केन्द्र सरकार ह गेंहू अउ चावल के कीमत ल नियंत्रित राखे बर भारतीय खाद्य निगम ल ई-नीलामी के निरदेस दीन हे। एफ.सी.आई. के अध्यक्ष अउ प्रबंध निदेशक अशोक मीना ह किहीन कि उचित अउ औसत गुणवत्ता वाला गेंहू के आधार मूल्य 2150 रूपिया प्रति क्विंटल राखे गे हवय। वास्तविक प्रोसेसर अउ बेपारी मन के पहिचान खातिर वैद्य एफ.एस.एस.ए.आई. लाइसेंस घलो जरूरी कर दे हवय। ए ई-नीलामी म खरीददार मन जादा ले जादा 100 मीट्रिक टन तक बोली लगा सकत हे।
छात्रावास/आश्रम-निर्देश
प्रदेस म आदिम जाति कल्याण विभाग डहार ले चलाए जावत जम्मो छात्रावास-आश्रम मन के शैक्षणिक सत्र सुरू होय के पहिली दुरूस्त करे जाही। संगेसंग छात्रावास -आश्रम मनके साफ-सफाई, मरम्मत, पेयजल अउ रंग-रोगन बर जम्मो जरूरी इंतजाम करे जाही। ए संबंध म निगरानी समिति के बइठक अउ पालक-बालक सम्मेलन आयोजित करे बर दिसा-निरदेस जारी करे गे हवय। एखर तहत पढ़इय्या लइका मन ल विभागीय योजना मन के लाभ दिलाय के संगेसंग निसुल्क भोजन, सुध्द स्वच्छ पेयजल, विद्युत, भवन, स्वास्थ्य परीक्षण, योग अउ कोचिंग के बेवस्था करे जाही। एखर अलावा जम्मो विद्यार्थी मनके नास्ता म मिलेट ल सामिल करे बर घलो केहे गे हवय।
अंतर्राष्ट्रीय नशा निवारण दिवस
‘‘अंतर्राष्ट्रीय नसा निवारण दिवस‘‘ के मउका म 26 जून के प्रदेस म नसापान के खिलाफ व्यापक जनमत विकसित करे बर जम्मों जिला मन म आने-आने विभाग मनके सहयोग ले व्यापक प्रचार-प्रसार अउ जन-जागरूकता खातिर अभियान चलाए जाही। ए संबंध म समाज कल्याण विभाग ह जम्मो कलेक्टर मन ल निरदेस जारी करीन हवय। जेमा, नसा के रोकथाम खातिर स्थानीय संस्कृति अउ परंपरा ल ध्यान म राखत कारीकरम मन के आयोजन करे जाही। संगेसंग भारतमाता वाहिनी के माध्यम ले पंचायत मन म नसा मुक्ति खातिर कारीकरम घलो आयोजित कर नसा पान ले होवइया खतरा के जानकारी दे जाही। एखर अलावा रेडियो अउ टेलीविजन के जरिया नसामुक्ति कारीकरम मन के प्रसारण करे जाही।
रोजगार मेला
रईपुर के जोरा म लाईवलीहुड कॉलेज म 26 जून के रोजगार मेला के आयोजन करे जाही। ए मेला म 19 नियोजक कंपनी मन डहार ले 1000 ले जादा खाली पद मन म भरती करे जाही। ए मेला बिहनिया 11 बजे ले मंझनिया दू बजे तक चलही। ए मेला म आठवी, दसवी, बारहवीं कक्षा पास अभ्यर्थी मन समेत आई.टी.आई., कम्प्यूटरडिप्लोमा, मेकेनिकलडिप्लोमा धारक अभ्यर्थी मन घलो सामिल हो सकथ हे। रोजगार मेला म राज्य सासन डहार ले बेरोजगारी भत्ता पवईया हितग्राही मन ल प्राथमिकता दे जाही।
महादेव सट्टा ऐप-आरोपी गिरफ्तार
दुरूग पुलिस ह ऑनलाइन सट्टा- महादेव ऐप के खिलाफ कार्रवाही करत पांच झिन आरोपी मन ल गिरप्तार करे हवय। जिला के पुलिस अधीक्षक शलभ कुमार सिन्हा ह बताइन के औद्योगिक क्षेत्र ले लगे 32 एकड़ जघा म दबिस देकर पुलिस ह ऑनलाइन सट्टा ऐप के नाम ले चलत दू ठिन पैनल ल खतम कर दीन। छापा कार्रवाही म आने आने बैंक मन के अइसन खाता मनके रिकार्ड ह जब्ती होय हे। जेमा, दांव म लगे सट्टा के पैसा के ट्रांजेक्शन करे जावत रिहीस। पुलिस ह गिरप्तार आरोपी मनके तीर ले एक ठिन लेपटॉप, 13 ठिन मोबाइल, ए.टी.एम. कार्ड, चेकबुक अउ आने आने दस्तावेज बरामद करीन हवय।
उंहे, जिला रोजगार कार्यालय अउ जिला कौसल विकास प्राधिकरण डहार ले लाईवलीहुड कॉलेज जोरा म बिहनिया साढ़े दस बजे ले मंझनिया तीन बजे तक प्लेसमेंट कैम्प के आयोजन करे जाही। कैम्प म निजी क्षेत्र के 15 ले जादा नियोजक मन डहार ले तकरीबन 600 पद मन म भरती करे जाही।
जिले की चिट्ठी
प्रादेसिक समाचार एकांश, आकाशवाणी रइपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजकर पांच मिनट ले छै बजकर दस मिनट तक करे जाही। ए कारीकरम ल छत्तीसगढ़ के जम्मों आकाशवाणी केन्द्र एके संघरा रिले करही। ए दारी के अंक म ‘‘रइपुर‘‘ जिला के गतिविधि मन के बारे म जानकारी दे जाही।
हल्बी/गोण्डी-समाचार बुलेटिन
काली रविवार के ‘‘हल्बी‘‘ अउ ‘‘गोण्डी‘‘ बोली म समाचार बुलेटिन प्रसारित करे जाही। ए दूनो बुलेटिन आकाशवाणी केन्द्र जगदलपुर ले प्रसारित करे जाही। जेला जम्मों बस्तर संभाग म सुने जा सकही। ‘‘हल्बी‘‘ के समाचार बुलेटिन बिहनिया साढ़े सात बजे ले अउ ‘‘गोण्डी‘‘ के समाचार बुलेटिन संझा साढे़ छै बजे ले प्रसारित करे जाही।
मानसून
दक्षिण पश्चिम मानसून आज प्रदेस के जम्मों जिला म पहुंच गीस हवय। जेखर पुष्टि मउसम विभाग ह कर दे हवय।
मउसम विभाग के मुताबिक एक ठिन उपरी हवा के चक्रीय चक्रवाती घेरा बंगाल के खाड़ी अउ ओखर ले लगे तटीय ओड़िसा तक बने हुए हे। उंहे, एक ठिन द्रोणिका घलो उत्तरी पंजाब ले बंगाल के खाड़ी तक गुजरत हवय। जेखर असर छत्तीसगढ़ म घलो देखे जावत हे। एखर प्रभाव ले अवइया 24 घंटा के दउरान प्रदेस म जादातर स्थान मन म हल्का ले मध्यम बरसा होय के संभावना हवय। उंहे, एक-दू जघा मन म गरज-चमक के संग अंधड़ चलय, आकासीय बिजली गिरय अउ भारी ले अतिभारी बरसा होय के चेतावनी घलो दे गे हवय। एखर अलावा 26 अउ 27 जून के घलो अब्बड़ अकन जघा मन म भारी ले अतिभारी बरसा होय के अउ गरज-चमक के संग आकासीय बिजली गिरे के संभावना बताय गीस हवय।
इंही बीच कोरबा जिला के पाली विकासखंड के ग्राम माखनपुर म आकासीय बिजली के चपेट म आए ले एकेच परिवार के तीन झिन लोगन मन घायल होगिन। ओमन बारिस ले बाचे खातिर घर के आंगन म खड़े रिहीन तभे आकासीय बिजली के चपेट म आगे। जम्मों घायल होय मनखे ल उपचार खातिर पाली के सामुदायिक स्वास्थ्य केन्द्र म भरती कराय गे हवय।
अउ अब थोरकुन समाचार सार म-
– केन्द्र सरकार के निरदेसानुसार प्रदेस म ‘‘एक राष्ट्र-एक रासनकार्ड‘‘ योजना के तहत राष्ट्रीय खाद्य सुरक्षा अधिनियम के हितग्राही मन ल सत-प्रतिसत के.वाई.सी. अब 31 जुलाई तक करे जाही।
– राजनांदगांव जिला म अनुसूचित जाति अउ पिछड़ा वर्ग के नवीन प्रयास आवासीय विद्यालय मन म कक्षा नवमी म प्रवेस खातिर चयन परीक्षा काली 25 जून के बिहनिया 11 बजे ले मंझनिया डेढ़ बजे तक आयोजित करे जाही।
– कोण्डागांव जिला म दाहिकोंगा साप्ताहिक बाजार ले सुकूरपाल लहूटत एक ठिन चारपहिया वाहन के उलदे ले ओमा सवार 12 झिन मनखे मन घायल होगिन। ओमन ल ईलाज खातिर जिला अस्पताल म भरती कराय गे हवय।
– राजनांदगांव जिला म ए बेरा सघन कुष्ठ रोग खोज अभियान अउ नेत्र ज्योति अभियान चलाय जावत हे जउन ह 10 जुलाई तक चलही। ए दउरान ग्रामीण अउ सहरी क्षेत्र के मितानीन कार्यकर्ता मन डहार ले घर-घर सर्वे अउ परिवार के सदस्य मनके जांच करके मरीज के पहिचान करे जावत हे।
अउ
– हाईस्कूल पास होवइया नोनी अउ माईलोगिन मन ल सॉफ्टवेयर इंजीनियरिंग के प्रसिक्षण दे खातिर रइपुर जिला प्रसासन डहार ले तीन दिवसीय सेमीनार के आयोजन करे गीस, जेमा 300 ले जादा प्रतिभागी मन सामिल होइन।