे काम ल महिला मोर्चा के टीम ह बने ढंग ले करत हे। ओमन यहू कीहिन कि प्रधानमंत्री के अगवई म केंद्र के एनडीए सरकार के नौ साल पूरा होय के मउका म देशभर म सेवा, सुशासन, अउ गरीब कल्याण के काम करे गेहे। जेखर सेती भाजपा के राष्ट्रीय महिला मोर्चा के तीन दिवसीय कार्यक्रम ल छत्तीसगढ़ म राखे गेहे।
संविदा कर्मचारी हड़ताल
प्रदेश के संविदा कर्मचारी मन ह नियमितिकरण के मांग ल लेके हड़ताल शुरू कर देहे। छत्तीसगढ़ सर्व विभागीय संविदा अधिकारी कर्मचारी संघ डहार ले ए जम्मों कर्मचारी मन ह एक जुलाई ले आठ जुलाई तक राज्य के आने आने जिला मन म धरना-प्रदर्शन करत हे। एखर बाद नौ जुलाई के रायपुर म विशाल धरना-प्रदर्शन करे जाही। ए प्रदर्शन म राज्य भर के संविदा कर्मचारी मन ह शामिल हे।
उंहे मुंगेली जिला के संविदा कर्मचारी मन ह काली ले अनिश्चितकालिन हड़ताल म चल देहे। ए कर्मचारी मनके कहना हे कि कांग्रेस ह अपन घोषणा पत्र म संविदा कर्मचारी मन ल नियमितिकरण करे के वादा करे रीहिन। लेकिन राज्य सरकार डहार ले चार साल बीते के बाद घलो पूरा नइ करे जात हे।
माओवादी समाचार
बीजापुर जिला के इसुलनार के जंगल म माओवादी मनके कैम्प ल पुलिस के टीम डहार ले ध्वस्त करे गीस। ए दउरान मउका ले एक ठन टिफिन बम वायर डेटोनेटर , जिलेटिन अउ कतकोन माओवादी जीनिस बरामद करे गीस।
जिला के अतिरिक्त पुलिस अधीक्षक चंद्रकांत ह बताइन हे कि जंगल म माओवादी मनके रेहे के सूचना मिले रीहिस हे। जेमा जीआरपीएफ, एसटीएफ अउ सीआरपीएफ कोरबा बटालियन के संयुक्त टीम ल रवाना करे गे रीहिस। ए दउरान पहिली ले घात लगाये बइठे माओवादी मन ह सुरक्षा बलके टीम उपर फायरिंग शुरू कर दीन। जवान मन डहार ले करे गे जवाबी कार्रवाई म माओवादी मन ह जंगल कोति भाग गे ।
सुरक्षा बल डहार ले ए मुठभेड़ म तीन-चार झन माओवादी के मारे जाय के आशंका जताय गेहे।
पुलिस अधिकारी सड़क निरीक्षण
बीजापुर जिला के बासागुड़ा ले सुकमा जिला के जगरगुण्डा तक सड़क बनाय के काम करे जात हे। ए सड़क के निरीक्षण करे खातिर सीआरपीएफ के डीआईजी अरविंद राय अउ पुलिस अधीक्षक किरण चौहान ह मउका म पहुंचीन। ए सड़क के बने ले बीजापुर अउ सुकमा जिला ह सोझे जुड़ जाही। एखर ले अवई जवई म सुविधा मिलही।
हाथी उत्पात
बालोद जिला के पुलिस कंट्रोल रूम म पाछू रतिहा एक ठन दंतैल हाथी ह घुस गे रीहिस। मिले खबर के मुताबिक ये हाथी करीबन दू घंटा तक थाना म रीहिस, ए दउरान पुलिस मन ह खुद ल थाना के कमरा म बंद कर लीन। ए दउरान हाथी ह कोनो प्रकार के नुकसान नइ करीन अउ खुद निकलके जंगल कोति चल दीस।
कांग्रेस प्रशिक्षण शिविर
राज्य म अवइया विधानसभा चुनई ल देखत बूथ प्रबंधन के संगेसंग चुनाव के तैयारी के बारे म कार्यकर्ता मन ल जानकारी देबर प्रदेश कांग्रेस कमेटी डहार ले काली ले नौ जुलाई तक प्रशिक्षण शिविर के आयोजन करे जाही। ए दउरान उन्नीस ठन विधानसभा क्षेत्र म प्रशिक्षण शिविर राखे जाही। अब तक तिरसठ ठन विधानसभा क्षेत्र मन म प्रशिक्षण शिविर के कार्यक्रम करे गेहे।
कृषि सप्ताह-खरीफ फसल बोनी
कृषि वैज्ञानिक मन ह राज्य के किसान मन ल धान बोवई ले पहिली बीज उपचार अउ अंकुरन के जांच पड़ताल करे के सलाह देहे। ओमन यहू कहिन कि सालभर फसल उत्पादन बर खरीफ फसल के कार्य योजना बनाना चाही। कृषि वैज्ञानिक मनके कहना हे कि बीजा के उपचार करे ले बीजा मन म कीरा नइ लगय अउ फसल उत्पादन म बढ़ोत्तरी घलो होथे।
उंहे प्रदेश म अब तक चालू खरीफ सीजन म तीन लाख तैंतीस हजार हेक्टेयर ले जादा के भुंइया म फसल मनके बोवाई करे गेहे। एखर संगेसंग किसान मन ल चार लाख इंक्यानबे हजार कुंटल बीजा अउ करीबन पौने सात लाख टन खातु दे गेहे। कृषि विभाग के अधिकारी मन ह बताइन हे कि चालू खरीफ सीजन म राज्य म अड़तालिस लाख बीस हजार भुंइया म फसल बोये के लक्ष्य राखे गेहे।
हरेली तिहार
अवइया हरेली तिहार के दिन लोगन मन ह रायपुर जिला के कोसरंगी गांव के रिपा म बने गेड़ी अउ पूजा के थारी के प्रयोग करही। ए थारी म स्व सहायता समूह के माइलोगिन अउ बंसोड़ लोगन मन डहार ले पूजा म उपयोग होवइया सामान काला तिली, हरदी, सुपाड़ी, पोनी-बत्ती, कपूर, अउ हवन सामिल हे। ए गेड़ी के कीमत ल एक सौ बीस रूपिया प्रति नग तय करे गेहे। उंहे पूजा के थारी ल पच्यासी रूपिया म बेचे जाही।
हरेली तिहार ह छत्तीसगढ़ के सबले पहिली तिहार हरय। ए तिहार ह लोगन मन ल छत्तीसगढ़ के संस्कृति अउ परंपरा ले चिन्हारी कराथे। ए तिहार ह खेती किसानी ले जुड़े तिहार हरय।
अउ अब थोरकुन समाचार सार म-
– राज्य मंत्रिपरिषद के बइठका ल छै जुलाई के रायपुर म राखे जाही। ए बइठका बर आने आने विभाग ले प्रस्ताव मंगाय गेहे। बइठका म संविदा कर्मचारी संघ के हड़ताल अउ आने मुद्दा मन उपर गोठबात करे जाही।
– कांकेर जिला के कोयलीबेड़ा थाना क्षेत्र म छब्बीस जून के जूगड़ा गांव निवासी एक मनखे के हत्या करे के जिम्मेदारी माओवादी मन ह लीन हे। पाछू दिन एखर शव ल पुलिस ह जंगल ले बरामद करे रीहिन।
– कबीरधाम जिला म बीते रतिहा ग्राम धरमपुरा अउ इंदौरी के बीच लोहा ले भरे ट्रेलर अंतेतंते होके पलट गीस। ए हादसा म ट्रेलर म बइठे दू झिन लोगन के दबके मउत होगे।
– दुर्ग जिला के नगपुरा के कोटनी नदिया म बने एनीकट ल काली पार करत बेरा एक झन जवान लईका बोहागे, जेखर अभी तक कोनो पता नइ चल पाय हे।
अउ
– रायपुर के गुढ़ियारी थाना पुलिस ह पच्चीस किलो गांजा के संग बिहार के एक झिन आरोपी ल गिरप्तार करीन हे। जब्त करे गे गांजा के कीमत ल करीबन दू लाख साठ हजार रूपिया बताय जात हे।