प्रधानमंत्री नरेन्द्र मोदी अवइया सत्ताइस जून के भोपाल दउरा म आहीं। श्री मोदी ह ‘‘मेरा बूथ, सबसे मजबूत‘‘ अभियान के तहत देसभर ले चुने गे तीन हजार कार्यकर्ता के संग संवाद करहीं। इही कड़ी म आज रइपुर स्थित भाजपा कार्यालय एकात्म परिसर ले प्रदेस अध्यक्ष अरूण साव, महामंत्री केदार कश्यप अउ प्रदेस मंत्री रामू रोहरा के अगुवई म सौ झन कार्यकर्ता मन ल भोपाल रवाना करे गिस।
भाजपा-महासंपर्क अभियान
केन्द्र सरकार के नौ बछर पूरे के मउका म भारतीय जनता पार्टी ह देसभर म महासंपर्क अभियान चलावत हे। इही कड़ी म भाजपा कार्यकर्ता मन राजिम के बारूला गांव म घर-घर महासंपर्क अभियान चलाइन। ए मउका म केन्द्र सरकार के जनहित म करे गे कारज मनके परचार करे गिस।
उहें, मंुगेली म काली ‘‘सेवा, शासन अउ गरीब कल्याण‘‘ बिषय उपर वार्तालाप के आयोजन करे जाही। कारीकरम म भाजपा के प्रदेस अध्यक्ष अरूण साव अउ विधायक पुन्नूलाल मोहले समेत बड़े संख्या म भाजपा पदाधिकारी मन जुरियाहीं।
ऐति रइपुर के सहीद स्मारक भवन म आज प्रबुध्दजन सम्मेलन अउ मीसाबंदी मन के सम्मान समारोह आयोजित करे गिस। कारीकरम म भाजपा के राष्ट्रीय सह-संगठन महामंत्री शिवप्रकाश अउ भाजपा प्रदेस अध्यक्ष अरूण साव सामिल होइन।
बूथ चलो अभियान
प्रदेस कांग्रेस के ‘‘बूथ चलो अभियान‘‘ काली छब्बीस जून ले सुरू होवत हे। बस्तर संभाग के सबो विधानसभा सीट म ए अभियान बर पार्टी के वरिष्ट नेता मन ल प्रभारी बनाय गेहे। एखर ले जुरे कारीकरम के रूपरेखा अउ प्रभारी मनके सूची घलो जारी कर दे गेहे। अभियान म मुख्यमंत्री भूपेश बघेल, पार्टी के प्रदेस अध्यक्ष मोहन मरकाम अउ विधानसभा अध्यक्ष डॉक्टर चरणदास महंत घलो सामिल होही।
मुख्यमंत्री-निर्देश
मुख्यमंत्री भूपेश बघेल ह किहीन हे कि बांकी मोगरा ह झटकुन नगर पालिका बनही। एखर बर नगरीय प्रसासन अउ विकास विभाग ल निरदेस दे गेहे। आज कटघोरा विधायक पुरूषोत्तम कंवर ले भेंट के बेरा ओमन किहीन कि नगर पालिका के गठन ले विकास कारज म तेजी आही। संगे नागरिक मन ल जल्दी सुविधा घलो मिलही।
अंतर्राष्ट्रीय नशा निवारण दिवस
काली अंतर्राष्ट्रीय नशा निवारण दिवस हे। ए मउका म प्रदेसभर म नशापान के खिलाफ जागरूकता बगराय बर सबो जिला म कतकोन विभाग के सहयोग ले परचार-परसार अभियान चलाय जाही। उहें, नशापान के रोकथाम बर स्थानीय संस्कृति अउ रिवाज ल चेत म राखत कारीकरम आयोजित होही। संगेसंग भारतमाता वाहिनी के माध्यम ले पंचायत मन म नशामुक्ति बर कारीकरम आयोजित कर लोगन ल नशापान के दुष्परिणाम के जानकारी दे जाही। एखर अलावा रेडियो अउ टेलीविजन के माध्यम ले घलो नशामुक्ति कारीकरम के प्रसारण करे जाही।
विहिप-बैठक
रइपुर म विश्व हिन्दू परिषद के अखिल भारतीय केन्द्रीय प्रबंध कार्य समिति के बइठका चलत हे। तीन दिन तक चलइया ए बइठका म मंदिर मन ल सरकारी अधिग्रहण ले मुक्ति देवाय के संगे धर्मांतरण अउ गौ हत्या जइसन बिषय उपर बिस्तार ले चर्चा करे जावथ हे। संगेसंग कार्ययोजना घलो बनाय गेहे। रइपुर के माहेश्वरी भवन म आयोजित ए बइठका म विश्व हिन्दू परिषद के देसभर ले करीबन दू सौ पदाधिकारी सामिल होवत हें।
रानी दुर्गावती बलिदान दिवस
दुरूग म रानी दुर्गावती बलिदान दिवस समारोह के आयोजन करे गिस। कारीकरम म मुख्यमंत्री भूपेश बघेल सामिल होइन। ए मउका म जनसभा ल संबोधित करत मुख्यमंत्री ह किहीन कि जउन समाज अपन अतीत के जानकारी नइ राखे ओहा विकास ले दुरिहा हो जाथे। फेर आज आदिवासी समाज ह अपन बीते बेरा ल सुरता करत वीरांगना रानी दुर्गावती के बलिदान दिवस के मउका म ओमन ल श्रध्दांजलि अर्पित करत हे। मुख्यमंत्री ह किहीन कि सरकार ह आदिवासी संस्कृति ल संजोय राखे के कारज करत हे। संगे समाज के रीति-रिवाज, देवी -देवता मनके मठ के संरक्षन घलो करत हे। ए मउका म ओमन गोंडवाना भवन म डोम बनाय बर पचास लाख रूपिया दे के घोषणा करीन।
ऐति भाजपा के प्रदेस महामंत्री केदार कश्यप अउ अनुसूचित जनजाति के सदस्य मन घलो रानी दुर्गावती के मूर्ति उपर फूल चढ़ाके नमन करीन। ए मउका म श्री कश्यप ह किहीन कि भारतीय इतिहास म नारी सक्ति, साहस अउ वीरता के पर्याय रेहे हे। उंहे, भाजपा के पूर्व प्रदेस अध्यक्ष विक्रम उसेंडी ह किहीन कि आदिवासी समाज बर रानी दुर्गावती सदा प्रेरणा बने रइहीं।
गृह मंत्रालय-फेक न्यूज
सोशल मीडिया के माध्यम ले बगराय गे छत्तीसगढ़ गृह मंत्रालय के पत्र ल स्टेट फेक न्यूज कंट्रोल अउ स्पेसल मॉनिटरिंग सेल ह झूठा खबर बताइस हे। एखर संबंध म एफआईआर घलो दर्ज कराय गेहे।
बतादन कि झूठा पत्र म कान्यकुब्ज, सरयूपारीण अउ आने पुजारी ब्राम्हण उपर देसद्रोह के मामला दर्ज करके कार्रवाई के उल्लेख करे गेहे, जउन असत्य अउ भ्रामक हे।
रोजगार-मेला
रइपुर के जोरा स्थित लाईवलीहुड कॉलेज परिसर म काली छब्बीस जून के रोजगार मेला के आयोजन करे जाही। ए मेला म उन्नीस नियोजक कंपनी डहार ले एक हजार ले जादा खाली पद म भरती करे जाही। रोजगार मेला बिहनिया ग्यारा बजे ले मंझनिया दू बजे तक चलही। मेला म आठवीं, दसवीं, बारहवीं पास अभ्यर्थी समेत आईटीआई, कम्प्यूटर डिप्लोमा, मैकेनिकल डिप्लोमा धारक अभ्यर्थी सामिल हो सकहीं। रोजगार मेला म राज्य सरकार डहार ले बेरोजगारी भत्ता पवइया हितग्राही मन ल प्राथमिकता दे जाही।
ओति, कोरिया जिला के रोजगार अउ स्वरोजगार मार्गदर्सन केन्द्र डहार ले घलो काली लाईवलीहुड कॉलेज सलका म प्लेसमेंट कैंप के आयोजन करे जाही।
मानसून
मानसून ह जम्मो प्रदेस म छा गेहे। एखरे संगे प्रदेस के कतकोन जिला म जोरदार बरसा सुरू होगे हे। मउसम विभाग ह जादातर इलाका म भारी बरसा के रेड अलर्ट जारी करे हे। राजधानी रइपुर म आज बिहनिया ले रूक-रूक के पानी गिरत हे। मउसम विभाग के मुताबिक अवइया हफ्ताभर के भीतर मानसून ह जम्मों राज्य म सक्रिय हो जाही।
उहें, अवइया चोबीस घंटा के दउरान रायगढ़ अउ बिलासपुर जिला के एक -दू जघा म गरज-चमक के संग भारी बरसा होय के संभावना हे। अइसने अवइया अड़तालीस घंटा के दउरान घलो कोरबा, जांजगीर-चांपा, रइपुर, बलौदाबाजार, महासमुंद, जशपुर, कबीरधाम, राजनांदगांव समेत भारी बरसा होय के संभावना जताय गेहे।
अब थोरकुन समाचार सार म-
– मुख्यमंत्री भूपेश बघेल ह विधायक स्वर्गीय विद्यारतन भसीन के भिलाई निवास पहुंचके ओमन ल श्रध्दांजलि दीन। ए बेरा श्री बघेल ह भसीन परिवार ले भेंट करके उंखर प्रति संवेदना प्रकट करिन।
– गरियाबंद जिला के मैनपुर वन परिक्षेत्र के सिहार गांव म जंगल गे महिला उपर हाथी ह हमला कर दिस। जेखर ले महिला के मउत होगे।
– कोरबा जिला के सेंद्रीपाली गांव म करंट लगे ले एक युवक के मउत होगिस।
– कोरबा जिला के ही बालको थाना इलाका के अजगरबहार गांव के तिर सड़क हादसा म एक मनखे के मउत होगिस। उहें, चार झन आने लोगन गंभीर रूप ले घायल होगें।
अउ
– बिलासपुर वनमंडल के टीम ह बेलगहना रेंज के भेलवाटिकरी के तिर दू झन लकड़ी तस्कर ल गिरफ्तार कर लेहे। उंखर तिर ले बीस लाख के लकड़ी समेत वाहन ल घलो जब्त करे गिस।