देस म आनुवंसिक बीमारी सिकलसेल ल दूर करे बर प्रधानमंत्री नरेंद्र मोदी आज मध्यप्रदेस के लालपुर गांव म लोगन मन म राष्ट्रीय सिकल सेल रक्त अल्पता उपचार अभियान-2047 के सुरूआत करीन। ए दउरान प्रधानमंत्री ह लाभार्थी मन ल सिकल सेल जेनेटिक स्टेटस कार्ड घलो प्रदान करीन।
ए मउका म प्रधानमंत्री ह किहीन कि केंद्र सरकार ह आदिवासी भाई-बहिनी के कल्याण बर प्रतिबध्द हवय। सिकलसेल एनीमिया मुक्ति मिशन के सुरू होय ले उंखर जीवन म महत्वपूर्ण बदलाव आही सरकार के प्रयास हावय कि ए बीमारी कम होवय अउ एखर ईलाज के खरचा घलो कम होवय।
बछर दू हजार सैतालीस तक सिकलसेल बीमारी ल खतम करे बर देस के सत्रह राज्य के दू सौ अठहत्तर जिला म ए मिशन संचालित करे जाही। एमा छत्तीसगढ़ के सब्बों तैंतीस जिला सामिल होही।
राजनाथ सिंह-कांकेर
रक्षा मंत्री अउ भाजपा के बड़का नेता राजनाथ सिंह ह किहीन हे कि छत्तीसगढ़ के कांग्रेस सरकार ह वामपंथी उग्रवाद ले लेके गंभीर नइ हवय। आज अपन छत्तीसगढ़ प्रवास के दउरान कांकेर म आमसभा ल संबोधित करत हुए राजनाथ िंसंह ह किहीन कि प्रधानमंत्री नरेंद्र मोदी के अगुवई म केंद्र के एनडीए सरकार ह पाछू नौ बछर म वामपंथी उग्रवाद उपर लगाम लगाय हे। अउ अब माओवादी समस्या ह देस के थोरकुन राज्य मन म ही बाचे हवय।
ओमन किहीन कि भाजपा सदैव ले आदिवासी हितैषी रहे हे, जबकि कांग्रेस ह अतका बछर ले देस म राज करीस, फेर जनजातीय क्षेत्र के विकास बर कुछू नइ करीस। राजनाथ सिंह ह आरोप लगाइन कि छत्तीसगढ़ म कांग्रेस सासन काल म जबरदस्ती अउ गलत ढंग ले धरम परिवर्तन कराय जावत हे। जेमा रोक लगाय जाना चाही।
भाजपा नेता ह कांकेर प्रवास के दउरान संपर्क से समर्थन अभियान के तहत परसिध्द काष्ठसिल्पकार पद्मश्री अजयकुमार मंडावी ले उंखर घर म भेंट करीन । एखर अलावा वीर गुंडाधूर के मूर्ति म पुष्पांजली घलो अर्पित करीन। ए अवसर म प्रदेस भाजपा अध्यक्ष अरूण साव अउ भाजपा के राष्ट्रीय उपाध्यक्ष डॉक्टर रमन सिंह ह घलो संग म रहीन।
मुख्यमंत्री-लोकार्पण
राज्य म ‘‘मुख्यमंत्री मितान योजना‘‘ आज ले सब्बो नगर पालिका म घलो सुरू होगे हे। एखर बाद अब मितान योजना के अंतर्गत श्रमिक कार्ड समेत पच्चीस तरह के सेवा के सुबिधा घर बइठे हितग्राही मन ल मिलही। मुख्यमंत्री भूपेश बघेल ह आज रइपुर म वीडियो कॉन्फ्रेंसिंग ले ए योजना के सुभारंभ करीन जेमा मितान योजना के एक लाखवां सर्टीफिकेट ल हितग्राही ल सौपिन। ओमन ह सहरी क्षेत्र के मनखे मन ल रोजगार ले जोड़े बर अरबन इंडस्ट्रीयल पार्क योजना के सिलान्यास करीन अउ ओखर संगेसंग नगरीय प्रसासन अउ विकास विभाग के अंतर्गत चलाय जावत आने-आने योजना के बिस्तार घलो करीन। मुख्यमंत्री ह श्रम स्वास्थ्य योजना के तहत मोबाइल मेडिकल यूनिट ल हरियर झंडा दिखाके रवाना करीन।
ए मउका म मुख्यमंत्री ह जांजगीर-चांपा जिला के खोखसा म नवा रेलवे ओवरब्रिज के वर्चुवली लोकार्पण करीन। ए ओवरब्रिज ह चांपा अउ जांजगीर ल जोड़े के काम आही। एखर निर्माण उनतीस करोड़ रूपिया ले जादा के रासि ले करे गेहे। जांजगीर-चांपा ले विधानसभा अध्यक्ष डॉक्टर चरणदास महंत ह ए कारीकरम म वर्चुवली जुड़े रिहीन।
संसद-सत्र
संसद के मानसून सत्र ए महीना के बीस तारीक ले सुरू होके ग्यारा अगस्त तक चलही। केन्द्रीय संसदीय कार्य मंत्री प्रहलाद जोशी ह ट्वीट करके ए जानकारी दीन। श्री जोशी ह सब्बो राजनीतिक दल ले मानसून सत्र म सक्रिय भागीदारी करे अउ विधायी मामला संग आने-आने मुद्दा म सार्थक चर्चा करे के अपिल करे हे।
प्रधानमंत्री-सहकारिता सम्मेलन
प्रधानमंत्री नरेंद्र मोदी ह किहीन कि अमृत काल म देस के गांव-गवई अउ किसान मनके क्षमता बढ़ाय बर सहकारिता क्षेत्र के भूमिका बहुत जादा बढ़ने वाला हे।
प्रधानमंत्री ह आज नई दिल्ली म सत्रहवां भारतीय सहकारिता सम्मेलन के उद्घाटन मउका म किहीन कि केंद्र सरकार ह खेती अउ किसान के कल्याण बर हर बछर साढ़े छै लाख करोड़ रूपिया ले जादा खर्चा करत हे। ओमन किहीन कि सरकारी योजना ले छोटे अउ मंझला किसान ल बहुत फायदा होय हे। भारतीय जनता पार्टी सरकार ह किसान मन ल आने-आने योजना के जरिए हर बछर म पचास हजार रूपिया के गारंटी देहे।
किसनहा मन बर आने-आने कल्याणकारी योजना के उल्लेख करत हुए प्रधानमंत्री ह किहीन कि कई करोड़ छोटे किसान मन ल प्रधानमंत्री किसान योजना के लाभ मिलत हवय जेखर तहत उंखर बैंक खाता म दू लाख पचास हजार करोड़ रूपिया के सीधा ट्रांसफर करे गेहे। श्री मोदी ह किहीन कि सरकार ह देस म प्राकृतिक खेती ल बढ़ावा देवत हे। ओमन ह सहकारिता क्षेत्र ले सुक्ष्म सिंचाई परियोजना, अनाज भंडारण सुविधा, तकनीक के उपयोग अउ डिजीटल प्रणाली स्थापित करे के आवाहन करीन।
ए मउका म भारतीय राष्ट्रीय सहकारिता संघ ह दू दिन के भारतीय सहकारिता सम्मेलन आयोजित करे हे।
प्रधानमंत्री छत्तीसगढ़ दौरा
अवइया सात जुलाई के प्रधानमंत्री नरेंद्र मोदी के रइपुर प्रवास के कारीकरम प्रस्तावित हे। पार्टी सूत्र ले मिले जानकारी अनुसार प्रधानमंत्री ह विसेस विमान ले बिहनिया रइपुर के स्वामी विवेकानंद एयरपोर्ट पहुंचही जहां ले ओमन ह रइपुर के साइंस कॉलेज मैदान बर रवाना हो जाही। उहां, आमसभा ल संबोधित करत हुए भारतमाला प्रोजेक्ट समेत तीन आने-आने योजना मनके सिलान्यास करही। एखर बाद श्री मोदी ह हेलीकाप्टर ले ही रइपुर एयरपोर्ट पहुंचही अउ विसेस विमान ले दिल्ली लहूट जही।
प्रधानमंत्री के प्रस्तावित कारीकरम अउ आमसभा ले लेके रइपुर सांसद सुनील सोनी अउ भाजपा के वरिष्ठ विधायक बृजमोहन अग्रवाल ह साइंस कॉलेज मैदान पहुंचीन अउ तइयारी के जायजा लीन।
मतदाता सूची-पुनरीक्षण
प्रदेस म ए बछर म होवइया विधानसभा चुनाव ल देखत हुए मतदाता सूची के दूसरइया विसेष संक्षिप्त पुनरीक्षण के काम करे जात हे। एमा घर-घर सर्वे के काम चलत हवय जेमा वोटर लिस्ट म छूटे अउ स्थानांतरित होय मतदाता मनके पहिचान करे जात हे। ए सर्वे म अठ्ठारा बछर के युवा मन के नाम मतदाता सूची म जोड़े बर आवेदन घलो भरवाय जाही। संगेसंग दिवंगत अउ स्थायी रूप ले दूसर जघा चल दिए मतदाता मन के नाम सूची ले हटाय जाही। निर्वाचन आयोग कोति ले ए सर्वे ले संबंधित वोटर हेल्पलाइन एप अउ वोटर सर्विस पोर्टल उपलब्ध कराय गेहे।
भारत निर्वाचन आयोग कोति ले जारी कारीकरम अनुसार मतदाता सूची के प्रारंभिक प्रकासन प्रदेस के सब्बो मतदाता केन्द्र अउ मुख्य निर्वाचन पदाधिकारी कार्यालय के वेबसाइट म दू अगस्त के करे जाही। उहें, आखरी प्रकासन चार अक्टूबर के होही। दू अगस्त ले इकतीस अगस्त तक प्रदेस के सब्बो बूथ म फार्म बर बड़का प्रचार-प्रसार अउ आने-आने जन-जागरूकता कारीकरम चलाय जाही। बारा अउ तेरह अगस्त अउ उन्नीस अउ बीस अगस्त के बिसेस सिविर के आयोजन घलो करे जाही।
मुख्यनिर्वाचन पदाधिकारी रीना बाबासाहेब कंगाले ह बताइन कि प्रदेस म मतदाता सूची म अब तक एक लाख छियान्बे हजार ले जादा नवा मतदाता मन के नाम जोड़े जा चुके हे।
अउ अब थोरकुन समाचार सार म-
– विस्व सोसल मीडिया दिवस के मउका म काली रइपुर म एक दिवसीय कार्यसाला आयोजित होइस। ए आयोजन जनसंपर्क विभाग, यूनीसेफ अउ छत्तीसगढ़ एलायंस फॉर बिहेवियर चेंज कोति ले कराय गे रिहीस।
– छत्तीसगढ़ व्यावसायिक परीक्षा मंडल व्यापम कोति ले पी.ए.टी. अउ पी.व्ही.पी.टी. भरती परीक्षा काली दू जुलाई के बिहनिया नौ बजे ले प्रदेस के नौ केन्द्र म आयोजित करे जाही।
– संघ लोक सेवा आयोग यूपीएससी द्वारा आयोजित इनफोर्समेंट ऑफिसर, अकाउंटेंट ऑफिसर अउ असिसटेंट प्रोविडेंट फंड कमिश्नर के परीक्षा काली दू जुलाई के दू पॉली म आयोजित करे जाही।
– रइपुर स्थित जिला रोजगार कार्यालय म तीन जुलाई के शिक्षित बेरोजगार मन बर रोजगार मेला के आयोजन करे जाही। जेमा चार सौ ले जादा पद बर भरती प्रक्रिया होही।