देस म आनुवंशिक बीमारी सिकल सेल ल दूर करे के सेती केन्द्र सरकार डहार ले सिकल सेल एनीमिया उन्मूलन मिशन के सुरूआत करे जात हे। प्रधानमंत्री नरेन्द्र मोदी काली एक जुलाई के मध्यप्रदेस ले ए मिसन के सुभारंभ करही। ए दउरान प्रधानमंत्री लाभार्थी मन ल सिकल सेल जेनेटिक स्टेटस कार्ड घलो बाटहीं। छत्तीसगढ़ के स्वास्थ्य मंत्री टी.एस. सिंहदेव वीडियो कांफ्रेंस के माध्यम ले ए मिसन के सुभारंभ कार्यक्रम ले जुड़ही।
बछर दू हजार सैतालीस तक सिकल सेल ल खतम करे बर देस के सत्रह राज्य के दू सौ अठत्तर जिला म ए मिसन संचालित करे जाही एमा छत्तीसगढ़ के जम्मों तैंतीस जिला सामिल हे।
स्वास्थ्य विभाग के उप संचालक डॉक्टर खेमराज सोनवानी ह बताइन कि मिसन के अंतर्गत विकासखण्ड स्तर म लोगन मन ल सिकलसेल के कारण अउ बचाव के उपाय बताय जाही। संघरा जरूरी जांच अउ इलाज सुविधा घलो देवाय जाही।
जे.पी. नड्डा
भारतीय जनता पार्टी के राष्ट्रीय अध्यक्ष जगत प्रकाश नड्डा आज बिलासपुर के रेलवे फुटबाल मैदान म आमसभा ल संबोधित करत हे। ए मउका म बड़ संख्या म भाजपा कार्यकर्ता अउ आमजन मौजूद हवय। सभा के बाद भाजपा अध्यक्ष श्री नड्डा पार्टी के संपर्क ले समर्थन अभियान के तहत सिंधु अमरधाम जाके पूज्य लालदास जी ले भेंट करहीं।
लाभार्थी सम्मेलन
प्रधानमंत्री नरेंद्र मोदी के अगवई म केंद्र के एनडीए सरकार के नौ बछर पूरा होय के उपलक्ष्य म भारतीय जनता पार्टी डहार ले ए दिन म महा जनसंपर्क अभियान चलाये जात हे। एखर अंतर्गत काली रायपुर म लाभार्थी सम्मेलन के आयोजन करे गीस। कार्यक्रम म भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमन सिंह अउ सांसद सुनील सोनी, विधायक बृजमोहन अग्रवाल, पूर्व मंत्री राजेश मूणत अउ भाजपा जिला अध्यक्ष जयंती पटेल ह लाभार्थी मन ल सम्मानित करीन।
ए मउका म पूर्व मुख्यमंत्री डॅाक्टर रमन सिंह ह प्रधानमंत्री नरेंद्र मोदी के नौ साल के कार्यकाल के उपलब्धि बताइन। ओमन कीहिन कि केंद्र सरकार देश के एक सौ चालीस करोड़ के आबादी ल कोरोना वैक्सीन मुफ्त म दीन। उंहे अस्सी करोड़ जनता ल हर महीना पांच किलो प्रति व्यक्ति मुप्त अनाज दीन। उंहे श्री सिंह ह कीहिन कि राज्य के कांग्रेस सरकार वादाखिलाफी करके जनता ले छलावा करत हे। एखरे संग ओमन राज्य सरकार उपर कोयला, शराब अउ चांउर घोटाला करे के घलो आरोप लगाइन।
प्रधानमंत्री आवास योजना राशि
मुख्यमंत्री भूपेश बघेल ह आज प्रधानमंत्री आवास योजना ग्रामीण के तहत उनचास हजार ले जादा हितग्राही मनके खाता म एक सौ इंक्यावन करोड़ रूपिया के राशि के ऑनलाईन अंतरण करीन। उंहे मुख्यमंत्री ह बेरोजगारी भत्ता योजना के तीसरा किस्त के रूप म एक लाख सोला हजार हितग्राही मनके खाता म करीब बत्तीस करोड़ रूपिया के राशि घलो अंतरित करीन।
ए मउका म मुख्यमंत्री ह कहिन कि प्रधानमंत्री आवास योजना ग्रामीण के पाछू दस बछर म जुड़े नवा हितग्राही मन ल आवास उपलब्ध कराय बर राज्य सरकार केंद्र ले आग्रह करही। एखरे संग ओमन यहू कीहिन कि यदि केंद्र ले अनुमति नइ मिलही तभो राज्य सरकार नवा हितग्राही मन ल आवास उपलब्ध कराय बर योजना बनाही।
मुख्यमंत्री ह कहिन कि राज्य सरकार प्रदेश के युवा मन ल रोजगार अउ स्व रोजगार के जादा ले जादा मउका म उपलब्ध कराना चाहथे। ए उद्देश्य ले शासकीय विभाग मन म बड़का संख्या म भर्ती करे जात हे। उंहे युवा मन ल आर्थिक संबल देबर बेरोजगारी भत्ता के संग कौशल विकास के प्रशिक्षण घलो दे जात हे।
अशोक चतुर्वेदी-गिरफ्तार
छत्तीसगढ़ पाठ्य पुस्तक निगम के पूर्व महाप्रबंधक अशोक चतुर्वेदी ल आज ईओडब्ल्यू अउ एसीबी के टीम ह आंध्रप्रदेस ले गिरफ्तार करीन। बतादन कि श्री चतुर्वेदी उपर आय ले जादा संपत्ति के मामला दरज हरय। ए मामला म पहिली श्री चतुर्वेदी ल हाईकोर्ट ले राहत मिले रहीस फेर कुछ दिन पहिली एला निरस्त कर दे गीस, जेखर बाद ए कार्रवाई करे गीस।
ऑटोमेटिक चालान
प्रदेश म बिना फिटनेस अउ बिना टैक्स वाला वाहन मनके सड़क ले गुजरे ले अब ऑटोमेटिक चालान करे जाही। राज्य सरकार के परिवहन विभाग ह आने आने रद्दा मन उपर अब ए.एन.पी.आर. ई-डिटेक्शन सिस्टम शुरू करे के तियारी पूरा कर लेहे। तुरते एखर शुरूआत करे जाही।
परिवहन विभाग के अनुसार छत्तीसगढ़ म आने आने रद्दा म चलइया अइसे गाड़ी मनके पता लगाय बर पहिली चरण म नौ जगा म ए.एन.पी.आर. कैमरा लगाय गेहे। ए कैमरा परिवहन विभाग के वाहन सॉफ्टवेयर अउ ई-डिटेक्शन सिस्टम ले जुड़े हे जउन बिना फिटनेस अउ टैक्स के चलइया गाड़ी मन ल पहिचान के ऑटोमेटिक चालान कार्रवाई करही। चालान एस.एम.एस. के माध्यम ले वाहन के मालिक के मोबाइल म भेज दे जाही अउ जब तक ओखर भुगतान नइ होही तब तक ओ गाड़ी ले जुड़े जम्मों काम सबो आरटीओ म प्रतिबंधित रीही।
पहिली चरण म महासमुंद-बसना-पदमपुर मार्ग, सराईपाली-सारंगढ़, जयराम नगर-मस्तूरी, रायपुर-अभनपुर-भरेंगाभाटा, पत्थलगांव-अंबिकापुर, डोंगरगढ़- राजनांदगांव, रायगढ़-तेंदुआभाटा, रायगढ़-सरिया अउ नगरी रद्दा म ई-डिटेक्शन सिस्टम लगाये जा चुके हे।
एफ.एम. चैनल
काली एक जुलाई ले आकाशवाणी रायपुर के एफ.एम. चैनल ले विविध भारती के कार्यक्रम के जगा म आकाशवाणी रायपुर के प्रायमरी चैनल के कार्यक्रम प्रसारित करे जाही। इस दौरान विविध भारती के सिरिफ प्रायोजित कार्यक्रम मुंबई ले रिले करे जाही।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत मानसून के मउसम म होवइया बीमारी के कारण अउ बचाव म केंद्रित रिही। ए संबंध म संचालक महामारी नियंत्रण डॉक्टर सुभाष मिश्रा ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली एक जुलाई के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
नव आरक्षक-दीक्षांत
रायपुर के माना स्थित पुलिस प्रशिक्षण विद्यालय म आज नव आरक्षक मन बर बुनियादी प्रशिक्षण दीक्षांत परेड के आयोजन करे गीस। ए दीक्षांत परेड म तीन सौ आठ महिला, एक सौ उनचास पुरूष अउ बारा तृतीय लिंग समुदाय के नवा आरक्षक सामिल होइन। ए मउका म मुख्य अतिथि के रूप म मउजूद गुप्त वार्ता शाखा के पुलिस महानिरीक्षक अजय यादव ह किहीन कि प्रसिक्षण हमेसा एक तरासे के प्रक्रिया होथे। ओमन किहीन कि अपराध अउ अपराधी मनके आपराधिक कार्यप्रणाली म घलो बदलाव होवत हे, एखरे सेती आपमन ल अइसन कार्य प्रणाली बर सतर्क रेहे के जरूरत हरय।
ए मउका म ऑल राउण्ड बेस्ट प्रशिक्षणार्थी के पहला स्थान महिला नवआरक्षक अभिलाषा सिंह ल अउ पुरूष नवआरक्षक ऑल राउण्ड बेस्ट प्रशिक्षणार्थी के प्रथम स्थान मिथलेश पुजारी ल मिलिस।
राष्ट्रीय सांख्यिकी दिवस
राष्ट्रीय सांख्यिकी दिवस के मउका म काली रइपुर के पंडित रविशंकर शुक्ल विश्वविद्यालय म कारीकरम राखे गीस। ए मउका म मुख्य अतिथि कुलपति प्रोफेसर सच्चिदानंद शुक्ल ह सांख्यिकी के महत्व म जोर देवत छात्र मन ल सांख्यिकी के तकनीक अउ ओखर अनुप्रयोग बर जागरूक करीन। ओमन किहीन कि कोनो भी क्षेत्र म बड़का कार्य सुरू करे ले पहिली केन्द्र सरकार, राज्य सरकार अउ दूसर संस्था डहार ले योजना बनाय, विश्लेषण अउ परिणाम के आकलन करे बर सांख्यिकी के विशेष प्रयोग करे जात हे। श्री शुक्ल ह किहीन कि सांख्यिकी के बिना अनुसंधान के कोनो भी काम पूरा करना असंभव हरय।
कारीकरम के अध्यक्षता राष्ट्रीय सांख्यिकी कार्यालय रइपुर के उप महानिदेशक रोशन लाल साहू ह करीन। ए मउका म प्रश्नोत्तरी प्रतियोगिता के आयोजन घलो करे गीस।