आज गुरू पूर्णिमा हरय। एला व्यास पूर्णिमा घलो केहे जाथे। ये परब आध्यात्मिक अउ शैक्षणिक गुरू मन ल समर्पित हवय। भगवान बुद्ध ह बोधि वृक्ष तरी ज्ञान लेके बाद अपन पहिली प्रवचन दे रीहिन। भगवान बुद्ध ह सारनाथ ले बोधगया के यात्रा करे रीहिन अउ पूर्णिमा के दिन प्रवचन दीन। आज के दिन भगवान बुद्ध के अनुयायी उंखर पूजा करथे। प्रधानमंत्री नरेंद्र मोदी ह गुरू पूर्णिमा के मउका म लोगन ल बधाई देत अपन संदेस म कीहिन कि गुरू पूर्णिमा गुरू अउ अध्यात्मिक शिक्षक मन कोति आभार जताय के तिहार हरय।
छत्तीसगढ़ के मुख्यमंत्री भूपेश बघेल ह प्रदेशवासी मन ल गुरू पूर्णिमा के शुभकामना देत कीहिन कि भारतीय संस्कृति म गुरू के सर्वोच्च स्थान हरय। गुरू कोति ले देगे अनमोल सीख ल जीवन म उतार के हमला आगू बढ़ना चाही। उंहे भारतीय जनता पार्टी के प्रदेश अध्यक्ष अरूण साव ह गुरू पूर्णिमा के मउका म राजधानी रायपुर के भारत सेवा आश्रम पहुंच के संत दर्शन अउ संत समागम के निमित्त स्वामी शिवरूपानंद पांडेय के दर्शन करीन अउ प्रदेश के सुख समृद्धि के कामना करीन।
ये बेरा म प्रदेश अध्यक्ष भारत माता के प्रतिमा म फूलमाला चढ़ईन।
प्रधानमंत्री दौरा
प्रधानमंत्री नरेंद्र मोदी अवइया सात जुलाई के रायपुर दौरा म रीही। ये दउरान ओमन साइंस कॉलेज मैदान म राखे गे जनसभा ल संबोधित करही। प्रधानमंत्री के आगमन ल लेके भारतीय जनता पार्टी ह अपन तियारी तेज कर देहे। प्रदेश अध्यक्ष अरूण साव, सांसद सुनील सोनी समेत भाजपा के बड़का नेता आज साइंस कॉलेज मैदान पहुंचके उंहा होवत तियारी ल देखीन। साइंस कॉलेज मैदान म वाटरप्रूफ डोम बनाय जात हे।
जनसभा अउ स्टॉल बर आने आने डोम बनाय गेहे। इंहा लगइया स्टॉल म केंद्र सरकार के आने-आने योजना ले जुड़े प्रदर्शनी लगाय जाही। कार्यक्रम स्थल के आज एसपीजी के टीम ह जांच करीन। प्रधानमंत्री के दउरा के बेरा सुरक्षा व्यवस्था बनाये राखे बर करीबन बारा सौ पुलिस कर्मचारी मनके ड्यूटी लगाय गेहे।
गृहमंत्री पिछड़ा वर्ग
भारतीय जनता पार्टी के बड़का नेता अउ केंद्रीय गृहमंत्री अमित शाह ह कीहिन हे कि केंद्र सरकार अन्य पिछड़ा वर्ग समुदाय के विकास खातिर सरलग काम करत हे। ओमन पाछू नौ बछर म ये समुदाय के विकास अउ उंखर जीवन म आय बदलाव बर करे गे उपाय ल बताइन। श्री शाह काली लखनउ म भारतीय जनता पार्टी के एक समारोह ल संबोधित करत रीहिन।
राजनीतिक पार्टी-वित्तीय लेखा
राजनीतिक पार्टी अब अपन वित्तीय लेखा ल ऑनलाईन दर्ज करा सकही। निर्वाचन आयोग ह राजनीतिक दल कोति ले चंदा, रिपोर्ट, वार्षिक लेखा अउ निर्वाचन व्यय विवरण दर्ज कराय बर एक वेब पोर्टल शुरू करे हे। आयोग ह सबो राजनीतिक पार्टी ल जारी एक चिट्ठी म केहे हे कि वित्तीय विवरण ल बेरा म दर्ज कराय अउ रिपोर्ट ल प्रत्यक्ष रूप ले जमा कराय म अवइया परसानी ल खतम करे के प्रबंध करे गेहे।
मतदाता सूची-पुनरीक्षण
छत्तीसगढ़ म एसो होवइया विधानसभा चुनई ल लेके भारत निर्वाचन आयोग ह प्रसासनिक तइयारी तेज कर दे हे। चुनाव के पहिली मतदाता सूची म नाम जोड़े, हटाये अउ सुधारे के काम चलत हे। एखर बर प्रदेस म निर्वाचक नामावली के द्वितीय विसेस संक्षिप्त पुनरीक्षण के काम चलत हे। ए दउरान बीएलओ कोति ले घरो-घर जाके सर्वे के काम करे जात हे। सर्वे म नवा पंजीकरण, मउत अउ स्थायी रूप ले स्थानांतरित मतदाता मनके पहिचान करे जात हे।
सर्वे म अठारा बछर के अपंजीकृत नागरिक मनके नाव मतदाता सूची म जोड़े खातिर अर्जी भरे जाही। ये बखत पुनरीक्षण बर तारीख एक अक्टूबर दू हजार तेईस तय करे गेहे। माने ये तारीख या एखर पहिली जउन मन अठारा बछर पूरा कर लीहीं उखर मनके नाव मतदाता सूची म जोड़े जा सकही। ऑनलाईन फारम भरे बर वोटर हेल्पलाईन एप अउ वोटर सर्विस पोर्टल हवय। निर्वाचन आयोग कोति ले जारी कार्यक्रम के मुताबिक मतदाता सूची के प्रारंभिक प्रकासन प्रदेश के जम्मों मतदान केंद्र अउ मुख्य निर्वाचन पदाधिकारी कार्यालय के वेबसाइट म दू अगस्त अउ आखरी प्रकासन चार अक्टूबर के करे जाही।
शिक्षक-परिणाम
छत्तीसगढ़ व्यावसायिक परीक्षा मंडल व्यापम कोति ले शिक्षक, सहायक शिक्षक अउ व्याख्याता के पद बर आयोजित भर्ती परीक्षा के नतीजा जारी कर दे गेहे। अभ्यर्थी व्यापम के वेबसाइट म लॉगइन करके नतीजा देख सकत हे। व्यापम कोति ले लेगे लिखित परीक्षा म मिले कुल अंक म अतिथि शिक्षक के बोनस अंक जोड़के परीक्षा के नतीजा घोषित करे गेहे।
उंहे छत्तीसगढ़ माध्यमिक शिक्षा मंडल कोति ले राखे गे हाईस्कूल अउ हायरसेकण्डरी मुख्य परीक्षा के पुर्नगणना अउ पुर्नमूल्यांकन परीक्षा के नतीजा घोषित कर दे गेहे। परीक्षार्थी मंडल के वेबसाइट म नतीजा देख सकत हे। जउन विद्यार्थी मन एखर बर अर्जी दे रीहिन, ओमन पूरक या अवसर परीक्षा बर अर्जी देना चाहत हें, त जिला मुख्यालय म समन्वय संस्था या विकासखंड के शासकीय स्कूल ले काली चार जुलाई तक ऑनलाईन अर्जी जमा कर सकत हे।
महिला पर्यवेक्षक भर्ती
प्रदेश म महिला अउ बाल विकास विभाग कोति ले पर्यवेक्षक के चार सौ चालीस खाली पद म भर्ती बर अर्जी मंगाय गेहे। ये पद म नियुक्ति छत्तीसगढ़ व्यावसायिक परीक्षा मंडल कोति ले राखे गे प्रतियोगी परीक्षा ले करे जाही। ये परीक्षा बर छत्तीसगढ़ के मूल निवासी, महिला उम्मीदवार पात्र होही।
परीक्षा खुली सीधी भर्ती अउ परिसिमित सीधी भर्ती ले, ले जाही। खुली सीधी भर्ती बर दू सौ बीस पद मंजूर हवय, जेमा जम्मों वर्ग के माइलोगिन अर्जी कर सकत हे। उंहे परिसिमित सीधी भर्ती बर घलो दू सौ बीस पद मंजूर करे गेहे। एमा सिरिफ आंगनबाड़ी कार्यकर्ता मन ही अर्जी दे सकही।
संविदा कर्मचारी हड़ताल
नियमितीकरण के मांग ल लेके प्रदेश के संविदा कर्मचारी मन ह अपन हड़ताल शुरू कर देहे। छत्तीसगढ़ सर्व विभागीय संविदा अधिकारी कर्मचारी संघ के बैनर तले ए जम्मों कर्मचारी एक ले आठ जुलाई तक आने-आने जिला म धरना प्रदर्शन करत हे। नौ जुलाई के रायपुर म विशाल धरना प्रदर्शन करे जाही जेमा राज्य भर के संविदा कर्मचारी सामिल होही। एमा जांजगीर-चांपा जिला म संविदा कर्मचारी मन ह कचहरी चौक म नियमितीकरण के मांग ल लेके आज धरना पद्रर्शन करीन।
गाड़ी के फिटनेस जांच बर प्रदेस के पहिली ऑटोमेटिक फिटनेस टेसि्ंटग सेंटर रइपुर म तियार होगे हे। ए सेंटर म आधुनिक मसीन के मदद ले गाड़ी के फिटनेस जांच करे जाही। रद्दा हादसा ल रोके बर परिवहन विभाग ह ए केंद्र के स्थापना करे हे। एखर पहिली फिटनेस निरीक्षण के काम आरटीओ ऑफिस म करके प्रमाण पत्र जारी करे जात रिहीस । अब प्रदेस म एक अप्रैल दू हजार चोबीस ले ऑटोमेटिक फिटनेस सेंटर ले हैवी गाड़ी के फिटनेस प्रमाण-पत्र लेना जरूरी कर देगे हे। अउ एखर बर अधिसूचना जारी कर दे गेहे।
सावन मास
काली ले सावन के महिना सुरू होवत हे। एखरे संग भगवान शंकर के पूजा, अभिषेक, मंदिर देवाला अउ घरो-घर सुरू हो जही। ए मउका म मुख्यमंत्री भूपेश बघेल ह प्रदेसवासी मन ल सुभकामना देत सुख-समृध्दि अउ खुशहाली के मानता मानीन हे। उंहे, प्रदेस म ऐसो हरेली तिहार के मउका म लोगन बर गेड़ी के सशुल्क व्यवस्था वन विभाग कोति ले करे जाही। ए गेड़ी वन विभाग के कार्यालय अउ सीमार्ट म मिलही।
मौसम
प्रदेस म अवइया चौबीस घंटा म कुछेक जघा छुट-पूट बरसा होय के संभावना हे। उंहे, एक-दू जघा गरज-चमक संग गाज गिर सकत हे। मउसम विभाग के मुताबिक उपरी हवा म चक्रीय वक्रवाती घेरा बने हे, जेखर परभाव ले काली बरसा होय के संभावना हे।