प्रधानमंत्री नरेन्द्र मोदी ह केहे हे कि देस म लोगन मन ल यूनिफॉर्म सिविल कोड के नाम म भड़काय जात हे। ओमन किहीन कि भारत के संविधान म घलो नागरिक मनके समान अधिकार के बात केहे गेहे। सुप्रीम कोर्ट घलो काहत हे कि कॉमन सिविल कोड लाओ। श्री मोदी भोपाल म भाजपा के ‘‘मेरा बूथ-सबसे मजबूत‘‘ कारीकरम म कार्यकर्ता मन ले संवाद करत हुए किहीन कि एक घर म परिवार के सदस्य बर एक कानून हो। उहें, परिवार के दूसर सदस्य बर दूसरइया कानून हो, त का ओ घर चल पाही ? फेर अइसना दोहरा व्यवस्था ले देस कइसे चल पाही।
श्री मोदी ह कार्यकर्ता मन के प्रश्न के उत्तर म विपक्षी एकता ले लेके सरकार के योजना तक तमाम बिसय उपर प्रकास डालीन। ‘‘मेरा बूथ-सबसे मजबूत‘‘ अभियान के तहत प्रधानमंत्री ह आज देशभर के पांच सौ तिरालीस लोकसभा म दस लाख अउ मध्यप्रदेश के चौंसठ हजार ले जादा बूथ के कार्यकर्ता मन ल संबोधित करीन। देस म बूथ सशक्तिकरण अभियान म महत्वपूर्ण भूमिका निभइया अलग-अलग प्रदेश के विधानसभा क्षेत्र मन ले चुने गे तीन हजार भाजपा कार्यकर्ता मन ल प्रधानमंत्री ले संवाद के मौका मिलीस। एमा छत्तीसगढ़ के सौ झन कार्यकर्ता मन घलो सामिल रिहीन।
‘‘मेरा बूथ-सबसे मजबूत‘‘ कार्यक्रम म प्रधानमंत्री नरेन्द्र मोदी के संबोधन ल सुने बर छत्तीसगढ़ म घलो भाजपा डहार ले सीधा प्रसारण के व्यवस्था करे गे रिहीस।
केन्द्र-राज्य सहायता
केन्द्र ह ‘‘पूंजी निवेश के लिए विशेष सहायता योजना‘‘ के अंतर्गत मौजूदा वित्त बछर म छत्तीसगढ़ समेत सोलह राज्य मन बर छप्पन हजार चार सौ पन्द्रह करोड़ रूपिया के मंजूरी देहे। एमा स्वास्थ्य, शिक्षा, सिंचाई, जलापूर्ति, बिजली, सड़क, पुल अउ रेलवे समेत अलग-अलग क्षेत्र सामिल हे। ए योजना के उद्देश्य राज्य मन डहार ले पूंजीगत व्यय ल बढ़ावा देना आय। योजना म जल जीवन मिशन अउ प्रधानमंत्री ग्राम सड़क योजना के हिस्सा के रूप म राज्य मन ल धनराशि आवंटित करे गेहे।
विश्व बैंक-शिक्षा ऋण
छत्तीसगढ़ म स्कूल सिक्षा के गुणवत्ता ल बढ़ाय बर विश्व बैंक ह दू हजार चार सौ साठ करोड़ रूपिया मंजूर करे हे। ए रासि ले छह सौ मॉडल स्कूल मनके विकास अउ संचालन म मदद मिलही। संगेसंग गुणवत्ता पूर्ण बुनियादी सुविधा के संग सीनियर सेकेंडरी स्कूल म विज्ञान अउ वाणिज्य के सिक्षा ल बढ़ावा दे जाही। ए परियोजना ले गरीब अउ कमजोर वर्ग ले अवइया प्रदेस के करीब चालीस लाख लइका मन ल लाभ मिलही।
उपचुनाव
प्रदेस म नगर पालिका अउ त्रिस्तरीय पंचायत मन बर एक सौ अंठानवे रिक्त पद बर आज मतदान होइस। एमा नगर पालिका म पार्षद के आठ अउ त्रिस्तरीय पंचायत के एक सौ अंठानवे पद सामिल हे। ए उप चुनाव म पांच सौ पचपन प्रत्याशी मन चुनाव मैदान म रिहीन।
नगरीय निकाय म मतगणना अउ परिणाम के घोसना तीस जून के बिहनिया नौ बजे होही। उहें, पंचायम मन म मतदान खत्म होय के बाद काउंटिंग बूथ म मतगणना सुरू होइस। जरूरी होय म काली अट्ठाईस जून के तहसील अउ ब्लॉक मुख्यालय मन म मतगणना मंझनिया तीन बजे ले करे जाही। पंचायत मनके सारणीकरण अउ निर्वाचन के घोसना तीस जून के बिहनिया नौ बजे होही। विकासखंड मुख्यालय मन म पंच, सरपंच अउ जनपद सदस्य के परिणाम घोसित होही। उहें, जिला मुख्यालय मन म जिला पंचायत सदस्य के चुनाव परिणाम घोसित करे जाही।
हाईकोर्ट-शिक्षक भर्ती
छत्तीसगढ़ उच्च न्यायालय ह शिक्षक भर्ती प्रक्रिया ल अंतिम रूप दे बर अंतरिम रोक लगा देहे। सिक्षक भर्ती विज्ञापन म अतिथि शिक्षक मन ल बोनस अंक दे अउ बिसयवार विज्ञापन जारी नइ करे ल लेके हाईकोर्ट म एक याचिका दायर करे रिहीन, जेखर उपर सुनवाई करत हुए न्यायमूर्ति पी.पी. साहू के एकलपीठ ह सासन ल नोटिस जारी कर ए मामला म जवाब-तलब करे हे। याचिका म केहे गेहे कि स्कूल सिक्षा सेवा संवर्ग भर्ती नियम-दू हजार उन्नीस म अतिथि सिक्षक मन ल बोनस अंक देके कोई प्रावधान नइ हे। एखर अलावा सिक्षक भर्ती बर जेन विज्ञापन जारी करे गेहे ओमा कोनो प्रकार के बिसय के वर्गीकरण नइ करे गेहे।
गौरतलब हे कि प्रदेस म सिक्षक भर्ती बर पाछु दस जून के परीक्षा ले गे रिहीस, जेखर परिणाम आना बाकी हे।
कांग्रेस-नई दिल्ली बैठक
छत्तीसगढ़ कांग्रेस के नई दिल्ली म काली एक अहम बइठका होही। पार्टी के राष्ट्रीय अध्यक्ष मल्लिकार्जुन खड़गे ह ए बइठका लीही। बइठका म पार्टी के छत्तीसगढ़ प्रभारी कुमारी सैलजा, मुख्यमंत्री भूपेश बघेल, प्रदेस अध्यक्ष मोहन मरकाम, गृहमंत्री ताम्रध्वज साहू अउ स्वास्थ्य मंत्री टी.एस. सिंहदेव सामिल होही। मिले जानकारी के अनुसार बइठका म विधानसभा चुनाव के संगेसंग लोकसभा चुनाव के रणनीति उपर चर्चा करे जाही।
माओवादी समाचार
सुकमा जिला म आज माओवादी अउ सुरक्षा बल के बीच होय मुठभेड़ म एक झिन माओवादी मारे गीस। पुलिस अधीक्षक किरण चौहान ह बतईन कि आज बिहनिया डीआरजी अउ सीआरपीएफ के संयुक्त टीम गश्त बर निकले रिहीस। इही दउरान भेज्जी इलाका म माओवादी मन संग मुठभेड़ होगे। इलाका म सर्चिंग अभियान जारी हे।
मौसम
प्रदेस म मानसून के सक्रिय होवत ही राजधानी रायपुर समेत सबो जिला म पाछु तीन दिन ले अच्छा बरसा होवत हे। मौसम विभाग ह अवइया चौबीस घंटा के दउरान रायपुर, दुर्ग, बालोद, मुंगेली, बेमेतरा, बिलासपुर अउ कबीरधाम जिला म एक-दू ठन जघा म भारी बरसा अउ राजनांदगांव जिला म अति भारी बरसा होय के संभावना व्यक्त करे हे। एखर अलावा सरगुजा संभाग के सबो जिला के संगेसंग बीजापुर, दंतेवाड़ा, सुकमा अउ बस्तर जिला म एक-दू जघा म गरज-चमक के संग आकाशीय बिजली गिरे के चेतावनी दे गेहे।
प्रदेस म लगातार होवत बरसात के सेती कई ठिन जिला म जनजीवन अस्त-व्यस्त होगे हे अउ कई ठिन निचली बस्ती म पानी भर गेहे। उहें, सहरी क्षेत्र म अंडर ब्रिज म पानी भरे ले आवागमन बाधित होवत हे। बरसा के कारण खड़े फसल ल नुकसान पहुंचे हे। जेन गांव म धान के बोआई होगे हे। उहां खेत मन म पानी भरे ले किसान मन ल नुकसान उठाना पड़त हे। उहें, बुआई के काम घलो प्रभावित होय हे।
कोरिया जिला के बैकुंठपुर रेलवे स्टेसन करा राष्ट्रीय राजमार्ग क्रमांक-तैंतीस म भारी बरसा के कारण पानी भर गेहे, जेखर ले लोगन मन ल आय-जाय म परेसानी होवत हे।
राजनांदगांव जिला म अभी घलो रूक-रूक के बरसा होवत हे। बसंतपुर, लखौली के अलावा दूसर निचली बस्ती मन म पानी भर गेहे। अंबागढ़ चौकी ब्लॉक के चिल्हाटी क्षेत्र म घलो दू दिन ले लगातार तेज बरसा होवत हे।
मौसम विभाग के अनुसार प्रदेश म काली अलग-अलग स्थान मन म हल्का ले मध्यम बरसा हो सकत हे। हालांकि मौसम विभाग ह काली ले प्रदेस म वर्षा म कमी आय के संभावना व्यक्त करे हे। संगेसंग अधिकतम तापमान म वृद्धि संभावित हे।
अउ अब थोरकुन समाचार सार म-
– खनिज संसाधन विभाग के विशेष सचिव जयप्रकाश मौर्य ल उंखर वर्तमान कर्तव्य के संगेसंग चिकित्सा सिक्षा विभाग के आयुक्त पद के अतिरिक्त प्रभार सौंपे गेहे।
– नवा रायपुर म छत्तीसगढ़ संस्कृति परिषद के नवा कार्यालय भवन बन गे तैयार होगे हे। जल्दी ही एखर सुभारंभ करे जाही। संस्कृति मंत्री अमरजीत भगत ह आज भवन के निरीक्षण करीन अउ अधिकारी मन ल आवश्यक दिसा-निरदेस दीन।
– श्री अमरनाथ यात्रा बर दुर्ग रेलवे स्टेसन ले आज शिवभक्त मनके पहलइया जत्था जम्मू बर रवाना होइस। श्री अमरनाथ यात्रा एक जुलाई ले सुरू होके बारह अगस्त तक चलही।
अउ
– जांजगीर-चांपा जिला के हथनेवरा गांव म आज दू ठन मोटरसाइकिल के बीच होय टक्कर म चिकित्सक चंद्रेश श्रीवास के मउत होगे। उहें, तीन झन लोगन मन घायल होगे।